______ལོ་མ་རྒྱལ།
༡
ཁྱོད་ནི་འོད་དུ་འཚེར་བའི་ཆུ་ཐིགས་ཤིག །
ང་ཡི་རྒྱ་མཚོ་ནང་དུ་ཟགས་ནས་བྱུང་།།
ཁྱོད་ནི་འཇམ་མཉེན་ལྡན་པའི་མཚོ་རླབས་ཤིག །
ང་ཡི་མཚོ་མོའི་ངོགས་སུ་བྱིལ་བྱིལ་བྱེད།།
༢
དུས་ནི་ཁུ་སིམ་འཆར་ཀའི་ཕང་བ་ལ།།
རླུང་གི་རལ་གྲི་རྩྭ་ལོའི་གསེབ་ལ་གཡུགས།།
ཟིལ་ཆར་མིག་ཆུ་བཞིན་དུ་གཏོར་བ་ན།།
ཁྱོད་ཀྱིས་གཏམས་པའི་སེམས་འདི་ལྗིད་ཏིག་ཏིག །
༣
མུ་ཏིག་འདྲ་བའི་ཁྱོད་ཀྱི་མིག་གི་ཆུས།།
བལ་དཀར་ལྟ་བུའི་སེམས་འདི་རྨང་ནས་བངས།།
དེ་བཞིན་ཁྱོད་ཀྱི་གདོང་གི་འཛུམ་པའི་མདངས།།
ནམ་དུ་ང་ཡི་བཞིན་ན་ལྷམ་མེར་བཞད།།
༤
ཚེ་འདིར་ཁྱོད་ཀྱི་ར་ལས་བརྒལ་བར་དཀའ།།
ང་ནི་རྡོ་ལྟར་ཁྱོད་ཀྱི་འོབས་སུ་ལྷུང་།།
མུན་པ་གྲང་ངར་ཇི་ལྟར་རྒོལ་ན་ཡང་།།
སྒྲོན་མེ་སྦར་ཏེ་ཁྱོད་ཀྱི་གམ་ནས་འཚོ།།
༥
ཕྱེ་མ་ལེབ་ཀྱི་གཤོག་ཟུང་གཉོན་དུང་དུང་།།
ཁྲ་ཁྲ་འདབ་མའི་ཚོགས་ཀྱི་གསེབ་ན་གཡོ།།
ཀེམ་ཀེམ་གཡོ་བའི་ཁྱོད་ཀྱི་མིག་ཟུང་དེ།།
སེམས་ཀྱི་མེ་ཏོག་སྟེང་ན་ཡང་ཡང་འགུལ།།
༦
རླུང་བུ་ཤུག་ཤུག་རྣ་བའི་ཁ་ནས་གཡུགས།།
རྩྭ་དང་ལོ་མ་ཁུར་ནས་རྒྱང་ལ་བཞུད།།
མཛའ་བརྩེ་ལྕང་སྡོང་འོག་ནས་སྙན་ངག་བྲིས།།
མྱུར་དུ་མཇལ་བའི་སྨོན་ལམ་བརྗོད་བྱ་ཡིན།།
༧
ནམ་ཡང་སྒེའུ་ཁུང་ནང་ནས་ལྟ་བའི་དུས།།
ཁྱོད་ཀྱི་ངོ་གདོང་སེམས་ཀྱི་གཏིང་ལ་འཆར།།
མེ་ལོང་ལྟ་བུའི་སྒེའུ་ཁུང་གྲུ་བཞི་འདི།།
ཁྱོད་ལ་མཇལ་སའི་ལྡུམ་ར་གཞན་ཞིག་གོ
༨
གཙང་བོ་དལ་གྱིས་འབབ་པའི་གཞས་དབྱངས་ཁྲོད།།
ཁྲ་ཆིལ་མེ་ཏོག་གཡོ་བའི་གར་ངོགས་ནས།།
མེ་ཏོག་རྐང་གསུམ་བརྩེ་བས་ལག་ཏུ་བཏོགས།།
ཁྱོད་ཀྱི་ལན་བུར་སྙིང་ནས་གསེབ་ན་འདོད།།
༩
ཉ་གང་ཟླ་བ་དགུང་ན་རབ་ཏུ་མཛེས།།
ཁྱོད་ལ་འཁོར་བའི་སེམས་ཀྱི་དམ་རྟགས་ཡིན།།
མཚན་མོའི་ལུས་ལ་དངུལ་གྱིས་བརྒྱན་པ་འདི།།
སྙིང་ཁམས་ཁྱོད་ཀྱིས་གཡོགས་པའི་མཚོན་རྟགས་ཡིན།།
༡༠
ཉི་མ་རི་ལ་ནུབ་དུས་ཉིན་ཐོ་བྲིས།།
ཉི་མ་རི་ནས་ཤར་དུས་སྨོན་ལམ་བཏབས།།
རི་དང་གཙང་བོས་བཅད་པའི་བར་ཐག་གིས།།
སེམས་ཀྱི་སྦྲེལ་ཐག་དམ་པོ་གཅོད་མི་ཐུབ།།
༡༡
ཁེར་སྡོད་བྱས་ཏེ་དཔེ་ཆ་ཀློག་པའི་དུས།།
ཡི་གེའི་གསེང་ནས་ཁྱོད་ཉིད་ཟླ་ལྟར་མངོན།།
ཤོག་གུའི་ཐང་ནས་སྨྱུག་བུ་བགྲོད་པའི་དུས།།
སྨྱུག་བུའི་རྩེ་ནས་ཁྱོད་ཉིད་ཤུར་ཤུར་སླེབས།
༡༢
ཆར་བ་ཤག་ཤག་འབབ་པའི་ནམ་ཚོད་འདིར།།
མེ་ཏོག་ལོ་མ་ཆར་གྱིས་བངས་དང་ཐལ།།
རྣ་བས་ཆར་སྒྲར་གཏད་ནས་བསྡད་པ་ན།།
ཁྱོད་ཀྱིས་བཞག་པའི་ཁ་སང་ད་ལྟ་དྲན།།
༡༣
མཆོད་རྟེན་ཆེན་མོར་སྐོར་ར་ལན་གསུམ་བྱས།།
