ཟངས་མདོག་དཔལ་རིའི་གནས་ཡིག་གསར་མ།

ཀླུ་སྨྱོན་ཁྲག་འཐུང་གླིང་པ།

སྣང་སྲིད་ཟིལ་གནོན་པདྨ་འབྱུང་གནས་མཆོག །
གང་དུ་གཤེགས་པའི་དག་ཞིང་ཉམས་དགའ་བ། །
ཟངས་མདོག་དཔལ་གྱི་རི་བོའི་གནས་ཡིག་ཅིག །
དཔྱོད་ལྡན་དག་གི་དཔྱད་གཞིར་བདག་གིས་འབུལ། །

དེ་ལ་འདིར་མདོ་རྒྱུད་དུ་མ་ནས་ལུང་བསྟན་པའི་གྲུབ་རིགས་ཀྱི་སྐྱེས་བུ་ཆེན་པོ། གསང་སྔགས་ཀྱི་བསྟན་པའི་བཀའ་བབས་འགྲན་ཟླ་དང་བྲལ་བ། བོད་གངས་ཅན་པ་རྣམས་ལ་བཀའ་དྲིན་མཆོག་ཏུ་ཆེ་བའི་རིག་སྔགས་འཆང་བ། ཨོ་ཌི་ཡ་ནའམ་ཨུ་རྒྱན་གྱི་ཡུལ་དུ་སྐུ་འཁྲུངས་པའི་སློབ་དཔོན་པདྨ་སམྦྷ་ཝའམ་གུ་རུ་རིན་པོ་ཆེ་པདྨ་འབྱུང་གནས་ཞེས་མཚན་སྙན་པར་གྲགས་པ་མཆོག་གིས། སྤྱི་ལོའི་དུས་རབས་བརྒྱད་པའི་དུས་དཀྱིལ་དུ་བོད་ཀྱི་ལྷ་འདྲེ་གདུག་པ་ཅན་རྣམས་ཟིལ་གྱིས་མནན། རྗེ་འབངས་ཉེར་ལྔ་སོགས་སྣོད་ལྡན་གྱི་སློབ་མ་རྣམས་ལ་མདོ་རྒྱུད་སྤྱི་དང་ཁྱད་པར་མན་ངག་རྫོགས་པ་ཆེན་པོའི་ཆོས་སྐོར་དང་དཔལ་ཆེན་རྡོ་རྗེ་གཞོན་ནུའི་ཆོས་སྐོར་སོགས་གསང་ཆེན་སྔགས་ཀྱི་ཆོས་འཁོར་ལེགས་པར་བསྐོར་ཚར་རྗེས། བོད་ཀྱི་མ་འོངས་ལུང་བསྟན་དུ་མ་འདོམས་པར་མཛད་པ་མ་ཟད། ནངས་རེ་དགོང་རེར་བོད་ཀྱི་དོན་ལ་འབྱོན་པའི་ཞལ་བཞེས་ཟབ་མོ་ཡང་གནང་ཞིང་། གཟུངས་མ་གཏེར་ཆེན་ཡེ་ཤེས་མཚོ་རྒྱལ་དང་རྒྱལ་སྲས་མུ་ཏིག་བཙན་པོ་སོགས་རྗེ་འབངས་རྣམས་ཀྱིས་མཐའ་མའི་སྐྱེལ་མ་ཇི་ལྟར་ཞུས་པ་དང་ཁོང་ཅག་གིས་རང་རང་གི་མཉམ་བཞག་ཡེ་ཤེས་ཀྱིས་སློབ་དཔོན་ཁོང་གང་དུ་གཤེགས་ཚུལ་ཇི་ལྟར་གཟིགས་པའི་ཚུལ་ནི་བཀའ་ཐང་སྡེ་ལྔ་ལས། ཟི་ཁྲོན་མི་རིགས་དཔེ་སྐྲུན་ཁང་གི་པར་མའི་ཤོག་ངོས ༦༠༨ པར།
འཛམ་བུའི་གླིང་ཉེ་སོག་ཀའི་ཡུ་བ་ལ༔ སྲིན་པོའི་ཡུལ་གླིང་ཆེན་པོ་ལྔ་ཡོད་དེ༔ དེ་ཉིད་ཨུ་རྒྱན་ཡུལ་དང་ཐག་ཉེ་ལ༔ དབུས་ན་ཟངས་མདོག་དཔལ་རི་ཞེས་བྱ་བ༔ སྲིན་པོའི་གྲོང་ཁྱེར་ལྔ་བརྒྱས་བསྐོར་པ་ཡི༔ ཤར་ན་ལིངྐ་པྰུ་རུ་བྱ་བ་ཡོད༔ ལྷོ་ན་སྲིན་པོའི་གྲོང་ཁྱེར་དགའ་བ་ཅན༔ ནུབ་ན་ཀོ་ཀ་ཐང་དཀར་གླིང་ཞེས་དང༔ བྱང་གི་ཕྱོགས་ལ་སྲིན་ཡུལ་བྱན་ལག་ལྗོངས༔ ཤར་ལྷོའི་མཚམས་ན་ཟོ་མ་པྰུ་རིའི་མཚོ༔ ལྷོ་ནུབ་མཚམས་ན་བམ་རི་ཐོད་པ་མཁར༔ ནུབ་བྱང་མཚམས་ན་མ་ལ་གནམ་ལྕགས་རྩེ༔ བྱང་ཤར་མཚམས་ལ་ནལ་བྱིའི་དུར་ཁྲོད་རྣམས༔ སྲིན་པོའི་གྲོང་ཁྱེར་ལྔ་བརྒྱ་ལྔ་བརྒྱས་བསྐོར༔ ཞེས་ཟངས་མདོག་དཔལ་རི་སིངྒ་ཀའི་རྒྱལ་ཁབ་ཀྱི་ཡུལ་དབུས་སུ་ཡོད་པ་བསྟན་པ་ཙམ་གཏོགས། འཛམ་གླིང་སྟེ་རྒྱ་གར་གྱི་ས་དབྱིབས་སོག་ཀའི་དབྱིབས་ཀྱི་ཡུ་བར་ཐག་ཉེ་བའི་ཕྱོགས་སུ་ཡོད་པ་ཚུན་ཆད་གསལ་བོར་གསུངས་འདུག་ཅིང་།
ཡང་ཤོག་ངོས ༦༩༡ ནས ༧༠༣བར།
