ཁ་ཚེར་མ།
ཆུང་ནས་མི་ཤེས་གཞོན་ནས་འདྲིས་པའི་ལས་མཐུན་ལམ་གྱི་འགྲོ་རོགས་མ།།
འགྲོགས་ཀྱིན་འགྲོགས་ཀྱིན་གཞུང་རྒྱུད་དྲང་མོས་མི་སེམས་འགུག་པའི་གཤིས་བཟང་མ།།
ང་ཡི་ངག་ན་ཁྱོད་ལ་མཁོ་བའི་གཞས་ཆུང་ཞིག་གི་གླུ་ཚིག་ཅིག།
ཁྱོད་ཀྱི་མངལ་ནས་ཀུན་ནས་མཁོ་བའི་གླེང་རིན་ཡོད་པའི་སྲས་ཤིག་འཁྲུངས།།
ཁྱོད་ཀྱི་སྐྱེས་སྐར་གསལ་བོ་མིན་པས་མང་པོའི་ཁ་ནས་རྩོད་པར་གྲུབ།།
གང་ལྟར་ང་ཡི་རང་སེམས་དྭངས་མོ་ཁྱོད་ལ་གླན་པའི་སྣང་བ་སྐྱིད།།
ལ་ལས་ཆང་རག་ཧུབ་ཀྱིས་འཐུང་བཞིན་ར་བཟིའི་གཏམ་གྱིས་ཁྱོད་ཉིད་གླེང་།།
སྤྲང་བོ་ང་ཡིས་བློ་རྩེ་གཅིག་གིས་ཁྱོད་ཀྱི་ཁབ་ནས་ཚོར་བ་བསྐྱངས།།
ཁྱོད་ཀྱི་གདོང་ན་དུས་རབས་དུ་མའི་རིག་གནས་ཤིག་གི་འཕེལ་འགྲིབ་ཡོད།།
གལ་ཏེ་ཁྱོད་ཉིད་གསོན་པོར་མེད་ཚེ་མི་རབས་དུ་མ་ཇི་ལྟར་སྦྲེལ།།
ཁྱོད་ཀྱི་རིན་ཐང་དོག་ཙམ་མ་ཡིན་གླེགས་བམ་མང་པོའི་ཁུག་ན་ཡོད།།
སྒང་བ་བོད་ན་བློ་སེམས་གཅིག་གིས་ཁྱོད་ཉིད་སྐྱོང་བའི་བྱེད་པོ་དཀོན།།
བྲིས་ན་མི་ཕྲིས་བསྐྱུར་ནི་མི་ཕོད་སྙན་ངག་ཟེར་བའི་དགའ་མ་ཁྱོད།།
རུས་པ་དཀར་པོའི་ཕ་ལ་སིམ་པས་འཇམ་པོའི་གཤིས་ཤིག་ངང་གིས་གྲུབ།།
(སྒང་བ་བོད་ན་བློ་སེམས་གཅིག་གིས་ཁྱོད་ཉིད་སྐྱོང་བའི་བྱེད་པོ་དཀོན།།)
ཁ་ཚེར་མོས་ཁ་གསོན་པོ་འདི་འདྲ་མ་ཤོད་ཨེ་གོ།
རང་སྲོག་ལས་གནས་ཡོད་ཡོད་བཏང་བའི་སྒང་བ་བོད་ཀྱི་དཔའ་བོ་ཚོ།
ཤི་རིན་སྤྲད་ནས་འཇིག་རྟེན་སྐྱོབས་པ་ཀ་ཁའི་འཆི་གསོན་མ་ཡིན་ནམ།