ཀླུ་སྨྱོན།
ཆར་བ་ཆེན་པོ་ཞིག་འབབ་མཚམས་བཞག་ཟིན། ཕྱི་རོལ་ཏུ་རླུང་བུ་འུར་འུར་དུ་ལྡང་བ་དང་མཉམ་དུ་ལྗོན་ཤིང་གི་ལོ་མ་འདར་བའི་ཤག་སྒྲ་ཐོས་ཡོང་། གློག་འོད་དམར་ཤར་རེ་བ་ཞིག་ཀྱང་ལན་རེར་འཁྱུག་ཅིང་། དེས་སྒེའུ་ཡོལ་གྱི་ངོས་སུ་ཡོད་པའི་བྱ་བྱེའུ་དང་མེ་ཏོག་གི་རི་མོ་དེ་ཚོ་གསལ་བོར་མཐོང་ཡོང་། ཉལ་ཁྲིའི་ཟུར་གྱི་བརྙན་འཕྲིན་ལས་སིར་སྒྲ་ཞིག་འབྱིན་བཞིན་ཡོད་པ་མ་གཏོགས་ཐད་གཏོང་ལེ་ཚན་ཁག་སྔ་མོ་ཞིག་ནས་གཏོང་མཚམས་ཡོངས་སུ་བཞག་ཟིན་འདུག ཛ་དྲག་ཉེན་སྐྱོབ་རླངས་འཁོར་གྱི་དུང་སྒྲ་འཛེར་བོ་ཞིག་ཕྱི་རོལ་ནས་གྲགས་ཡོང་བ་དེ་ནི་རླངས་འཁོར་གདོང་གཏུག་གི་དོན་རྐྱེན་མིན་ན་མཚན་མོའི་ཞབས་བྲོ་ཁང་དག་གི་ནང་དུ་ཕོ་གསར་ཚོ་གཞུ་རེས་ཐུག་པ་ཡིན་སྲིད། གཅིག་བྱས་ན་པ་སངས་ཀྱང་མདང་དགོང་བཞིན་ད་དུང་ཞབས་བྲོ་ཁང་ཞིག་ཏུ་ཝུ་ཆང་གིས་ར་བཟི་བསྡད་ཡོད་སྲིད་ལ། ཚབས་ཆེ་ན་འཆལ་སྤྱོད་མ་ཞིག་དང་མཉམ་དུ་སྲང་ལམ་ཁུག་ཀྱོག་ཅིག་གམ་མགྲོན་ཁང་གོང་ཁེ་ཞིག་ཏུ་ཉལ་བསྡད་ཡོད་སྲིད། ལམ་སྒྲོན་དག་སྔར་བཞིན་འཚེར་བ་དང་རླུང་བུ་གཡུག་མཚམས་ག་ལེར་བཞག་ཟིན། གཏིང་རིང་བའི་གནམ་མཐའ་ནས་གློག་འོད་རེ་ཟུང་འཁྱུག་གིན་ཡོད། ཚགས་པར་རྙིང་ཧྲུལ་དང་འགྱིག་ཤོག་ལེབ་མོ་འགའ་སྲང་བར་ནས་ལྷེབ་ཙམ་བྱེད་པ་ནི་རྣམ་ཤེས་ལྡོམ་པོ་ཁྱུ་གཅིག་གིས་ད་དུང་སོ་སོའི་གཏན་འཇགས་ཀྱི་གནས་མལ་མ་རྙེད་པ་འདྲ་བོ་འདུག ཆར་ཤུལ་གྱི་ཆུ་འཁྱིལ་རེ་རེའི་ངོས་སུ་སྲང་བར་གཡས་གཡོན་གྱི་གློག་འོད་འཕྲོས་ནས་མེ་ཏོག་གི་ཚོམ་བུ་སྣ་ཚོགས་འདྲ་བ་ཞིག་ཏུ་བསྒྱུར་འདུག སྐབས་འདིར་ཁྱོད་ཀྱིས་སྲང་བར་ནས་འཐུལ་ཡོང་བའི་དྲི་མ་ཁྱད་མཚར་བོ་ཞིག་སྣོམ་ཐུབ་ལ། དྲི་མ་དེའི་ཀློང་ནས་ཝུ་ཆང་དང་ཟས་ལྷག་གི་བྲོ་བ་ཡ་མཚན་པ་དེ་འདྲ་མང་པོ་ཞིག་ཀྱང་ཀླད་པའི་ནང་བློས་བསླངས་བྱེད་ཐུབ།
མུ་འགོད།
གང་ཡང་གོ་མ་སོང་།
མགོ་རྔ་དང་ནང་དོན་མི་གསལ་བའི་རྩོམ་དེ་མུ་འགོད་གནང་རོགས་ཐུགས་རྗེ་ཆེ།
ཆར་བ་ཆེན་པོ་འབབ་མཚམས་ནས།།
ཚགས་པར་རྙིང་ཧྲུལ་ལྷེབ་ཚུལ་བཤད།
ཆར་བ་ཤོག་བུས་མ་ཁོག་པ་།
ཤོང་བུ་ཆར་བས་མ་ལྡུར་བའི།།
བརྫུན་སྒྲུང་བཤད་པའི་ཨ་ཁུ་ལགས།།
བརྩམས་སྒྲུང་འབྲི་བར་ངོ་མ་ཚ།། ཧ་ཧ་ཧ།
བཙན་བྱོལ་ནང་སྒྲུང་རྩོམ་འབྲི་མཁན་གྲལ་ནས་ཨ་ཁུ་ཀླུ་སྨྱོན་ནི་ཚད་འཛིན་འོས་པའི་སྒྲུང་རྩོམ་འབྲི་མཁན་ཞིག་རེད། ད་ལྟའི་བོད་ཡིག་གི་དྲ་ལམ་དང་གསར་ལམ་མ་དར་བའི་ཡར་སྔོན། ཀླུ་ཡེ་ཤེས་རྒྱ་མཚོ་གྲྭ་རྐྱང་བཅོས་མ་ཞིག་ཡིན་དུས་ཁོང་གིས་སྒྲུང་རྩོམ་གྱི་དེབ་འགའ་ཞིག་མི་ཡུལ་དུ་ཕུད་སོང་བས་དངོས་གནས་དེ་དག་ལ་ལོ་རྒྱུས་དང་། སྤྱི་ཚོགས་ཀྱི་དོན་གནད་ཚང་བའི་གསོན་ཉམས་ལྡན་པ་ཤ་སྟག་རེད། ད་ལན་སླར་ཡང་ཨ་ཁུ་ཀླུ་སྨྱོན་ཚང་གི་(སྲང་ལམ་)འདིའི་ནང་གཞོན་སྐྱེས་སྒྲུང་རྩོམ་འབྲི་མཁན་མང་དག་ཅིག་ཞུགས་ཐུབ་པའི་སྨོན་ལམ་ཡོད།
མུ་འགོད་ཞེས་བཀོད་ཡོད་དུས་རྗེས་སུ་བརྗོད་གཞི་ཚད་ལྡན་ཞིག་ཡོང་རྒྱུ་ཡིན་པ་ཐེ་མི་ཚོམ། ད་ནི་བླ་རྒན་ང་མགྱོག་པོར་གནས སྐོར་ལ་འགྲོ་རན་ཡོད་པས་སྒྲུང་གི་རྔ་མ་རྒྱ་གར་ནས་ཀློག་རྒྱུ་རེད། བུ་དང་བུ་མོའི་འདོད་པའི་སྐོར་ཞིག་མིན་པར་ཤོག