རིགས་སློབ་བློ་སྦྱིན།
མི་རིགས་ཤིག་གི་རང་དབང་འཐབ་རྩོད་ལ་གྲུབ་འབྲས་ཤིག་ཐོན་དགོས་ན་དེ་ནི་ཞུགས་མ་ཐག་ནས་མི་རིགས་དེའི་ཁྱོན་ཡོངས་ཀྱི་སློབ་སྦྱོང་གི་ཆུ་ཚད་དང་ཆིག་སྒྲིལ་གྱི་སྟོབས་ཤུགས་འཐབ་རྩོད་ཀྱི་ཁ་ཕྱོགས་གནད་དུ་འཁེལ་མིན་དང་དུས་དང་འཚམས་མིན་བཅས་ལ་རག་ལས་པ་ཞིག་རེད།
དེ་ལ་སྔར་ཡིན་ན་རང་ཉིད་ཀྱི་མིང་ཡིག་ཐོག་ཏུ་འབྲི་མི་ཤེས་ཀྱང་ལོ་མང་རིང་ལྷག་བསམ་དང་བྱ་བའི་ཉམས་མྱོང་གིས་ཕྱུག་པའི་སྤྱི་འཐུས་གང་ཅིའི་ཐད་འགན་ཁུར་ཅན་མང་དག་ཅིག་ཡོད་པ་མིག་མཐོང་ལག་ཟིན་ཞིག་རང་རེའི་སྤྱི་ཚོགས་ནང་བྱུང་མྱོང་ཞིང་། འདི་འདྲ་བ་ནི་སྐབས་འགར་ལྷག་བསམ་དང་ལར་ཞེན་སྙིང་སྟོབས་ཉམས་མྱོང་བཅས་ཀྱིས་ཕྱུག་པའི་སྤྱུ་འཐུས་ཤིག་བྱུང་ཚེ་རང་ཉིད་ཀྱི་མིང་འབྲི་མ་ཤེས་ཀྱང་ལྷག་བསམ་དང་སྙིང་སྟོབས་ལ་རྒྱ་སྤྱི་སེམས་ཉམས་མྱོང་བཅས་ཀྱི་ནུས་པས་ཕན་རླབས་ངེས་ཅན་ཞིག་བྱུང་དང་ཡོང་བཞིན་པ་ཡིན་མོད། འོན་ཀྱང་ཆེས་སྐྱི་གཡའ་བ་ཞིག་ནི་གལ་ཏེ་སྟབས་མ་ལེགས་པར་སྤྱི་འཐུས་རེ་ཟུང་སྤྱིར་ན་སྦྱངས་སྟོབས་ཀྱི་ཤེས་བྱ་ཡོན་ཏན་གྱིས་ནི་དབེན། བརྒྱ་ལ་ཅུང་ཟད་ཙམ་རེ་ཡོད་ཀྱང་ཕྱོགས་རེ་ཙམ་དུ་སོང་གཤིས་ཤེས་ཡོན་ཆུང་ཆུང་ཉེན་ཁ་ཆེ་ཞེས་པའི་དཔེ་རུ་ནི་སོང་།
ལྷན་སྐྱེས་ཀྱི་རིགས་སྟོབས་དང་བཅོས་མིན་གྱི་ལྷག་བསམ། འགྱུར་མེད་ཀྱི་སྤྱི་སེམས་ནི་མེད། རང་ཉིད་ཀྱི་ལངས་ཕྱོགས་སམ་ལྟ་བར་ཆགས་ཞེན་དང་ཨུ་ཚུགས་ནི་ཆེ། རང་ཉིད་ཀྱི་མངོན་འདོད་ཕྲན་ཚེགས་ཙམ་འགྲུབ་སླད་ཆབ་སྲིད་ཁ་ལ་འཁྱེར་བར་གོམས་པའི་གཡོ་བྱུས་ལ་ནི་མཁས། མི་རིགས་ཤིག་དང་མི་རིགས་དེའི་རྩ་ཆེ་ཞིང་དོན་ཆེ་བའི་ཆོས་དང་རིག་གཞུང་ལ་སྦྱངས་པ་ནི་མེད་ཅིང་དེ་དག་གི་རིན་ཐང་ནི་མ་མཐོང་། རྒྱལ་སྤྱིའི་འགྲོ་སྟངས་སོགས་ཁྲིིམས་མཐུན་གྱི་བྱ་བ་ཇི་ལྟར་བསྒྲུབ་དགོས་མིན་ཐད་ཀྱི་གོ་རྟོགས་ཙམ་ཡང་མེད་པར་ཧོལ་རྒྱུགས་ཙམ་དང་གཡམ་རྒྱུགས་ཙམ་ཟེར་རྗེས་འབྲངས་པ་དག་ནི་སྔོན་ཆད་བྱས་རྗེས་ཇི་ཙམ་ཡོད་ཀྱང་རུང་ལ་མེད་ཀྱང་ཆོག་གི་དེ་དག་ནི་གནད་དོན་ལོགས་ཀ་ཞིག་རེད། སྤྱིའི་རྩ་དོན་དང་མངོན་འདོད་ལ་བསམ་བློ་བཏང་སྟེ་བློ་གཟུ་བོར་གནས་བའི་སྒོ་ནས་ལྟ་མཁན་ཞིག་ཡིན་ན་མི་དེའི་རིགས་ཀྱིས་རང་ཉིད་ཀྱི་བྱ་སྤྱོད་ཀྱི་ཐོག་ནས་རང་ཉིད་ལ་སྤྱི་འཐུས་ཤིག་གི་འོས་བབ་ཇི་འདྲ་ཞིག་ཡོད་མེད་བོད་མི་རིགས་ལ་ངོ་སྤྲོད་གསལ་བོ་ཞིག་བྱས་ཡོད་སྙམ། །
དེས་ན་སྐབས་འདིར་གུས་པའི་ཞུ་འདོད་པའི་གནད་དོན་གཙོ་བོ་ནི་རང་ཉིད་ལ་དམངས་གཙོའི་ཁེ་དབང་ལོངས་སུ་སྤྱོད་རྒྱུ་ཡོད་བཞིན་པ་འདི་བེད་སྤྱོད་ཡག་པོ་ཞིག་གཏོང་རྒྱུ་ནི་ཅིས་ཀྱང་གལ་ཆེན་པོ་ཞིག་རེད་ཅེས་པ་དེ་ཡིན་ཞིང་། དེ་ཡང་བེད་སྤྱོད་ཡག་པོ་ཞིག་ཇི་ལྟར་གཏོང་དགོས་སམ་ཞེ་ན། སྐབས་སོ་སོར་སྤྱི་འཐུས་འདེམས་སྐབས་བསམ་བློ་ཡག་པོ་ཞིག་བཏང་སྟེ་རང་ཉིད་ཀྱི་འོས་ཤོག་གཅིག་བུ་དེ་འཕེན་ས་མ་ནོར་བ་ཞིག་བྱེད་དགོས་པ་དེ་རེད།
འཕེན་ས་མ་ནོར་བ་གང་འདྲ་ཞིག་ལ་ཚད་གཞི་འཛིན་དགོས་སམ་ཞེ་ན། དེ་ནི་བོད་རང་ཉིད་ཀྱི་ཆོས་དང་རིག་གཞུང་སྐད་ཡིག་དང་བཅས་པར་སྦྱངས་པ་རྩེར་སོན་མིན་ནའང་ཡག་པོ་ཡོད་པའི་ཁར་རྒྱལ་སྤྱིའི་འགྲོ་ལུགས་འགྲོ་སྟངས་ལའང་རྒྱུས་མངའ་གང་འཚམས་ཡག་པོ་ཡོད་ཅིང་ལྷག་པར་དུ་རྒྱ་དམར་གྱི་ཉིན་རེའི་འགྲོ་སྟངས་ཐད་ཚོར་བ་རྣོ་ངར་ཅན་ཞིག་དང་ཟབ་པོ་ཡོད་པ། རང་ཉིད་ཀྱི་ཕྱོགས་གཏོགས་སམ་གྲོགས་པོ་དགའ་ཉེ་བློ་དཀར་ཙམ་ལ་ཕྱོགས་རིས་བྱེད་ཤེས་ཙམ་མ་ཡིན་པར་བོད་སྤྱིའི་རྩ་དོན། ཆོས་དང་རིག་གཞུང་སྐད་ཡིག་དང་བཅས་པའི་ཆེད་ལ་རྒྱ་དང་དགའ་ཞེན། འགན་ཁུར་དང་བསམ་བློ་བཅས་ཡོད་མཁན་ཞིག་དགོས་པ་མ་ཟད་རང་ལྟ་མཆོག་འཛིན་དང་ཨུ་ཚུགས་ཚ་བོ། རྒྱུ་མཚན་ཡོད་མིན་ལ་མི་ལྟ་བར་མཁྲེགས་འཛིན་རང་ཉིད་ཀྱིས་ལྟ་ཚུལ་ལམ་ལངས་ཕྱོགས་དང་ཏོག་ཙམ་མ་མཐུན་པ་བྱུང་ན་དེ་མ་ཐག་མི་གཞན་དེའི་སྐད་ཆ་དང་བསམ་ཚུལ་ལ་རྒྱུ་མཚན་ལྡན་མིན་དང་། སྤྱི་བའི་ཆེད་དུ་ཡིན་མིན། གལ་ཆེ་ཆུང་ག་ཚོད་ཙམ་ཆགས་ཡོད་མིན་བཅས་ལ་ཁྱོན་ནས་མི་ལྟ་བར་དངོས་ཤུགས་བརྒྱུད་གསུམ་ནས་མི་དེ་མེད་པ་བཟོ་ཐབས་བྱེད་མཁན་དེ་འདྲ་མིན་པར་ངང་རྒྱུད་རིང་ཞིང་དཀྱེལ་ཆེ་བཟོད་སྒོམ་ཆེ་བ། མདོར་ན་སྤྱི་བའི་ཆེད་དུ་རང་ཉིད་ཡོངས་སུ་བློས་གཏོང་ཐུབ་སྟེ་སྤྱིའི་ཆེད་དུ་བསམ་ཕོད་པ་དང་། བཤད་ཕོད་པ། སྒྲུབ་ཕོད་པ་བཅས་འོས་མི་དེ་འདྲ་ཚད་ལོངས་པ་ཞིག་བྱུང་ན་དེ་འདྲའི་སྤྱི་འཐུས་སུ་ཞིག་བསླེབས་ནའང་བོད་སྤྱི་ལ་ཕན་ཐོགས་ཡོང་རྒྱུ་ཡིན་ཞིང་དེས་རྩ་དོན་ཐོག་ཕན་ཐོགས་ངེས་ཅན་ཞིག་ཡོང་རྒྱུ་ཡིན་པ་ནི་གདོན་མི་ཟ་བ་ཞིག་རེད། །
ཇི་ཙམ་གྱིས་འོ་སྐོལ་གྱི་ཁྱིམ་ཚང་ཆེན་པོ་འདི་ཉིད་ཚགས་ཚུད་པོ་དང་བརྟན་པོ་ནང་ནས་བཀྲ་ཤིས་པ་ཡག་པོ་ཞིག་བྱུང་བ་ཡིན་ན་དེ་ཙམ་གྱིས་འཛམ་གླིང་སྤྱིའི་ཐོག་ནས་ཡིན་ནའང་རེད། ལྷག་པར་དུ་རྒྱ་དམར་གྱི་ཕྱོགས་ནས་རང་རེར་ལྟ་སྟངས་འགྱུར་བ་མ་འགྲོ་རང་འགྲོ་ཆགས་རྒྱུ་དང་གདེང་འཇོག་མི་བྱེད་ཀ་མེད། དེ་འདྲ་བྱུང་ན་རང་རེའི་མངོན་འདོད་དང་རྩ་དོན་ལ་ཡང་ཕན་ཐོགས་ངེས་ཅན་ཞིག་འབྱུང་རྒྱུ་ངེས་ཅན་ཡིན་ཞིང་། རྒྱུ་མཚན་ནི་ཆིག་སྒྲིལ་ལ་སྟོབས་ཤུགས་ཡོད་ཅིང་སྟོབས་ཤུགས་ཀྱིས་ལམ་ལུགས་སྲོལ་རྒྱུ་མཚན་དང་མི་ལྡན་པའམ་མ་དྲང་པ་གང་ཞིག་ཡིན་ཀྱང་དེ་ཉིད་རྩ་གཏོར་དུ་གཏོང་ཐུབ་པ་དེ་ཡིན། དཔེར་ན་རྟ་ཕོས་ཀྱང་བགྲོད་དཀའ་བའི་ཆུ་བོ་ཆེན་པོ་ཞིག་ཡིན་ཀྱང་སོ་སོར་མང་དུ་གྱེས་ན་ལུག་གིས་ཀྱང་བདེ་བླག་ངང་བགྲོད་དེ་རྐང་པའི་འོག་རྡོག་རྫིས་གཏོང་ཐུབ་པ་ཡོང་གི་ཡོད།
དེས་ན་ཆིག་སྒྲིལ་ནི་ཀ་བ་བརྟན་པོ་ཞིག་སྟེ་ཆིག་སྒྲིལ་གྱི་ཀ་བ་བརྟན་པོ་ཞིག་མེད་ན་གདུང་མ་ཞིག་དང་འདྲ་བའི་མི་རིགས་ཤིག་གི་མངོན་འདོད་དང་རྩ་དོན་ནི་གནས་ཐབས་མེད་པ་ཞིག་དང་ཡོང་ཐབས་མེད་པ་ཞིག་ངང་གིས་ཆགས་སོང་བ་མ་ཡིན་ནམ།
དེར་བརྟེན་ཆིག་སྒྲིལ་གལ་ཆེ་ཞིང་དེ་ཡོང་བ་ལ་འགོ་ཁྲིད་ལས་བྱེད་དམ་སྤྱི་འཐུས་ནི་ལྟ་བ་དང་སྤྱོད་པ་མི་གཞི་སློབ་སྦྱོང་གང་ཅིའི་ཐད་བརྟག་ཐུབ་འཕེར་བ་ཞིག་དགོས་རྒྱུ་ནི་ཅིས་ཀྱང་གལ་ཆེན་ནང་གི་དོན་ཆེན་དེ་ཆགས་ཡོད་པས་ཐེངས་འདིའི་མདོ་སྨད་མི་མང་གི་སྤྱི་འཐུས་འོས་མིའི་ཁོངས་སུ་འོས་མི་གསུམ་ངོ་དེབས་སོགས་སུ་ཡོངས་བསྒྲགས་ཐོག་ཁྱབ་སྤེལ་གཏོང་བཞིན་པའི་ཁོངས་སྤྲོ་ཚིགས་ཆོས་གྲགས་ལགས་ནི་ཆེེས་འོས་ཤོས་སུ་མཐོང་སྟེ། དེ་ཡང་གུས་པས་རང་དགར་མ་བརྟག་མ་དཔྱད་པར་སེམས་ཚོར་ཙམ་མམ་གཡམ་རྒྱུགས་ཙམ་གཞན་གྱི་སྐུལ་སློང་སོགས་དེ་འདྲ་གང་གི་ཡང་གཞན་འོག་ཏུ་མ་སོང་བར་རང་ཉིད་ཀྱིས་བློ་དྲང་མོར་བཞག་སྟེ་བསམ་སྐབས། སྤྲོ་ཚིགས་ཆོས་གྲགས་ལགས་ནི་ཡུན་རིང་འགྲོགས་པའི་དུས་ཚོད་ནང་ཕྱིར་བལྟས་ཤིག་བྱས་པའི་བརྒྱུད་རིམ་ནང་ཁོང་ནི་ལྟ་བ་དང་སྤྱོད་པ་སློབ་སྦྱོང་མི་གཞི་བོད་ཀྱི་ཆོས་དང་རིག་གཞུང་གང་ལའང་གཞན་དྲང་མི་འཇོག་པའི་གདེང་ཚོད་ཡོད་མཁན་ཞིག་སྟེ་མདོར་ན་བཙན་བྱོལ་བོད་མི་གཞོན་སྐྱེས་འཚར་ལོངས་འབྱུང་བཞིན་པའི་ཁྲོད་མཐོང་དཀོན་པའི་མི་བུ་ལྷག་བསམ་དང་ཡོན་ཏན་ཅན་ཡ་རབས་ཤིག་ཡིན་གཤིས་ཐེངས་འདིའི་མདོ་སྨད་མི་མང་གི་སྤྱི་འཐུས་འོས་མི་རུ་རང་ཉིད་ལ་རྒྱུས་ཡོད་པའི་ཁོངས་ནས་ཁོང་འབའ་ཞིག་མཐོང་སྟེ་གཟུར་གནས་ལྷག་བསམ་ཀྱིས་ཕྱུག་པའི་རིགས་མཐུན་མདོ་སྨད་མི་མང་ལའང་དེ་བཞིན་དུ་དྲན་སྐུལ་དང་འབོད་སྐུལ་ངོ་སྤྲོད་བཅས་ཞུ་བཞིན་དུ་ཡོད། །
