འོད་གསལ་མཐའ་ཡས།
ན་མོ་གུ་རུ་བྷྱཿ
རིས་མེད་འགྲོ་བའི་དཔལ་མགོན་དམ་པ།།
རྒྱལ་སྲས་སེམས་དཔའ་གཞོན་ནུའི་ཚུལ་འཛིན།།
སྙིགས་མའི་རྒུད་པ་འཇོམས་པའི་དེད་དཔོན།།
ས་ཡི་སྙིང་པོར་གུས་པས་འདུད་དོ།།
གང་སར་རྒྱུ་བའི་གྲྭ་རྐྱང་འཁྱམ་པོ།།
ལས་དབང་རླུང་གི་འཁོར་ཕྱོགས་ཞིག་གིས།།
ས་ཡི་སྙིང་པོའི་གདན་ས་བྱིན་ལྡན།།
གནས་མཆོག་དཔལ་རི་རྩེ་དགུར་འབྱོར་སོང་།།
བདེ་བཤེགས་སྐུ་གཟུགས་རྡོ་དང་ཤིང་སོགས།།
སྣ་ཚོགས་ལས་གྲུབ་དད་རྟེན་བྱས་ན།།
ཚོགས་གཉིས་བསགས་པར་འགྱུར་བ་ཡིན་ཞེས།།
དཔལ་མགོན་འཕགས་པ་ཀླུ་སྒྲུབ་དགོངས་པ།།
ནག་པོ་རྒྱ་ཡི་ཡུལ་གྲུ་འདི་རུ།།
ཆོས་མེད་སེམས་ཅན་བགྲངས་ལས་འདས་པ།།
འདི་རྣམས་ཐར་བའི་ས་བོན་འཇོག་ཕྱིར།།
རྒྱལ་བའི་འགྲོ་དོན་ངོ་མཚར་ཆེའོ།།
ས་ཡི་སྙིང་པོའི་ གནས་མཆོག་དེ་ན།།
ཡུལ་སྐོར་མི་ཚོགས་ནམ་མཁའི་རྒྱུ་སྐར།།
ཀུན་གྱིས་ལག་ཏུ་སྤོས་དང་མེ་ཏོག།
མཆོད་པའི་སྤྲིན་བཟང་མི་ཟད་ཕུལ་འདུག།
འོན་ཀྱང་གནས་སྐབས་བདེ་སྐྱིད་མ་གཏོགས།།
མཐར་ཐུག་སངས་རྒྱས་འབྲས་བུར་སྨོན་མཁན།།
ཆོས་ལྡན་རྒྱ་མི་རེ་གཉིས་མ་གཏོགས།།
ཆོས་ཀྱི་སྙིང་པོ་ཤེས་མཁན་ཉུང་ཉུང་།།
རབ་འབྱམས་ཕྱོགས་བཅུའི་རྒྱལ་བ་ཀུན་ལ།།
ལག་གཉིས་ཐལ་མོ་སྦྱར་ཏེ་འདུད་ན།།
ཚེ་རབས་ཕྱི་མར་མཐར་འབྲས་ཐོབ་ངེས།།
ཁྱིམ་བདག་དཔལ་སྐྱེས་རྣམ་ཐར་ཇི་བཞིན།།
འཕགས་པ་ས་ཡི་སྙིང་པོ་མཁྱེན་ནོ།།
འཛམ་གླིང་སྐྱེ་འགྲོའི་རྒུད་པ་སོལ་ཅིག།
གངས་ལྗོངས་ཆོས་སྲིད་ཉམ་པ་སོལ་ཅིག།
རིས་མེད་འགྲོ་བའི་སྡུག་བསྔལ་སེལ་མཛོད།།
གནས་མཆོག་འདི་ཉིད་མཇལ་བསྐོར་བྱས་པའི།།
རྣམ་དཀར་དགེ་བའི་རྩ་བ་ཅི་མཆིས།།
བླངས་དོར་གནས་ལ་རྨོངས་པའི་འགྲོ་བ།།
ཀུན་ཀྱང་སངས་རྒྱས་ས་རུ་སྨོན་ནོ།།
༢༠༡༣ཟླ༡༠ཚེས༢༦ཉིན་ཨེ་ཝྃ་རིག་པའམ་འོད་གསལ་མཐའ་ཡས་སུ་འབོད་པ་གང་དེས་འཕགས་པ་ས་ཡི་སྙིང་པོའི་གདན་ས་གནས་མཆོག་དཔལ་རི་རྩེ་དགུ་ནས་ཤར་མར་བྲིས་པ་དགེ་ལེགས་འཕེལ།