དེ་ནས་རྒྱལ་སྲས་མུ་ཏིག་བཙན་པོ་ནི༔ རྗེ་འབངས་ཉི་ཤུ་རྩ་ལྔས་བསྐོར་པ་དང༔ མཁན་པོ་ཤྰཀྱ་བསོད་ནམས་གཙོ་བྱས་པའི༔ བོད་ཀྱི་རབ་ཏུ་བྱུང་བ་ཐམས་ཅད་དང་། བཻ་རོ་ཙ་ན་སྐ་ཅོག་སྣ་དྲངས་པའི༔ བོད་ཀྱི་ལོ་ཙྰ་མཁས་པ་ཐམས་ཅད་དང༔ མཐུ་མཁན་སངས་རྒྱས་ཡེ་ཤེས་སྣ་དྲངས་པའི༔ བོད་ཀྱི་སྔགས་ནག་མཐུ་མཁན་ཐམས་ཅད་དང༔ སྔགས་པ་རྡོ་རྗེ་བདུད་འཇོམས་སྣ་དྲངས་པའི༔ བོད་ཀྱི་རྔ་བརྡུང་འཕྲེང་ཐོགས་ཐམས་ཅད་དང༔ བླ་སྨན་ཉང་བཙན་ཤི་ལས་སྣ་དྲངས་པའི༔ བོད་ཀྱི་སྨན་དཔྱད་བྱེད་པ་ཐམས་ཅད་དང༔ བླ་མཁྱེན་ལྗང་སྟོན་ཁུ་ལུས་སྣ་དྲངས་པའི༔ བོད་ཀྱི་གབ་རྩེ་འདིངས་པ་ཐམས་ཅད་དང༔ ཡོན་བདག་མཁར་ཆེན་རྒྱལ་གྱིས་སྣ་དྲངས་པའི༔ བོད་ཀྱི་ཕོ་སྐྱེས་ཡོན་བདག་ཐམས་ཅད་དང༔ མཁའ་འགྲོ་ཡེ་ཤེས་མཚོ་རྒྱལ་སྣ་དྲངས་པའི༔ བོད་ཀྱི་བུད་མེད་བུ་མོ་ཐམས་ཅད་ཀྱིས༔ དཔལ་མོ་དཔལ་ཐང་སྐྱེལ་ཐུང་ཞམ་རིང་བྱས༔ སྟོད་ཀྱི་མངའ་རིས་ཅོག་གེའི་ཡུལ་ཞེས་པ༔ བྲག་ནི་སྲིན་པོ་ཁྲོས་འདྲའི་ཡུལ་ཚུགས་བསྐྱལ༔ སློབ་དཔོན་ཐུགས་རྗེ་ཆེན་པོའི་སྒོམ་ལུང་དང༔ མི་རེ་ལ་ནི་ཞལ་གདམས་ཆོས་རེ་གསུངས༔ ཞེས་པ་ནས།
ང་འགྲོ་ལྷོ་ནུབ་སྲིན་པོའི་ཡུལ་དུ་འགྲོ༔ གདོང་དམར་སྲིན་པོ་འདུལ་དུ་འགྲོ་ཙ་ན༔ སེམས་ཅན་ཐམས་ཅད་བདེ་ལ་བཀོད་དུ་འགྲོ༔ ང་འགྲོ་ཟངས་མདོག་དཔལ་རིའི་ཕོ་བྲང་འགྲོ༔ ཟངས་མདོག་དཔལ་རིའི་ཕོ་བྲང་འགྲོ་ཙ་ན༔ སྲིན་པོ་ཐམས་ཅད་ཆོས་ལ་འཛུད་དུ་འགྲོ༔ རྗེ་འབངས་ཡུན་དུ་སྐུ་ཁམས་བདེ་བར་བཞུགས༔ ཞེས་པ་ནས།
འཇའ་ཚོན་འོད་དུ་འཁྱིལ་ལེར་ནམ་མཁར་བཞུད༔ རྗེ་འབངས་ཉ་མོ་བྱེ་ཚན་བོར་བ་ལྟར༔ ལྟོགས་སྐོམ་མ་དྲན་གུང་ཐང་ལ་ཁར་ལུས༔ དེ་ནས་རྒྱལ་བློན་རྗེ་འབངས་འཁོར་བཅས་ཀྱིས༔ མང་ཡུལ་སྤྱི་གྲོང་རོང་ཐང་ཤོ་རྫིང་མཐར༔ ཉི་ཤུ་ལྔ་བར་མཉམ་པར་བཞག་ནས་སུ༔ ཉི་དྲོར་སློབ་དཔོན་བཞུད་པའི་ཕྱི་ལ་བལྟས༔ ཉི་ཟེར་གསེབ་ནས་ཕར་ལ་བྱ་རོག་ཙམ༔ ཕྲིག་ཕྲིག་འོད་དུ་ལམ་ལམ་བྱས་ནས་བཞུད༔ དེ་ནས་ཕུག་རོན་ཙམ་དང་བྱེའུ་ཙམ༔ སྦྲང་བུ་ཙམ་དང་སྲོ་མ་ཙམ་སོང་ནས༔ དེ་ནས་བལྟས་ཀྱང་མིག་གིས་མ་མཐོང་སྟེ༔ མཉམ་པར་བཞག་ཅིང་བལྟས་ཀྱང་མ་མཐོང་བར༔ དགོངས་ཁ་མཉམ་བཞག་ཉི་མ་ཟེར་ཙམ་ན༔ “རྒྱ་གར་ཕར་བརྒལ་” ཨུ་རྒྱན་མ་སླེབ་པར༔ འཛམ་བུ་ཟ་རིའི་ཁར་གཤེགས་བཞུགས་པར་མཐོང༔ དེ་ནས་ནངས་པར་མཉམ་བཞག་བལྟས་པ་ཡིས༔ སིངྒ་ལ་གླིང་ལྕགས་ཀྱི་གྲོང་ཁྱེར་འགྲམ༔ ལྗོན་ཤིང་ཙམ་པ་ཀ་ཡི་བསིལ་གྲིབ་བཞུགས༔ ཅང་ཤེས་རྟ་མཆོག་གསེར་གྱི་བྱེ་མ་འགྲེ༔ སྨན་གྱི་རྒྱལ་པོ་སི་ཏ་ཟ་བ་མཐོང༔ སློབ་དཔོན་དྲུང་ན་སྲིན་པོའི་བུ་མོ་ནི༔ རབ་མཛེས་གཞོན་ནུ་སྟོང་ཕྲག་གཅིག་འདུས་ནས༔ ཆོས་ཀྱི་འོད་ཟེར་ཕོག་ནས་མོས་པ་མཐོང༔ སྲིན་པོ་སྲིན་མོ་ལྕགས་ཁང་སྒོ་མེད་དུ༔ སྲིན་པོའི་རྒྱལ་པོ་ཐོད་འཕྲེང་རྩལ་དུ་བཞུགས༔ སྲིན་པོ་ཐམས་ཅད་འདུད་ཅིང་གུས་པར་མཐོང༔