སྟོན་པའི་སྐུ་ལ་ཕྱག་ནི་ལན་གསུམ་འཚལ།།
བརྩེ་བའི་སླད་དུ་སྨོན་ལམ་ལན་གསུམ་བཏབས།།
མྱུར་དུ་ལྷན་འཛོམས་བྱུང་ན་དགའ་བ་ལ།།
༡༤
རྫ་ཆུ་ལྷུང་ལྷུང་དལ་གྱིས་འབབ་པ་དེ།།
ཁ་དོག་དམར་བའི་བརྩེ་བ་འདི་ཡི་དོད།།
ནམ་ཡང་མཚམས་ཚུགས་ཡ་ཡོར་མེད་པ་ཡིས།།
ཁྱོད་ཀྱི་རྒྱ་མཚོར་ལྷང་ལྷང་འབབ་དང་འབབ།།
༡༥
གལ་ཏེ་ང་རང་ནམ་མཁའ་ཡིན་པ་ན།།
ཁྱོད་ནི་དེ་ན་འཚེར་བའི་ཉི་ཟླ་ལགས།།
གལ་ཏེ་ང་རང་ལྡུམ་ར་ཡིན་དང་ན།།
དེ་ན་ཁྱོད་ལས་མེ་ཏོག་གཞན་ནི་མེད།།
༡༦
ཁྱོད་ཀྱིས་བཤད་པ་རྣ་ཡི་གཏིང་ལ་ཟུགས།།
ཁྱོད་ཀྱི་འཇམ་ཤ་ང་ཡི་ཁྲག་ལ་བབས།།
མདོར་ན་ང་ནི་ཁྱོད་དང་ཁྱོད་ནི་ང་།།
ཁྱོད་དང་ང་གཉིས་རྣམ་ཤེས་གཅིག་ལ་འཐིམས།།
༡༧
ལོ་མའི་མདུན་ལ་ཁྱོད་ཀྱི་མིང་ཡིག་བྲིས།།
དེ་ཡི་རྒྱབ་ལ་སྙིང་གི་ཚིག་གསུམ་བྲིས།།
དེ་ནི་ཉིན་ཐོའི་བར་ལ་དམ་པོར་སྦྱར།།
དྲན་དུས་དྲན་དུས་ཡང་ནས་ཡང་དུ་ལྟོས།།
༡༨
བྱ་གཉིས་ཨ་སྔོན་དབྱིངས་ནས་རྒྱང་ལ་འཕུར།།
སྤྲིན་པ་དཀར་རོ་སུ་ཡི་ཕོ་ཉ་ཡིན།།
གལ་ཏེ་ཁྱོད་རང་བྱང་དུ་བགྲོད་པ་ན།།
སྙིང་གི་ཚིག་འདི་ཁྱེར་ན་དགའ་བ་ལ།།
༡༩
མི་ཚོགས་ཁྲོད་ལ་འདུ་འཛི་ཆེ་ན་ཡང་།།
ཁྱོད་རང་མེད་པས་ང་ནི་ཁུ་སིམ་ཡིན།།
ང་ཡི་ཁུ་སིམ་ཁྱོད་ཀྱིས་མི་མཐོང་ཕྱིར།།
ཁྱོད་ཉིད་མེད་དུས་ང་ནི་ཁུ་སིམ་མོ།།
༢༠
མགོ་བོ་སྔས་སུ་འཇོག་དུས་ཁྱོད་ཉིད་དྲན།།
ནང་མོ་མིག་ནི་ཕྱེ་དུས་ཁྱོད་ཉིད་དྲན།།
ཁྱོད་ནི་ནམ་ཡང་ང་ཡི་སྙིང་ཁ་ན།།
མཚམས་ཚུགས་མེད་པར་དྲག་ནས་དྲག་ཏུ་ལྡིང་།།
༢༡
དོན་གྱི་ཁྱོད་ནི་ང་ཡི་སུ་ཞིག་ཡིན།།
ང་ནི་ཅི་ཕྱིར་ཁྱོད་ལ་བརྩེ་ཞིང་དུང་།།
འདི་ནི་སུ་ཡིས་བཀོད་སྒྲིག་ཡིན་ནམ་ཞེས།།
སུ་ལ་དྲིས་ན་སུ་ཡིས་ང་ལ་བཤད།།
༢༢
གདུང་བ་སེལ་ཕྱིར་ཐོག་སོ་སྟེང་ལ་བུད།།
དགོང་ཁའི་མཚམས་སྤྲིན་དམར་པོ་སྙིང་ལྟར་དམར།།
མིག་ཟུང་རྒྱང་ན་ཡོད་པའི་རྒྱང་ལ་ཤོར།།
སེམས་འདིས་ཁྱོད་དང་ང་ཡི་སང་ཉིན་དྲན།།
༢༣
མཛེས་མའི་སྐེད་ཀྱི་ལན་བུ་ལྷབ་ལྷུབ་ངང་།།
མིག་གི་མདུན་ནས་ཀྱག་ཀྱོག་འགྲོ་བ་མང་།།
ཁྱོད་ལ་གོམས་པའི་མིག་གི་རྒྱ་མོ་ལ།།
ཁྱོད་ལས་གཞན་པའི་གཟུགས་ཤིག་བདེ་མ་ཡིན།།
༢༤
གངས་དང་རི་བོ་མེད་པའི་ས་ཆ་ན།།
གངས་དང་ཁ་བ་ལྟ་བུ་ཁྱོད་ཉིད་ཡིན།།
རྡོ་དང་བྱེ་མས་བྲང་ཁོག་སྲེག་པའི་དུས།།
ཁྱོད་ནི་ལྗང་གུ་སྟོབ་པའི་སེམས་ཀྱི་ཆར།།
༢༥
ཁྱོད་ཀྱིས་མིག་གི་བཀྲག་མདངས་ང་ལ་གཏད།།
ང་ཡི་གདོང་གི་ནག་ཐིག་ཐོལ་གྱིས་གསལ།།
འོད་དང་ཆ་རིག་བཀྲ་བའི་མིག་དེ་གཅེས།།
ང་ནི་ཁྱོད་ཀྱི་རྫི་མ་ཡིན་ན་བསམ།།
༢༦
ཁྱོད་ནི་ལག་པའི་མཐིལ་གྱི་རི་མོ་ཡིན།།
