ཆབ་མདོ་ངག་ཕུན།
སྔོན་གླེང་།
ད་ནི་བོད་ཆོས་ལྡན་གྱི་ཞིང་ཁམས་རྒྱ་དམར་གྱི་དྲག་པོའི་བཙན་བཟུང་བྱས་ནས་བཟུང་སྟེ། བོད་མི་རིགས་ཀྱི་ཐོག་ཏུ་ཧ་ལས་པའི་གདུག་རྩུབ་དང་གཉའ་གནོན་ཚད་ལས་འདས་པ་བྱས་ཡོད་ནའང་། ད་དུང་རྒྱ་གཞུང་གིས་ངོས་ལེན་མེད་པའི་ཐོག་ནས་བོད་ལ་ཞི་བའི་བཅིངས་འགྲོལ་བཏང་བ་ནས་བཟུང་སྟེ། བོད་མི་རིགས་ཡོངས་ལ་བདེ་སྐྱིད་ཀྱི་འཚོ་བ་འཕེལ་རྒྱས་ཕྱིན་ཡོད་ཚུལ་གྱི་འུར་སྒྲོག་གནས་ལུགས་དང་མི་མཐུན་པ་བྱས་དང་བྱེད་བཞིན་ཡོད་ཅིང་། དོན་དངོས་ཐོག་བཤད་ན་བོད་འདི་ཉིད་རྒྱ་དམར་གྱིས་བཙན་བཟུང་བྱས་ནས་བཟུང་སྟེ་བོད་མི་རིགས་ལ་ཐོབ་དགོས་པའི་བདེ་སྐྱིད་ཀྱི་རང་དབང་ཉིན་གཅིག་ཀྱང་ཐོབ་མེད་ཅེས་བརྗོད་ན་མི་ཆོག་རྒྱུ་ཅི་ཡང་མེད། རྒྱ་དམར་གྱིས་བོད་ཀྱི་གྲོང་ཁྱེར་ཆེ་ཁག་ཏུ་ཕྱི་དངོས་པོ་ཁྲ་ཁྲ་ཟིང་ཟིང་གི་རྣམ་པ་ཞིག་བཟོས་ཡོད་ནའང་དོན་གང་ཡང་སྙིང་དེ་དག་ནི་བོད་མི་རིགས་ལ་ཁེ་ཕན་ཐོབ་རྒྱུའི་ཚབ་ཏུ་རྒྱ་རིགས་ལ་ཁེ་ཕན་མང་བ་ཐོབ་ཀྱི་ཡོད་པ་དེ་རེད། བོད་མི་ཉམས་ཆུང་ལ་ཐོབ་ཀྱི་མེད་ཅིང་། རྒྱ་དམར་གྱི་ཁ་ནས་བོད་མི་རིགས་རྣམས་སྤུན་ཟླ་མི་རིགས་ཡིན་ཚུལ་སྒྲོག་གི་ཡོད་ཀྱང་དོན་དག་བོད་མི་རྣམས་དགྲ་བོ་ཞིག་ལ་ངོས་འཛིན་བྱེད་ཀྱི་ཡོད། རྒྱུ་མཚན་ནི་བོད་མི་རྣམས་ཀྱི་སེམས་ནང་གི་སྡུག་བསྔལ་ཕྱི་རུ་འདོན་པ་ཙམ་ཁྱོད་ཤི་ང་གསོན་དགོས་ཞེས་བརྗོད་དེ་ཡ་ང་སྙིང་རྗེ་མེད་པ་དྲག་གནོན་བྱས་དང་བྱེད་བཞིན་ཡོད་ཅིང་། དེ་བཞིན་རྒྱ་དམར་གྱི་མོ་ལོ་ལྔ་བཅུ་ལྷག་ཙམ་རིང་ལ་འཇམ་རྩུབ་ཀྱི་ཐོག་ནས་བོད་མི་རིགས་ཀྱི་ཆོས་དང་རིག་གཞུང་རྩ་མེད་བཟོ་རྒྱུའི་ཆབ་སྲིད་ཀྱི་སྲིད་ཇུས་ངན་པར་སྤེལ་ནས་བོད་མིའི་ཐོག་ཏུ་དྲག་གནོན་ཁོ་ན་བྱས་པས། བོད་མི་རྣམས་ཀྱིས་དེ་དག་མིག་མདུན་དུ་མཐོང་དུས་གསོན་པ་ལས་འཆི་བ་དགའ་བར་དགོངས་ནས། གཞིས་ལུས་རྒྱལ་གཅེས་པ་རྣམས་ཀྱི་གཞན་ལ་འཚེ་བའི་རྣམ་པ་ཕྲ་མོ་ཙམ་ཡང་མེད་པའི་ཐོག་ནས་རྒྱལ་ཁབ་དང་མི་རིགས་ཆག་འཇིག་གི་གནས་སྟངས་སྐྱོབ་ཆེད་ཡོད་ཚད་བློས་བཏང་གིས་སྐུ་ལུས་མཆོད་མེར་སྒྲོན་གནང་མཛད་བཞིན་ཡོད། དེ་དག་གི་འགན་ཡོངས་རྫོགས་རྒྱ་གཞུང་གིས་འཁུར་དགོས་པ་རེད། ད་ནི་རྒྱ་གཞུང་གི་གནད་ཡོད་མི་སྣ་རྣམས་ཀྱིས་བོད་ཀྱི་ཐོག་ལ་འཛིན་པའི་ཆབ་སྲིད་ལ་བསྒྱུར་བཅོས་གཏོང་དགོས་པར་དུས་ཚོད་རན་འདུག་སྙམ་ཞིང་། འདི་མུ་བཞིན་བོད་ཀྱི་ཐོག་དྲག་གནོན་བྱས་བསྡད་ཚེ་མཐར་རྒྱ་བོད་མི་རིགས་བར་ཛ་དྲག་གི་འགལ་ཟླའི་གནས་སྟངས་ཤིག་ཏུ་གྱུར་ཚེ་དེའི་འགན་ཡོངས་རྫོགས་དེ་ཡང་རྒྱ་གཞུང་གི་གནད་ཡོད་མི་སྣ་ཚོས་འཁུར་དགོས་པ་ཞིག་རེད་དོ། །ད་ནི་རྒྱ་གཞུང་གི་གནད་ཡོད་འགོ་ཁྲིད་ཀླད་རྙིང་མཁྲེགས་བཟུང་ཅན་དེ་དག་གིས་ཤེས་པར་གྱིས་ཤིག ད་རེས་ཀྱི་གོ་སྐབས་དེ་ཉིད་བརྒྱུད་དེ་བོད་ཀྱི་བདེན་དོན་གྱི་ཆེད་དུ་མི་ལུས་རིན་པོ་ཆེ་བོད་རྒྱལ་ཁབ་ཀྱི་དོན་དུ་སྐུ་ལུས་མཆོད་མེར་སྒྲོན་གནང་མཛད་མཁན་ཡོངས་ལ་རྗེས་དྲན་གྲངས་མེད་ཞུ་འོ།།
ཐོལ་བྱུང་གི་གཏམ།
སྐྱིད་པའི་གངས་ལྗོངས་ཆོས་ཀྱི་ཞིང་ཁམས་ལ།།
གངས་ཅན་པ་རྣམས་ཞི་བདེར་གནས་པའི་དུས།།
བཙན་རྒྱ་གུང་ཁྲན་ཁ་དབྱངས་སྙན་པོ་འཁྱེར།།
རིམ་གྱིས་གངས་ལྗོངས་ཡོངས་རྫོགས་བཙན་གྱིས་བཟུང་།།
རིག་གནས་གསར་བརྗེ་ཞེས་བྱ་ཁ་དབྱངས་འཁྱེར།།
གནའ་རབས་མེས་དབོན་དཀའ་བ་ཁྱད་བསད་པའི།།
ཡོད་ཚད་བློས་བཏང་བཞེངས་སྐྲུན་གནང་བའི་དགོན།།