ཞེས་པ་ལོ་སྟོང་ཕྲག་གི་སྔོན་དུ་གུ་རུ་རིན་པོ་ཆེ་མཆོག་གི་ཐུགས་ཟིན་གྱི་གཟུངས་མ་ཁྱད་དུ་འཕགས་པ་མཁའ་འགྲོ་ཡེ་ཤེས་མཚོ་རྒྱལ་གྱིས་ཕྱག་བྲིས་བགྱིས་ཏེ་ཡར་ལུང་ཤེལ་བྲག་ཏུ་གཏེར་དུ་སྦས་པ། ཕྱིས་སུ་གཏེར་སྟོན་གྱི་རྒྱལ་པོ་གུ་རུ་ཨུ་རྒྱན་གླིང་པས་གཏེར་ནས་བཏོན་པ་དང་། རྒྱལ་དབང་ལྔ་པ་ཆེན་པོས་ཐུགས་འགན་བཞེས་ནས་པར་དུ་བཞེངས་པའི་དཔེ་རྒྱུན་ལས་བྱུང་བའི་ཁུངས་ཐུབ་ཡིག་རྙིང་འདི་ཚོ་དཔང་པོར་བཞག་སྟེ་དཔྱད་ན། སློབ་དཔོན་རིན་པོ་ཆེ་ཁོང་ཉིད་བོད་ཡུལ་ནས་ཕེབས་ཡུལ་གྱི་ཟངས་མདོག་དཔལ་རི་དེ་ནི་བོད་ཀྱི་ནུབ་ཕྱོགས་མངའ་རིས་ཀྱི་མཚོ་མ་ཕམ་པའི་འགྲམ་དུ་ཡོད་པའི་མ་པང་སྤོས་མོ་མཁར་དང་། སྤོ་མོ་མཁར། པདྨ་མཁར་ཞེས་པའི་གནས་དེ་གཞར་ཡང་མ་ཡིན་པར། ཟངས་མདོག་དཔལ་གྱི་རི་བོ་དེ་ནི་བོད་ཡུལ་ནས་གཞལ་ནས་ལྷོ་ནུབ་ཀྱི་ཡུལ་དུ་ཁེལ་ཡོད་པའི་རྒྱ་གར་དང་ཨོ་རྒྱན་གྱི་ཡུལ་གཉིས་བརྒལ་པའི་ཕ་མཐའ། མཐའ་ཡས་རྒྱ་མཚོ་ཆེན་པོའི་ཀློང་གི་གླིང་ཕྲན་ཞིག་ཡིན་པས། སློབ་དཔོན་རང་ཉིད་བོད་ཡུལ་དུ་བཞུགས་དུས་བོད་ཀྱི་ལྷོ་ནུབ་ཏུ་ཡོདཔའི་སྲིན་ཡུལ་ཞིག་ཡིན་ཚུལ་གསུངས་པ་དང་། དེ་དུས་སྟོད་མངའ་རིས་སྐོར་གསུམ་ནི་བོད་ཀྱི་བཙན་པོ་རིམ་བྱོན་གྱི་མངའ་རིས་སུ་ཚུད་ནས་ལོ་མང་ཕྱིན་ཟིན་པས། དེ་རུ་སློབ་དཔོན་རིན་པོ་ཆེ་ཕེབས་ན་མ་གཏོགས་འདུལ་མི་ཐུབ་པའི་སྲིན་པོ་ཤ་སྟག་གིས་གང་བ་ཞིག་ལོ་རྒྱུས་གང་དུ་ཡང་མེད་ལ། བོད་རང་གི་ངག་རྒྱུན་ལོ་རྒྱུས་སུ་ཡང་སྟོད་མངའ་རིས་སུ་སྲིན་པོའི་ཡུལ་ཁམས་ཤིག་ཡོད་ལུགས་སུ་ལ་ཡང་མ་གྲགས། དེ་ལས་ལྡོག་སྟེ་ལིངྐའི་ཡུལ་ལམ་ཤྲི་ལིངྐའི་ཡུལ་ཁམས་དེར་སྲིན་པོའི་འཇིགས་པ་ཆེ་བ་ནི་རྒྱ་ནག་གི་བཙུན་པ་ཧྥ་ཤྰན་གྱི་ལམ་ཡིག་ལས། རྒྱ་གར་པར་མའི་ཤོག་ངོས་༩༡ གླིང་དེ་ནི་དང་པོར་མི་མེད་ཅིང་། དེ་ན་གནས་པའི་སེམས་ཅན་ནི་བདུད་དང་གནོད་སྦྱིན་དང་། ཀླུ་དག་གནས་བཞིན་པ་ཡིན་ཡང་། ཡུལ་གྲུ་གཞན་གྱི་ཚོང་པ་རྣམས་ཀྱིས་དེ་དག་དང་ཉོ་ཚོང་བྱེད་མུར་ཡོད་དེ། ཞེས་དང་། དེའི་མཆན་འགྲེལ་ལྟ་བུར་སོག་པོ་བློ་བཟང་རྟ་དབྱངས་ཀྱིས། སིངྒ་ལའི་གླིང་གི་སྟོབས་འབྱོར་དང་གཙུག་ལག་ཁང་རྟེན་གསུམ་དང་དགེ་འདུན་འཆད་ཉན་བཅས་དང་། སྔོན་གྱི་སྲིན་མོའི་རྫོང་སོགས་ད་ལྟའང་ཡོད་ཅེས་གླིང་སྐོར་བ་བོད་སོག་མང་པོ་ལས་དངོས་སུ་ཐོས། ཞེས་དང་། དེའི་རྗེས་སུ་རྒྱ་གར་དུ་བྱོན་པའི་སློབ་དཔོན་ཐང་ཟིན་གྱི་ལམ་ཡིག་བམ་པོ་དགུ་པ་ལས། རྒྱ་གར་པར་མའི་ཤོག་ངོས་༢༦༠ ། ཡུལ་དེའི་ཤར་ལྷོའི་མཚམས་སུ་རི་བོ་ལིངྒ་ཡོད། དེ་ཤིན་ཏུ་བགྲོད་དཀའ་བ་སྲིན་པོའི་གནས་ཡིན་ཏེ། འབྱུང་པོའི་ཁམ་ཁྱིམ་དག་ཡོད་ཅིང་། སྔོན་སྟོན་པས་གནས་འདིར་ལངྒར་གཤེགས་པའི་མདོ་གསུངས། ཞེས་བྱུང་། རི་བོ་ལིངྒ་དེ་ནི་ཟངས་མདོག་དཔལ་རིའི་མིང་གཞན་ཞིག་ཡིན་ངེས།
གླིང་ཕྲན་དེའི་འདབས་སུ་ཡོད་པའི་རྒྱ་མཚོའི་བྱེ་མ་གསེར་ལྟར་འཚེར་བའི་ནང་དུ་སྐབས་རེར་གནའ་བོའི་རྒྱ་གར་གྱི་གཏམ་རྒྱུད་ཁྲོད་དུ་ཡོད་པའི་རྟ་ཡི་རྒྱལ་པོ་ཞིག་གིས་སྐབས་རེར་འགྲེ་ལྡོག་བྱེད་པ་ཡང་མཐོང་རྒྱུ་ཡོད། ད་དུང་རྒྱ་གར་བའི་ངག་རྒྱུན་གཏམ་རྒྱུད་དང་དངོས་བྱུང་ལོ་རྒྱུས་གཉིས་ཀའི་ཁྲོད་དུ་རླུང་ལྟར་གྲགས་པའི་སྲིན་པོའི་རྒྱལ་པོ་བཞུགས་ས་རྔ་ཡབ་ལིངྐའི་ཡུལ་དེ་ནི་རྒྱ་གར་ལྷོ་ཕྱོགས་སུ་ཚོང་པ་མང་པོ་རྟག་པར་གྲུ་གཟིངས་ལ་བསྡད་ནས་རྒྱ་མཚོ་ལས་ཐོན་པའི་རིན་པོ་ཆེའི་རིགས་མང་པོ་ལེན་དུ་འགྲོ་ས་ཞིག་ཡིན་པ་དང་།
བོད་ཀྱི་ལོ་རྒྱུས་ཞིབ་འཇུག་པ་ཚངས་དབང་དགེ་འདུན་བསྟན་པས་ཟངས་མདོག་དཔལ་རི་མངའ་རིས་སུ་ཡོད་པའི་སྒྲུབ་བྱེད་དུ་དྲངས་པའི་བཙུན་མོ་བཀའ་ཐང་གི་ལུང་ཚིག བོད་དང་ཞང་ཞུང་གཉིས་ཀྱི་མཚམས་སུ་བྱོན། །མ་ཕམ་གཡུ་མཚོ་ནག་མོའི་འགྲམ་དུ་བཞུགས། །པད་མ་རྒྱས་པའི་ལྷ་ཁང་མཆོད་པ་ཕུལ། ། ཞེས་པའི་ལུང་དེ་རང་གིས་སྐབས་དེར་ཟངས་མདོག་དཔལ་རི་ཞེས་མི་འབོད་པར་པད་མ་རྒྱས་པའི་ལྷ་ཁང་ཞེས་འབོད་པ་བསྟན་ཡོད་པས། ཨུ་ཚུགས་ཀྱིས་གཡག་སྣ་འཕུག་འདོད་པ་ཡ་མཚན་གྱི་གནས་སུ་མཆིས།
གཞན་ཚངས་དབང་པས་ལུང་དྲངས་པའི་ཉེ་ཆར་ཆོས་འཕེལ་གྱིས་བརྩམས་པའི་༼མངའ་ རིས་ཁུལ་གྱི་ལམ་ཡིག༽་བྱ་བ་ལས། བྱིའུ་དགོན་ནི། སྒྲུབ་ཕུག་གི་སྟེང་དུ་པད་རྒྱལ་ལྷ་ཁང་ཞེས་པ་ཡོད། རི་བོའི་དབྱིབས་ནི་ཟངས་མདོག་དཔལ་རི་འདྲ་ལ་རྒྱབ་རི་ནི་རི་བོ་མ་ལ་ཡ་ཡིན་ཞེས་གསུངས། ཞེས་པ་འདིས་ཟངས་མདོག་དཔལ་རིའི་དབྱིབས་དང་འདྲ་བོ་ཡོད་པ་ལས་དེ་ལྟར་བཏགས་པ་མ་གཏོགས་ཟངས་མདོག་དཔལ་རི་དངོས་ལ་ངོས་འཛིན་བྱས་པའི་སྒྲུབ་བྱེད་ཅི་ཡང་མ་རེད། རིགས་པ་འདི་དག་གིས་ནི་བོད་ཡུལ་དུ་པོ་ཏྰ་ལ་ཞེས་པའི་རི་བོ་དང་ན་ལནྡྲ་ཞེས་པའི་དགོན་པ་ཡོད་པས་དེ་དག་དངོས་ཡོད་པར་སྒྲུབ་མི་ཐུབ་པ་དང་འདྲའོ།།

རིག་འཛིན་འཇིགས་མེད་གླིང་པས་མཛད་པའི་ཟངས་མདོག་དཔལ་རིའི་སྨོན་ལམ་ལས།
ཨེ་མ་ཧོ༔ འདི་ནས་ཉི་མ་ལྷོ་ནུབ་མཚམས་ཤེད་ན༔
གནས་ཆེན་རྡོ་རྗེ་གདན་གྱི་ནུབ་བྱང་མཚམས༔
རྔ་ཡབ་གླིང་ཕྲན་ཟ་བྱེད་སྲིན་པོའི་ཡུལ༔
དུས་གསུམ་སངས་རྒྱས་རྣམས་ཀྱིས་བྱིན་བརླབས་པའི༔
གླིང་མཆོག་ཁྱད་པར་ཅན་ལ་གསོལ་བ་འདེབས༔
ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔
བཀོད་པ་ལྷུན་གྲུབ་ཙིཏྟའི་ས་འཛིན་སྤོ༔
རྩ་བ་གདེངས་ཅན་འཇོག་པོའི་ཐོད་དུ་བཅིང༔
སྐེད་པར་ལུས་མེད་མཁའ་འགྲོས་ཚོགས་འཁོར་བསྐོར༔
རྩེ་མོ་གཟུགས་ཁམས་བསམ་གཏན་སྙོགས་པ་ལྟའི༔
ཟངས་མདོག་དཔལ་གྱི་རི་བོར་སྐྱེ་བར་ཤོག༔
ཅེས་པ་འདིའི་འབྲུ་རེ་རེ་བཞིན་དེད་ནས་ཟངས་མདོག་དཔལ་རི་གར་ཡོད་ཞིབ་འཇུག་ཅིག་བྱ་སྟེ།

ཨེ་མ་ཧོ༔ འདི་ནས་ཉི་མ་ལྷོ་ནུབ་མཚམས་ཤེད་ན༔ འདི་ནས་ཞེས་པའི་འདི་སྒྲས་སྙེག་ས་ནི་རིག་འཛིན་འཇིགས་མེད་གླིང་པ་རང་ཉིད་བཞུགས་ཡུལ་དབེན་གནས་ཚེ་རིང་ལྗོངས་ཡིན་ལ། དེ་ནས་གཞལ་ན་ཉི་མ་ལྷོ་ནུབ་ཀྱི་ཕྱོགས་སུ་ཁེལ་པའི་ས་ཆ་ནི་རྒྱང་རིང་གི་ཤྲྰི་ལངྐའི་ཡུལ་རེད་གཏོགས་བོད་རང་གི་བྱེ་བྲག་སྟོད་མངའ་རིས་ཀྱི་མཚོ་མ་ཕམ་པའི་འགྲམ་དེ་གཏན་ནས་མ་ཡིན།

གནས་ཆེན་རྡོ་རྗེ་གདན་གྱི་ནུབ་བྱང་མཚམས༔ ཞེས་པའི་ཚིག་འདི་ནི་ཨོ་རྒྱན་ཡུལ་གྱི་གནས་ངོས་འཛིན་བྱེད་པར་ཕན་པའི་ཚིག་ཅིག་རེད་མ་གཏོགས་ཟངས་མདོག་དཔལ་རིའི་གནས་ངོས་འཛིན་བྱེད་པའི་ཚིག་ཅིག་གཏན་ནས་མ་ཡིན་པར་འདོད། ཟངས་སྲིད་ཟངས་མདོག་དཔལ་རི་བོད་དམ་བོད་ཀྱི་འདབས་འབྲེལ་ས་ཆ་ཞིག་ཡོད་ན། གནས་ཀྱི་ས་ཕྱོགས་དང་པོར་བོད་ཀྱི་ལྷོ་ནུབ་དང་། དེ་ནས་རྡོ་རྗེ་གདན་དབུས་སུ་བཞག་ནས་ཡང་སྐྱར་ཕྱིར་བོད་དུ་འཁོར་ཏེ་ས་ཕྱོགས་གང་ཡིན་གསུང་དགོས་དོན་ག་ལ་ཡོད་དེ་མེད་དོ།། སློབ་དཔོན་རིན་པོ་ཆེ་ནི་དུས་གསུམ་མཁྱེན་པ་ཞིག་ཡིན་པས། གངས་རིན་པོ་ཆེ་དང་མཚོ་མ་ཕམ་པ་ངོ་ཤེས་མཁན་ཞིག་ག་ལ་ཡིན་ཏེ་མིན་པས། དང་པོ་རང་ནས་ཟངས་མདོག་དཔལ་རི་གངས་རིན་པོ་ཆེ་ཏི་སེ་དང་མཚོ་མ་ཕམ་པའི་འགྲམ་དུ་ཡོད་ལུགས་གསུང་ཆོག་པ་གང་ཞིག་ལ་དེ་ལྟར་རྩ་བ་ནས་གསུངས་མེད་པ་འདི་ཁོ་ནས་ཀྱང་ཟངས་མདོག་དཔལ་རི་དེ་བོད་ནས་ཐག་རིང་གི་ས་ཆར་ཡོད་པ་དེ་རིགས་པས་བརྟགས་ན་ཤེས་ནུས་པ་ཞིག་རེད། བདག་གིས་བསམས་ན། གོང་གི་ཚིག་བཅད་དེ་ནི་མི་སྙིང་ཁམས་ཅན་ཞིག་གིས་རང་བཟོའི་ཚིག་རྡོག་འགའ་རིག་འཛིན་འཇིགས་མེད་གླིང་པའི་གསུང་གི་བར་དེར་བཙན་གྱིས་བཅུག་པ་རེད་འདུག

རྔ་ཡབ་གླིང་ཕྲན་ཟ་བྱེད་སྲིན་པོའི་ཡུལ༔ ཞེས་པའི་ཚིག་འདིས་ཟངས་མདོག་དཔལ་རི་ཆགས་སའི་རྒྱལ་ཁབ་དེ་རྒྱ་མཚོའི་དཀྱིལ་གྱི་གླིང་ཕྲན་ཞིག་ཡིན་པར་ཧ་ཅང་གསལ་པོའི་སྒོ་ནས་བསྟན་པ་དང་། ཟ་བྱེད་སྲིན་པོའི་ཡུལ་ཞེས་པ་དེས་སྔོན་བྱུང་གི་གཏམ་རྒྱུད་ཆེས་མང་པོ་ཞིག་གི་ཁྲོད་དུ་ཁྱབ་ཆེན་པོ་ཡོད་པའི་སྲིན་རྒྱལ་ལིངྐ་མགྲིན་བཅུའི་ཡུལ་དེ་བསྟན་ཡོད་ཅིང་། རྒྱལ་པོ་དགའ་བྱེད་དང་མཛེས་མ་སི་ཏ་གཉིས་ཀྱི་གཏམ་རྒྱུད་ལ་ཆ་རྒྱུས་ཅུང་ཟད་ཅིག་ཡོད་མཁན་ཞིག་ཡིན་ན། ཤྲྰི་ལངྐའི་ཡུལ་འདིས་གནའ་དུས་སྲིན་པོས་གང་བའི་ཡུལ་ཁམས་ཤིག་ཡིན་པ་མི་ཤེས་རྒྱུ་ཅི་ཡོད།

བཀོད་པ་ལྷུན་གྲུབ་ཙིཏྟའི་ས་འཛིན་སྤོ༔ ཞེས་པའི་ཚིག་འདིས་རི་འདིའི་དབྱིབས་བཀོད་བསྟན་ཡོད་ཅིང་། ཤྲྰི་པ་ད་འདིའི་དབྱིབས་ནི་མིའི་སྙིང་གི་དབྱིབས་འཁྲུལ་བ་མེད་པར་གྲུབ་ཡོད་པ་དང་། སྟོན་དཔྱིད་ཀྱི་དུས་སུ་ཁ་དོག་ཀྱང་སྙིང་ཤའི་མདོག་རང་དུ་མངོན་ཡོང་།

རྩ་བ་གདེངས་ཅན་འཇོག་པོའི་ཐོད་དུ་བཅིང༔
ཤྲི་པ་དྷའམ་ཟངས་མདོག་དཔལ་རི་རང་ཉིད་ལས་ངོ་མཚར་བའི་རྦབ་ཆུ་སྣ་ཚོགས་ཆལ་ཆིལ་དུ་འབབ་པ་དག་རི་རྩར་མཚེའུར་འཁྱིལ་བ་དང་། གྲུ་གཟིངས་ཀྱིས་བགྲོད་དགོས་པའི་གཙང་ཆེན་ཞིག་གནས་རིའི་ཉེ་འདབས་སུ་གྱ་གྱུར་བཞུར་བཞིན་ཡོད་པས། ཟངས་མདོག་དཔལ་རིའི་རྩ་བའམ་རི་འདབས་དེར་ཀླུ་རྒྱལ་འཇོག་པོའི་གནས་མེད་པར་སུ་ཡིས་ཁ་ཚོན་གཅོད་ཐུབ་བམ།