ནམ་ཡང་ང་ཡི་སེམས་ན་ནམ་ཡང་གནས།།
དུས་ཀྱི་སྐད་ཅིག་ཆ་ཤས་རེ་རེ་ལ།།
ཁྱོད་རང་སྟོང་བའི་སེམས་ཤིག་ཡོད་མ་ཡིན།།
༢༧
གོམ་པ་རེ་རེ་སྤོས་ནས་འགྲོ་བའི་དུས།།
ང་ཡི་རྐང་རྗེས་ཀུན་ན་ཁྱོད་རང་གསལ།།
ལོ་མ་རེ་རེ་མིག་གིས་མཐོང་དུས་སུ།།
ཁྱོད་ཉིད་ལོ་མའི་གདོང་ནས་ཝ་ལེར་མངོན།།
༢༨
དགའ་བའི་སེམས་འདི་རྡོ་ལྟར་རྡོག་རྡོག་ཅིག །
ཉིན་མཚན་མེད་པར་བྲང་ལ་ཡང་ཡང་རྡེག །
ཡིན་ཡང་ཁྱོད་ལ་གཏད་པའི་སྒོ་ཆེན་དེ།།
ནམ་ཡང་སྲ་མོར་མཁྲེགས་པོར་གཏན་མི་སྲིད།།
༢༩
ང་ནི་ཁྱོད་ཀྱི་ཁང་པའི་སྒེའུ་ཁུང་ཡིན།།
ཁྱོད་ཀྱི་གྲང་ངར་མུན་པ་ང་ཡིས་སེལ།།
ང་ནི་སྒེའུ་ཁུང་དེ་ཡི་ཤེལ་སྒོ་ཡིན།།
ཕྱི་ཡི་རླུང་དང་ཁ་བ་ང་ཡིས་འགོག །
༣༠
ཞོགས་པའི་ཉི་ཟེར་དལ་གྱིས་དལ་གྱིས་ཤར།།
ཟིལ་བའི་འོད་ཐིག་འཚེར་ནས་འཚེར་དུ་ཕྱིན།།
འོད་དུ་འཚེར་བའི་སེམས་ཀྱི་སྐད་ཆ་དེ།།
ནམ་དུ་ཁྱོད་ལ་བརྗོད་པའི་སྐལ་བཟང་ཞིག །
༣༡
རྨི་ལམ་ཁྲོད་ནས་རྟག་པར་ཁྱོད་དང་མཇལ།།
མེ་ཏོག་གསེབ་ན་ངེད་གཉིས་དགོད་པ་རྨིས།།
གླུ་དབྱངས་ཁྲོད་ན་ངེད་གཉིས་གཤིབ་པ་རྨིས།།
རྨི་བའི་རྨི་ལམ་མཚན་ཐག་རིང་ན་བསམ།།
༣༢
ཁྱོད་ཀྱི་སྐེད་པའི་གཡས་ན་སྨེ་ཞིག་ཡོད།།
ཁྱོད་ཀྱིས་ཡོད་མེད་ཤེས་ཡོད་ཆ་མ་འཚལ།།
དེ་ནི་ང་ཡི་བྲང་གི་སྨེ་བ་དང་།།
ཁ་དོག་ཆེ་ཆུང་འདྲ་བས་ངོ་མཚར་ཆེ།།
༣༣
སྟོན་གྱི་ཟླ་གང་དགུང་ནས་ཤར་ལ་ཉེ།།
གལ་ཏེ་དེ་རིང་ཡུལ་ན་ཡོད་རྒྱུ་ན།།
སྤང་གི་རི་ཅོག་སེམས་ཀྱིས་བཏོགས་པ་དང་།།
ཁྱོད་ལ་ཞྭ་བཟོ་དེ་ནི་ང་ཡི་སེམས།།
༣༤
མགོ་བོ་དགྱེས་ནས་གནམ་ལ་ལྟ་བའི་དུས།།
ཡལ་གའི་སྟེང་ན་བྱེ་འུ་ཀྱི་ཀྱི་གྲགས།།
དགོད་ཀྱིན་དགོད་ཀྱིན་ཁྱོད་ཀྱིས་བཤད་པ་དེ།།
བྲག་ཅ་བཞིན་དུ་སེམས་ན་ཡང་ཡང་འཁོར།།
༣༥
ཁྱོད་ནི་མེད་ན་ང་ནི་ཕྱེད་ཀ་དང་།།
ཁྱོད་རང་ཡོད་པས་ང་རང་རྫོགས་པ་འོ།།
རྫོགས་པའི་མི་ཚེ་ཚེ་ཡི་དམིགས་པ་དེ།།
ཁྱིམ་པ་ང་ཡི་གཏན་ཚིགས་སྲ་མོ་འོ།།
༣༦
བརྩེ་དུང་གསེར་གྱི་མེ་ཏོག་དམར་བོ་འདི།།
གཟུགས་པོ་ལུས་ལ་འདོགས་པའི་རྒྱན་ཆ་མིན།།
སེམས་ཀྱི་བཀྲོས་སྐོམ་སེལ་བའི་བདུད་རྩེ་དེ།།
བརྩེ་དུང་བཞིན་གྱི་རང་མདངས་རྗེན་པ་ལགས།།
༣༧
ཁྱོད་ལ་དགའ་བའི་རྒྱུ་མཚན་ཅི་དང་ཅི།།
ང་ཡི་ཁ་ནས་བཤད་རྒྱུ་ཅི་ཡང་མེད།།
ནམ་ཞིག་ཁྱོད་ལ་དགའ་བའི་དུས་ནི་ནམ།།
མི་ཤེས་གང་ལྟར་ཁྱོད་ལ་དགའ་བ་ཤེས།།
༣༨
ཉ་གང་ཟླ་བ་སྤྲིན་གྱི་སྟེང་ན་མེད།།
ཟིལ་བ་འཚེར་པོ་རྡོ་ཡི་ངོས་ན་མེད།།
སྙིང་དམར་གསོན་པོ་བམ་པོའི་ཁོག་ན་མེད།།
ང་ཡི་སེམས་པ་གཞན་གྱི་ཕྱོགས་ན་མེད།།
༣༩
