གཞིས་ཀྱི་སྙན་ངག་པ་སྨུག་པའི་སྙན་ངག་འགའ།

སྨུག་པ།

ང་རང་ཁྱོད་ཀྱི་རྐང་རྗེས་ལ་བལྟས་ཏེ་ངུས།
ས་སྲོད་ཅིག་ལ་ང་རང་ཁེར་རྐྱང་དུ། །
གྲོང་ཁྱེར་ཞིག་གི་མཐའ་རུ་རྐང་ཐང་ཉུལ། །
སྐྱོ་བའི་རླུང་བུ་ཡང་མོ་ཡང་མོ་ལྡང་། །
དྲན་པའི་ལྗོན་ཤིང་དལ་མོ་དལ་མོ་སྒུལ། །

ཁྱོད་ཉིད་འདི་ནས་སོང་སྟེ་རྒྱང་དུ་གཤེགས། །
ཐག་རིང་ཐག་རིང་དེ་ཡི་ཕར་ནང་བཞུད། །
ངས་ནི་ང་རང་བསྐྱོར་ནས་འདི་ཀར་ཡོང་། །
འདི་རུ་ཁྱོད་ཀྱི་རྒྱབ་གཟུགས་ཙམ་ཞིག་འཚོལ། །

ཐད་ཀའི་འདི་དག་ཁྱོད་རང་ཡིན་ན་བསམ། །
ལམ་ཁ་དེ་ནས་ཁྱོད་ནི་ཡོང་ན་སྙམ། །
ཁྱོད་རང་གཏན་ནས་མིན་པའི་མི་དེ་དག །
ཁྱོད་ཉིད་ཡིན་པར་འཁྲུལ་ཞིང་དུང་བ་འཆོར། །

མེ་ལོང་ཡིན་ཐབས་མེད་པའི་ནམ་མཁའ་འདིས། །
ང་ལ་ཁྱོད་ཀྱི་ཞལ་རས་ཙམ་ཞིག་སྟོན། །
ཁང་བརྩེགས་ཕྲག་ཁར་འཐོགས་པའི་ཟླ་བ་དེས། །
གམ་ན་སུ་ཡང་མེད་པའི་གསལ་བཤད་འབྲི། །

དེང་མ་ཁྱོད་ཉིད་ཡང་ཡང་འགྲོ་མྱོང་བའི། །
རྨ་ཆུའི་འགྲམ་རྒྱུད་འདི་གོ་སྙིང་དུ་སྡུག །
སྔོན་ཆད་ཁྱོད་རང་ལན་མང་ཁེན་མྱོང་བའི། །
ལྕགས་ཟམ་འདི་ཡང་ཀྱེ་མ་ཡིད་དུ་འོང་། །

གྲམ་པའི་རྒྱ་ལྕང་འདི་ཡི་གྲིབ་འོག་ལ། །
ཁྱོད་ཀྱི་ལུས་དྲི་ཙམ་ཞིག་ད་དུང་བྲོ། །
མིས་བཟོས་ཕ་བོང་འདི་ཡི་གཡས་གཡོན་ན། །
ཁྱོད་ཀྱི་རྐང་རྗེས་འགའ་ཞིག་ད་རུང་ལྷགས། །

དེང་མ་ཁྱོད་ཉིད་ཡང་ཡང་འགྲོ་མྱོང་བའི། །
རྨ་ཆུའི་འགྲམ་རྒྱུད་འདི་གོ་སྙིང་དུ་སྡུག །
སྔོན་ཆད་ཁྱོད་རང་ལན་མང་ཁེན་མྱོང་བའི། །
ལྕགས་ཟམ་འདི་ཡང་ཀྱེ་མ་ཡིད་དུ་འོང་། །