སྐེད་པར་ལུས་མེད་མཁའ་འགྲོས་ཚོགས་འཁོར་བསྐོར༔ ཞེས་པའི་ཚིག་འདིའི་བསྟན་བྱ་ནི། ཟངས་མདོག་དཔལ་རི་འདིའི་རི་རྐེད་དུ་ངོ་མཚར་བའི་བྲག་ཕུག་སྣ་ཚོགས་ཡོད་པ་དང་། དེ་དག་གི་ནང་དུ་མཁའ་སྤྱོད་དང་ས་སྤྱོད་ཀྱི་མཁའ་འགྲོ་མ་རྣམས་ཀྱིས་གསང་ཆེན་སྔགས་ཀྱི་བརྡ་སྐད་སྒྱུར་བཞིན་དཔའ་བོ་མཁའ་འགྲོའི་བྲོ་གར་འཁྲབ་བཞིན་དགའ་བ་བཞི་དང་བཅུ་དྲུག་གི་ལང་ཚོའི་རྩེད་འཇོ་སྣ་ཚོགས་དང་བཅས་བམ་ཆེན་ཚོགས་ཀྱི་འཁོར་ལོར་དུས་རྟག་ཏུ་རོལ་བཞིན་ཡོད་ཚུལ་གསུངས།

རྩེ་མོ་གཟུགས་ཁམས་བསམ་གཏན་སྙོགས་པ་ལྟའི༔ ཞེས་པའི་ཚིག་རྐང་འདིའི་བསྟན་བྱ་ནི། ཟངས་མདོག་དཔལ་རི་འདིའི་དཔང་ནི་ཧ་ཅང་མཐོ་ཞིང་། རྡོ་སྐས་གྱ་གྱུ་མ་ལྔ་སྟོང་ལྷག་བགྲོད་ན་ད་གཟོད་རི་རྩེར་བསླེབ་ཐུབ་པ་དང་། རི་རྩེ་ནས་ཉི་མ་འཆར་དུས་ཀྱི་མཛེས་ལྗོངས་ངོ་མཚར་ཞིང་ཡིད་འཕྲོག་པ་མཐོང་བ་དེ་བསྟན།

ཟངས་མདོག་དཔལ་གྱི་རི་བོར་སྐྱེ་བར་ཤོག༔ ཅེས་པ་འདི་ཚིག་འདི་ནི་ཧ་ཅང་གནད་འགག་ཆེ་བ་སྟེ། དཔལ་གྱི་རི་འདིའི་སྟོན་ཁའི་དུས་ཚིགས་ཀྱི་ཁ་དོག་ནི་ཟངས་དམར་གྱི་མདོག་ཇི་མ་ཇི་བཞིན་པ་ཡིན་པས། རྒྱང་ཐག་ཉེ་རིང་གང་ནས་བལྟས་ཀྱང་ཟངས་བླུགས་ཀྱི་རི་བོ་ཞིག་དང་ཤིན་ཏུ་མཚུངས་པ་དེ་བསྟན།

གཏེར་ཆེན་མཆོག་གྱུར་བདེ་ཆེན་གླིང་པའི་རྣམ་ཐར་བཀྲ་ཤིས་དབྱངས་ཀྱི་ཡན་ལག་གསལ་བྱེད་ཅེས་བྱ་བ་ལས། སྤྲུལ་པའི་གཏེར་སྟོན་ཆེན་པོ་འདི་ཉིད་ཀྱི་ཉམས་སྣང་དུ་མཁའ་འགྲོ་བ་དག་གིས་ཁོང་ནམ་མཁའི་ལམ་ནས་བོད་ཡུལ་དང་རྒྱ་གར། ནུབ་ཕྱོགས་ཀྱི་ཨོ་རྒྱན་ཡུལ་བཅས་ཀྱི་བར་སྣང་བརྒྱུད་དེ་དེང་སང་གི་གནམ་གྲུར་ཞུགས་པ་དང་འདྲ་པར་རྒྱ་གར་ལྷོ་ཕྱོགས་རྒྱ་མཚོ་ཆེན་པོའི་གླིང་ཕྲན་ཟངས་མཆོག་དཔལ་རིར་གནས་མཇལ་དུ་གདན་འདྲེན་ཞུས་པའི་སྐོར་ཞིག་འདིར་དགོད་པར་བྱ་སྟེ། ཞང་ཀང་ཐེན་མ་དཔེ་སྐྲུན་ཁང་གི་པར་མ། ཤོག་ངོས་༧༠
དེ་ཡང་རྗེ་ཉིད་ཀྱིས་གནས་འདི་ནི་ “རྡོ་རྗེ་གདན་གྱི་ལྷོ་ནུབ་སྲིན་ཡུལ་ལངྐ་པུ་རི་ཡིན་ནམ” ཅེས་དྲིས་པ་ལ། དེ་ནི་ལྷོ་ནུབ་སྲིན་པོའི་གླིང་ཀཻ་རི་བརྩེགས་པ་དང་བྱན་ལག་ལྗོངས་འདབས་འབྱོར་དུ་ཡོད། འདི་ནི་རྒྱ་གར་ཟ་ཧོར་དང་འདབས་འབྲེལ་བ་ཅན་ཡིན། སྲིན་པོའི་གླིང་དུ་འགྲོ་བ་ལ་ད་དུང་ཆུ་བོ་བརྒལ་དགོས། ཞེས་དང་།
དེ་ནས་ནུབ་ཕྱོགས་ཨོ་རྒྱན་གྱི་ཡུལ་དང་རྔ་ཡབ་སྲིན་པོའི་གླིང་གི་བར་དུ་ཆུ་བོ་ཆེན་པོས་བཅད་འདུག་པ་ལ། ཞེས་དང་།
དེ་ནས་རྒྱ་མཚོ་ཆེན་པོ་གནམ་ཐང་དུ་ལྷུང་བ་ལྟ་བུ་གར་བལྟས་ཐམས་ཅད་མཚོ་ཡིས་ཁེབས་པ་འདྲ་བ་ཞིག་སྣང་བ་འདི་གང་ལགས་ཞུས་པས། འདི་ནི་མུ་ལེ་མཐིང་གི་འཕྲུལ་མཚོ་ཞེས་བྱ་བ་སྟེ། གྲུ་གཟིངས་ཀྱིས་བརྒལ་དགོས་པ་ཡིན་ཅིང་། ད་ནི་རྔ་ཡབ་གླིང་དབུས་ཟངས་མདོག་དཔལ་རིར་བསླེབས་པ་དང་ཉེའོ།། ཞེས་དང་།
