ཆུ་སྣ་གར་ཁྲིད་ཕྱོགས་ལ་ངང་གིས་འདུར།

བོང་སྟག་རི་ལུ།

ཀུན་མཁྱེན་འཇམ་པའི་དབྱངས་ཀྱིས་ཤིས་པ་སྩོལ།།
ངག་དབང་དབྱངས་ཅན་ལྷ་མོའི་སྨྱུག་རྩེ་དྲོངས།།
ས་མཐོའི་སྒང་པ་བོད་ཀྱིས་མཐུན་རྐྱེན་སྦྱོར།།
ང་ཚོས་གླེང་གཞི་ཟླུམ་པོ་གཅིག་ཏུ།།
ང་ཚོ་ཆ་བྱད་གཞན་ལ་དགའ་དང་གཅིག།།
གཞན་མི་ང་ཚོའི་གྲལ་དུ་འཚང་དང་གཉིས།།
སྔོན་ནས་བོད་མི་འཐོར་ཞིག་སོང་དང་གསུམ།།
ང་ཚོ་འཇིག་པའི་མཐུན་རྐྱེན་འཛོམས་ནས་འདུག།
ང་ཚོ་རླུང་དང་འཕྲད་ན་གྱང་ཁའི་རྩྭ།།
སེར་བུ་གར་འགྲོའི་རྗེས་སུ་བཙན་གྱིས་མཆོངས།།
ང་ཚོ་གཞན་དང་ཕྲད་ན་གྲམ་པའི་ཆུ།།
ཆུ་སྣ་གར་ཁྲིད་ཕྱོགས་ལ་ངང་གིས་འདུར།།
རི་ནས་ཙག་དང་སེར་བུའི་མར་ལ་དེད།།
གྲོང་ནས་འཕྱ་སྨོད་ཚིག་གིས་ཡར་ལ་དེད།།
རི་གྲོང་བར་ནས་ཤི་མ་གསོན་དུ་བསྡད།།
ང་ཚོ་གནས་ཚང་མེད་པའི་མགྲོན་པོ་ཡིན།།
ང་ཚོའི་མགོན་སྐྱབས་ནམ་མཁའི་ལྷ་ཚོགས་ཡིན།།
ལྷ་ལ་མཆོད་བཀུར་བྱེད་མཁན་ང་ཚོ་ཡིན།།
ང་ཚོ་ཚང་མ་ས་མཐའི་མི་རྐྱང་ཡིན།།
དག་དང་ཇག་ཚོགས་ཕེབས་ནས་འབྲོ་རྐྱང་ཡིན།།
ཀུན་གྱིས་བལྟས་ན་ས་གཞི་བདག་མེད་ཡིན།
དོན་གྱིས་གླེང་ན་ཡོད་ཚད་གཞན་གྱི་ཡིན།།
རྐང་པ་ས་རུ་སྤོས་ནས་གླ་ཆ་སྤྲད།།
མི་ཚེ་དོན་ཡོད་སྙམ་ནས་ལོ་ཟླ་བསྐྱལ།།
ང་ཡི་ཕྱོགས་བཞི་ཐོག་ཁང་གསར་པ་རེ།།
ང་ཡི་གཡས་གཡོན་མི་ཚོགས་རྒྱུས་མེད་རེ།།
ང་ཡི་མདུན་རྒྱབ་བགྲོད་པའི་ལམ་བུ་ཞིག།
ང་ཡི་ཕ་ས་ཡང་སྙིང་གང་དུ་ཡོད།།
དང་པོ་སྐྱ་ཀ་གྲགས་ནས་བརྡ་ཞིག་བརྒྱབ།།
བར་དུ་ཕོ་རོག་ནག་པོའི་ལམ་ཞིག་བསྟན།།
མཐའ་མ་སྤྱང་ཚོགས་འཁོར་ནས་གཟན་ཞིག་རྙེད།།
ཁྱི་སྤྱང་འོ་ཟོའི་བར་ནས་སྣང་བ་མཐུན།།
ང་ཡི་མེས་པོ་རླབས་ཆེན་མི་སྣ་ཞིག།
སུམ་གཉིས་ས་ལ་སྤྱད་པའི་ལོ་རྒྱུས་ཡོད།།
བུ་ཆུང་ང་ནི་དེ་ཡི་ཞབས་འདྲེན་ཞིག།
རང་གི་ཕ་སྐད་དོར་བའི་ང་རྒྱལ་ཡོད།།
ང་ཡི་ཕ་ལོ་རྒོད་པོ་ཤ་གཟན་ཞིག།
བུ་ཆུང་ང་ནི་ཁྭ་ཏ་སྐྱག་གཟན་ཞིག།
འདི་ལྟར་ཕ་ཤུལ་བུ་ཡིས་མ་ཟིན་པའི།།
མི་ཚོགས་མང་པོའི་སྡིག་མཛུབ་ང་ལ་ཀེར།།
ང་ནི་ཨ་མས་བསྐྱངས་པའི་བུ་ཆུང་ཡིན།།
ཤེས་བྱའི་སྐྱེད་ཚལ་འགྲིམས་པའི་སློབ་མ་ཡིན།།
སྒང་པ་བོད་ཀྱི་མི་རབས་རྗེས་མ་ཡིན།།
རང་གི་རིགས་རྒྱུད་གླེང་བའི་ཐ་མ་ཡིན།།