རྒྱུ་མཚན་ནི་ཁོང་ལྟ་བུའི་མི་བུ་འཇོན་ཐང་ཅན་དང་ལྷག་བསམ་ཅན་ཡོན་ཏན་ཅན་ཞིག་མདོ་སྨད་མི་མང་གི་སྤྱི་འཐུས་ཆགས་ན་དེས་བོད་སྤྱིའི་རྩ་དོན་ཆེད་ཕན་ཐོགས་ཡོང་རྒྱུ་ཡིན་པ་མ་ཟད་མདོ་སྨད་སྤྱི་ཚོགས་ཀྱི་མཚན་ཐོངས་ལ་རྒྱ་ལའང་དོན་གྱིས་ཕན་ཐོགས་པ་ཞིག་རེད་སྙམ། གཞན་དམངས་གཙོའི་ཁེ་དབང་ལོངས་སུ་སྤྱད་དེ་དུས་ལ་མ་བསླེབས་པའམ་དུས་དང་མ་རན་པའི་ལྟ་བ་དང་ལང་ཕྱོགས་སྣ་ཚོགས་སྤེལ་ཏེ་སྤྱིའི་བདེ་སྡུག་དང་མངོན་འདོད་ཆོས་དང་རིག་གཞུང་གི་འགན་དབང་དང་ལས་དབང་ཆགས་འཇིགས་གི་ཉེན་ཁ་གང་ལའང་མི་བསམ་པར་དམངས་གཙོ་དང་རང་དབང་ཁ་ལ་འཁྱེར་བཞིན་རང་ཉིད་ཁོ་ནའི་ལྟ་བར་ཆགས་ཞེན་གྱིས་གཞན་གྱིས་བྱས་རྗེས་དང་། འཕྲལ་ཕུགས་ཀུན་ལ་རྩིས་གཞི་ལེགས་པར་བསྐོར་བའི་བྱ་བ་སྒྲུབ་ཕྱོགས་ལ་ལེགས་སོའི་ངོས་འཛིན་ཙམ་ཡང་མེད་ཁར་དགྲ་དགྲ་ནག་ཏུ་བལྟས་ཏེ་མདུང་ཁ་ནང་ལ་བསྐོར་བཞིན་དགྲ་དགའ་གཉེན་སྡུག་གི་སྐད་ཆ་དང་བྱ་བ་སྒྲུབ་མཁན་ཇི་ཙམ་གྱིས་མང་པོ་ཆགས་ན་དེ་ཙམ་གྱིས་བོད་སྤྱིའི་རྩ་དོན་དང་མངོན་འདོད་ལའང་འཕྲལ་ཕུགས་གང་ནས་བསམས་ཀྱང་གནོད་པ་ལས་ཕན་པ་ཞིག་ཡོང་ཐབས་མེད་པར་མཐོང་བས་སྐ ུ་ཉིད་ཀྱིས་ཀྱང་རང་ཉིད་ཀྱི་བསམ་བློར་གློ་བུར་བའི་སེམས་ཚོར་ཙམ་རེ་དང་ཆགས་སྡང་གི་དྲི་མས་བསླད་ཞུགས་མ་བཅུག་པར་བློ་རྣལ་དུ་བཞག་སྟེ་སེམས་ནང་ལ་བསྐོར་ཏེ་བསམ་བློ་ཞིག་བཏང་ན་རྟོགས་ངེས་ཡིན་ཞིང་གུས་པས་ཞུས་པའི་གནད་དོན་ནམ་སྤྱིའི་ཆེད་དུ་དམིགས་པའི་ལྷག་བསམ་དང་རྒྱུ་མཚན་དང་ལྡན་པའི་དྲང་གཏམ་ཞིག་ཡིན་མིན་རྟོགས་པར་འགྱུར་ངེས་རེད།
སྤྲོ་ཚིགས་ཆོས་གྲགས་ལགས་ཀྱི་སློབ་སྦྱོང་གི་བརྒྱུད་རིམ་དང་ད་བར་རང་ཉིད་ཀྱི་ཁེ་ཕན་ཙམ་མིན་པར་སྤྱིའི་ཆེད་དུ་ཕྱག་ལས་གང་ཞིག་གནང་ཡོད་མིན་ནི་གཞན་དུ་གསལ་བར་བཀོད་འདུག་པས་འདིར་བསྐྱར་བཟློས་ཡང་བཟློས་བྱས་མེད་པ་ལགས་སོ། ། ། །
བཅས་གུས་པ་རིགས་སློབ་བློ་སྦྱིན་གྱིས་འབོད་སྐུལ་དང་དྲན་སྐུལ་དུ་ཕུལ། །
གོང་མས་བཤད་ན་གོང་མ་བདེན་འདྲ་།
འོག་མས་བཤད་ན་འོག་མ་བདེན་འདྲ་།
བདེན་དང་མི་བདེན་མི་མང་བདུན་ནས་།
ལེགས་ཉེས་རྣམ་དཔྱོད་བརྡར་བའི་ཆེད་དུ་།
ཁུག་དང་སྤྲོ་གཉིས་མགྲོན་ལ་འབོད་རོགས་།
རེ་འགས་སེམས་ཀྱི་ཚོར་བ་གཙོ་ལ་འཛིན་།
ལ་ལས་མ་ཤེས་དབང་གིས་ཧོལ་རྒྱུག་བྱེད་།
ཤེས་ཀྱང་ཕྱོགས་རིས་དབང་གིས་སྐྱག་རྫུན་བཤད་།
སྤྱོད་ངན་རྣམ་གསུམ་དོར་ནས་རྩོད་པ་བྱོས་།
ཤར་ཕྱོགས་ཁུག་ཏ་སོ་མི་མདོ་སྨད་ལ་མི་ཞིག་མ་ཡོད་ནི་འུ རེད་
རིགས་སློབ་བློ་སྦྱིནལགས་ཀྱིས་སྤྲོ་ཚིགས་ཆོས་གྲགས་ཀྱི་སློབ་སྦྱོང་གི་བརྒྱུད་རིམ་དང་། ད་བར་རང་ཉིད་ཀྱི་ཁེ་ཕན་ཙམ་མིན་པར་སྤྱིའི་ཆེད་དུ་ཕྱག་ལས་གང་ཞིག་གནང་ཡོད་མིན་གཞན་དུ་གསལ་བར་བཀོད་འདུག་ཟེར་བ་དེ་བདེན་པ་རེད་ལགས། དབག་གིས་ཀྱང་ཁོང་ལ་རྒྱབ་སྐྱོར་ཡོད་པར་ཐེངས་འདིའི་མདོ་སྨད་མི་མང་གི་སྤྱི་འཐུས་འོས་མིའི་ཁོངས་སུ་སྤྲོ་ཚིགས་ཆོས་གྲགས་ལགས་ནི་ཆེས་འོས་ཤོས་སུ་མཐོང་།