དེ་མ་ཐག་གང་བྱུང་མ་ཚོར་བར་གྲུ་ཤན་རྟ་མཆོག རྟ་མགོ་ཡིན་ནམ་་་་ཞིག་མཚོ་ཁར་ལྷགས་པའི་ནང་དུ་རྗེ་རིག་འཛིན་ཆེན་པོ་དང་མཁའ་འགྲོ་སྡེ་ལྔ་བཅས་གྲུ་བོ་ཆེར་ཞུགས་ཏེ་མིག་འཕྲུལ་ལྟ་བུའི་སྐད་ཅིག་ཉིད་དུ་ཕ་རིར་བསླེབས་པ་བྱུང་། དེ་ནས་མཁའ་འགྲོ་ལྔའི་ཞལ་ནས། ད་ནི་ཟངས་མདོག་དཔལ་གྱི་རི་བོའི་ཤར་ཕྱོགས་མཁའ་འགྲོའི་གསང་ལམ་ལ་འཛེགས་ཏེ་འགྲོའི་ཞེས་གསུངས། དྷ་ཀི་ལྔས་ལམ་སྣ་དང་བཅས་ཕེབས་པའི་ཤར་ཕྱོགས་དེར། བྲག་དཀར་པོ་ཤེལ་ལྟར་འཚེར་བའི་མཆོད་རྟེན་རང་གྲུབ་ཀྱི་འོག་ནས་འགྲོ་དགོས་པར་འདུག འདི་གང་ལགས་ཞུས་པས། ཀ་ཎི་ཀ་ཡི་མཆོད་རྟེན་ཟེར། ཞེས་དང་།
རྒྱལ་ཁམས་པ་དགེ་འདུན་ཆོས་འཕེལ་གྱིས་བརྩམས་པའི་སིངྒ་ལའི་ལོ་རྒྱུས་ནང་དུ། བོད་ལྗོངས་པར་མའི་ཤོག་ངོས་ ༤༢༧ དང་ ༤༣༡ དང་ ༤༣༩ དང་ ༤༦༥བར། དེ་ལ་གླིང་འདིའི་མིང་ཆེས་ཡོངས་སུ་གྲགས་པ་ནི། ལངྐ་བྱ་བ་ཡིན་ཅིང་། ཁོང་པ་རྣམས་ལ་ཡང་རང་ཡུལ་ལ་མིང་དེ་ག་དང་། རྒྱ་གར་ལ་འཛམ་བུ་གླིང་ཞེས་འབོད། ཅེས་དང་། སྤྱིར་མལཡྰ་བྱ་བ་ཏ་མི་ལའི་སྐད་དེ་རིའི་མིང་ཙམ་ཡིན་ཅིང་། ཏྲྰིམལཡྰ་བྱ་བ་ཡང་དེ་དག་གི་སྐད་དེ་ཤྲྰིམལཡྰ་དང་དོན་གཅིག་ཅིང་། དཔལ་གྱི་རི་བོ་བྱ་བ་ཡིན། ཞེས་དང་། དེ་བཞིན་ཏྰམྲདིཔ་སྟེ་ཟངས་གླིང་ཡང་འདི་ལ་ཟེར་བ། རང་རེའི་འདུལ་བའི་དཔེ་མེད་མའི་བྱུང་བའི་སྐབས་ན་ཡ་གསལ་ལ། ཞེས་དང་། དེད་དཔོན་སིངྒ་ལར་སོང་སྟེ་ཟངས་གླིང་གི་སྲིན་མོ་རྣམས་བསད་དེ་ཡུལ་བཟུང་བས་གླིང་གི་མིང་ཡང་དེ་སྐད་གྲགས་སོ་བྱ་བ་དང་། ཞེས་གླིང་འདིའི་རྒན་རབས་པའི་ངག་རྒྱུན་དུ་ཡང་གླིང་འདི་དང་པོར་སྲིན་མོ་དག་གིས་བཟུང་ཡོད་ཚུལ་གྱི་བཤད་རྒྱུན་ཡོད་པ་གསལ་སྟོན་བྱས་འདུག
དེ་ལྟར་ལྷོ་ནུབ་ཅེས་པའི་ཕྱོགས་དང་། ཟངས་གླིང་ཞེས་པའི་ཡུལ་དང་། དཔལ་གྱི་རི་བོ་ཞེས་པའི་རི་བོ་དང་། སྲིན་པོ་སྲིན་མོ་ཞེས་པའི་མི་རིགས་ཏེ། བདེན་པའི་དཔང་པོ་འདི་བཞི་ཡིས་གུ་རུ་རིན་པོ་ཆེའི་གནས་མཆོག་ཟངས་མདོག་དཔལ་གྱི་རི་བོ་དེ་བོད་དང་རྒྱ་གར་ཨོ་རྒྱན་སོགས་འཛམ་བུ་གླིང་དུ་ཡོད་པ་ཞིག་མ་ཡིན་པར། རྒྱ་གར་རྡོ་རྗེ་གདན་གྱི་ལྷོ་ནུབ་རྒྱ་མཚོ་ཆེན་པོའི་དཀྱིལ་གྱི་གླིང་ཕྲན། ཡོངས་གྲགས་ཤྲྰི་ལངྐའི་ཡུལ་ལམ་སངྒ་ལའི་ཡུལ་དུ་ཡོད་པའི་ཤྲྰི་པ་ད་ཅེས་པའི་རི་བོ་ངོ་མཚར་བ། གསང་སྔགས་པ་དག་གིས་གནམ་ལྕགས་འབར་བའི་རི་བོ་ཞེས། གསང་སྔགས་ཀྱི་བདག་པོ་དཔལ་ཕྱག་ན་རྡོ་རྗེས་རིགས་ཅན་དྲྭ་མ་ལྔར་གསང་སྔགས་ཀྱི་རྒྱུད་ཐོག་མར་གསུངས་སའི་གནས་སུ་རྩི་བ་འདི་ཁོ་ན་ཡིན་པར་ཡིད་ཆེས་བྱེད་རོགས།