ཁྱོད་ཀྱི་པར་ཅིག་ང་ཡི་མདུན་ལ་སྦྱར།།
དེ་ལ་ལྟོས་ཏེ་སྙན་ངག་ཡང་ཡང་བྲིས།།
མིག་ཟུང་བཙུམ་ནས་བསམ་བློ་བཏང་བ་ན།།
ཁྱོད་ནི་ང་ཡི་མཁའ་ན་ལྡིང་སྐོར་བྱེད།།
༤༠
མཚོ་མོའི་ནང་ལ་རྡོ་ཞིག་ལྷོད་ཀྱིས་འཕངས།།
དེ་ཡི་རླབས་རིས་ཆེ་ནས་ཆེ་རུ་ཕྱིན།།
མཚོའི་ཁའི་ངང་མོའི་གཤོག་སྒྲོ་མཐོང་བ་ན།།
ཁྱོད་ཀྱི་རུམ་ལ་འཕུར་ནས་ཡོང་ན་བསམ།།
༤༡
མཚན་མོ་གནམ་གྱི་སྐར་ཚོགས་ལམ་ལེམ་འཚེར།།
མུན་པ་ཁུ་སིམ་ང་ཡི་མཐའ་ནས་བསྐོར།།
བྱང་ལ་ཕྱོགས་པའི་སྐར་མདའ་ཕྲ་མོ་དེ།།
ཁྱོད་ལ་འཁྲེང་བའི་སེམས་པ་གཉོམ་པོ་དེ།།
༤༢
མཚམས་རེར་ཐག་ཉེ་གྲོང་ནས་ཁྱི་སྐད་གོ །
མཚམས་རེར་རླུང་བུ་ལྡིང་ཏེ་སྐྲ་ལོ་སྤུར།།
བྲང་ན་གནས་པའི་སྙིང་གི་འཕར་སྒྲ་ཡིས།།
ཁྱོད་རང་དྲན་པའི་སྨྲེ་ངག་ཁ་རུ་བསྐྱུགས།།
༤༣
ཐ་མག་སྦར་ཏེ་སེམས་ཀྱི་ལམ་ཁ་གསལ།།
གདུང་བ་ཁུར་ནས་ལམ་ལ་འཁྱམས་སུ་སོང་།།
ལོ་མ་ལམ་ལ་ཟགས་པ་མང་དྲག་སྟབས།།
ཤག་ཤག་གོམ་སྒྲས་མཚན་མོའི་ལྷིང་འཇགས་དཀྲོགས།།
༤༤
གློག་གཞུ་འོག་ནས་ངལ་གསོ་བྱེད་པའི་དུས།།
ཕྱེ་ལེབ་འབུ་སྲིན་དེ་ཡི་མཐའ་ལ་འཚང་།།
དེ་ནི་ལོ་མ་ལྟ་བུའི་སེམས་པ་འདི།།
ཁྱོད་ཀྱི་ཕྱོགས་ལ་འཚང་དང་འཕྱང་མོ་ཉུག །
༤༥
དོ་ནུབ་སྨག་གི་རྔམ་ཁ་རབ་ཏུ་མཐུག །
དེ་ནི་ཁྱོད་ལ་དགའ་བའི་དགའ་ཚད་ཡིན།།
དོ་ནུབ་ཁ་ཁུ་སིམ་པོ་ཧ་ཅང་ཆེ།།
དེ་ནི་ཁྱོད་རང་མེད་པའི་གདུང་ཚད་ཡིན།
༤༦
མུན་པའི་ཁྲོད་ནས་སྨག་ལས་མི་མཐོང་ཡང་།།
ཁྱོད་ཀྱི་ཡོད་ཚད་ང་ཡི་མིག་ལ་ཤར།།
མཚན་མོ་འདི་ནི་སྨག་གི་མེ་ལོང་ཞིག །
དེ་ལས་མཐོང་བ་ཁྱོད་ཉིད་ཁོ་ན་འོ།།
༤༧
མུན་པ་སྟུག་པོ་ང་ཡི་ནང་ལ་ཟུག །
ཕྱི་ཡི་འཇགས་པས་ནང་ལ་འདུ་འཛི་བྱིན།།
ཁྱོད་ལ་མ་ཐུགས་སེམས་ལ་ཁ་བ་བབས།།
དོ་ནུབ་མཚན་སྨག་གྱོན་ནས་ཁེར་སྡོད་བྱས།།
༤༨
མཚན་མོའི་གྲོང་གི་གློག་འོད་རྣམ་པར་བཀྲ །།
གྲོང་གི་མི་ཡི་སེམས་ལ་མུན་པ་འཐིབས།།
བརྩེ་དུང་ཕྱི་ཡི་གོས་ལ་འཇམ་ཤ་ཆེ།།
གདུང་བའི་དྲན་པའི་ཡིད་ནི་ཇི་འདྲའི་རྩུབ།།
༤༩
མཚན་གྱི་སྨག་གིས་ཁྱོད་རང་གཡོགས་པ་ན།།
ང་ནི་དགུང་གི་ཟླ་བ་ཁོ་ཐག་ཡིན།།
སྐྱོ་བའི་ཁུ་སིམ་ཁྱོད་ལ་མི་སྟེར་ཏེ།།
ང་ནི་ཁྱོད་ཀྱི་གླུ་དབྱངས་ཁོ་ན་འོ།།
༥༠
འཇགས་པའི་མཚན་མོས་མུན་པ་གོས་སུ་བཀླུབས།།
སྐྱོ་བའི་བྲང་ལ་རླུང་གིས་བྱིལ་བྱིལ་བྱེད།།
ཁྱོད་ཀྱིས་ཁེངས་པའི་མཚན་མོ་འདི་ཡི་མཁའ།།
ཁྱོད་ཀྱི་སྐར་འོད་མེད་པའི་ཡིད་སེམས་སྐྱོ།།
༥༡
ལོ་མའི་སྟེང་ནས་ཆར་ཟིན་ཐིགས་པ་འདི།།
ཁྱོད་རང་དྲན་པའི་གདུང་བའི་མཆི་མ་ཡིན།།
ལྷན་འཛོམས་ཤར་གྱི་ཉི་མ་མ་ཤར་ན།།
