དོལ་སྨྱོན།
==== སེམས་ཀྱི་གནས་ཚང་ལ་ཕུལ་བ།
དང་པོ། (2013) ལ་སྐྱེལ་མ་ཞུ་བ།
དེ་རིང་ནི་སྟོང་ལོ་བཅུ་གསུམ་གྱི་ཉིན་མཐའ་མ་དེ་རེད། སྟོང་ལོ་བཅུ་གསུམ་འདི་འུ་གཉིས་ལ་མཚོན་ན་རྒྱལ་ཁའི་ལོ་ཞིག་སྟེ། ལོ་འདིའི་ནང་འུ་གཉིས་ཀྱི་མི་ཚེར་ལམ་ལྷོང་དང་ལེགས་འགྲུབ་རྒྱལ་ཁ་དང་གྲུབ་འབྲས་སོགས་ཀྱི་དབུ་འཁྱུད་མང་དུ་བྲིས་ཡོད་ལ། ད་དུང་མདུན་སྐྱོད་དང་སྔོན་ཐོན་གྱི་གོམ་པའང་གང་འཚམ་སྤོས་ཡོད། དེས་ན་ཉིན་ཞག་ཆུའི་རླབས་རིས་བཞིན་བཞུར་བཞུར་ནས་དེ་རིང་གི་ཉིན་འདིར་སླེབས་དུས། འུ་གཉིས་ནས་འདས་ཟིན་པའི་སྟོང་ལོ་བཅུ་གསུམ་ལ་ཕྱིར་འདང་ཞིག་རྒྱབ་ཚེ། སེམས་ཞུམ་ཞིང་ངོ་གནོང་དགོས་པའི་སྐྱོ་བ་ལས་བྲལ་ཏེ་དགའ་བ་དང་སྤྲོ་བའི་ཚོར་བ་རེ་ངེས་པར་དུ་མྱོང་ཐུབ་པ་དེ་ཡིན།
དེ་ཡང་ཡིན་ཏེ་སྟོང་ལོ་བཅུ་གསུམ་འདི་མེ་ཏོག་གི་ལྡུམ་ར་ཞིག་ཡིན་ན། འུ་གཉིས་ནི་བརྩེ་དགས་འཕུར་ལྡིང་བྱེད་པའི་གསེར་སྦྲང་གཡུ་སྦྲང་དེ་ཡིན་ལ། སྟོང་ལོ་བཅུ་གསུམ་འདི་དབྱར་གྱི་དཔྱིད་དཔལ་ཞིག་ཡིན་ན། འུ་གཉིས་ནི་མཛེས་སྡུག་གི་རང་ཞལ་ངོམ་པའི་གངས་ལྷ་མེ་ཏོག་དེ་ཡིན། དགོད་སྒྲའི་ཀློང་ནས་རྫོགས་པའི་སྟོང་ལོ་བཅུ་གསུམ། མིག་ཆུའི་གསེང་ནས་བཞུད་པའི་སྟོང་ལོ་བཅུ་གསུམ། དགོད་སྒྲ་ནི་བདེ་སྐྱིད་ཀྱི་འབྲས་རྟགས་ཡིན་ལ། མིག་ཆུ་ནི་བརྩེ་དུང་གི་བཞུར་རྒྱུན་ཡིན།
སྟོང་ལོ་བཅུ་གསུམ་འདིའི་ནང་དུ། དོན་དང་དོན་མིན་གྱི་ཚོར་འདུ་ཆེས་སྐྱེན་པའི་ང་ཡིས། ཞི་འཇམ་བབ་ཕེབས་ཡིན་པའི་ཁྱེད་ཀྱི་སེམས་ལ་རྨ་ཁ་གང་འཚམ་བཟོས་ཡོད་ཅིང་། བློ་གཅིག་སེམས་གཅིག་གི་བརྩེ་བ་ཆེས་ཟབ་པའི་ང་ཡིས། ཕྱི་གཙང་ནང་གཙང་ཡིན་པའི་ཁྱེད་ཀྱི་སེམས་ལ་དྲོད་ཁོལ་གང་འཚམ་བསྐྱིལ་ཡོད། དེས་ན་སྟོང་ལོ་བཅུ་གསུམ་གྱི་ཉིན་མཐའ་མ་འདིར་སླེབས་དུས། ངས་སྟོང་ལོ་བཅུ་གསུམ་ནང་ནོར་ཞིང་འཁྲུལ་བའི་སྒོ་ནས་ཉེས་ཤིང་འཛོལ་བའི་སྒོ་གསུམ་གྱི་བྱ་བ་ཀུན་ལ་གནོང་འགྱོད་དྲག་པོས་མཐོལ་བཤགས་ཞུ་བ་ཡིན་ལ། དགའ་བ་དང་དུང་བའི་སྒོ་ནས་བྱམས་པ་དང་བརྩེ་བའི་སྒོ་གསུམ་གྱི་ལེགས་བྱས་ཀུན་ལ་སྤོབས་པ་ཆེན་པོ་ཞིག་དང་བློ་སྟོབས་ཆེན་པོ་ཞིག་གིས་རྗེས་སུ་ཡི་རངས་བྱེད་པ་ཡིན།