ཨར་འདམ་བྲང་ལ་སྤར་བྲད་མ་བྱེད་ཅེས། །
སེན་མོའི་གསེང་ནས་རྡུལ་རྣམས་འདར་བཞིན་བཤད། །
རྡོ་བའི་སྲུབ་ལ་མཆི་མ་མ་གཏོར་ཞེས། །
རྨ་ཆུ་སེར་པོ་ཞིག་ཀྱང་ངུ་ཞོར་ཟེར། །

ཉི་ནུབ་ཞིག་ལ་ངོས་ཀྱིས་ཁེར་རྐྱང་དུ། །
རྐང་རྗེས་འགའ་ཞིག་སྲུང་ནས་ས་སྲོད་བརྒལ། །
ཡུན་གྱིས་བཞུར་ཞིང་ལྷོད་ཀྱིས་ལུད་ཡོང་བའི། །
སེམས་ནང་གདུང་བ་འདི་ཙམ་པར་དུ་བཏབ། །

2013/21/9 ཉིན་ཀྱི་ས་སྲོད་དུས་སུ།
མུན་རུབ་དུས་དྲན་པ་ཆུ་རེད།

ས་སྲོད་འདི་ནི་དེང་མའི་ས་སྲོད་བཞིན། །
ང་ཡི་སྨྲེང་བ་བརྐུས་ནས་ཁ་རོག་འགྲོ །
མུན་པ་འདི་ཡང་མདང་གི་མུན་པ་བཞིན། །
ཁོ་བོའི་སྙིང་ལ་གཟས་ནས་ག་ལེར་ཡོང་། །

ཡང་མོ་ཡང་མོ་ཡིན་འདྲའི་མུན་པ་འདི། །
སེམས་ཀྱི་གཏིང་ལ་ལྷུང་ན་ཀྱེ་མ་ལྕི། །
མུན་པ་འདི་ལས་མུན་པ་གཞན་ཞིག་དྲན། །
མུན་པའི་གཏིང་ལ་ལུད་པ་འགའ་ཞིག་དྲན། །

ལམ་སྒྲོན་འོག་ཏུ་སྐར་མ་འགའ་ལ་སྡོད། །
མགོ་བོ་དགྱེ་ཞིང་ཟླ་བ་ཨེ་མཐོང་བལྟ། །
སྤང་ཐོག་ཞིག་ཏུ་དུས་ཚོད་ཕྱེད་ཙམ་ངུ། །
ཡར་མར་གཡེང་བའི་ཐབས་ཤིག་ཨེ་ཡོད་དྲན། །

མི་ཚེ་འདི་ནི་བྱིའུ་ཚང་ཙམ་དུ་ཟད། །
གཅིག་ཏུ་འདུས་ནས་སོ་སོར་འཐོར་ནས་འགྲོ། །
ཕ་མ་གཉེན་ཉེ་སྙིང་ནས་བརྩེ་བའི་གྲོགས། །
ནམ་ཞིག་རང་རང་བྱས་ནས་བུད་འགྲོ་ཨང་། །

མུན་པའི་སྲུབ་ལ་འཚང་བའི་འབའ་འབུ་དག །
ཁ་པར་གློག་འོད་ངོགས་སུ་ལྷན་དུ་འདུ། །
གཤོག་པ་ཙམ་ཞིག་འཕྲད་པ་དེ་ཙམ་ལས། །
དོན་དུ་རང་རང་ས་ན་ལུས་འདུག་ཨང་། །

རླུང་གིས་གཞོགས་གཅིག་བསྡུས་པའི་ལོ་མ་དག །
སླར་ཡང་རླུང་གིས་ཁྱེར་ཏེ་གཞན་དུ་འཁུར། །
ང་ནི་འདི་ལྟར་ཡོང་ཞིང་དེ་ལྟར་འགྲོ །
ཁྱོད་ཀྱང་འདི་ལྟར་སླེབས་ཤིང་དེ་ལྟར་གཤེགས། །