ཁུག་རྟ་ནི་སྤྲོ་ཚིགས་ཆོས་གྲགས་དང་བསྡུར་ས་ཞིག་མེད་སྙམ། ཁུག་རྟ་ལ་སློབ་ཆུང་གི་ལག་འཁྱེེར་ཙམ་ཞིག་མི་ཚེ་ལ་ཡོད་པ་མ་རེད། སྤྲོ་ཚིགས་ནི་རམ་འབྱམས་པ་ཐོན་རེད། ཁུག་རྟ་ནི་ཟམ་གདོང་གི་བཀའ་ཤག་གི་དྲ་འབུའི་མྱུལ་མ་ཡིན་པ་ལས། ཉམས་ཞིབ་པའི་གོ་རིམ་དང་ཆ་རྐྱེན་གང་ཡང་མེད་མཁན་ཞིག་རེད། དེ་ལས་སྤྲོ་ཚིགས་ནི་བོད་དང་བོད་ཀྱི་ཁྱད་ནོར་གླེང་བ་ལས་ཤེས་ཐུབ། ཁུག་རྟ་ནི་དབང་བསྒྱུར་གྲལ་ར་གྱི་ལག་ཆ་ཙམ་རེད། སྤྲོ་ཚིགས་ནི་མཐོ་སློབ་དགེ་རྒན་དང་ཉམས་ཞིབ་རང་ཚུགས་ཐུབ་མཁན་ཞིག་རེད། ཁོ་གཉིས་འདྲ་ས་ཞིག་ཡོད་པ་ནི་གྲྭ་ལོག་ཡིན་པ་དེ་རེད།
སྤྲོ་ཚིགས་ལགས་ཁྱེད་སྤྲོ་བོ་བྱས་ནས་བཞུགས་དང་། མདོ་སྨད་པས་སྤྱི་སེམས་འཛིན་ན་ཁྱེད་རང་སྤྱི་འཐུས་སུ་ཐོབ་ཐོབ་པ་རེད།
“དྲ་གྲོགས་འབྲས་སྤུངས་བློ་བཟང་ཐུབ་བསྟན་ལགས། ཁྱེད་རང་ཤར་ཁུག་ལགས་ལ་རྒྱབ་སྐྱོར་གནང་མཁན་སོགས་སུ་ཞིག་ཡིན་ཡང་ཆོག དེ་ཁྱེད་རང་གི་ཐོབ་ཐང་རེད། འོན་ཀྱང་སྐྱག་རྫུན་མ་ཤོད། ཀིརྟི་བྱེས་པ་གྲྭ་ཚང་རྡ་རམ་ས་ལར་ཡོད་པ་རེད། དེ་ཤེས་པར་གྱིས། གལ་ཏེ་ཁྱེད་ཀྱིས་ཀིརྟི་བྱེས་པ་གྲྭ་ཚང་ལ་མཐོང་ཆུང་མིན་ན། སྐད་ཆ་དེ་འདྲ་བཤད་པའི་འོས་མེད། གང་ཡིན་ཟེར་ན། ངས་རྒྱུས་ལོན་བྱས་པ་ལྟར་ན། སྤྲོ་ཚིགས་ཆོས་གྲགས་ལགས་ཀིརྟིའི་བྱེས་པ་གྲྭ་ཚང་གི་དགེ་བསྐོས་གནང་མྱོང་གཏན་ནས་མི་འདུག དེ་མི་བདེན་བསམ་ན་རྩད་གཅོད་གྱིས། མི་བདེན་བཞིན་དུ་སྐྱག་རྫུན་སྒྲིག་ནས་བཤད་ན་ཡག་པོ་ཡོད་པ་མ་རེད། དེ་གཅིག་ཡིན།
དེ་ནས་ཁོང་གྲྭ་པ་ལོག་པ་དེ་ཁོ་རང་གི་ཐོབ་ཐང་རེད། གྲྭ་པ་ལོག་རྗེས་གྲྭ་ཚང་ལ་བཤགས་པ་ཕུལ་དགོས་པའི་འགྲོ་ལུགས་སྒྲིག་གཞི་ཞིག་ཡོད་པ་དེ་ཁོང་གིས་སྔ་ས་ནས་གནང་ཚར་འདུག དེ་ཡང་ཤེས་དགོས། དེ་ནས་ཁྱེད་ཀྱིས་རྒྱབ་སྐྱོར་བྱེད་པའི་ཁུག་རྟ་ལགས་བོད་གཞུང་ལན་འདེབས་ཚོགས་ཆུང་ནང་ནས་ཇི་ལྟར་ཐོན་པའི་སྔ་ཕྱིའི་བརྒྱུད་རིམ་དང་། དབུ་མའི་ལམ་ལས་འགུལ་ཁང་ནས་ཇི་ལྟར་ཕུད་མིན། ཁ་བརྡ་དྲ་རྒྱའི་རྩོམ་སྒྲིག་པའི་མིང་གྲས་ནས་ཕྱིར་འཐེན་བྱེེད་དགོས་ཇི་ལྟར་ཆགས་ཚུལ་སོགས་རེ་རེ་བཞིན་དྲ་ངོས་སུ་འཁུར་རྒྱུ་མེེད་པ་དེ་འདྲ་མ་རེད། ངའི་རེ་བར་ཁྱེད་དང་འཕྲིན་ལས་ལྷུན་འགྲུབ་ཟེར་བ་གཉིས་མི་གཅིག་ཡིན་པ་འདྲ། གང་ལྟར་ཐུགས་རྗེ་གཟིགས། ཀིརྟི་ཚང་གི་བླ་སློབ་བར་རམ། ཡང་ན་མི་སྒེར་དང་ཚོགས་པའི་བར་དཀྲུག་ཤིང་གི་སྦྱོར་པ་མི་རྩོམ་པ་མཁྱེན། དེ་འདྲ་གནང་ཡ་མང་དྲགས་ན་ཡག་པོ་ཡོད་པ་མ་རེད། གང་ལྟར་ཚོད་ཅིག་ཡོད་ན་ཡག་པོ་ཡོད་པ་རེད། དེ་ཤེས་པར་གྱིས།”
་་་་་་་
ཚོགས་གཙོ་སྤེན་པས་དབང་ཤུགས་ཀྱིས།།
བཅའ་ཁྲིམས་བཟང་བོ་ཐང་ལ་བརྡབས།།
དཔའ་བོ་ཀླུ་མཁར་སྒོ་བཀག་ནས།།
མདོ་སྨད་རྟ་ཡི་མཐུན་སྒྲིལ་གཏོར།།
ཤར་ཕྱོགས་ཁུག་རྟ་ཤར་ལ་དགའ།།
ཤར་ཕྱོགས་རྒྱ་ཡི་རྒྱལ་དར་བསྒྲེངས།།
ཚངས་དབྱངས་རྒྱ་མཚོ་ཚོང་ལ་དགའ།།
ཇོ་ནང་ཆོས་འདི་ཚོང་བསྒྱུར་བྱས།།
ལྷ་ཆབ་སྦྱིན་པ་རྩོམ་ལ་དགའ།།
རྩོམ་ལ་ལྟོས་ནས་རང་དོན་བསྒྲུབ།།
བཀྲ་ཤིས་དོན་གྲུབ་མིང་ལ་དགའ།།
མིང་གི་དོན་དུ་ཕ་ཡུལ་བཙོངས།།
ཨ་ཚོགས་ཀླུ་མཁར་རང་བཙན་དགའ།།
རང་བཙན་དགའ་རྐྱེན་སྨྱོན་ལ་ཉེ།།
སྤྲོ་ཚིགས་ཆོས་གྲགས་དཔོན་ལ་དགའ།།
དཔོན་པོའི་ཆེད་དུ་རིག་གནས་བཙོངས།།
མདོ་སྨད་རྟ་ཡི་ཆོལ་ཁ་འདི།།
གངས་ཅན་བོད་ཀྱི་སྲོག་རྩ་ཡིན།།
སྲོག་གི་ཀ་བ་བརྟན་པའི་སླད།།
འཐུས་མི་གཅིག་པོ་ཡག་པོར་འདེམས།།་་་
བོད་པ་ཚང་གི་ན་ཚ་ཞིག་སྟེ་མྱི་ཞིག་སློབ་སྦྱོང་སོགས་ཀྱི་ཐད་འབུར་དུ་ཐོན་ཡོང་ན་འབུར་འཇོམས་བྱེད་ཅི་ཐུབ་ལྟ། གལ་ཏེ་སུ་ཞིག་གི་སྐྱོན་རྐྱང་རྐྱང་བཙལ་བསྡད་ན་གནའ་མི་བོད་ཀྱི་གཏམ་དཔེར། མྱི་སྐྱོན་མེད་འཛམ་བུ་གླིང་ན་མེད།།ཤིང་འཛེར་མེད་རྒྱ་རྫོང་ནགས་ན་མེད།།ཟེར་བ་ལས་མ་འདས་པས་གང་ཟག་སུ་ཡིན་ནའང་ཆོག་ཁོའི་སྐྱོན་ཡོན་གཉིས་རྒྱ་མར་གཞལ་ཤེས་དགོས། ང་ནི་སྤྲོ་ཚིགས་ཆོས་གྲགས་ལ་རྒྱུས་མངའ་ཆེན་པོ་ཡོད་མཁན་ཞིག་ཡིན། ཁོང་གིས་སྤྱི་འཐུས་ཀྱི་ལས་འགན་ཏག་ཏག་སྒྲུབ་ཐུབ་ཀྱི་རེད་འདོད།