ད་དུང་སྟོང་ལོ་བཅུ་གསུམ་འདིའི་ནང་དུ་། ཁྱེད་ནས་བདག་ལ་ཁ་ཞེ་གཉིས་མེད་ཀྱི་བརྩེ་བ་བྱིན་ཡོད་ལ་མངོན་ལྐོག་དབྱེར་མེད་ཀྱི་དུང་བ་བསྐྱིལ་ཡོད། ད་དུང་ང་ཡི་ཚེ་སྲོག་ལ་གཟི་བྱིན་གྱི་འོད་སྟོང་སྤར་ཡོད་ལ་ང་ཡི་རྣམ་ཤེས་ལ་སྟོབས་ཤུགས་ཀྱི་གཟི་དཔལ་བསྐྲུན་ཡོད། ང་ཡི་བླ་ཚེ་སྲོག་གསུམ་གྱི་ངོ་བོར་གྱུར་པའི་སེམས་ཀྱི་གནས་ཚང་། ངས་ཁྱོད་ལ་སེམས་ཁོང་རུས་པའི་གཏིང་ནས་ཐུགས་རྗེ་ཆེ་ཞེས་ལན་བརྒྱར་ཞུ་བ་ཡིན།
མཐའ་མཇུག་འདིར་སླེབས་དུས་ཆེས་དགའ་འོས་པ་ཞིག་ནི། ནད་མེད་བདེ་ཐང་དང་བསམ་དོན་ལྷུན་འགྲུབ། བརྩེ་བ་ཇེ་ཆེ་དང་དུང་བ་ཇེ་ཟབ། བློ་གཅིག་སེམས་གཅིག་དང་ཁ་ཞེ་གཉིས་མེད་ཀྱི་ངང་ནས་སྟོང་ལོ་བཅུ་གསུམ་ཡོངས་སུ་རྫོགས་ཤིང་། དེ་རིང་གི་ཟིན་བྲིས་འདི་ཡང་དགའ་སྤྲོ་ཆེན་པོ་ཞིག་གི་ངང་ནས་འབྲི་རྒྱུ་བྱུང་བ་དེ་རེད། དེས་ན་སྟོང་ལོ་བཅུ་བཞི་ཡོངས་སུ་རྫོགས་པའི་སང་ལོའི་ཉིན་འདིར་ཡང་ཟིན་བྲིས་འདི་ལྟ་བུ་ཞིག་འབྲི་བའི་གོ་སྐབས་ལ་སྒུག་ནས་ཡོད་ཅིང་། དགེ་བ་དང་བཟང་པོ་བཀྲ་ཤིས་དང་རྣམ་རྒྱལ་རྐྱང་རྐྱང་ཡིན་པའི་ཟིན་བྲིས་འདི་ལས་ལྷག་པ་ཞིག་འབྲི་བར་ཡིད་ཆེས་གཏན་གཏན་ཡོད།
31.12.2013 ཉིན་བལ་ཡུལ་རྒྱལ་ས་ནས།
གཉིས་པ། (2014) བསུ་བ།
ང་ཡི་སེམས་ཀྱི་གནས་ཚང་ལགས། དེ་རིང་ནི་སྟོང་ལོ་བཅུ་བཞིའི་ཉིན་དང་པོ་དེ་ཡིན་པས། ངས་ཐོག་མར་སྐུ་ཉིད་ལ་སྟོང་ལོ་གསར་བ་འདིའི་ནང་དུ་ལུས་བདེ་སེམས་བདེ་དང་བཀྲ་ཤིས་ཁམས་བཟང་། བསམ་དོན་ལྷུན་འགྲུབ་དང་བྱ་བ་ལམ་འགྲོ། ཡོད་ཚད་བདེ་ལེགས་དང་ཐམས་ཅད་ལྷུན་འགྲུབ་ཡོང་བའི་རེ་བ་དང་སྨོན་འདུན་སེམས་ཀྱི་གཏིང་དང་སྙིང་གི་ཁོང་ནས་ལན་བརྒྱར་ཞུ་བ་ཡིན་ལ། དེ་དེ་བཞིན་དུ་འགྲུབ་པའི་གསོལ་འདེབས་དང་སྨོན་ལམ་ཡང་ཅི་ནུས་བྱེད་ངེས་ཡིན།