མུན་པ་འདི་དང་འདི་ཡི་ཁ་གཏད་དུ། །
ཁེར་མོ་སྡོད་ཅིང་ཁེར་མོ་ལུས་པ་དག །
མིག་གཉིས་རྡེབ་པའི་སྐད་ཅིག་སྐད་ཅིག་ལ། །
ང་ཡི་ཡིད་ལ་ལྷུང་གིན་ལྷུང་གིན་ཡོང་། །

ཉེ་བར་ཆགས་ཤིང་ཉེ་བར་སྡང་བ་དག །
དཔུང་བ་གཤིབ་ནས་ལམ་དུ་འབུད་པར་བྱ། །
ཁེར་མོ་སངས་རྒྱས་ཐོབ་ཀྱང་སྙིང་བོ་ཅི། །
ལག་པས་འཇུས་ནས་འགྲོ་རོགས་མི་ཉན་ཨང་། །

ང་ཡི་དྲན་པ་མུན་པའི་ཞབས་སུ་འཁྱིལ། །
ལྡེམ་ལྡེམ་འཕྱོ་ཞིང་ཤང་ཤང་བཞུར་ནས་འགྲོ །
ཁོ་བོའི་ཁེར་རྐྱང་མུན་པའི་གཏིང་དུ་འཚིག །
ཚག་ཚག་འབར་བའི་སྒྲ་ཞིག་གྲག་གིན་གདའ། །

 

2013/9/27/མཚན་གུང་ལ་ལན་གྲུ་སློབ་ཆེན་
ནང་དུ་སྤང་ལེབ་མོ་ལག་མཐིལ་འདྲ་བ་ཞིག་ཏུ་སྦྱར།
ཡོལ་བའི་རྒྱབ་ནས་རྙེད་པའི་འཇིག་རྟེན།

མི་ཚེ་ཐུང་ཐུང་གླེན་པའི་གློའུ་བཤད་ཡིན། །
ལས་ཀྱི་བྱམས་པ་འཁྲུལ་བའི་རྨི་ལམ་ཡིན། །
ལམ་གྱི་ཡུལ་ལྗོངས་སེམས་ཀྱི་རྨ་རྫུ་སྟེ། །
བྲང་ཁོག་ནང་ལ་ཆགས་པའི་དར་སོབ་ཡིན། །

ཕྱེ་ལེབ་ཆུང་ཆུང་གྱེས་ཁའི་རྒྱབ་གཟུགས་ཡིན། །
སྟོན་གྱི་ནམ་ཟླ་སྨྲེང་བའི་ངོས་གཅིག་ཡིན། །
དགུན་ཁའི་གྲང་རེག་འཆི་བའི་ཁ་དོག་སྟེ། །
རུས་པའི་གཏིང་ལ་རྒྱུགས་པའི་གཟེར་ཤད་ཡིན། །

སྤྲིན་པ་ལེབ་མོ་དབྱིངས་ཀྱི་ཐལ་བ་ཡིན། །
རླུང་བུ་འཁྱག་པོ་དེང་མའི་དུས་ཚོད་ཡིན། །
དྲན་པའི་འདྲ་རིས་མཚན་མོའི་ཡོལ་བ་སྟེ། །
དེ་ཡི་ཁ་དོག་ནག་པོ་ནག་རྐྱང་ཡིན། །

ཐད་ཀའི་འཇིག་རྟེན་ཡར་མར་གཡེང་ས་ཡིན། །
གཏིང་གི་ཁེར་རྐྱང་ཡིད་ཀྱི་ལོངས་སྤྱོད་ཡིན། །
སུན་པའི་ཡང་ལྕི་དབུགས་ཀྱི་རིང་ཐུང་སྟེ། །
རྩ་ལམ་ཀུན་ན་བཞུར་བའི་སྐྱོ་གདུང་ཡིན། །