རིགས་སློབ་བློ་བཟང་སྦྱིན་པ་ལགས་ཀྱིས། རང་ཉིད་ཀྱི་མྱོང་བ་གཞིར་བཞག་སྟེ་སྤྲོ་ཚིགས་ཆོས་གྲགས་ལགས་ལ་རྒྱབ་སྐྱོར་རྩོམ་བྲིས་བྱས་པ་ལེགས། དགེ་རྒན་ཞིག་ཡིན་ཕྱིན་སློབ་མའི་ཁྲོད་དུ་མཐོང་ཡོད་པ་འདི་ལས་གཟི་བརྗིད་ཅིག་མེད་པ་རེད། ལྷག་པར་དུ་ད་ལྟའི་སྐབས་སུ་ཆིག་སྒྲིལ་ནི་གང་ལས་ཀྱང་གལ་ཆེ་བ་ཆགས་ཡོད་པའི་ངོས་ནས་དང་། མདོ་སྨད་སྤྱིའི་མཚན་མཐོང་ངོས་ནས་བལྟས་ནའང་སྤྲོ་ཚིགས་ཆོས་གྲགས་ལགས་སྤྱི་འཐུས་སུ་འོས་ཤོས་སུ་མཐོང་ཞེས་ལྟ་ཚུལ་བརྗོད་པ་ནི། སེམས་པ་རྣལ་ལ་ཕབ་ནས་བྲིས་པའི་ལྟ་ཚུལ་ཡང་དག་པ་ཞིག་རེད་བསམ། ཆེ་ས་ནས་བོད་སྤྱི་དང་ཆུང་ས་ནས་མདོ་སྨད་ནང་ཁུལ་གྱི་མཐུན་སྒྲིལ་ལ་གནོད་མི་སྐྱེལ་མཁན་ཞིག་དང་། དེ་བཞིན་ད་ཕན་གྱི་ལས་ཀ་བྱེད་ཕྱོགས་སོགས་ལ་བལྟས་ནས་མདོ་སྨད་སྤྱིའི་མཚན་མཐོང་ལར་རྒྱར་མི་གནོད་མཁན་ཞིག་སྤྱི་འཐུས་སུ་འདེམས་དགོས་པ་ནི་ཧ་ཅང་གལ་ཆེན་དོན་ཆེན་རེད་དྲན། བདེན་མིན་རྒྱ་ཆེའི་མདོ་སྨད་མི་མང་གིས་ཐུགས་བསམ་བཞེས་དགོས་པ་ཞིག་རེད། དེ་མིན་ལུང་ཚན་གྱི་འཐེན་འཁྱེར་སོགས་ཀྱིས་ལས་ཀ་འདྲ་མིན་བྱས་ན་སྤྱི་བའི་རྩ་དོན་དང་། མདོ་སྨད་སྤྱིའི་མཐུན་སྒྲིལ་རྩ་དོན་ལ་ཕན་གི་མ་རེད།
ལྷ་མོ་ལགས། ངོ་མ་རེད། བལ་ཡུལ་བཀྲ་ཤིས་དོན་གྲུབ་ཀྱི་ལུང་ཚན་ཁ་ལ་འཁྱེར་ནས་སྤྱི་འཐུས་ལ་འདུག་འདོད་ཀྱི་རྨི་ལམ་གཏོང་གི་འདུག ཁོ་གསེར་རྟ་ནས་ཡིན་པས་འོས་བླུགས་དགོས་པའི་རེ་བ་གནང་གི་འདུག་དེ་ཚོ་རྩ་ནས་ཡག་པོ་མི་འདུག ད་ལྟ་བོད་ལ་དགོས་བ་ནིམཐུན་སྒྲིལ་ཡིན་པ་རེད
ད་ཁ་བཙུམ་ནས་ལྟ་འདུག་གི་ཡིན། སྔོན་ཞིག་ལ་གདུག་དཀར་ཟེར་བ་ཞིག་ཨ་མདོའི་སྤྱི་འཐུས་ལ་བཀོད་སོང་། མཐར་ཁོས་ལས་རྔ་མ་རྫོགས་སྔོན་ལ་ཨ་རི་ནས་སྐྱབས་བཅོལ་ཞུས་ཟུང་། དེའི་རྗེས་ཞིག་ལ་སྒྲོལ་དཀར་ཞེས་བ་ཞིག་ལ་འདེམ་ཤོག་བླུག་སོང་། མོས་ཡང་བཤད་རྒྱུ་ལུང་གང་བཞག་ནས་བུད་སོང་། ད་ཁ་བཙུམ་ནས་ལྟ་འདུག་གི་ཡིན་ནོ།
ལྷག་བསམ་དང་རྣམ་དཔྱོད་མཆོག་ཏུ་ཡངས་པའི་བཀུར་འོས་དྲྭ་གྲོགས་མང་དག་ཅིག་གིས་བོང་བ་གསེར་གཟིགས་ཀྱི་ཚུལ་དུ་གུས་པའི་བསམ་ཚུལ་ལ་བརྒྱབ་སྐྱོར་དང་དགོངས་ཚུལ་གང་མང་གསུངས་གནང་བ་ནི་ཆེས་དགའ་འོས་པའི་གནས་ཤིག་ཏུ་མཐོང་། གུས་པས་སྐུ་ཞབས་ཤར་ཁུག་ལགས་དང་སྐུ་ཞབས་ཀླུ་མཁར་བྱམས་སོགས་ལ་ཁྱད་གསོད་ནམ་ཡང་ཞུ་མི་ཕོད་པ་མ་ཟད་ལྷག་བསམ་དང་འཇོན་ཐང་རྣམ་དཔྱོད་སྙིང་སྟོབས་བཅས་ཀྱིས་ཕྱུག་པའི་མི་བུ་འདི་དག་གི་ཡོན་ཏན་ལ་ལེགས་སོའི་བསྔགས་བརྗོད་དང་གུས་བརྩི་བླ་ན་མེད་པ་ཞུ་བཞིན་དུ་ཡོད། གུས་པས་བསམ་ཚུལ་ཅུང་ཟད་ཅིག་ཡི་གེར་བཀོད་དེ་ཁ་བརྡ་དྲྭ་བའི་སྟེང་བཞག་རྗེས་དེ་དང་འབྲེལ་ཡོད་ཀྱི་རྩོམ་ཡིག་ཡིད་འཕྲོག་པ་དག་མཇལ་ཞིང་བཀླགས་རྒྱུ་བྱུང་།
ཚང་མས་མཁྱེན་གསལ་ལྟར་མི་བུ་རེ་རེས་ཡུལ་ལུང་རེ་རེ་གྲུབ་ཅིང་ཡུལ་ལུང་རེ་རེས་ང་ཚོའི་སྤྱི་ཚོགས་འདི་གྲུབ་པ་ཞིག་ཡིན་གཤིས་སོ་སོ་སོ་སོའི་ས་ནས་ལྷག་བསམ་དང་བསམ་བློ་བཏང་སྟེ་འོས་མི་ངོ་སྤྲོད་དང་འབོད་སྐུལ་བཅས་ཞུ་རྒྱུ་ནི་བོད་སྤྱིའི་བདེ་སྡུག་དང་ལས་དབང་ལ་རང་ཉིད་ཀྱི་ངོས་ནས་སེམས་ཁུར་དང་མཉམ་ཞུགས་བྱེད་སྟངས་ཤིག་སྟེ་ཆེས་ཡིད་དུ་འོང་ཞིང་འགན་འཁུར་བའི་དམངས་གཙོའི་རང་དབང་ལོངས་སུ་སྤྱོད་སྟངས་དེ་རེད། འོན་ཀྱང་རྩོམ་ཡིག་