ལོ་མའི་གདོང་གི་བརླན་ཤ་སྐམ་པ་མེད།།
༥༢
ལོ་མ་རླུང་བའི་ཁྲོད་ཀྱི་གར་མཁན་ཡིན།།
ཤག་ཤག་གཡོ་བའི་ལོ་མའི་སྒྲ་དབྱངས་ཀྱང་།།
རླུང་བུ་ཁྱོད་ཀྱིས་བྱིན་པའི་སྐད་ངག་ཡིན།།
ལོ་མ་རླུང་བུ་འཛོམས་ན་མཛེས་སྡུག་གོ །
༥༣
ཁྱོད་ཀྱི་སྟོན་ཁ་རྒས་ནས་འགྲོ་དུས་སུ།།
ལོ་མ་སེར་པོ་སེམས་ལ་ཤག་ཤག་བབས།།
ཡིན་ཡང་སེམས་འདི་སྐྱོ་བས་མི་མནར་ཏེ།།
དཔྱིད་རླུང་ལྡིང་དུས་ལོ་མ་ལྗང་གུ་ཡོད།།
༥༤
ལྗོན་པའི་སྟེང་ན་ལོ་མ་མང་ན་ཡང་།།
ཁྱོད་ནི་ང་ཡི་ལོ་མ་ཁོ་ན་ཡིན།།
ནམ་ཞིག་མཚོན་གྱིས་ལྗོན་པ་མ་བཅད་ན།།
ང་ཡི་ལོ་མ་ནམ་ཡང་སྐམ་མི་འགྱུར།།
༥༥
ལོ་མའི་གསེང་ནས་གནམ་ལ་འཁོར་བ་ན།།
འཁོར་བའི་ཚད་མ་གཞན་ཞིག་དེ་ནས་རྟོགས།།
ཁྱོད་ནི་ང་ཡི་སེམས་སུ་འཛུལ་པ་ནས།།
སེམས་ཀྱི་སྒོ་གླེགས་གཞན་ཞིག་ཕྱེ་ནས་བྱུང་།།
༥༦
ལོ་མའི་བར་ནས་ཟླ་བ་མཐོང་དུས་སུ།།
མཚན་མོའི་འབུ་སྲིན་ལོ་མའི་གསེབ་ན་གྲགས།།
མགོ་བོ་སྒུར་ནས་མདུན་ལ་བལྟས་པ་ན།།
ཁྱོད་ཀྱི་ལོ་མ་ང་ཡི་གམ་ན་འགུལ།།
༥༧
ལོ་མའི་ངོགས་ཀྱི་ཐིག་རིས་ཕྲ་མོ་དེ།།
ཁྱོད་ལ་བགྲོད་སའི་ལམ་གྱི་ས་ཁྲ་ཡིན།།
ལོ་མའི་ཕྱི་ནང་ཁྱད་པར་ཡོད་ན་ཡང་།།
ཁྱོད་ཀྱི་སྙིང་གི་ཁུ་བ་ལྗང་གུ་ཡིན།།
༥༨
གང་དུ་སོང་ཡང་ལོ་མ་དེ་ན་ཡོད།།
གང་དུ་ཡོད་ཀྱང་ཁྱོད་རང་སེམས་ན་ཡོད།།
སེམས་ན་ཡོད་པས་སེམས་པ་ཁེངས་ནས་ཡོད།།
ལོ་མ་ཡོད་པས་བསིལ་བའི་གྲིབ་མ་ཡོད།།
༥༩
ཉི་འོད་ལོ་མ་འཕྲོས་ན་བཀྲག་མདངས་ཤིག །
ང་རང་ཁྱོད་ལ་ཐུགས་ན་མཛུམ་མདངས་ཤིག །
ཉི་འོད་ལོ་མ་འཕྲད་པའི་ཁོར་ཡུག་འདི།།
ཁྱོད་དང་ང་ཡིས་བསྐྲུན་པའི་མེ་ཏོག་ཅིག །
༦༠
ལོ་མའི་ངོགས་ནས་ང་ཡིས་བལ་དཀར་འཐུ།།
ལོ་མའི་འབུས་ལྷུང་སེམས་ཀྱི་གོ་རྟོགས་ཤིག །
དོན་གྱི་ལོ་མའི་འཇིག་རྟེན་འོད་དཀར་ཅིག །
འདི་དག་ཁྱོད་ཀྱིས་བསྟབས་པའི་གཏན་ཚིགས་ཉིད།།
༦༡
ཉི་མ་ནུབ་མཐའ་བཞུད་པའི་ནམ་ཚོད་དེར།།
མེ་འཁོར་བགྲོད་པའི་དུང་སྒྲ་ལྷང་ལྷང་གྲགས།།
ཁྱོད་རང་དྲན་པའི་སེམས་ཀྱི་དུང་བ་འདི།།
དེ་ཡིས་ཁྱེར་ཏེ་ཁྱོད་ཀྱི་ཕྱོགས་སུ་རྒྱུགས།།
༦༢
མགོ་བོ་གནམ་ལ་འཁོར་ཏེ་ཉལ་བ་ན།།
ཧྲག་ཧྲག་འཁོར་བའི་རླུང་འཁོར་གསལ་ལེར་མཐོང་།།
རླུང་འཁོར་གནམ་ནས་ཇི་ལྟར་འཁོར་ན་ཡང་།།
དྲན་པའི་རྔུལ་ཆུ་དྭངས་མོ་ཁྲོམ་ཁྲོམ་བཞུར།།
༦༣
མེ་ལོང་མདུན་ནས་རང་གི་གདོང་ལ་བལྟས།།
ང་ཡི་གདོང་ན་ཁྱོད་ཀྱི་བཞིན་རས་གསལ།།
ཁ་ཡི་ཁ་སྤུ་རིང་ནས་རིང་དུ་རེད།།
ཁྱོད་རང་དྲན་པ་ཟབ་ནས་ཟབ་ཏུ་ཕྱིན།།
༦༤
ཚ་གདུང་ཆེ་བས་གྲང་མོ་ཡང་ཡང་འཐུང་།།
རྔུལ་གྱིས་བརླན་པས་གཟུགས་པོ་ཡང་ཡང་བཀྲུས།།
