ཨ་ནུ་ཐང་བསོད་ནམས།
སྐད་ཡིག་ནི་ཤེས་ཡོན་ཡིན་པས་ག་ཚོད་ཀྱིས་ཤེས་ན་དེ་ཚོད་གྱིས་རང་ལ་ཕན་ཐོགས་བྱེད་པ་ལས་གནོད་བྱེད་དུ་མི་འགྱུར་ལ། གྲུབ་མཐའ་ག་གེ་མོ་ཞིག་གིས་བསམ་བློ་སྒྱུར་བ་དང་གཏན་ནས་མི་འདྲ། ལྷག་པར་དུ་རང་གི་ཕྲུ་གུ་ལ་རང་སྐད་སློབ་པ་དེ་ཕྲུ་གུས་རང་གི་ཕ་མེས་ཀྱི་གནས་སྟངས་ཡག་པོ་ཤེས་ཆེད་དང་། རང་གི་གཉེན་ཉེའམ། ཕ་མེས་ཀྱི་མི་རིགས་ལ་གོ་བརྡ་ཡག་པོ་འཕྲོད་ནས་འབྲེལ་བ་ཡག་པོ་བྱེད་རྒྱུ་དེ་རེད། འབྲེལ་བ་ཡག་པོ་ཞིག་བྱེད་ཐུབ་ན། ཕྲུ་གུ་དེ་ཆེ་རུ་སྐྱེས་ཚེ་རང་ལ་ནང་མི་དང་གཉེན་ཉེ་ཡོད་པ་རྟོགས་ནས་ཁེར་རྐྱང་གི་སྡུག་བསྔལ་མྱོང་མི་དགོས་པའི་ཕན་ཐོགས་ཡོད་པ་མ་ཟད། རང་གི་སྤུན་མཆེད་དང་ཕ་མ། གཉེན་ཉེ་སོགས་ཀྱིས་ཀྱང་ཕྲུ་གུ་དང་ཁ་ཐུག་གིས་སྐད་ཆ་བཤད་ཐུབ་པས་དེ་ནི་ནང་མི་གཅིག་ལ་མཚོན་ན་བདེ་སྐྱིད་ཆེ་ཤོས་དེ་ཡིན། ནང་མི་ལ་དགའ་མཁན་གྱི་མི་ཞིག་ཡིན་ཚེ་རང་གི་ཕ་མ་དང་སྤུན་མཆེད་ལ་ཕྲུ་གུ་ངོ་སྤྲོད་བྱེད་ངེས་ཤིང་། ངོ་སྤྲོད་བྱས་ཏེ་ཕན་ཚུན་གྱི་འབྲེལ་བ་ཡག་པོ་ཞིག་དགོས་ན་སྐད་ཡིག་ནི་འབྲེལ་ཐག་དང་པོ་རེད།
དེར་བརྟེན། ཕྲུ་གུ་སུ་ཞིག་ལ་རང་གི་ཕ་མེས་ཀྱི་སྐད་ཡིག་སློབ་ཏུ་བཅུག་ན། དེ་ཆེར་སྐྱེས་ཚེ་དགའ་བ་སྒོམ་པ་ལས། ཁྱེད་ལ་འཁོན་འཛིན་བྱེད་མི་སྲིད། དེ་ལས་ལྡོག་སྟེ་མ་བསླབ་ན་འཁོན་འཛིན་བྱེད་སྲིད།