གཞན་དང་གཞན་དུ་འོས་མི་སོ་སོ་གཤིབ་བསྡུར་བྱས་ཏེ་ཁྱོད་ཤི་ང་གསོན་གྱི་འཐབ་རྩོད་ཀྱི་རྣམ་པ་ལྟ་བུ་ཞིག་མངོན་ཡོང་གི་ཡོད་པའང་མཐོང་ཞིང་། འོས་མི་སྒེར་ཁག་སོ་སོའི་འདས་པའི་ལས་དོན་དང་ཉམས་མྱོང་སློབ་སྦྱོང་སྤྱི་སྨན་གྱི་ལས་ཀ་ག་རེ་བྱས་ཡོད་མིན་དང་། ཡང་སྤྱི་བར་གནོད་པའི་ལས་ཀ་ག་རེ་བྱས་ཡོད་མེད་སོགས་གླེང་འོས་པ་ཙམ་ལས་འཁོན་འཛིན་ལྟ་བུའི་རྣམ་པས་སྐྱེ་བོ་སྒེར་གྱི་ལོ་རྒྱུས་དང་སྐྱོན་ཆ་བཙལ་ཏེ་ནན་གྱིས་གླེང་བ་དག་ནི་དམངས་གཙོའི་སྤྱི་ཚོགས་ཁྲོད་ཀྱི་འོས་མིའི་འགྲན་རྩོད་བྱེད་སྟངས་ཚད་ལྡན་ཞིག་མིན་པར་ཁར་གཞི་རྩའི་འགྲོ་བ་མིའི་ཐོབ་ཐང་གི་དོན་ཚན་ཁག་སོ་སོ་དང་ཡང་ཅུང་ཙམ་བརྒྱབ་འགལ་དུ་འགྲོ་བཞིན་མེད་དམ་སྙམ་པ་ཤར། ཐ་ན་རིགས་གཅིག་གིས་བྱད་དབྱིབས་ཚུན་ཚད་གླེང་སྟེ་དབྱེ་ཞིབ་བྱེད་ཀྱིན་པ་ནི་སྐབས་འདིར་ང་ཚོས་བོད་སྤྱི་བར་སྨན་པའི་མི་བུ་ལྷག་བསམ་འཇོན་ཐང་ཅན་ཞིག་དང་ཡོན་ཏན་ཅན་ཞིག་འདེམས་རྒྱུ་ལས་བོད་ཀྱི་ཕོ་གསར་འདེམས་ཀྱི་མེད་པའི་དབྱེ་བ་ཙམ་ཡང་མ་བྱས་པར་མངོན།
དེས་ན་སླར་ཡང་ལྷག་བསམ་དག་པའི་འབོད་སྐུལ་ཞུ་རྒྱུར། ང་ཚོ་ཚང་མ་སྤྱིར་བཏང་གི་ཆ་ནས་ལས་དང་ཉོན་མོངས་པའི་འཆིང་བ་ཀུན་ལྡན་གྱི་སོ་སྐྱེ་རང་དགའ་བ་རྐྱང་རྐྱང་སོང་གཤིས་ཆ་ཐམས་ཅད་ནས་མི་སྐྱོན་ཆ་མེད་མཁན་ཞིག་བཙལ་ཡང་མཐོང་དཀོན་པ་ཞིག་རེད། དེ་བས་ང་ཚོས་ལྟ་དགོས་ས་གཙོ་བོ་ནི་སྐྱོན་དང་ཡོན་ཏན་གཉིས་ལས་ཡོན་ཏན་ལྷག་ཅིང་དེ་ཡང་སྤྱི་བའི་དོན་དུ་སྤྱིའི་འཐུས་ཚབ་བྱེད་ཐུབ་མཁན་ཞིག་སྟེ་མདོར་ན་ལྷག་བསམ་ཅན་དང་ཡོན་ཏན་ཅན་ཞིག་འདེམས་དེ་རང་ཉིད་འུར་གྱི་རྗེས་སུ་མ་འབྲངས་པར་འོས་ཤོག་གཅིག་བུ་དེ་ཕྱོགས་ཞེན་བྲལ་བའི་སྒོ་ནས་སྤྱིའི་ཆེད་དུ་སྤྱི་མི་ཡང་དག་གི་ཚབ་མཚོན་རང་བཞིན་ཅན་ཞིག་ལ་འཕེན་རྒྱུ་ནི་དམངས་གཙོའི་ཁེ་དབང་ཡང་དག་པར་ལོངས་སུ་སྤྱོད་སྟངས་དེ་ཡིན་པས་དེ་ལྟར་གནང་རོགས་ཞེས་ཞུ་ཆོག་པ་ཞུ། །
བཀའ་དྲིན་ཆེ།
སློབ་མས་དགེ་རྒན་ངོ་སྤྲོད་ཡག་པོ་གནང་འདུག ཐུགས་རྗེ་ཆེ།
གུས་པའི་བསམ་ཚུལ་ཡི་གེར་བཀོད་པའི་མ་ཡིག་ནང་ཚིག་གི་གཅོད་སྟངས་དང་ཤད་འབྲི་སྟངས། དག་ཆ་ཁ་ཤས་ཀྱང་ནོར་འདུག་པས་མཁྱེན་ཡངས་རྣམས་ལ་དགོངས་པ་མ་འཚོམས་རོགས་ཞུ།
གུས་པ་ནི་སྐུ་ཞབས་སྤྲོ་ཚིགས་ཆོས་གྲགས་ལགས་ཀྱི་ཕ་ཡུལ་གཅིག་པ་དེ་འདྲ་མིན་ཞིང་ཁོང་གི་ལྷན་སྐྱེས་ཀྱི་རྣམ་དཔྱོད་དང་སྦྱངས་སྟོབས་ཀྱི་ཤེས་ཡོན་ད་དུང་མི་གཞི་བཅས་ཀྱིས་ཡིད་འཕྲོག་སྟེ་ཁོང་དང་གུས་གཉིས་བར་གྱི་འབྲེལ་བ་ནི་དགེ་སློབ་གྱི་འབྲེལ་བ་ཡིན་པ་ནི་དངོས་འབྲེལ་ཞིག་རེད། འོན་ཀྱང་གུས་པས་གོང་ཞུས་ལྟར་གནད་དོན་གང་ཞིག་ལ་ལྟ་སྐབས་ཆེས་ཐོག་མར་རང་ཉིད་ཀྱི་དགའ་ཕྱོགས་དང་སེམས་ཚོར། ཆགས་ཞེན་སོགས་ལོགས་སུ་གང་ཐུབ་ཐུབ་བཀར་ཏེ་བསམ་བློར་བསླད་ཞུགས་འཇུག་གི་མེད་པ་གཙོར་འདོན་བྱེད་ཀྱི་ཡོད། དེའི་ཐོག་ནས་གུས་པའི་ཁོང་ངོ་སྤྲོད་གནང་བ་ལ་སྔ་གཞུག་ཀུན་ཏུ་སྤོབས་པ་སྐྱེ་འོས་པ་ཞིག་ལས་གནོངས་ཤིག་ཁྱོན་ནས་མེད་པས་མཁྱེན་ལྡན་དྲྭ་གྲོགས་དག་གིས་ཀྱང་དེ་བཞིན་དུ་རང་ཉིད་ཀྱི་རྣམ་དཔྱོད་ཀྱི་བློ་མིག་ཡངས་པོ་ཞིག་དང་དྲང་པོ་ཞིག་ཏུ་གཟིགས་པར་ཞུ་ཞུ། །