ཕྱི་ནང་རབ་རིབ་ཉི་ཤུའི་སྨག་ནག་ཡིན། །
མགོ་རྔ་ཉོག་ཉོག་འཕྲུལ་གྱི་རོལ་རྩེད་ཡིན། །
འཚོ་བ་ཆག་པོ་འགྱིག་གི་མེ་ལོང་སྟེ། །
གཟུགས་དང་ཤེས་པའི་བར་གྱི་སྤྱོད་ཁང་ཡིན། །

འཇིག་རྟེན་སྣང་བ་གནམ་གྱི་ཀུ་རེ་ཡིན། །
ཚིག་དང་ཐ་སྙད་ཚོར་བའི་སྙིགས་རོ་ཡིན། །
ནང་གི་ཡི་གེ་ནང་གི་སྐྱོ་གར་ཏེ། །
བར་བཅུག་རི་མོ་མེད་པའི་བརྩམས་ཆོས་ཡིན། །

2012/7/12མཚན་མོར།
ཚོར་བའི་བདེན་པ།
མེ་ལོང་ངོས་སུ་ཆགས་པའི་དུད་དྲེག །
ཤོག་བུ་དཀར་པོའི་ངོས་ཀྱི་རི་མོ། །
འདོད་པའི་ཁམས་ཀྱི་སྤྲིན་དང་སྨུག་པ། །
ཁ་རུ་འཁྱིལ་ཡོད་གཏིང་ཏུ་སིམ་ཡོད། །

སྒེའུ་ཁུང་ངོགས་སུ་ལྷུང་བའི་སྐར་མ། །
ཚིག་མཛོད་ནང་ནས་བོར་བའི་ཡི་གེ །
ལམ་ནས་བཏུས་པའི་འཇའ་དང་མེ་ཏོག །
ཐད་ཀའི་དེ་ཡིན་སྐད་ཅིག་དེ་ཡིན། །

མཚམས་སྤྲིན་གསེང་དུ་འཐོར་བའི་རྐང་རྗེས། །
མཚན་མོའི་འོད་ཀྱིས་ཚིག་པའི་གཤོག་པ། །
རྨི་ལམ་ནང་དུ་བབས་པའི་ཁ་བ། །
གཏམ་རྒྱུད་ཅིག་ཡིན་འཇིག་རྟེན་ཞིག་ཡིན། །

མགོ་མཇུག་རྙེད་ཐབས་མེད་པའི་རྨ་ཁ། །
གློ་དང་རྒྱུ་མའི་སྟེང་གི་ནད་རོ། །
མཆི་བདག་ལག་གི་གྲི་དང་ཐགས་པ། །
ཡར་གྱི་དེ་ཡིན་མར་གྱི་དེ་ཡིན། །

གསལ་ལ་མག་མོག་ཆགས་པའི་དྲན་པ། །
སྐབས་དང་སྐབས་སུ་སྐྱེས་པའི་སྨྲེང་བ། །
དེ་ཡི་རྗེས་སུ་གཡུགས་པའི་རླུང་བུ། །
ས་རུ་ཟུག་ཡོང་གནམ་ལ་ཐུག་ཡོང་། །

གད་སྙིགས་དཀྱིལ་དུ་ཉལ་བའི་སྤྲང་བོ། །
ཁ་ལུད་ནང་ནས་ལྷུང་བའི་བརྩེ་དུང་། །
ཐལ་དང་རྡུལ་གྱིས་ཟོས་པའི་སྙན་ངག །
སྐྱོ་ངལ་ཞིག་ཡིན་བརྩམས་ཆོས་ཤིག་ཡིན། །

ཆུ་ཡི་ནང་ན་འགུལ་བའི་གྲིབ་གཟུགས། །
ཁ་དང་ངོ་ལ་བབས་པའི་གཉེར་རིས། །
རྡོ་དང་གཡའ་མའི་སྲུབས་གའི་སྨྲ་བརྗོད། །
ནམ་ཟླ་ཞིག་ཡིན་ཨ་ཡོ་ཞིག་ཡིན། །