སྟོང་ལོ་བཅུ་བཞི་འདི་ཡང་སྟོང་ལོ་བཅུ་གསུམ་ནང་བཞིན་འུ་གཉིས་ཀྱི་མི་ཚེར་དགེ་བ་དང་བཟང་པོ་ལྷུན་འགྲུབ་དང་དཔལ་འབར་ཁོ་ནས་མདུན་བསུས་ཤིང་། བདེ་སྐྱིད་དང་དཔལ་ལྡན་ཕུན་ཚོགས་དང་ཡིད་བཞིན་ཁོ་ནས་མཇུག་སྡུད་པའི་རེ་བ་དང་ཡིད་ཆེས་རི་ལྟར་སྤུངས་ཡོད། རེ་སྨོན་གྱི་གཏིང་ན་འཛུམ་པའི་སྟོང་ལོ་བཅུ་བཞི། ཡིད་ཆེས་ཀྱི་ཁོང་ན་བཞད་པའི་སྟོང་ལོ་བཅུ་བཞི། མེ་ཏོག་བཞིན་བཞད་པར་སྨོན། སྦྲང་ཆར་བཞིན་འཇོ་བར་སྨོན།
སྟོང་ལོ་བཅུ་བཞི་འདི་དཔྱིད་དཔལ་འཇམ་པོ་དེ་ཡིན་ན། འུ་གཉིས་ནི་ཟིམ་ཟིམ་དུ་འཇོ་བའི་སྦྲང་ཆར་ཟེགས་མ་དེ་ཡིན་པར་སྨོན། སྟོང་ལོ་བཅུ་བཞི་འདི་ས་སྲོད་ཀྱི་མཚམས་སྤྲིན་དེ་ཡིན་ན། འུ་གཉིས་ནི་བདེ་བར་གཉིད་དུ་ཡུར་བའི་བྱིའུ་ཆུང་འཇོལ་མོ་དེ་ཡིན་པར་སྨོན། སྟོང་ལོ་བཅུ་བཞི་འདི་མཛེས་སྡུག་གིས་འཁྱིལ་བའི་རྒྱ་མཚོ་ཆེན་པོ་དེ་ཡིན་ན། འུ་གཉིས་ནི་བརྩེ་དགས་རོལ་བའི་གསེར་བྱ་ངང་པ་དེ་ཡིན་པར་སྨོན།
སྟོང་ལོ་བཅུ་བཞིའི་སྐར་ཆ་རེ་རེ་ནས་སྟོང་ལོ་བཅུ་བཞིའི་སྐར་མ་དང་ཆུ་ཚོད་རེ་རེ། སྟོང་ལོ་བཅུ་བཞིའི་ཉིན་ཞག་རེ་རེ་ནས་སྟོང་ལོ་བཅུ་བཞིའི་བདུན་ཕྲག་དང་ཟླ་བ་རེ་རེར། ཁྱོད་ཀྱི་བྱ་བ་གསར་བ་དང་དམིགས་ཡུལ་གསར་བ། རེ་བ་གསར་བ་དང་རྨི་ལམ་གསར་བ། འཆར་གཞི་གསར་བ་དང་མདུན་སྐྱོད་གསར་བ་བཅས། ཡོད་ཚད་ནས་ཡོད་ཚད་བདེ་ལེགས་ངང་ལམ་ལྷོང་ཡོང་བའི་རེ་བ་དང་སྨོན་པ་ཤིན་ཏུ་ནས་ཆེ་ཞིང་། ལྷག་པར་དུ་སྟོང་ལོ་བཅུ་བཞི་འདིའི་ནང་དུ་གྲངས་མེད་ལ་ལུང་མང་པོས་རྒྱང་གིས་བཅད་པའི་ཁྱོད་ཀྱི་ཞལ་རས་དེ་བདག་གི་མིག་མདུན་ན་མངོན་སུམ་དུ་སྣང་ཞིང་། སླར་ཡང་གྱེས་བྲལ་གྱི་གདུང་བ་མི་མྱོང་བའི་སྨོན་ལམ་ཡང་ཡང་འདེབས།
ང་ཡི་བླ་ཚེ་སྲོག་གསུམ་གྱི་ངོ་བོར་གྱུར་བའི་སེམས་ཀྱི་གནས་ཚང་། ཁྱོད་ཀྱིས་སྔར་ལྟར་ལྷད་མེད་ཀྱི་བརྩེ་བ་དང་འགྱུར་མེད་ཀྱི་དུང་བས་ང་རང་སྐྱོང་རོགས། ང་འཇིག་རྟེན་འདིར་ཡུན་དུ་འཚོ་བར་འདོད་ཅིང་ནང་མི་ལྟོས་བཅས་དག་གི་མིག་སྔར་བརྟན་རླིང་གིས་ལང་བར་འདོད། ད་ལྟ་ངས་མི་རུ་སྐྱེས་པའི་ལག་རྗེས་བཞག་མེད་ལ་རྩམ་པ་ཟོས་པའི་ཟས་རིན་འཇལ་མེད།