དྲན་པའི་རྔུལ་དང་སེམས་ཀྱི་ཚ་གདུང་དེ།།
ཉིན་མ་རེ་ལ་ཆེ་ནས་ཆེ་རུ་འགྲོ །
༦༥
གློག་རྒོད་འཕུར་གྱིན་འཕུར་གྱིན་ནམ་འཕང་བསྟོད།།
རང་གི་གཤོག་ཟུང་རང་གི་སེམས་ལ་བཙུགས།།
ཁྱོད་ཀྱི་ནམ་མཁའ་ཇི་ལྟར་ཡངས་པ་ན།།
ང་ཡི་གཤོག་ཟུང་ཁྱོད་ཀྱི་ནམ་མཁའི་ཡིན།།
༦༦
ང་ནི་ལྡུམ་ར་སྐྱོང་གི་ཁྱིམ་པ་ཞིག །
མེ་ཏོག་ཁྱོད་ནི་ལྡུམ་ར་ང་ཡི་རྒྱན།།
ཆུ་ལུད་འཛོམས་པའི་ང་ཡི་ལྡུམ་ར་ནས།།
ཁྱོད་ཀྱི་འདབ་མ་ནམ་ཡང་ལྷུང་མི་སྲིད།།
༦༧
མཛུབ་མོར་བསྐོན་པའི་དངུལ་གྱི་མཛུབ་དཀྲིས་འདི།།
མཚན་མོ་དེ་ལ་ང་ཡི་མཛུབ་མོར་བསྐོན།།
སེམས་ལ་བསྐོན་པའི་ཁྱོད་ཀྱི་མཛུབ་དཀྲིས་དེ།།
སེམས་ཀྱི་མཛུབ་མོའི་སྟེང་ནས་ལྷོད་པ་མེད།།
༦༨
སྒོ་གླེགས་རྡུང་ཏེ་ཁྱོད་ཀྱི་ནང་ལ་འཛུལ།།
ནང་གི་བཀོད་པ་འདབ་མའི་ངོགས་དང་འདྲ།།
ང་ཡི་སེམས་ཀྱིས་དེ་ལ་ཡང་ཡང་རག །
མགོ་བོ་བརྙས་ཏེ་ཁྱོད་ཀྱི་རྨི་ལམ་འགྲིམས།།
༦༩
ཁྱོད་ཀྱིས་སྒེའུ་ཁུང་ཕྱེ་ནས་ང་ལ་བལྟས།།
ང་ཡིས་སྒོ་མོ་ཕྱེ་ནས་ནང་ལ་སོང་།།
ནང་ནས་ངེད་གཉིས་ལྷན་འཛོམས་བྱུང་བ་དང་།།
འོ་ཇ་འཐུང་ཞོར་སྙིང་གཏམ་གླེང་ན་བསམ།།
༧༠
ནམ་ཡང་ཁྱོད་ཀྱི་ལོ་མ་མཐོང་དུས་སུ།།
དེ་ཡིས་ཁྱོད་ལ་ང་ཡི་སྙིང་གཏམ་བཤད།།
ནམ་ཡང་ཁྱོད་ཀྱིས་སྤྲིན་དཀར་མཐོང་དུས་སུ།།
དེ་ཡིས་ཁྱོད་ལ་ང་ཡི་སྦྲང་ཆར་འབེབས།།
༧༡
དེ་རིང་གངྒའི་འགྲན་ན་འཁྱམས་སུ་སོང་།།
ཆུ་མོ་གངྒ་དལ་གྱིས་ལྷོད་ཀྱིས་བཞུར།།
གྲུ་ཆུང་བསྡད་དེ་ཆུ་ལ་བརྒལ་བ་ན།།
ཁྱོད་རང་མཉམ་དུ་ཡོད་ན་ཧ་ཅང་བསམ།།
༧༢
མེ་ཏོག་བཙོང་བའི་བུ་མོ་ཆུང་ཆུང་དེ།།
མེ་ཏོག་ཁྱེར་རེ་ང་ཡི་གམ་ལ་སླེབས།།
མེ་ཏོག་རྐང་གསུམ་སེམས་ཀྱིས་ཉོས་པ་དང་།།
མེ་ཏོག་ཆུ་ལ་བསྐུར་ཏེ་སྨོན་ལམ་བཏབས།།
༧༣
འདི་ན་མགོ་དཀྲིས་དམར་པོ་མེད་ན་ཡང་།།
རྒྱ་གར་བུ་མོའི་གདུ་བུ་ཧ་ཅང་མང་།།
མཛེས་པའི་ཁྲ་ཆིལ་གདུ་བུ་ཉོས་པ་དང་།།
ཁྱོད་ནི་ང་ཡི་གདུ་བུའི་བདག་མོ་ཡིན།།
༧༤
ནུབ་ཁའི་ཉི་མ་གངྒའི་ངོགས་ན་འཚེར།།
གྲུ་ཆུང་ཡོམ་ཡོམ་བགྲོད་པའི་ངང་ཚུལ་མཛེས།།
གངྒའི་ཀློང་ནས་ནུབ་ཁ་འཁོར་བ་ནི།།
ཁྱོད་ལ་གཤིབ་ཏེ་རྒྱ་མཚོར་ལྟ་བ་འདྲ།།
༧༥
གངྒ་གངྒ་ཁྱོད་ནི་གང་ནས་ཡོང་།།
གངྒ་གངྒ་ཁྱོད་ནི་གང་དུ་འགྲོ །
ཁྱོད་ནི་མཛའ་མོའི་མིག་ཆུ་ཡིན་ན་ནི།།
ང་རང་ཁྱོད་ལ་ཞུགས་ཏེ་བཞུད་ན་བསམ།།
༧༦
རྐང་རྗེན་བུད་དེ་གངྒའི་བྱེ་མར་བརྒལ།།
བྱེ་མ་ལག་ཏུ་བླངས་ཏེ་རླུང་ལ་བསྐུར།།
སེམས་པ་དེ་ལ་འདྲེས་ཏེ་ཤིག་ཤིག་ཐོར།།
བྱེ་མའི་ཀློང་ནས་ཁྱོད་ཀྱི་རྩྭ་ཐང་དྲན།།
༧༧
བྱེ་མའི་ཀློང་ནས་རྒྱང་ལ་བལྟས་པ་ན།།
