ཕུན་ཚོགས་བསྟན་དར།
༡༽
སྐྱེས་ཙམ་ཉིད་ནས་སྣང་བ་ཞིག་མིག་ལམ་དུ་འཆར།
འོན་ཀྱང་། ཨ་མ་ལགས་ནི་ཧ་ལས་ཤིང་།
ཧང་སངས་ཏེ་ཅང་མི་སྨྲ་བའི་བརྟུལ་ཞུགས་འཛིན།
ཆུ་ཚོད་གཅིག་ཙམ་རིང་དྲན་མེད་དུ་བརྒྱལ་ཞིང་།
ཟུངས་ཁྲག་གི་འབྱམས་རྒྱུན་མཚམས་མ་ཆད་པར།
ཉལ་སྟན་ཡོངས་སུ་བརླན།
ཞལ་བར་ཁྲག་གི་མཚོ་ཆུང་འཁྱིལ།
སྐབས་དེ་དུས།
བདག་ནི་ཆེས་བྱིས་དུས་ཀྱི་མུན་ནག་ཡིན་པས།
གང་ཡང་མི་ཤེས་ལ་ཅི་ཡང་མ་ནུས་པར།
ངུ་སྒྲས་ཁོར་ཡུག་བསྐངས་ཤིང་།
གཞན་ལ་སུན་སྣང་འབའ་ཞིག་སྦྱིན།
༢༽
མིག་དབང་དང་སྣང་བ་འགྲོགས་ནས།
ཐམས་ཅད་ཇེ་གསལ་དུ་མངོན་དུས།
བདག་ནི་མ་མའི་པང་དུ་གཅེས་པའི་ནོར་དང་།
མཁོ་བའི་ཟས་གོས་ལས་ལྷག་པའི།
རིན་ཐང་རྣལ་མ་ཞིག་ཡོད་པ་ལྟར།
ཡང་ནས་བསྐྱར་དུ་བཟུང་སྟེ་དྲོད་འཇམ་གོས་ཀྱིས་བརྒྱན།
སྐབས་དང་དུས་སུ་གཅེས་ཤིང་ཞིམ་མངར་ཟས་ཀྱིས་བསྐྱངས།
འདི་ལྟར་ལོ་དང་ཟླ་བ་འདས་རྗེས།
བགྲང་བྱ་སུམ་ཅུར་ལོན་ཟིན།
མཚམས་དེ་དུས།
ཁོ་བོ་ནི་གཞོན་ནུའི་མུན་ནག་ཡིན་པས།
དྲིན་ཆེ་བའི་ཕ་མ་མ་དྲན།
སེམས་དུང་བའི་སྤུན་ཟླ་མ་བསམ།
དགོས་ངེས་པའི་ཕ་ཡུལ་མ་ཚོར་བར།
ཆང་རག་དང་རྒྱན་རྩེད་ཀྱིས།
ཨ་མ་ངུ་རུ་བཅུག
ཨ་ཕ་ཡིད་ཐང་ཆད།
སྤུན་མཆེད་སྡུག་ལ་སྦྱར།
རང་གིས་རང་བསླུས་ཤིང་ཕུང་བར་བྱས།
༣༽
རྩ་བ་རུལ་བའི་སྡོང་སྐམ་ལ།
ཆུ་ལུད་ཇི་ལྟར་བཏབས་ཀྱང་།
ལོ་འབྲས་མི་སྟེར་བ་ལྟར།
ལུས་ཀྱི་ཟུངས་ཤུགས་དང་།
ཡིད་ཀྱི་དྲན་ཤེས།
རིག་པའི་དཔྱད་པ།
ངག་གི་སྨྲ་བརྗོད།
འཚོ་བའི་མཐུན་རྐྱེན་སོགས།
ཉིན་རེ་ནས་ཟླ་རེ་བཞིན་ཇེ་ཞན་ཇེ་སྡུག་ཏུ་གྱུར།
ཐམས་ཅད་མི་འདོད་པའི་དཀའ་སྡུག
ཡོོད་ཚད་ཕན་མེད་ཀྱི་ཟོག་རོ་སྟེ།
འབུད་ཤིང་ཁོ་ནའི་རྗེས་སུ་མཐུན་པས།
སུ་ལའང་མི་དགོས་ཤིང་།
གང་གིས་ཀྱང་མི་ལེན་པའི་རྒས་གཉེར་གྱིས་ཁེངས།
དུས་དེ་ཡི་ཚེ།
ང་ནི་རྒས་གཅོང་གིས་མནར་བའི་ཆེས་མུན་ནག་ཡིན་པས།
རང་རོ་རང་གིས་མཐོང་ཞིང་།
རང་དྲིན་རང་ལ་ཆུང་བའི།
ཤེས་སྤྱོད་དབུལ་བ་རྨོངས་པའི་མུན་ནག
བྱས་རྗེས་མེད་པ་འགྱོད་གདུང་གི་མུན་ནག
གཉེན་ཉེ་བྲལ་བ་ཁེར་རྐྱང་གི་མུན་ནག
འཇིག་ལ་ཉེ་བ་འཆི་དུས་ཀྱི་མུན་ནག
གང་བྱེད་འདི་བྱེད་མེད་པ་མུན་ནག་གི་མུན་ནག་ཏུ།
གཟུགས་མ་མཐོང་ཞིང་།
སྒྲ་ཡང་མ་ཐོས་པར།
ངོ་གདོང་མིག་ཆུས་བརླན།
བྲང་ཁོག་ལག་ཟུང་གིས་བརྡུང་།
སྐྱོ་ངར་གྱི་མནར་གཅོད་མྱོང་བཞིན་ཡོད།།