དཔྱད་ཡིག་མཁོ་འདོན་པ་ཨ་མྱེས་བྱ་ཁྱུང༌།
བོད་རྒྱལ་ལོ།
རྡ་ས་རྩོམ་སྒྱུར་ལྷན་ཚོགས་ནས་གནང་བའི་འཆར་གཞི་ཕྱག་རྟགས་འབྱར་མའི་ཞལ་བཤུས།
སྤྱི་ལོ་ ༡༩༦༤ རང་གཞུང་སློབ་དེབ་ཁག་གིས་མཚོན་དེབ་གཞི་ཡིག་རིགས་ཁག་ལ་ཕྱི་སྲོལ་སྤྱི་ལོ་དང༌། རང་ལུགས་རབ་ལོ་བཅས་འགོད་གནང་མཛད་མུས་དེ་ལྟར་ཡང༌། ད་ལམ་ྋགོང་ས་སྐྱབས་མགོན་ཆེན་པོའི་བཀའ་སློབ་དགོངས་དོན་བཞིན་སླད་ཕྱིན་འབྲེལ་ཕྱོགས་སྐབས་ཀྱི་ལེའུ་ཐོ་སོགས་དམིགས་བསལ་སྐབས་ཐོབ་རབ་ལོ་འགོད་འོས་རིགས་ཟུར་དུ་ཕུད། དེ་བྱིངས་རྩོམ་སྒྱུར་ཚོགས་པས་མཚོན་ལས་ཁུངས་མ་ལག་ཁག་ནས་དེབ་གཞི་ཡིག་ཁག་ལ་སྤྱི་ལོ་དང༌། གངས་ལྗོངས་རྒྱལ་ཁབ་དབུ་བརྙེས་ཀྱི་ལོ་རྩིས་འགོད་རྒྱུ་དེ་ཡང་བོད་རྗེ་ཐོག་མ་གཉའ་ཁྲི་བཙན་པོ་ནས་བཟུང་འདི་ལོ་ཤིང་འབྲུག་བར་རྒྱལ་ལོ་ ༢༠༩༡ སོང་བ་གཞི་རྩར་བཞག་སྟེ་འགོད་འགྲེམས་མཛད་རྒྱུར་གཏན་འབེབས་ཀྱིས་རང་གཞུང་ལས་ཁུངས་ཁག་ལ་འཆར་གཞི་ཕྱག་རྟགས་འབྱར་མའི་ཞལ་བཤུས་རེ་སྩལ་རྒྱུ་ཞུས་ན་འཐུས་མིན་སྙན་ཞུ།། ཞེས་ ༦༤། ༦། ༤ ཉིན་ཕྱག་རྟགས་སྩལ་ཐོན་འཆར་གཞི་ངོ་མ་དང་ཞུས་དག་ཞུས། རྩོམ་སྒྱུར་ལྷན་ཚོགས་ནས། ཟླ་ཚེས་ལ་ཕུལ།
༼བོད་མིའི་རང་དབང་༽ ༡༩༦༤ ཟླ་ ༦ ཚེས་ ༢༦ ཉིན། ལོ་ ༥ ཨང་ ༡༢
ཕྱི་ལོ་དང་སྤྱི་ལོ།
བཀའ་དགོངས་ཆེད་བསྒྲགས།
རྡ་ས་རྩོམ་སྒྱུར་ལྷན་ཚོགས་ནས་ྋགོང་ས་སྐྱབས་མགོན་ཆེན་པོར་འཆར་ཕུལ་ཕྱག་རྟགས་རིན་པོ་ཆེའི་དགོངས་དོན། ཡུལ་དུས་བབས་བསྟུན་རྩ་འཛིན་འཆར་སྙན་དང༌། དེབ་གཞི་ཡིག་ཁག་ཆེ་ཕྲར་རང་ལུགས་ལོ་ཁམས་ཟླ་ཚེས་རྐྱང་པས་རྒྱས་ཕེབས་ཐུབ་མིན་གྱིས་སྤྱི་ལོ་འགོད་གནང་མཛད་མུས་འདི་དག་རྒྱལ་ས་ལྷ་ལྡན་དུ་བསྟན་གཤེད་རྒྱ་དམར་དཔོན་དམག་འབྱོར་ཚུན་རྒྱ་སྐད་ཐད་བསྒྱུར་གྱིས་བརྗོད་ཚུལ་སྲོལ་འཇགས་ཤིག་ལས། དེའི་སྔོན་ྋགོང་ས་བཀྲིན་ཟླ་མེད་སྐུ་འཕྲེང་བཅུ་གསུམ་པ་ཆེན་པོའི་སྐུ་དུས་སུ་ཕྱི་ལོ་ཞེས་བཀོད་གནང་མཛད་མུས་བཞིན་ད་ཕྱིན་དེབ་གཞི་སོགས་ཡིག་ཁག་ཆེ་ཕྲ་ཚང་མར་སྤྱི་ལོའི་ཚབ་ཏུ་ཕྱི་ལོ་ཞེས་འགོད་དགོས་རྒྱས་དཔྱད་གཏན་འབེབས་གྲུབ་པའི་སྩལ་རྒྱ་ཕེབས་པ་བཞིན་ལས་ཁུངས་ཁག་སོགས་ཚང་མས་བཀའ་དགོངས་ལྟར་བསྒྱུར་འགོད་ཡོད་པ་ཞུ། ༼བོད་མིའི་རང་དབང་༽ ༡༩༦༤ ཟླ་ ༡༠ ཚེས་ ༣༠ ཉིན།