ཀླུ་སྨྱོན།
ངས་སྒེའུ་ཁུང་གི་འཁྲིས་སུ་འགྲེངས་ཏེ་མིག་གི་དབང་པོ་དང་རྣམ་ཤེས་སྲང་ལམ་ལ་གཏོད་མཚམས་བཞག་ནས་ཁ་ཕྱིར་འཁོར་ཏེ་རང་ཁྱིམ་ལ་ལྟ་ཙམ་བྱས། ཉལ་ཁྲི་གཉིས་དང་འབོལ་ཁྲི་རྙིང་གོག་གཅིག དེབ་གསར་རྙིང་མང་པོས་ཕྱུར་བུར་ཁེངས་བསྡད་ཡོད་པའི་དེབ་ཁྲི་གཉིས་དང་ཤོག་སྒམ་ལྔ་དྲུག་ཅིག གློག་ཀླད་སོ་ནི་རྟགས་ཅན་ཞིག་དང་པར་ཆས་ནེ་ཁོན་རྟགས་ཅན་ཞིག པ་སངས་ཀྱི་ཨ་མས་ཉེ་ཆར་ལྷ་ས་ནས་བསྐུར་པའི་རྒྱ་མིའི་ཇ་དེམ་ཆེ་ཆུང་གཉིས། ངའི་ནུ་མོས་མགོ་ལོག་ནས་ཟླ་ཤས་སྔོན་ཁྱེར་ཡོང་བའི་གཡག་ཤ་རྐང་པ་ཞིག ཁྱིམ་མཛེས་ནོར་འཛོམ་གྱི་བུ་མོས་ཁ་སང་འཁྱེར་རྒྱུ་བརྗེད་པའི་འགྱིག་བཟོས་ཁྱི་ཕྲུག་ཅིག ཅ་ལག་མང་ཆེ་བ་ནི་ཕྲུ་གུས་རི་མོ་བྲིས་པ་དང་འདྲ་པར་གོ་རིམ་ཅི་ཡང་མེད་པར་གང་སར་གཡས་འཁྱོར་གཡོན་བསྙེས་སུ་བཀྲམ་འདུག་ཅིང་། ཐ་ན་ཕ་གིའི་རྩིགས་ངོས་ཀྱི་ཆུ་ཚོད་འཁོར་ལོ་ཆེན་པོ་དེ་ཡང་སུ་ཞིག་གིས་མགོ་མཇུག་ལྡོག་སྟེ་བཀལ་འདུག སྐབས་དེར་ངས་རང་གིས་ཀློག་མཚམས་བཞག་པའི་ཆུ་བྱ་སྐེ་རིང་ཞེས་པའི་སྒྲུང་དེབ་དེ་བོར་བརླགས་སུ་ཕྱིན་ནས་ཉིན་བཞི་ཕྱིན་པ་ཡང་ཧོབ་སྟེ་དྲན་བྱུང་། དེབ་དེ་ཁྱིམ་འདི་ནས་བོར་བརླགས་སུ་ཕྱིན་པ་ཡིན་མོད། ཆུ་ཚོད་དང་ཆུ་ཚོད་བསྐྱལ་ནས་བཙལ་ཀྱང་རྙེད་ཐབས་མ་བྱུང་། ངེད་ཚང་གི་ཁང་མིག་ཆུང་ཆུང་འདིའི་རྒྱ་ཁྱོན་གྱི་ཕྱེད་ཀ་ཙམ་དེབ་རྐྱང་རྐྱང་གིས་ཁེངས་བསྡད་ཡོད་པས། དེབ་གཅིག་འཚོལ་དགོས་ན་ངོ་མ་མགོ་བོ་ན་བར་བྱེད། དེབ་རྙིང་པ་དག་ལས་ཤོག་རྡུལ་འཕྱུར་ཏེ་སྐབས་རེར་དབུགས་ཀྱང་འགག་ལ་ཁད་བྱེད་པ་དང་། སྐབས་རེར་པ་སངས་ཀྱི་དུ་སྣེ་མེ་སྟག་ཆུང་ཆུང་ད་དུང་ལུས་བསྡད་པ་དེ་ཚོས་ཚགས་པར་དང་འབྲི་དེབ་མེ་རུ་སྦར་ནས་ཁང་པ་འཚིག་གྲབ་ཀྱང་བྱེད་མྱོང་ན་ཡང་། ཁོང་དང་ངེད་གཉིས་ཀ་དེབ་ཀློག་རྒྱུ་མེད་ན་ཉི་མ་མི་འཁྱོལ་བའི་སྐྱེས་ཕོ་མོ་གཉིས་ཡིན་པས། ངས་ནམ་ཡང་གྲངས་ཀ་མི་ཟིན་པའི་དེབ་འདི་ཚོའི་ཆེད་དུ་ཁོ་ལ་འཁང་ར་དང་ཁ་རྩོད་བྱེད་མ་མྱོང་། སྐབས་རེར་ཁྱིམ་ཧྲིལ་བོ་རྫབ་རྫུབ་ཏུ་གྱུར་པས་སྲང་ལམ་ཛོར་བོ་ཞིག་གི་སྣང་བ་ཡང་དབང་མེད་དུ་སྟེར་བར་བྱེད། དབྱར་ཁ་དང་སྟོན་ཁར་ཤོག་འབུ་སྣ་ཚོགས་ཀྱང་སྒོ་ནས་སྒེའུ་ཁུང་བརྒྱུད་ནས་ནང་དུ་འཛུལ་ཡོང་སྟེ་དེབ་ཀྱི་བར་དུ་ཚང་བཅའ་བ་དང་། ཅོག་ཙེའི་ནང་དུ་སྒོ་ང་གཏོང་བ་སོགས་འབུ་སྲིན་ཚོའི་འཇོན་ཚོད་ཀྱི་ནུས་པ་དེ་ཕྱིར་འདོན་པ་ལ་བསམས་ལ། ཐེངས་མང་པོར་རྒྱུགས་ཐེངས་གཅིག་གིས་དེབ་ཧྲུལ་ཚང་མ་གད་སྙིགས་ཀྱི་ནང་དུ་གཡུག་པ་འམ་སྲང་བར་དུ་སྤུངས་ནས་མེ་ལ་བསྒྲོན་པ། ཡང་ན་ཤོག་སྙིགས་ཉོ་མཁན་ཚོར་འཚོང་བ་སོགས་བྱེད་འདོད་ཀྱང་ལན་གཅིག་མིན་པར་སྐྱེས་མྱོང་མོད། གལ་སྲིད་གྲངས་ལས་འདས་པའི་ཤོག་འབུ་དེ་ཚོ་དམར་གསོད་བཏང་ཚེ་སྐྱེ་བ་ཕྱི་མར་དམྱལ་བ་ཐིག་ནག་ཏུ་སྐྱེ་རྒྱུར་འཇིགས་སྣང་སྐྱེ་གི་འདུག་པ་མ་ཟད། ཚེ་འདི་ལ་ཡང་རླངས་འཁོར་བརྡབ་སྐྱོན་ནམ་སྐས་འཛེག་སྟེང་ནས་འདྲེད་བརྡར་ཤོར་ཏེ་རྐང་ཆག་ལག་ཆག་ཏུ་གྱུར་ན་ཇི་ལྟར་བྱ་བསམས་ནས་ནག་ཉེས་དེ་དག་གསོག་འདོད་མ་སྐྱེས།
དཔེ་ཡག་པོ་འདུག