ལྦུ་ཆང་བསྔས་སུ་བྱས་པའི་ལང་ཚོ། །
ཁ་པར་ནང་ན་ངུ་བའི་བུ་མོ། །
མིག་ཤེལ་འོག་ནས་མཐོང་བའི་འཇིག་རྟེན། །
ལྗང་ཁུ་ཞིག་ཡིན་སྔོན་པོ་ཞིག་ཡིན། །
2012/3/12མཚན་མོར་ལུང་ཧྲན་སྒྲུབ་ཕུག་ཏུ།
མཛེས་པའི་གློ་རྡེག

མི་ཚེ་གཅིག་ལ་ཉི་མ་སུམ་ཁྲི་ཙམ། །
སྨིག་རྒྱུ་ཞིག་གི་ངོགས་སུ་ཡལ་ཞིང་འགྲོ །
ང་ནི་ལམ་ཕྲན་ཞིག་ཏུ་གཅིག་པུར་ཡོང་། །
ཁྱོད་ཀྱང་ཆུ་འགྲམ་ཞིག་ཏུ་ཁེར་མོ་སྡོད། །
མཚམས་སྤྲིན་ས་ལ་ལྷུང་བའི་ཡུལ་ཕྱོགས་ནས། །
ཁྱོད་ཀྱི་ཞལ་ཙམ་མཇལ་བ་ཀྱེ་མ་མཚར། །

སེམས་འདི་སྲང་ལ་འཐོར་བའི་ལོ་མ་ལྟར། །
ཡར་ཡར་འཕུར་ཞིང་ཐུར་ཐུར་ཞོགས་ནས་ཡོང་། །
ལས་འདི་དབྱིངས་སུ་ཉལ་བའི་དགུ་ཚིགས་བཞིན།
དེ་ཡི་སྣེ་མོ་སྟོང་བའི་མཐའ་རུ་བསྲིངས། །
ལམ་ཁའི་མེ་ཏོག་མིག་མཐའ་ཆུ་འཁྱིལ་མ། །
དེ་རུ་དར་ཅིག་སྡོད་པ་ཏོག་ཙམ་ཚོར། །

སུ་ཞིག་ཆུ་བོའི་ཚུལ་གྱིས་མུ་རུ་བཞུར། །
ཅི་ཞིག་རྒྱ་མཚོ་ནང་བཞིན་སྔུན་དུ་འཁྱིལ། །
སྣང་བ་ཤིན་ཏུ་ངལ་བའི་དུས་དག་ཏུ། །
དུ་རྐང་འགའ་ཞིག་ཤུགས་ཀྱིས་རྔུབ་པ་བཞིན། །
གོམ་པ་གང་ཙམ་སྤོ་བའི་བར་གླགས་ལ། །
མཛེས་པའི་གློ་རྡེག་རྨི་ལམ་རྗེས་སུ་འགྲོ །

འབྱམས་ཀླས་འགྱུ་བ་ལྷོད་པའི་བར་སྣང་ཀྱི།
མི་གསལ་ཟ་ཟི་ཆགས་པའི་སྣང་བ་ལ། །
སྤྲིན་དཀར་ཝུ་བ་འཕྱུར་བའི་ཆང་ཕོར་དུ། །
མི་རྟག་གློག་གི་འོད་དཀར་འཁྱུག་པ་འདི། །
འཇའ་ཚོན་ཁ་དོག་འདྲ་ལ་རི་མོ་འདྲ། །
མིག་ལ་ལྷུང་ཞིང་ཡིད་ལ་སིམ་ནས་ཡོང་། །

དུས་ཚོད་ཁོ་ནས་བརྩིགས་པའི་ཁང་བ་དེ། །
ནམ་མཁའི་བྲང་ནས་ཅུང་ཞིག་སྡོད་པ་ལ། །
ཕྱེ་ལེབ་གཤོག་པ་ཆག་པའི་ལྷག་འཕྲོ་ཞིག །
རླུང་གིས་ཁྱེར་ནས་དྲ་མའི་ངོས་སུ་འགྲོ །
མུན་པ་བག་ཙམ་མཐུག་པའི་མེ་ལོང་དུ། །
ལྷོད་ཆགས་རོལ་མོའི་སྒྲ་ཞིག་གཟུགས་སུ་འབབ། །