མི་རིགས་བླ་སྲོག་སྐུ་གསུང་ཐུགས་རྟེན་རྣམས།།
རྗེས་ལུས་བསྙད་དེ་ཡོད་ཚད་བཙན་གྱིས་བཤིག །
ཉེས་མེད་བོད་མི་དྲག་པོས་ཁྲིམས་ལ་སྦྱར།།
སྐྱིད་པའི་གངས་ལྗོངས་སྲིན་པོའི་ལུང་ལྟར་བསྒྱུར།།
རོགས་རམ་ཚོགས་ཆུང་ལ་སོགས་མིང་བཏགས་ནས།།
རྒན་དར་གཞོན་གསུམ་ངལ་རྩོལ་བཙན་གྱིས་བསྐུལ།།
ཉིན་རེར་ལྟོ་དུས་འགྲང་བ་ཟ་རྒྱུ་མེད།།
ད་དུང་ལས་ཀར་ཉིན་མཚན་དབྱེར་མེད་བཀོལ།།
དཀའ་ལྟོ་གཉིས་ཀྱིས་མི་མང་དུ་མ་གྲོངས།།
བོད་ཀྱི་སྐད་ཡིག་མེད་པ་བཟོ་བའི་ཐབས།།
སྐད་ཡིག་ཆས་གོས་རྗེས་ལུས་ཡིན་ཚུལ་སོགས།།
བསྒྲགས་ཏེ་བེད་སྤྱོད་མི་ཆོག་ཁྲིམས་ལུགས་བཟོས།།
དེ་འདྲའི་ལས་འགུལ་གདུག་རྩུབ་སྣ་མང་སྤེལ།།
འོན་ཀྱང་གཞིས་ལུས་བོད་མིའི་སྙིང་སྟོབས་སོགས།།
འགྱུར་མེད་རྡོ་རྗེ་བྲག་ལྟར་གནས་པའི་དྲིན།།
གུང་ཁྲན་ཅི་བྱེད་མེད་པར་རིམ་གྱུར་ནས།།
སྲིད་ཇུས་གུ་ཡངས་བཏང་ནས་བོད་མི་རྣམས།།
དཔལ་འབྱོར་འཕེལ་རྒྱས་བཏང་བར་ཡོད་ཁུལ་གྱི།།
བསླུ་བྲིད་བྱེད་དགོས་སྟོང་བསམ་རེ་བ་བཅངས།།
ཕྱི་ཡི་རྒྱལ་ཁབ་མགོ་སྐོར་གཏོང་བའི་ཆེད།།
བོད་ས་འཛུགས་སྐྲུན་འཕེལ་རྒྱས་བཏང་ཡོད་མདོག །
གནའ་བོའི་མཁར་གྲོང་ཡོངས་རྫོགས་གཏོར་བཤིག་གིས།།
རྒྱ་ཡུལ་གྲོང་འཁྱེར་ལྟ་བུར་གངས་ལྗོངས་བསྒྱུར།།
མ་འོངས་གངས་ལྗོངས་སོན་རྩའི་ན་གཞོན་ལ།།
གནའ་དེང་ཤེས་བྱ་སློབ་སྦྱོང་སྤྲོད་དགོས་ཀྱང་།།
མཐུན་འགྱུར་མེད་པའི་འཁྱམས་པོ་ཡོང་ཐབས་བྱེད།།
མི་རིགས་ལ་ཞེན་ཆེ་ཞིང་ཤེས་ཡོན་པ།།
འགའ་ཤས་མི་རིགས་ཐོབ་ཐང་རྩོད་པའི་སྐབས།།
ཆབ་སྲིད་ཞྭ་མོ་གཡོག་སྟེ་བཙོན་དུ་བཅུག །
བཙོན་དུ་སྡུག་སྦྱོང་འདྲ་མིན་སྣ་ཚོགས་ཀྱི།།
རིགས་འཚོ་མ་ཟིན་བཙན་གྱིས་བཟོ་བཞིན་ཡོད།།
ཁོག་གཡོ་ཆེ་ཞིང་མདུན་དུ་སོ་དཀར་བསྟན།།
གུང་ཁྲན་དཔོན་རྒན་རིང་ལུགས་དེ་དག་གིས།།
གངས་ལྗོངས་ཆོས་དང་རིག་གཞུང་ཡོངས་རྫོགས་བཅས།།
རྩ་མེད་བཟོ་རྒྱུར་གཡོ་རྒྱུའི་ཟློས་གར་འཁྲབ།།
འོན་ཀྱང་གཞིས་ལུས་བོད་མི་རྣམ་པ་ཡིས།།
ཞུམ་མེད་ལྷག་བསམ་སྙིང་སྟོབས་ཆེན་པོ་ཡིས།།
གྱ་དགུར་སེར་འབྲས་དགེ་གསུམ་དགེ་འདུན་གྱིས།།
ཡོད་ཚད་བློས་བཏང་ཞི་བའི་ངོ་རྒོལ་ལ།།
རྒྱ་གཞུང་དམག་མིས་ཡ་ང་སྙིང་མེད་ཀྱིས།།
ཁྲག་དྲི་བྲོ་བའི་དྲག་གནོན་ཚབས་ཆེན་བྱས།།
ད་དུང་རྒྱ་གཞུང་ངོ་ཚ་ཁྲེལ་མེད་ཀྱིས།།
དར་དམར་འོག་ཏུ་འཚར་ལོངས་བྱུང་བ་རྣམས།།
ཆབ་སྲིད་འདོད་བློ་ཡོངས་སུ་ཁེངས་ཡོད་ཟེར།།
སྤུན་ཟླ་མི་རིགས་ཡིན་ཚུལ་ཁ་དབྱངས་སྒྲོག།
དོན་དུ་བོད་མི་ཡོངས་རྫོགས་དགྲ་བོར་འཛིན།།
རང་ས་རང་དབང་ཐོག་ནས་འགྲོ་དབང་མེད།།
རང་བྱུང་ཁོར་ཡུག་ཐམས་ཅད་བཙན་གྱིས་བསྔོགས།།
སྐྱིད་པའི་གངས་ལྗོངས་ཐལ་བར་འཚུབ་སེ་བསྒྱུར།།
ཉེས་མེད་མི་རྣམས་རིམ་གྱིས་བཙོན་དུ་བཟུང་།།
དེ་འདྲའི་དཀའ་སྡུག་གནས་སྟངས་སྣ་མང་འོག །
སེམས་ཀྱིས་མ་བཟོད་ཕྱི་ལོ་ཉིས་སྟོང་བརྒྱད།།
ཆོལ་ཁ་གསུམ་གྱི་ས་ཁྱོན་ཡོངས་རྫོགས་སུ།།
ཞི་བའི་ཐོག་ནས་ངོ་རྒོལ་བྱས་མ་ཐག །
ཁྱོད་ཤི་ང་གསོན་བརྗོད་དེ་བོད་མིའི་ཐོག །
དེང་དུས་འཕྲུལ་ཆས་སྤྱད་དེ་བཙན་གནོན་བྱས།།
རང་རིགས་རྒྱལ་གཅེས་དུ་མའི་སྐུ་སྲོག་འཕྲོག །
ཕྱི་ལོ་ཉིས་སྟོང་དགུ་ནས་ད་ལྟའི་བར།།
གཞན་ལ་འཚེ་བའི་བྱ་བ་ཡོངས་དོར་ནས།།
གཅེས་པའི་རང་སྲོག་གཞན་དོན་ཆེད་དུ་བཏང་།།
ཁབ་རྩེ་ཙམ་ཡང་རེག་དབང་མེད་པའི་ལུས།།
རང་རིགས་བདེན་དོན་རང་དབང་རྩ་དོན་ཆེད།།
དཔའ་བོ་དཔའ་མོ་བརྒྱ་དང་ཉི་ཤུ་ལྷག །