དེ་མིན་འཇིག་རྟེན་ཡོངས་སུ་མི་ཤེས་གང་། །དེ་ནི་ཐུབ་པའི་ལྟ་བུར་མངོན། །ཞེས་པ་ལྟར་རང་ཉིད་ཀྱི་བསམ་བློར་ཆགས་ཞེན་གྱི་དྲི་མས་བསླད་སྟབས་གཞན་གང་ཞིག་མཐོང་ཡང་རང་ཉིད་ཀྱི་ལྟ་ཚུལ་ནང་བཞིན་ཡིན་དགོས་པའམ་ཡོང་དགོས་པའི་གཟིགས་ཚུལ་ཀུ་དོགས་ཅན་དང་འཁྱོག་པོ་རྣམས་རྒྱང་རིང་རྒྱང་རིང་ཞིག་ཏུ་འདོར་བར་རིགས་སོ་ཞེས་སླར་ཡང་ནན་ཏན་ཆེན་པོའི་སྒོ་ནས་ཞུ་གསོལ་འདེབས་པ་ལགས་ཤིང་། རྒྱུ་མཚན་ནི་གུས་པ་ཡང་ཡུལ་གངས་ཅན་པའི་ཡུལ་མི་དཀྱུས་མ་ཞིག་ཡིན་སྟབས་རང་ཉིད་ཀྱིས་མཐོང་བའི་སྤྱི་བའི་འོས་མི་དེ་ངོ་སྤྲོད་བྱེད་དབང་ཡོད་ལ་ངོ་སྤྲོད་བྱེད་ཡུལ་འོས་མི་དང་བྱེད་པ་པོ་གཉིས་དབར་གྱི་འབྲེལ་བ་དགེ་རྒན་དང་དགེ་ཕྲུག་ཡིན་པ་དེར་སྐྱོན་གང་ཡང་མཐོང་གི་མེད་པ་ལགས་ན་འབྲེལ་བ་དེ་ཙམ་ལ་བསྙད་བཙགས་ཏེ་དེ་མ་ཐག་ནས་གནད་དོན་རྣམས་འཁྱོག་པར་བསྒྱུར་རྒྱུའི་ལས་དོན་ཡང་མི་རྩོམ་པར་མཁྱེན་ཞེས་ཞུ། །
ད་ཡིན་ན།་མདོ་སྨད་ལ་རབ་བྱུང་ན་སྐད་ཡིག་གཉིས་གསུམ་མམ་རྒྱལ་སྤྱི་དང་རྒྱ་ནག་ལ་ལྟ་ཐུབ་མཁན། དེའི་ཐོག་འཇོན་ཐང་དང་ལྷག་བསམ་ཡོད་མཁན་ཞིག་དགོས་ཀྱི་འདུག མདོ་སྨད་དབུས་རྒྱུན་ནང་སྤྱི་འཐུས་ལངས་མཁན་ཡོད་མ་རེད་པས། དེ་མིན་རུང་སྤྱི་འཐུས་འོས་མི་མང་པོ་གདམ་རོགས།
ངས་བལྟས་ན། མདོ་སྨད་སྤྱི་འཐུས་འོས་གཞི་དག་ནི། སྤྱི་ཟུར་བསྟན་འཛིན་མགོན་པོ། ཟམ་གདོང་རིན་པོ་ཆེའི་སྒེར་དྲུང་བསྟན་འཛིན་དོན་ཡོན། ཀླུ་མཁར་བྱམས། འབྲེལ་བ་ལས་ཁུངས་འགན་འཛིན་ཚེ་རིང་དབང་མོ། དུས་བབ་དོན་གྲུབ་བཀྲ་ཤིས། སྤྲོ་ཚིགས་ཆོས་གྲགས། ཤར་ཕྱོགས་ཁུག་རྟ། འགྲོ་བ་མིའི་ཐོབ་ཐང་ཉམས་ཞིབ་པ་ཚེ་རིང་རྒྱལ། ནོར་ཝེ་རླུང་འཕྲིན་རྒྱ་ཡིག་སྡེ་ཚན་འགན་འཛིན་མགུར་འབུམ་རྒྱལ། ནོར་གླིང་འགན་འཛིན་ཟུར་པ་སྒྲོལ་མ་སྐྱབས། ནོར་གླིང་མཐོ་སློབ་དགེ་ཟུར་ལྷ་ལུང་རྒྱལ། སྙན་ངག་པ་ལྷ་ཆབ་སྦྱིན་པ། མཁན་པོ་འཇུ་བསྟན་སྐྱོང་།གློག་ཀླད་ཆེདསླ་མཁས་པ་སྨོན་ལམ། དགེ་རྒན་སྤྲེལ་ནག་པ་བློ་གྲོས་དཔལ་བཟང་། བཀྲ་ཤིས་དོན་གྲུབ། ཇོ་ནང་འགྲོ་ཕན་འགན་འཛིན་ཚངས་དབྱངས། མདོ་སྨད་དབུས་རྒྱུན་ཚོགས་གཙོ་བསྟན་པ་དངོས་དང་ཚོགས་གཙོ་ཨ་ལོ། རྒྱུན་ལས་རྒྱ་མཚོ། ཝ་ཎའི་དཔེ་མཛོད་ལས་བྱེད་ཨ་ཅཱ་ར་གཞོན་ནུ་དོན་གྲུབ། ངྔ་ས་ས་གནས་མདོ་སྨད་རྒྱུན་ལས་འཆི་མེད། དགེ་རྒན་གཡུ་སྒང་འོད་ཟེར་སོགས་ཡོད།
གོང་གི་འོས་མི་དེ་དག་ལ་དགོངས་བཞེས་གནང་སྟེ་འོས་བླུགས་པ་ཡིན་ན་མང་གཙོའི་ཁེ་དབང་དངོས་ལོངས་སུ་སྤྱད་པ་ཞུག་ཡིན། མིང་གཞུང་འདིའི་ར་བ་ལས་བརྒལ་ཏེ་འོས་མི་མཚམས་སྦྱོར་ཞུ་རྒྱུ་ཡོད་ན་དགའ་བསུ་ཡོད།
ནོར་གླིང་འགན་འཛིན་ཟུར་བ་སྒྲོལ་མ་སྐྱབས་ཡག་ཤོས་རེད། ཡིན་ནའང་། ཨ་མདོའི་མིས་རང་ཉིད་དགའ་ཕྱོགས་ལ་ཚོར་སྣང་གིས་འུད་བསྟོད་བྱེད་པ་མ་གཏོགས་དངོས་ཡོད་སྤྱི་ཚོགས་ཀྱི་དགོས་མཁོར་དམིགས་ནས་ལས་ཀ་གང་ཡང་བྱེད་ཤེས་ནི་མ་རེད། འདིའི་ཐད་སྤྱི་འཐུས་ཚོགས་གཙོས་གསུངས་བཞིན་སྤྱི་འཐུས་ཟེར་དུས་གྲོས་ཚོགས་ར་བའི་ནང་ནས་སྐད་ཆ་རྫིག་པོ་བཤད་རྒྱུ་གཅིག་པོས་ག་ལ་འཐུས། ར་བ་དེ་ནས་ཕྱོགས་ལོགས་ལ་ཐོན་ཚར་བའི་རྗེས་ནས་སྒྲུབ་དགོས་པའི་འགན་འཁྲི་ཆེས་མང་བ་དེ་རེད། ་་་་་
སྐུ་ཞབས་ཕུག་རོན་ལགས་ལ་ཞུ་རྒྱུར།
འོས་མིའི་ར་བ་སུ་གང་གིས་བཟོས་ཡོད་པ་མ་རེད་ལ། ཚད་བཀག་དེ་བས་ཀྱང་ཡོད་པ་མ་རེད། འོན་ཀྱང་མདོ་སྨད་ཟེར་ན་ས་མདོ་སྨད་དང་གནམ་མདོ་སྨད་རེད། ང་འདྲ་བའི་མི་གཉོམ་ཆུང་ཞིག་གིས་དེ་ཚོ་ཚང་མ་རེ་རེ་ནས་ངོ་ཤེས་དགོས་ན་ཡང་དཀའ་བའི་ཚོད་རེད། དེ་བས་ང་རང་གིས་གང་ཤེས་པ་དང་མཐོང་བའི་འོས་མི་དེ་སྤྱིའི་དོན་དུ་ཁུར་ཞིག་བླངས་ཏེ་དང་བླང་གིས་ངོ་སྤྲོད་བྱས་པ་དེ་ཙམ་ཡིན་ལགས། སྐུ་ཉིད་ཀྱི་ངོས་ནས་ཀྱང་དེ་ག་རང་གནང་བའི་རེ་བ་ཆེ། །
མཁྱེན་ལྡན་མ་དོན་འགྲུབ་མཚོ་མོ་ལགས་ལ་ཞུ་རྒྱུར།