གཞན་ཡང་རྫོགས་ཆེན་ཡང་སྤྲུལ་བསྟན་འཛིན་ཀུན་བཟང་ལུང་རྟོགས་བསྟན་པའི་ཉི་མས་བརྩམས་པའི་རྫོགས་ཆེན་ཆོས་འབྱུང་ལས། ཀྲུང་གོའི་བོད་རིག་པ་དཔེ་སྐྲུན་ཁང་གི་པར་མའི་ཤོག་ངོས། ༤༠། དེ་ལྟར་ལངྐའི་ཡུལ་ན་ཡོད་པའི་རི་མ་ལ་ཡ་ནི། གནས་དེར་སྔོན་བཅོམ་ལྡན་འདས་ལིངྐའི་བདག་པོ་སྒྲ་སྒྲོགས་ཀྱི་བུ་མགྲིན་བཅུས་སྤྱན་དྲངས་ཏེ། བྱང་སེམས་བློ་གྲོས་ཆེན་པོས་ཞུས་པ་ལས་ལང་ཀར་གཤེགས་པའི་མདོ་གསུངས་ཤིང་། གཞན་ཡང་ཡུལ་དེར་སློབ་དཔོན་ཆེན་པོ་ཀ་ཧ་ན་པ་བྱོན་ནས་བི་ཤྭ་རི་པྰི་ཞེས་པའི་སྲིན་མོ་འཁོར་ལྔ་བརྒྱའི་ཚོགས་བཅས་བཏུལ་ནས་སྔགས་ཀྱི་བསྟན་པ་སྤེལ་བར་མཛད། ཅེས་བྲིས་འདུག་པས་ཀྱང་། སྔོན་ཆད་ཤྲྰི་ལངྐའི་ཡུལ་འདི་སྲིན་ཡུལ་ཞིག་ཡིན་པ་གསལ་སྟོན་དང་། གུ་རུ་རིན་པོ་ཆེ་ཉིད་ཀྱིས་ཀྱང་། ང་ནི་མི་སྡོད་སྲིན་པོའི་ཡུལ་དུ་འགྲོ༔ ཞེས། ཁོང་གང་དུ་གཤེགས་པའི་ཡུལ་དེ་ནི་སྲིན་པོའི་ཡུལ་ཞིག་ཡིན་ཚུལ་རྡོ་རྗེའི་གསུང་གིས་འགྱུར་མེད་རྒྱ་ཡིས་བཏབ་འདུག་པས། ད་ནི་བོད་པ་སྤྱི་དང་ཁྱད་པར་སྔ་འགྱུར་རྙིང་མ་བ་ཚོས་ཟངས་མདོག་དཔལ་གྱི་རི་བོ་དེ་རྨི་ལམ་དང་དག་སྣང་འབའ་ཞིག་གིས་མ་གཏོགས་བགྲོད་དུ་མི་བཏུབ་པའི་ཡུལ་གྲུ་ག་གེ་མོ་ཞིག་ཡིན་པར་མི་དགོངས་པར། རྒྱ་གར་ནག་དང་བོད་ཡུལ་ནུབ་གླིང་སོགས་གང་ན་བཞུགས་ཀྱང་རུང་། ཕྱི་བསྐྱོད་ལག་ཁྱེར་དང་ཤྲྰི་ལིངྐའི་ནང་བསྐྱོད་ཆོག་མཆན། གནམ་གྲུའི་འཛིན་ཡིག་སོགས་གྲ་སྒྲིག་གནང་སྟེ་དེང་དུས་ལ་དཔགས་པའི་ཐག་ཉེ་བའི་ས་རུ་མིག་གིས་མཐོང་རྒྱུ་དང་རྐང་པས་བགྲོད་རྒྱུ། ལག་པས་རེག་རྒྱུ་དང་པར་དུ་ལེན་རྒྱུ་སོགས་གཟུགས་ཅན་གྱི་དངོས་པོ་གཞན་དག་དང་གཅིག་མཚུངས་སུ་རང་རེའི་བསོད་ནམས་ཀྱི་བགོ་སྐལ་དུ་སྨིན་པའི་ཟངས་མདོག་དཔལ་གྱི་རི་བོ་འདིར་གནས་མཇལ་དུ་ཕེབས་རོགས་ཞུ་རྒྱུ་ཡིན།།
རི་འདིའི་མིང་ནི་དགེ་ཆོས་ཀྱིས་སང་ག་ལའི་གནས་ཡིག་ཏུ་ཤྲྰིཔད་ཞེས་བྲིས་ཡོད་པ་ཇི་བཞིན་google དྲ་ཚིགས་སུ་ཕེབས་ནས་ sri pada ཞེས་བྲིས་ནས་རྡེག་གནོན་བྱས་ན་གནས་མཆོག་འདིའི་ངོ་མཚར་བའི་འདྲ་པར་སྣ་ཚོགས་དང་གནས་ཀྱི་ཐག་ཉེ་རིང་གི་ཡུལ་ལྗོངས་ཀྱི་བཀོད་པ། གནས་འདིར་གནས་སྐོར་དུ་བསྐྱོད་པའི་ཕྱི་གླིང་པ་ཚོས་བླངས་པའི་གློག་བརྙན་ཐུང་ཐུང་གི་རིགས་ཀྱང་འབད་མེད་དུ་ཐོབ་ཐུབ། དགེ་འདུན་ཆོས་འཕེལ་གྱིས་གནས་འདི་གླིང་གི་དབུས་སུ་ཡོད་ཅིང་ཞེས་བཤད་ཡོད་མོད། གློག་ཀླད་ནང་གི་ google ས་ཁྲ་བེད་སྤྱད་ནས་བལྟས་ན་གླིང་གི་དབུས་རང་དུ་མེད་པར་ནུབ་ཕྱོགས་ཀྱི་ཆར་གཏོགས་པའི་ས་གནས་སུ་ཡོད།
དོ་ནུབ་རྨི་ལམ་ནང་དུ་བསྐྱོད་མི་དགོས།།
ལོ་མང་སྒོམ་གྱི་རྟོགས་པས་བགྲོད་མི་དགོས།།
ལག་ཁྱེར་ཆོག་མཆན་འཛིན་ཡིག་ཙམ་ཞིག་གིས།།
ཟངས་མདོག་དཔལ་གྱི་རི་བོར་འགྲོ་ཆོག་ཆོག།
རྗེ་བཙུན་མཚོ་སྐྱེས་རྡོ་རྗེའི་ཐུགས་རྗེ་ཡིས།།
ཟངས་མདོག་དཔལ་གྱི་རི་བོ་འབད་མེད་རྙེད།།
སང་གནངས་མ་ཤི་ཚེ་རིང་བྱུང་བ་ན།།
བདག་ཀྱང་གནས་དེར་ལན་གཅིག་བསྐྱོད་ངེས་ཡིན།།
དག་པའི་སྣང་ངོར་དག་པའི་ཞིང་ཁམས་ཡོད།།
མ་དག་སྣང་ངོར་ས་སྤྱོད་གནས་མཆོག་ཡོད།།
རྒྱ་གར་ལྷོ་ཕྱོགས་ཤྲྰི་ལང་ཀའི་ཡུལ།།
མ་བསྐྱོད་ཟངས་མདོག་དཔལ་རི་མཇལ་ནུས་མིན།།