གངས་ཅན་བོད་ཀྱི་བདེན་དོན་ཆེད་དུ་ཕུལ།།
འཛམ་གླིང་ཐོག་ཏུ་དེ་འདྲའི་ལོ་རྒྱུས་དཀོན།།
གངས་ལྗོངས་དཔའ་བོ་དཔའ་མོ་ཁྱེད་རྣམ་པ།།
གངས་ལྗོངས་བོད་མིའི་སེམས་ནང་གསོན་པོར་གནས།།
ཁྱེད་རྣམས་ཞུམ་མེད་སྙིང་སྟོབས་དེ་དག་ལ།།
ཡི་རངས་མི་ཞུ་མཁན་ཞིག་སུ་ཡང་མེད།།
བོད་ཀྱི་ལོ་རྒྱུས་ཛ་དྲག་གནས་སྟངས་སྐབས།།
དེ་འདྲའི་ལས་འགུལ་རླབས་ཆེན་སྤེལ་བ་ལ།།
བཀའ་དྲིན་སྙིང་ནས་ཡི་རངས་ཚད་མེད་ཞུ།།
ད་ནི་གངས་ལྗོངས་བོད་མི་ཡོངས་རྫོགས་ཀྱིས།།
བློ་རྩེ་ཆིག་བསྒྲིལ་གངས་ལྗོངས་ཞིང་ཁམས་ལ།།
བདེ་སྐྱིད་ཉི་འོད་གསར་པ་ཤར་བའི་ཐབས།།
ཡོངས་རྫོགས་ནུས་ཤུགས་གཅིག་ཏུ་སྤུངས་དགོས་སོ།།
ང་དང་ཁྱོད་ཅེས་རྩོད་པའི་དུས་སྐབས་མིན།།
ནང་ཁུལ་འཐེན་འཁྱེར་བྱེད་པའི་དུས་སྐབས་མིན།།
ཉི་མ་གང་འཁྱོལ་བྱེད་པའི་དུས་སྐབས་མིན།།
ནང་ཁུལ་ཕྲག་དོག་བྱེད་པའི་དུས་སྐབས་མིན།།
ཕུ་ནུ་ནང་དམེ་བྱེད་པའི་དུས་སྐབས་མིན།།
རྩ་ས་རྩོད་གླེང་བྱེད་པའི་དུས་སྐབས་མིན།།
ཤཱོ་དང་མ་ཇང་རྩེད་བའི་དུས་སྐབས་མིན།།
ཆང་དང་ཨ་རག་འཐུང་བའི་དུས་སྐབས་མིན།།
གཏམ་བཤད་རྫིག་པོ་བྱེད་པའི་དུས་སྐབས་མིན།།
དཔལ་འབྱོར་རྒྱས་སྤྲོས་བྱེད་པའི་དུས་སྐབས་མིན།།
ང་ཐོབ་ཁྱོད་ཤོར་བསམ་པའི་དུས་སྐབས་མིན།།
ནང་ཁུལ་རྩོད་གླེང་བྱེད་པའི་དུས་སྐབས་མིན།།
དྲིན་ལན་ལོག་འཇལ་བྱེད་པའི་དུས་སྐབས་མིན།།
ངོ་ཚ་ཁྲེལ་མེད་བྱེད་པའི་དུས་སྐབས་མིན།།
ཞེས་པ་འདི་ནི་སྨྱུ་གུའི་རྩེ་མོ་ནས།།
དབང་མེད་ཤོར་བས་དགོངས་འགལ་མེད་པར་ཞུ།།
ཕན་པའི་ཚིག་རེ་འདུག་ན་སེམས་སུ་ཟུངས།།
ཕན་མེད་རེད་འདུག་བསམ་ན་གཡུག་ཀྱང་ཆོག །
ཀུན་གྱིས་དེ་དོན་རྟོགས་པའི་རྒྱུར་གྱུར་ཅིག །
༢༠༡༣.༡༠.༢༠