ལྷ་རྩེའི་ཁུ་བྱུག
ཁོ་བོའི་དངོས་མིང་ལ་བསོད་ནམས་ཆོས་དབྱིངས་དང་། སྨྱུག་མིང་ལ་ལྷ་རྩེའི་ཁུ་བྱུག་ཏུ་འབོད། ཁམས་རབ་ཤེས་སྒོག་སྟོད་དུ་སྐྱེས་འཚར་བྱུང་ཞིང་། ཆུང་དུས་ཕྱུགས་རྫིར་བསྐྱོད་པ་ལས་སློབ་གྲྭར་འགྲོ་བའི་གོ་སྐབས་མ་ཐོབ་ནའང་། ཕ་རྒན་དྲིན་པོ་ཆེས་བོད་ཡིག་བསླབས་ཏེ། ནང་ཆེན་སྐྱོ་བྲག་དགོན་པའི་ཚོགས་གྲལ་ཞུགས་པ་ན། དགའ་སྐྱོའི་རྨི་ལམ་ལྟ་བུ་བཟང་ངན་དུ་མའི་ཀློང་དུ་ཁ་ཡན་ཞིང་། བར་ཞིག་ཏུ་སྐྱོ་བྲག་གསལ་བྱེད་རིན་པོ་ཆེའི་བདག་རྐྱེན་ལ་བརྟེན་ནས་གྲོགས་དགའ་དབང་དང་གྲགས་བཟང་གི་ལྷན་མདོ་སྟོད་རྫོགས་ཆེན་ཤྲི་སེང་ཆོས་གྲྭ་དང་། ཨ་རིག་ཆོས་གྲྭ། བླ་རུང་ལྔ་རིག་ནང་བསྟན་སློབ་གླིང་སོགས་ནས་ཐོས་བསམ་ཅུང་ཟད་བགྱིས་པའི་སྐལ་བཟང་ཐོབ། ལྷག་པར་དཔལ་སྤུངས་མཁན་ཆེན་དིལ་ཆུང་བློ་ཆོས་སྐུ་མདུན་དུ་ལོ་གསུམ་ཙམ་གྱི་ཡུན་དུ་བྲིས་གཟུགས། སུམ་ཅུ་པ། དག་ཡིག ནག་རྩིས། སྙན་ངག་ལེའུ་བར་པ་སོགས་ལ་རང་བློས་གང་ལྕོག་སློབ་གཉེར་བྱས། སྙན་ངག་ལེའུ་ཐོག་མཐའ་གཉིས་རྟ་རྒྱུག་མཁན་པོ་ཐུབ་བསྟན་གྱི་མདུན་ནས་དགུན་གཅིག་ལ་ཞུས།
སློབ་དཔོན་ཁྲོ་རུ་ཚེ་རྣམ་མཆོག་གི་མདུན་ནས་སྒྲ་དང་། ལྷ་རྒན་ཀརྨ་ཐིག་མཆོག་གི་མདུན་ནས་གསོ་བ་རིག་པ། མཁན་ཆེན་བསྟན་པ་རབ་རྒྱས་སོགས་མཁས་དབང་འགའི་སྐུ་དྲུང་དུ་ཐུན་མོང་དང་ཐུན་མིན་གྱི་རིག་གནས་གང་འཚམས་རེ་ཞུས། བར་ཞིག་ཏུ་སྐྱོ་བྲག་བཤད་གྲྭ་ལེགས་བཤད་ཆོས་གླིང་དུ་བྲིས་སུམ་རྟགས། དག་ཡིག ས་དཔྱད། སྙན་ངག་སོགས་ལོ་མང་དུ་བཏོན། སྒེར་རྩོམ་མཐོ་སྒང་ཞོགས་རླུང་། སྙན་ངག་དཔེར་བརྗོད་དབྱངས་ཅན་འཛུམ་དཀར། ལྷོ་རྫ་ཆུ་སྔོན་མོའི་རླབས་སྒྲ། གསེར་མདོག་ལང་ཚོ། སྲིད་པའི་གཞི་མདོར་ཁུར་བའི་ལོ་མ་དམར་པོ། རྣམ་ཤེས་སྒུལ་བའི་དབྱངས་རྟ། སྙན་ངག་ལ་འཇུག་པའི་ལམ་དང་། ཆོས་རྗེ་སྒམ་པོ་པ་བསོད་ནམས་རིན་ཆེན་གྱི་རྗེས་དྲན་དེབ་ཀྱི་ཆ་ཤས་བླངས་ཤིང་། ད་ལྟ་བཅད་མ་ཕྱོགས་བསྒྲིགས་མི་འགྱང་བར་མི་ཡུལ་ལ་ཆས་པའི་སྟ་གོན་བྱ་བཞིན་ཡོད།
དུས་དེབ་སེང་གེ་གནམ་མཆོང་། ནང་ཆེན་དུས་དེབ་གཉེར་དང་གཉེར་བཞིན་ཡིན། བོད་ལྗོངས་རྩོམ་རིགས་སྒྱུ་རྩལ། ཁུལ་གཙང་གསུམ་དུས་དེབ་གཙོས་དུས་དེབ་དང་། གངས་རྒྱན་ན་ཆུང་ཚགས་པར་གཙོས་དེབ་ཚགས་བཞི་བཅུ་ལྷག་གི་ངོས་སུ་སྙན་ངག་མང་དུ་བྲིས་མྱོང་ལ། མདོ་དབུས་ཁམས་ཀྱི་གླུ་པ་ཤེར་བསྟན་དང་ཀུན་དགས་གཙོས་སྒེར་སྡེར་དང་ཆེད་གཉེར་སོགས་ཟེར་སྡེར་སུམ་ཅུ་ཙམ་ལ་གླུ་ཚིག་བྲིས། བར་སྐབས་དག་ཏུ་ཕར་ཕྱིན་བྱམས་པའི་དགོངས་རྒྱན་དང་། ཚད་མ་གནམ་ལྕགས་ཐོག་མདའ་སོགས་རིག་གཞུང་པར་སྐྲུན་གྱི་ལས་ཀ་ལ་ཞུགས། ཕྱིས་སུ་སྤྱི་འགྲོས་ལྟར། སེང་རྡོར་དྲ་བ། མཚོ་སྔོན་པོའི་ཟིན་བྲིས། ཉི་ཟེར་དྲ་བ། དགེ་ཆོས་དྲ་བ། འབའ་རོམ་དྲ་བ། ཕྱི་གཉེར་ཁ་བརྡའི་དྲ་བ། ཆང་ས་དྲ་བ་སོགས་སུ་སྙན་ངག་སྐོར་ཞིག་འབྲི་བཞིན་ཡོད་དོ། །
ངོ་སོ་བསྟོད། ཁ་བརྡ་དང་སེང་རྡོར་དྲ་རྒྱ་གཉིས་ནས་ཐེངས་ཁ་ཤས་ལ་མཐོང་སོང་། མུ་མཐུད་དུ་རང་རེའི་བོད་ཡིག་གི་ཚེ་སྲོག་སྲུང་སྐྱོབ་ཀྱི་ལས་བཟང་ལ་བརྩོན་རོགས།