ད་དུང་བརྩེ་བའི་ཡབ་ཆེན་མཆོག་ལ་ཞབས་ཞུ་སྒྲུབ་དགོས་ཤིང་བྱམས་པའི་མ་ཡུམ་དམ་པའི་དྲིན་ལན་གསབ་དགོས། སྙིང་ཉེ་སྤུན་མཆེད་དག་ལ་རོགས་པ་བྱེད་དགོས་ཤིང་བདེ་སྐྱིད་འོད་སྟོང་ལྡན་པའི་ཁྱིམ་གཞི་འཛིན་དགོས། དེས་ན་བྱ་བ་དེ་དག་བསྒྲུབ་ཆེད་ང་ད་དུང་ཡུན་རིང་འཚོ་དགོས་ལ་མདུན་ནས་མདུན་དུ་སྐྱོད་དགོས། ཏག་ཏག་ཁྱོད་མེད་ན་ང་འཇིག་རྟེན་འདིར་འཚོ་ཐབས་བྲལ་བས། ཁྱོད་ཀྱིས་ནམ་ཡང་ང་རང་སེམས་སུ་ཉར་རོགས། བརྩེ་བས་སྐྱོང་རོགས།
མཐའ་དོན། སྟོང་ལོ་བཅུ་བཞིས་ཁྱོད་ཀྱི་འཇིག་རྟེན་ལ་བདེ་སྐྱིད་ཀྱི་ཁ་གཡང་སྒྲོག་གིན། སྟོང་ལོ་བཅུ་བཞིས་ཁྱོད་ཀྱི་འཚོ་བ་ལ་ཞི་བདེའི་གཟི་འོད་སྐྲུན་གྱིན། སྟོང་ལོ་བཅུ་བཞིས་ཁྱོད་ཀྱི་མདུན་ལམ་ལ་ལེགས་ཚོགས་ཀྱི་དངོས་གྲུབ་སྩོལ་གྱིན། ཞི་བདེའི་ངང་དུ། གཉིས་ཕན་ངང་དུ། དགོད་སྒྲའི་ངང་དུ། བག་ཕེབས་ངང་དུ། ལེགས་ཚོགས་ངང་དུ་སྟེ། ཡོད་ཚད་བདེ་ཞིང་ཐམས་ཅད་སྐྱིད་པའི་ངང་ནས་དུས་འདའ་བའི་སྨོན་ལམ་སེམས་ཀྱི་གཏིང་ནས་འདེབས་པ་ལགས།
01.01.2014 ཉིན་བལ་ཡུལ་རྒྱལ་ས་ནས།
ཁྱེད་རང་ཡང་སྟོན་བླ་མའི་གདུལ་ཞིང་དོལ་པོའི་མི་བུ་ཞིག་ཡིན་ན་སྟོང་ལོ་གསར་པའི་ནང་དོལ་པོའི་ཡུལ་སྐད་ཀྱི་གཟི་དཔལ་ལྡན་པའི་རྩོམ་ཡིག་དང་སྙན་ངག་སོགས་མང་ཙམ་སྤེལ་བའི་རེ་འདུན་ཡོད། ཅིས་ན་ཡུལ་དོལ་པོའི་ཕྱོགས་ལའང་རང་ས་རང་ཡུལ་གྱི་སྐད་ལུགས་ཐུན་མོངས་མ་ཡིན་པ་ཞིག་ཡོད་པས་དེའི་ངོ་མཚར་བའི་དཔལ་ཡོན་རྣམས་དོལ་ཕྲུག་ཤེས་ཡོན་ཅན་ཁྱེད་འདྲ་བ་ཚོས་སྲུང་སྐྱོབས་བྱ་འོས་པ་ཞིག་ལོས་ཡིན། དེ་དང་དེ་འབྲེལ་གྱི་དམུ་ཐག་དཀར་པོའི་ལོ་རྒྱུས་རིང་མོ་ཞིག་ཡུལ་དོལ་པོའི་ཕྱོགས་ལའང་ངོ་མཚར་བའི་འཇའ་ཚོན་གྱི་གུར་ཁང་དུ་དེང་གི་བར་འཚོ་གཞེས་སུ་བཞུགས་ཡོད་པར་མངོན་ནོ། །