ཤོག་བྱ་མང་པོ་རྒྱང་ནས་རྒྱང་ལ་སྤུར།།
གལ་ཏེ་ཁྱོད་ནི་ཤོག་བྱ་ཡིན་པ་ན།།
ང་ནི་ཁྱོད་རང་འདེགས་པའི་རླུང་བུ་ཡིན།།
༧༨
རྒྱ་གར་བུ་མོའི་གདོང་གི་མིག་ཟུང་ལས།།
ཀེམ་ཀེམ་གཡོ་བའི་ཁྱོད་ཀྱི་མིག་དཀྱིས་དྲན།།
ཁྱོད་ནི་རྒྱ་གར་བུ་མོ་མིན་ན་ཡང་།།
ང་ཡི་སེམས་ན་ཁྱོད་རང་མཛེས་མ་ཡིན།
༧༩
སཱ་རེ་རླུང་གི་ཁྲོད་ན་ལྷབ་ལྷུབ་གཡོ།།
ལན་བུ་སྐེད་ཀྱི་སྟེང་ན་ལྡེམ་ལྡེམ་འགུལ།།
སཱ་རེ་ཅན་གྱི་བུ་མོ་འཛུམ་པ་ཡིས།།
ཁྱོད་ཀྱི་ཡོད་ཚད་ང་ཡི་སེམས་ལ་དྲངས།།
༨༠
ཁ་པར་ནང་གི་ཁྱོད་ཀྱི་དགོད་སྒྲ་ཡིས།།
ང་ཡི་སྙིང་ཁར་འོད་ཀྱི་མེ་ཏོག་བཙུགས།།
བརྩེ་བའི་ཟླ་དཀར་དགུང་ནས་འཚེར་བྱས་ཏེ།།
ནམ་ཡང་ནུབ་པ་མེད་ན་བསམ་པ་ལ།།
༨༡
སྒེའུ་ཁུང་སྟེང་ན་ཕུག་རོམ་ཆ་ཆ་ཡོད།།
འཁོར་འཁོར་བྱས་ནས་ཆུ་དག་སྦྱོར་བ་ཡིས།།
ཡིད་ཀྱི་སྣང་བ་གཞན་ལ་དྲངས་བྱས་ཏེ།།
ཁྱོད་རང་དྲན་ན་ཐོལ་གྱིས་ཁོག་འཛུམ་ཤོར།།
༨༢
སྔ་མོ་ལངས་ནས་ལྡུམ་རའི་ནང་ལ་སོང་།།
ལྗོན་པའི་གསེབ་ནས་དཔེ་ཆ་དབྱངས་སུ་གྱེར།།
འདབ་མའི་ངོགས་ཀྱི་ཟིལ་ཐིགས་མཐོང་བའི་ཚེ།།
ཡིད་ཀྱི་གནམ་ལ་ཁྱོད་ཀྱི་ཉི་ཟླ་ཤར།།
༨༣
ལོ་མའི་སྟེང་གི་ས་རྡུལ་ནག་པོ་དེ།།
ཆར་བ་བབས་ནས་ཡོངས་སུ་དག་པར་གྱུར།།
ཁྱོད་ལ་འཁོར་བའི་སེམས་པ་དཀར་པོ་དེ།།
ཆར་རླུང་གིས་ཀྱང་བསུ་ན་བསུ་ཐབས་མེད།།
༨༤
ས་དང་རྡུལ་གྱིས་རྒྱང་གི་ཡུལ་ལྗོངས་བསྒྲིབས།།
ཁྱོད་དང་ང་གཉིས་ལེ་དབར་སྟོང་གིས་བཅད།།
གོམ་སྣེ་ལམ་ལ་ཆས་པའི་ཞོགས་པ་ནས།།
ངེད་གཉིས་འཛོམས་ཀྱི་སྐྱིད་པའི་ནུབ་མོ་ནམ།།
༨༥
གལ་ཏེ་ཁྱོད་རང་བྱ་ཞིག་ཡིན་དང་ན།།
ང་ནི་ཁྱོད་རང་འབབ་སའི་ལྗོན་པ་ཡིན།།
གལ་ཏེ་ཁྱོད་རང་ཉ་ཞིག་ཡིན་པའི་ཚེ།།
ང་ནི་ཁྱོད་རང་འཁྱུག་སའི་ཆུ་བོ་ཡིན།།
༨༦
ཆར་བ་ཤག་ཤག་འབབ་པའི་མཚན་མོ་དེར།།
ང་ཡིས་སེམས་ཀྱི་སྐད་ཆ་བཤད་མ་ཕོད།།
ཁྱོད་ཀྱིས་སྙིང་གི་སྐད་ཆ་གླེང་མ་ཐུབ།།
ཁུ་སིམ་ཁྲོད་ནས་གཅིག་སེམས་གཅིག་གིས་རྟོགས།།
༨༧
ཁྱམས་རའི་སྣེ་ན་ཐིགས་པ་ལྷོད་ཀྱིས་ཐིགས།།
ས་ལ་ས་དོང་ཡང་ཡང་ཟབ་མོ་བཟོ།།
རྟག་པར་ཁྱོད་རང་སེམས་ཀྱིས་དྲན་པ་ཡིས།།
དྲན་པའི་ས་དོང་གཏིང་ནས་གཏིང་དུ་ཕྱིན།།
༨༨
སྒེའུ་ཁུང་འགྲན་ནས་ཉིན་ཐོ་འབྲི་བའི་དུས།།
བྱེའུ་ཆུང་ཆུང་སྒེའུ་ཁུང་ཁ་ལ་བབས།།
བྱེའུ་ལྟོས་ནས་སྙན་ངག་ཚིག་གསུམ་བྲིས།།
ཚིག་གསུམ་གཤོག་སྒྲོར་བཏགས་ནས་ཁྱོད་ལ་བསྐུར།།
༨༩
འདབ་མའི་ཚོགས་རྣམས་ལྷན་དུ་འཛོམས་པ་ན།།
དེ་ལ་ཡིད་དུ་འོང་བའི་མེ་ཏོག་བརྗོད།།
ཁྱོད་རང་ང་གཉིས་མཉམ་འཛོམས་བྱུང་བ་ན།།
དེ་ནི་ཁྱོད་དང་ང་ཡི་འཛུམ་མདངས་ཡིན།།
