གལ་སྲིད་ལྷོ་ཕྱོགས་ཀྱི་གྲྭ་སར་སྡོད་མྱོང་མཁན་དང་དེར་ལྟ་སྐོར་བྱེད་མྱོང་མཁན་ཞིག་ཡིན་ན། ཁང་ཚན་རེ་རེའི་སྒོ་འགྲམ་དུ་རྒན་གཞོན་བར་མའི་གྲྭ་པ་དག་གིས་འཚང་ཁ་ཤིག་ཤིག་གིས་བོད་ཀྱི་དུས་བབ་དང་ཤེས་བྱ་སོགས་ཚགས་དེབ་དག་ལ་ལྟ་བཞིན་ཡོད་པ་དེ་ནི་གཡོལ་ཐབས་མེད་པའི་དོན་དངོས་ཤིག་རེད་ལ། དེས་ཅི་ཞིག་མཚོན་བཞིན་པ་དང་གང་ཞིག་སྟོན་བཞིན་ཡོད་པ་རེད་ཅེ་ན། དུས་རབས་ཉེར་གཅིག་པའི་གྲྭ་པའི་སྤྱི་ཚོགས་འདི་ནི་ལོ་ངོ་ཉིས་སྟོང་སྔོན་གྱི་རྒྱ་གར་དང་བརྒྱ་ཕྲག་འགའི་སྔོན་གྱི་བོད་པའི་སྤྱི་ཚོགས་ཧ་ཅང་གུ་དོག་པོ་དེའི་འཆིང་རྒྱ་ལས་རིང་དུ་བྲལ་ཟིན་ནས། ད་ལྟའི་འཛམ་གླིང་གསར་པ་འདིའི་མི་གྲལ་དུ་ཚུད་པ་དང་འཚུད་རྒྱུ་དེ་ནི་སུས་ཀྱང་གཡོལ་ཐབས་མེད་པའི་ལོ་རྒྱུས་ཀྱི་འཕེལ་རིམ་ཞིག་ཡིན་པ་དེ་ཡིན་ཞིང་། དེ་བཞིན་གྲྭ་ཤག་མང་པོ་ཞིག་གི་སྒེའུ་ཁུང་ལས་སྒྲ་སྡུད་འཁོར་ལོའི་གློག་གི་རྦ་རླབས་ཀྱིས་ལེ་དབར་ཁྲི་ཕྲག་གི་ཕ་རོལ་ནས་བསྒྲགས་པའི་ཨ་རིའི་རླུང་འཕྲིན་དང་ཨེ་ཤི་ཡའི་རང་དབང་རླུང་འཕྲིན་གཉིས་ཀྱི་གསར་འགྱུར་སྣ་ཚོགས་གླིང་ལྔ་མཚོ་བཞིའི་མཁའ་དབྱིངས་བརྒྱུད་དེ་ཡུལ་གྱར་བ་འདི་ཚོའི་ཉིན་རེའི་འཚོ་བའི་གྲུབ་ཆ་གལ་ཆེན་ཞིག་ཏུ་བསྒྱུར་དང་སྒྱུར་བཞིན་པའི་རྣམ་པ་དེ་མཐོང་ཐུབ། དེ་བཞིན་སངས་རྒྱས་ཀྱི་ཆོག་མཆན་ཡིག་ཆ་སྟོན་རྒྱུ་མེད་པའི་དགོན་པ་རེ་རེའི་འཚོ་རྟེན་དུ་གྱུར་པའི་ཚོང་ཁང་དང་མགྲོན་ཁང་། ཟ་ཁང་དང་དྲ་ཁང་སོགས་དེང་རབས་འཛམ་གླིང་གི་སྤྱི་འབངས་སུས་ཀྱང་ལོངས་སུ་སྤྱོད་ཐུབ་པ་མང་པོ་ཞིག་དུས་རབས་གསར་པའི་གྲྭ་པ་དག་གིས་ཀྱང་ལོངས་སུ་སྤྱོད་བཞིན་པ་དེ་མིག་ལམ་དུ་ཤར་ཡོང་གི་རེད། འདི་ལྟ་བུའི་འཚོ་གནས་ཀྱི་ཆེད་དུ་ནང་འདྲེན་བྱས་པའི་བྱ་དངོས་གསར་པ་རེ་རེ་བཞིན་རྒྱ་མཚོའི་རྦ་རླབས་བཞིན་གཅིག་རྗེས་གཅིག་གིས་དེད་ནས་ཡོང་བའི་དེ་རིང་། ད་དུང་ཁྱིམ་པ་སུན་འབྱིན་ལ་ཁ་གཡར་ནས་གློག་ཀླད་དང་ཁ་པར་གཏན་འགོག་བྱེད་བཞིན་པ་དེ་ནི། ཁྱིམ་པ་སུན་འབྱིན་གྱི་བྱ་སྤྱོད་ངོ་མ་དེ་ངོས་མ་ཟིན་པའི་སྣང་ཚུལ་ཞིག་ཏུ་ཟད་དེ། རྒྱ་གར་ལྷོ་ཕྱོགས་ལྟ་བུར་མཚོན་ན་རྒྱ་གར་རྒྱལ་ཡོངས་ནས་གནས་སྡོད་ཡུལ་མིའི་དཔལ་འབྱོར་ཧ་ཅང་སྐྱོ་བའི་ཡུལ་གྲུ་ཞིག་ཡིན་པས། ཡུལ་འདི་ནས་དགོན་པ་གྲྭ་ཚང་ཁག་ཅིག་གི་ཕྱག་མཛོད་ཚོས་ཕན་ཚུན་འགྲན་བསྡུར་གྱིས་གཙུག་ལག་ཁང་རྒྱལ་པོའི་ཕོ་བྲང་ལྟ་བུ་རེ་བཞེངས་དང་བཞེང་བཞིན་པ་འདི་ནི་ས་གནས་ཡུལ་མིའི་སྣང་ངོར་ཁྱིམ་པ་སུན་འབྱིན་གྱི་ལས་ངོ་མ་ཞིག་དང་། གོང་ས་མཆོག་གིས་དགོན་པའི་འདུ་ཁང་འགྲན་བསྡུར་ལས་གྲྭ་རྐྱང་ཚོའི་འཚོ་བ་དང་འཕྲོད་བསྟེན་གྱི་གནས་སྟངས་ཡར་རྒྱས་སུ་བཏང་ན་ལེགས་པར་གཟིགས་པའི་བཀའ་སློབ་དག་ཆུ་ནང་ལ་དབྱུགས་པའི་རྟགས་མཚན་ཞིག་མ་རེད་དམ། གལ་སྲིད་གློག་ཀླད་དང་ཁ་པར་བཟུང་མི་ཆོག་ན་དབྱིན་ཡིག་ཀྱང་བསླབ་ན་ག་ལ་འགྲིག་སྟེ་དེ་དག་ནི་ཕྱི་རྒྱལ་གྱི་རིག་གཞུང་གི་རྒྱུད་སྐུད་གཅིག་གི་སྟེང་དུ་གནས་པས་སོ།། ངས་འདིར་ཕྱག་མཛོད་ཀླད་མེད་སྐོར་ཞིག་དང་དགེ་བསྐོས་བཙན་པོ་ཁག་ཅིག་གི་སྐོར་ནས་རང་གིས་གང་བསམས་དེ་རྗོད་བྱེད་བཞིན་ཡོད་པ་མ་གཏོགས། ལམ་བསླབ་པ་གསུམ་གྱི་ཉམས་ལེན་དང་ལུང་སྡེ་སྣོད་གསུམ་གྱི་འཆད་ཉན་གྱིས་སྐུ་ཚེ་འདའ་བ་དག་ནི་ནམ་ཡང་གུས་པའི་བསྟན་དང་སྟོན་པ་གཅིག་པའི་ཆོས་གྲོགས་ཡིན་ནོ།།
འོ་ན་བདག་ཀྱང་ཁྱེད་ཀྱི་ཆོས་གྲོགས་ཡིན་པ་འདྲ།
གྲྭ་སའི་ཁོར་ཡུག་འདིར་རྒྱུས་ཡོད་ཚུལ་ལ་བལྟས་ན་ཁྱོད་ཀྱང་གྲྭ་བ་ཞིག་ཡིན་པ་འདྲ།
གྲྭ་སར་རྒྱུས་ཡོད་ན་ངོ་ཚ་ཞིག་རེད་དམ། གྲྭ་བ་ཡིན་ན་ཨ་རིས་འཚོལ་བཞིན་པའི་ནག་ཅན་པ་ཞིག་རེད་དམ།
དེང་སང་རྒྱ་གར་དགོན་པར་གྲ་པ་མང་པོ་ཡོད་པ་ནི་རྡ་ས་གཞུང་ནས་གསར་འབྱོར་བ་ལོ་རྒན་ཚོ་གཏོང་ས་བྱས་པ་དང་། ལོ་རྒན་བོད་ནས་གསར་འབྱོར་བ་འགྲོ་ས་མེད་པ་དེ་ཚོའི་བསྡོད་གནས་རེད། གཞན་ལོ་ཆུང་དེ་ཚོ་ནི་ལ་དག་དང་། མོན། བལ་ཡུལ་སོགས་མཐའ་མཚམས་ཀྱི་པྲུག་གུ་བདག་མེད་དེ་ཚོ་རེད། འ་ཆད་འུ་ཐུག་གི་གནས་ཚུལ་ལ་ཡོད་པ་ལས་རྒྱ་ཆེན་པོ་བཤད་ཡེ་ལྷག་ཡོད་པ་མ་རེད།