ཨོ་རྒྱན་ཉི་མ།
སྤྱིར་བཏང་གཞིས་བྱེས་གཉིས་ཀྱི་བོད་མིའི་བསམ་བློ་ཁུར་སྟངས་ལ་ཁྱད་པར་ཆེན་པོ་རེད་ལ། དེ་བས་ཀྱང་ཀླད་རྙིང་དང་། ཀླད་གསར་གཉིས་ཀྱི་འཛིན་སྟངས་ཁ་ཁ་སོ་སོ་རེད། ཀླད་གསར་ཚོའི་བློ་ངོ་ན་ཀླད་རྙིང་ཚོ་ནི་སྲིན་པོ་འདྲ་བོ་ཤིན་ཏུ་གདུག་རྩུབ་ཅན་ཞིག་དང་། ཀླད་རྙིང་ཚོའི་བློ་ངོ་ན་ཀླད་གསར་རྣམས་ནི་ཝ་མོ་འདྲ་བའི་གཡོ་སྒྱུ་ཅན་ཞིག་ཏུ་སྣང་བ་ལས། ཕྱོགས་གཉིས་ཀར་མཐོང་སྣང་ཡང་དག་ཅིག་ཡོད་ཚོད་མ་རེད། དེ་ཕྱིར་ཀླད་གསར་ཞེས་པ་དེ་གཞིས་བྱེས་གཉིས་ལ་ཡོད་ན་ཡང་། མིང་འཇུག་ཡུལ་གཙོ་བོ་བྱེས་པའི་གཞོན་སྐྱེས་ཚོ་ལ་ཆགས་པ་རེད། དེང་སང་དོགས་པ་ཞིག་ཡོད་པ་ནི་ཀླད་གསར་ཚོས་གོ་ས་ཤོར་གྱིས་དོགས་པ་དང་། ཀླད་རྙིང་ཚོས་གོ་ས་ཞིག་འཐོབ་པའི་རེ་བ་སྟེ། ཀླད་པ་གསར་རྙིང་གཉིས་ཀ་རེ་དོགས་ཤིག་གིས་འཕྲང་ལ་ཐོགས་ཏེ། དོན་དངོས་ཀྱི་བསྒྲུབ་བྱ་ཆོས་པས་ཆོས་དང་། ཆབ་སྲིད་པས་ཆབ་སྲིད་དེ་སྟོར་ལ་ཉེ་བར་མཐོང་། དེ་ཕྱིར་ཕུང་གསུམ་པ་ཞེས་པ་ཀླད་པ་གསར་རྙིང་གཉིས་ཀའི་ཁྲོད་དུ་ཡོད་ན་ཡང་། ཕུང་གསུམ་པ་ཆེ་འབྲིང་གཉིས་ཀླད་གསར་ཚོའི་ནང་མང་བ་དང་། ཕུང་གསུང་པ་ཐ་མ་ནི་ཀླད་གསར་དང་། ཀླད་རྙིང་གཉིས་ཀའི་ཁྲོད་དུ་འདྲ་མཉམ་ཡིན་པར་འདོད། དེ་དག་ཕུང་གསུམ་པ་ཡིན་པ་གཅིག་མཚུངས་ཡིན་ན་ཡང་། ཀླད་རྙིང་གི་ཕུང་གསུམ་པ་ཚོ་ལས་དང་རྣམ་སྨིན་ལ་འཇིགས་ཤིང་། སེམས་ཁོང་ནས་བློ་མི་བདེ་བ་ཞིག་ཡོད་ཀྱང་། གནས་སྐབས་མི་ཁ་ལ་འཇིགས་ཏེ་ཕུང་གསུམ་པའི་སྤྱོད་པས་བྲེལ་བཞིན་པ་དང་། ཀླད་གསར་ཕུང་གསུམ་པ་དག་ནི་གང་ཐུབ་དང་། གང་ནུས་ཁེ་བཟང་དུ་བརྩིས་ཏེ་ལས་འབྲས་ཞེས་པ་དང་། ཆོས་གོས་རྣམ་གསུམ་ཟེར་བ་ཚང་མ་འགྲོ་སྟངས་ཤིག་ལས། དོན་ལ་མེད་པར་འདོད་མཁན་རྐྱང་རྐྱང་རེད། དེ་ཕྱིར་ཕུང་གསུམ་པ་གསར་རྙིང་གཉིས་ལས་གསར་པ་ཚོ་ཉེན་ཁ་ཆེ་བ་རེད་ཅེས་བཤད་པ་ཡིན། ནམ་རྒྱུན་ཀླད་པ་གསར་རྙིང་གཉིས་ལས་ཅིག་ཤོས་ཀྱིས་མ་སྨིན་པ་དང་། ཅིག་ཤོས་ཀྱིས་རུལ་བ་ཞེས་ནང་ཕན་ཚུན་དོན་དང་། ལྟར་སྣང་གཉིས་ཀའི་ཐད་ནས་འགལ་བ་ཆུང་རྩག་མང་པོ་རེད། དེ་ཕྱིར་དེ་གཉིས་ཀྱི་ཁེ་ཉེན་ལ་བསམ་བློ་བཏང་བ་ཡིན་ན། གཉིས་ཀ་ལ་ནག་ཉེས་ཡོད་པ་གཅིག་མཚུངས་རེད། ཀླད་རྙིང་གི་བློ་ཁོག་དང་། ཀླད་གསར་གྱི་མགོ་བདེ་གཉིས་ཟུང་དུ་ཚོགས་སོང་ན་ཀླད་གསར་བརྒྱ་ཡིས་དོ་ཟླ་མེད་པའི་ཚུལ་བཤད་མཁན་ཡང་ཡོད་པས། ནག་ཉེས་མེད་པར་བཟོ་རྒྱུ་ཡིན་ནམ། ནག་ཉེས་ཇེ་ཆེར་གཏོང་རྒྱུ་ཡིན། དེ་ནི་ཀླད་པ་གསར་རྙིང་གཉིས་ཀའི་ཕྱོགས་ནས་བསམ་བློ་ལེགས་པར་གཏོང་རན་པའི་དུས་ཚོད་རེད། ད་དུང་བསམ་བློ་མ་བཏང་བར་རྙིང་པ་ཚོས་གླེན་རྟགས་དང་། གསར་པ་ཚོས་མགོ་བདེ་བྱེད་བསྡད་ནས་གཞུག་ནས་གང་ལྟར་བྱ་རྒྱུ་ཡིན། ཡུལ་སྲོལ་གོམས་གཤིས་ཟེར་བ་དང་། ཡ་རབས་སྤྱོད་བཟང་ཟེར་བ། སྡོམ་དང་དམ་ཚིག་ཟེར་བ། རིག་གཞུང་ཟེར་བ་འདི་དག་ནི་ངེས་པར་དུ་ཁྲིམས་ཀྱི་ར་བ་ལས་མ་འདས་པའི་ཡང་དག་པའི་ངག་དང་། ཡང་དག་པའི་ལས། ཡང་དག་པའི་འཚོ་བ་ལ་བརྟེན་པ་ཤ་སྟག་ཡིན་པས། ཁྲིམས་མེད་ལུང་མེད་ཀྱི་ཕུང་གསུམ་པ་སྐྱ་སེར་ཚོས་འགྲོ་བ་མིའི་རིགས་གཙོར་བྱས་པའི་རང་ཉིད་གང་དུ་སྲིད་པ་བཟུང་བའི་མི་རིགས་དེ་རྩ་རྫོགས་བྱ་འདོད་དམ།