༩༠
རྟག་པར་ཁྱོད་རང་དྲན་དུས་ལྡུམ་རར་སོང་།།
དེ་ན་ཁྱོད་རང་མཐོང་བའི་མེ་ལོང་མང་།།
མཚམས་རེར་ནགས་བྱི་ཤིང་ལ་འཛེག་པ་ཡིས།།
དྲན་པའི་སྐྱོ་བ་ཉུང་ཙམ་ཁད་ཀྱིས་སེལ།།
༩༡
ཡེ་གེའི་གསེང་ནས་རུས་པའི་ཤ་ཡང་སྐམ།།
དྲན་པའི་ཀློང་ནས་སེམས་ཀྱང་ཉམས་ནས་ཉམས།།
གལ་ཏེ་ཁྱོད་རང་འཁྲིས་སུ་ཡོད་པ་ན།།
མགོ་བོ་སྔས་ཏེ་ངལ་གསོ་ཅུང་ཙམ་བྱ།།
༩༢
ཁྱམས་ར་འོག་ནས་ཁམས་གསེང་བྱེད་པའི་དུས།།
གནམ་གྱི་ཆར་བ་ས་ལ་ཟིམ་ཟིམ་བབས།།
སེམས་ཀྱི་ས་ལ་འབབ་པའི་ཁྱོད་ཀྱི་ཆར།།
ནམ་ཡང་ཆད་པ་མེད་ན་བསམ་པ་ལ།།
༩༣
ཁོ་བོ་ལམ་གྱི་འགྲན་ནས་བགྲོད་པའི་དུས།།
ལམ་གྱིས་ང་ལ་ང་ཡི་ལམ་སྣེ་བསྟན།།
ས་དང་རྡུལ་ལོང་སྤྲིན་ནག་བཞིན་དུ་འཁྲིགས།།
ཁྱོད་རང་དྲན་ན་ང་ཡི་གོམ་ཁ་བྲལ།།
༩༤
ནམ་ཞིག་ཁྱོད་དང་མཇལ་བའི་དུས་ཚོད་དེར།།
དང་པོ་ཁྱོད་ཀྱི་གདོང་ལ་མེ་ཏོག་འདེབས།།
གཉིས་པ་ཁྱོད་ཀྱི་སེམས་ནས་ལུ་གུ་འཚོ།།
མཐའ་མ་སེམས་པ་གཤིབ་ཏེ་ཟླ་བར་བལྟ།།
༩༥
སེམས་ནས་དགའ་ས་ཉུང་ནས་ཉུང་ན་ཡང་།།
སེམས་འདི་ཁྱོད་ལ་དགའ་བ་ང་ཡི་འཛུམ།།
ཁྱོད་ཀྱི་མེ་ཏོག་སེམས་ནས་མ་སྐམ་ན།།
གདོང་གི་འཛུམ་པ་རྟག་ཏུ་ལྷོད་པ་མེད།།
༩༦
མཚན་མོ་མ་གཉིད་ནམ་གུང་ཡར་ལ་ལངས།།
ཁྱོད་རང་དྲན་ཏེ་ཁྱོད་ལ་ཁ་པར་བཏང་།།
ཁ་པར་བཏང་ཡང་ཁ་སྒོ་བརྒྱབ་ནས་འདུག །
མུན་ནག་ནང་ནས་ཐ་མག་ཡང་ཡང་སྦར།།
༩༧
དེརིང་ནམ་མཁའ་སྔོ་ཞིང་སངས་པ་འདི།།
ཡུལ་གྱི་ནམ་མཁའི་མདངས་དང་གཅིག་པ་རེད།།
མ་འོངས་ལས་ཀྱི་བསྐལ་བ་འཛོམས་སོང་ན།།
ཡུལ་གྱི་ནམ་མཁའི་མཚར་སྡུག་ཁྱོད་ལ་སྟོན།།
༩༨
ང་ལ་སྙིང་ནས་བརྩེ་བའི་མི་ནི་ཁྱོད།།
ང་ཡི་སྙིང་ནས་བརྩེ་བའི་མི་ནི་ཁྱོད།།
ཁྱོད་ལ་སྙིང་ནས་བརྩེ་བའི་མི་ནི་ང་།།
ཁྱོད་ཀྱི་སྙིང་ནས་བརྩེ་བའི་མི་ནི་ང་།།
༩༩
ང་ཡི་བྲང་གི་སྨེ་བ་དམར་པོ་དེ།།
ཁྱོད་ཀྱིས་ང་ལ་བཞག་པའི་དམ་བཅའ་ཡིན།།
ཁྱོད་ཀྱི་འགྲམ་པའི་མཛེས་པའི་མཛེས་ཁུང་དེ།།
ང་ཡིས་ཁྱོད་ལ་བཞག་པའི་དམ་བཅའ་ཡིན།།
༡༠༠
བརྩེ་དུང་གསེར་གྱི་ཉི་མ་ལམ་ལེམ་འདི།།
མི་འདོད་སྤྲིན་གྱིས་སྒྲིབ་པ་མེད་པར་ཤོག །
བརྩེ་དུང་དངུལ་གྱི་ཟླ་བ་དཀར་པོ་འདི།།
བར་ཆད་གཟའ་ཡིས་བཟུང་བ་མེད་པར་ཤོག །
2013.09.20 ཉིན་རྫོགས་པར་བྱས།
ཤིན་ཏུ་ལེགས། སྒེའུ་ཁུང་འགྲམ་ན་མིག་གི་རྒྱལ་མོ་འདི་ཚོར་དྲན་ཤེས་རེ་བསྟེན་ན་དེ་ག་རང་རེད། སྙིམ་པའི་གླུའམ་གླུ་་ཐར་སྦྱར་མ་དད་པ་དང་ལྟ་གྲུབ་ཚད་མཐོན་པོ་མེད་ན་ལེན་ས་མི་འགྲོ་བར་བཤད་པ་མ་གཏོགས་པ། སྡེབ་སྦྱོར་ནི་ཚིགས་བརྒྱ་མ་ལས་ལྷག་མ་རེད་ཡ། མུ་མཐུད་ནས་བྲིས་ཨ།