གུས་པས་ཕྱོགས་ཞེན་དང་ཆགས་སྡང་ཁྱོན་ནས་ཞུས་མེད། མདོ་སྨད་ཀྱི་སྤྱི་མི་ཚད་ལྡན་ཞིག་གང་ན་སུ་བཞུགས་པ་ཚང་མ་རེ་རེ་ནས་བདག་གིས་དངོས་གནས་ངོ་ཤེས་ཀྱི་མེད། ཡིན་ནའང་སོ་སོས་གང་ཤེས་པའི་ནང་འོས་ཤོས་དེ་ངོ་སྤྲོད་ཞུ་བཞིན་དུ་ཡོད། སྐུ་ཉིད་ཀྱི་ངོས་ནས་ཀྱང་ལམ་སེང་བཀའ་བཀྱོན་དང་གླེང་འགེལ་བ་སོགས་མེད་པར་དྲང་པོའི་ཐོག་ནས་སྤྱིའི་དོན་དུ་སྤྱི་མི་ཚད་ལྡན་ཞིག་སོ་སོས་གང་ཤེས་རྣམས་ངོ་སྤྲོད་གནང་རོགས་ཞུ། །
བཀའ་དྲིན་ཆེ།
སྐུ་ཞབས་ཕུག་རོན་ལགས་ཀྱིས་གོང་དུ་སྤྱིའི་དོན་དུ་དགོངས་བཞེས་ཡག་པོ་ཞིག་གནང་སྟེ་སོ་སོས་ཤེས་པའི་འོས་མི་ངོ་སྤྲོད་གནང་བར་སྙིང་ཐག་པ་ནས་བཀའ་དྲིན་ཆེ་ཞུ།
འདི་ལྟར་ན་སྤྱིའི་དོན་ལ་བཅངས་པའི་ལྷག་བསམ་དངོས་དེ་མཚོན་ཐུབ་ཀི མུ་མཐུད་ནས་ཡིན་ད།
ཨ་ཚོགས་ཀླུ་མཁར་བྱམས་རྒྱལ་གྱུར་ཅིག སྤྲོ་ཚིགས་ཟེར་རྒྱུའི་ཁེ་གང་ན་འདུག་ན་རྒྱུགས་རྒྱུ་ལས་རང་ཚུགས་ཡོད་པ་མ་རེད། དེ་ཚོ་མྱི་རྫུན་མའི་རིགས་རེད།
ཡག་པོ་འདུག་ ཡིན་ན་གྲྭ་རྐྱང་ཟེར་དེ་ཤིན་ཏུ་ནས་ནོར་འདུག་
རྗེས་མ་ཡིད་གཟབ་་མཛོད་གལ་ཆེ།
བལ་ཡུལ་གནས་བསྡད་བཀྲིས་དོན་གྲུབ་ནི་ད་ཐེངས་གི་མདོ་སྨད་སྤྱི་འཐུས་ལ་འོས་སུ་མཐོང། མདོ་སྨད་མི་དམངས་ཀྱི་ཁོང་ལ་འོས་བླུག་རོགས།
གོང་དུ་མང་པོ་ཞིག་གི་རང་གི་འདོད་པ་ལྟར་འོས་མི་ཁག
གཅིག་ཁྱབས་བསྒྲགས་བྱེད་གྱིན་འདུག་། འདི་ནི་ང་ཚོའི་མཐུན་མོང་གི་ཁེ་དབང་རེད་ལ་ཐོབས་ཐང་ཡང་རེད། འོན་ཀྱང་འོས་མི་འདི་དག་སྤྱི་འཐུས་སུ་འདེབས་པ་འདོད་མོས་མེད། གང་ཡིན་ཟེར་ན་འོས་མི་འདི་དག་མདོ་སྨད་མཁོ་པའི་འོས་མི་མ་རེད། འོན་ན་མདོ་སྨད་ལ་མཁོ་བའི་མི་དེ་སུ་ཟེར་མ་བལ་ཡུལ་དུ་གནས་སྡོད་བཀྲིས་དོན་གྲུབ་ནི་ང་ཚོ་ལ་མཁོ་བའི་མི་དེ་རེད།
བཀྲ་ཤིས་དོན་གྲུབ་ཟེར་བ་དེ་བལ་ཡུལ་ནས་བཤད་རྒྱུ་གཏམ་རྒྱུའི་མང་བའི་མི་རེད། ལྷག་པར་གཞིས་ཆགས་ཞིག་གི་སེམས་ན་ན་ཟུག་མེད་དུས་བོད་ཀྱི་རྩ་དོན་ཟེར་བ་ཁག་པོ་རེད
གཞན་ལ་བསྟུན་ཐབས་བྱས་ཏེ་ཀུན་མཐུན་བྱེད་པ་ནི་ཡོན་ཏན་ཞིག་ཡིན་པ་ལས་སྐྱོན་རྩ་བ་ཉིད་ནས་མ་རེད། མདོར་ན་ལྷ་ཆོས་རྩ་བ་དད་པ་ཡིན། ། ཀུན་དང་མཐུན་པ་མི་ཆོས་རྩ་བ་ཡིན། །ཞེས་གསུངས་ཡོད་པ་ལྟར་རེད། གང་ལྟར་ཐེངས་འདིའི་མདོ་སྨད་མི་མང་གི་སྤྱི་འཐུས་ལ་མི་ཚད་ལོངས་ཤེས་འཇོན་ལྷག་བསམ་ཀྱིས་ཕྱུག་པའི་འོས་མི་ཞིག་བྱུང་ན་དེ་ག་རང་གིས་བོད་པ་ཚང་ཕྱོགས་གང་ཐད་ནས་ཡར་རྒྱས་འགྲོ་བ་དང་ཆབས་ཅིག་ཏུ་ཕན་ཐོགས་ངེས་ཅན་ཡོད་པ་ཞིག་ཡིན་པས་ཚང་མས་ཕྱོགས་ཞེན་དང་ཆགས་སྡང་མེད་པའི་ཐོག་ནས་སྤྱིའི་དོན་དུ་བསམ་བློ་མང་ཙམ་བཏང་སྟེ་འོས་ཤོག་འཕེན་ས་མ་ནོར་བ་ཞིག་བྱེད་རྒྱུ་ཅིས་ཀྱང་གལ་ཆེ་བར་མཐོང་། །
བཀའ་དྲིན་ཆེ།
ཨ་མདོ་བ་ཁྱེད་ཚོས། རྒྱལ་ཁ་ཞིག་ལེན་འདོད་ན། དྲང་ཕྱོགས་ནས་ལང་ཐུབ་པའི་དབའ་བོ་བློ་ཁོག་ཅན་ཞིག་འདེམས་ཤོག་ཨ། ཁ་མཁས་བ། ཀ་ཁ་བ། ཁྱེད་ལས་བ། སྐད་གཉིས་བ། སྙན་ངག་པ། མགོ་སྐོར་བ། མཚན་ཉིད་པ། ཉམས་ལེན་པ། རྒྱུ་ཆེན་པ། མདོ་མེད་པ། རྒྱལ་ཚོང་བ་སོགས་ཀྱིས་ཅི་གང་བྱེད་ཡ་ཡོད་པ་མ་རེད།
འཛམ་གླིང་སྤྱིད་སྲིད་དང་། རང་རྒྱལ་ནང་སྲིད། སྡོད་གནས་དམངས་སྲིད་གང་ལ་གོ་ལུང་ཐོས་ལུང་ཙམ་ལས་སློབ་སྦྱོང་ལམ་སྟོན་གང་ལ་ཡང་གོ་སྐབས་མེད་པའི་བཙན་བྱོལ་བ་ཡོངས་ཆབ་སྲིད་ཀྱི་གོ་རྟོག་གཅིག་པ་གཅིག་པ་ཡིན་པས། དེ་ལ་འདི་བཟང་དང་འདི་ངན་ཟེར་ས་མེད་པས། མྱི་གཤིས་དྲང་མོ། མྱི་དོན་ལ་འཆི་ཐུབ་ནི་ཞིག་ཡིན་ན་འགྲིག་ཡོད་པས། ད་རེ་ལྕགས་རྡོ་སྐོར་ཐུབ་ནི་ཞིག་ཡིན་པའི་རེ་བ་ཡོད་ཐལ།