2013/11/11ཉིན་ལ།
ས་སྲོད་ཅིག་ལ། ང་རང་ཁེར་མོ་རི་མགོ་ཞིག་ཏུ་བསྡད།

སེམས་པ་གཏིང་ནས་སྐྱོ་འམ་ཅི། །
ནུབ་ཁའི་ཉི་མ་ཉག་ནས་འདར། །
འོད་སྣང་མཐའ་རུ་སྐྱོ་སྣང་སྦྲུམ། །
མདུན་དུ་ནུར་ཞིང་རྒྱབ་ཏུ་བལྟ། །

མཚམས་སྤྲིན་འཛུམ་གྱི་ཆག་རོ་ཙམ། །
མཇུག་མཐའི་ནམ་མཁའི་ངོ་གདོང་ལུས། །
འགྲོ་ཁའི་མི་ཡི་མིག་མཐའ་ན། །
ལོ་ངོ་གསུམ་གྱི་ཆར་བ་འཁྱིལ། །

ཡུལ་ལྗོངས་དག་ནི་སོ་སོར་འཐོར། །
མཛེས་སྡུག་དག་ནི་ཧྲིལ་གྱིས་འཚིག །
རབ་རིབ་དེ་ཡི་གས་བར་དུ། །
རྒྱབ་གཟུགས་ཤིག་ནི་ཡལ་བ་མཐོང་། །

རྡོག་སྒྲ་གླུ་ལ་འགུགས་པ་བཞིན། །
རྫ་ཆུ་ཤག་ཤག་བཞུར་ཞིང་འགྲོ །
གཞས་ཀྱི་སྣེ་གཅིག་རྒྱང་དུ་ཆད། །
དབྱངས་ཀྱི་ལྷག་འཕྲོ་བྲག་ཆ་འཁོར། །

གསེར་ཡིག་བྲིས་པའི་མ་འོངས་བ། །
སྡོང་ལོ་རེ་རེའི་ངོགས་སུ་ལྷུང་། །
རྒྱ་ལྕང་ཞིག་གིས་ཡུད་ཙམ་ལ། །
ཁོ་བོའི་རྒྱབ་ནས་སྐྱོར་བ་ཚོར། །

སྲོད་རླུང་ཁོ་མོའི་ལག་པ་བཞིན། །
ལ་མོའི་རྒྱབ་ནས་ག་ལེར་ལྡང་། །
བརྩེ་བའི་རླུང་བུ་བསིལ་མ་འཇམ། །
ངོས་ཀྱི་གདོང་ལ་བྱིལ་བྱིལ་གཏོང་། །

གཟུགས་དབྱིབས་མེད་པའི་མུན་པའི་སྡེ། །
ཕྱོགས་དང་ཕྱོགས་ནས་འཇབ་ཀྱིན་ཡོང་། །
བྲང་ཁོག་གཤགས་པའི་ཉ་མོ་ཞིག །
ཤེལ་དམ་ནང་དུ་གཅུ་ལོག་རྒྱག །

སྨུག་པ་འདི་ནི་ཆང་རྒོད་བཞིན། །
རྩ་ལམ་དག་ཏུ་རྒྱུ་བར་བྱེད། །
ང་ནི་རི་མགོ་ཞིག་ཏུ་སྡོད། །
སྲོད་ཀྱི་ཉི་འོད་རི་རྒྱབ་སྐྱེལ། །

2013/19/11ཉིན་གྱི་
ས་སྲོད་དུས་སུ་གཡུ་གྲོང་གི་རི་མགོ་ཞིག་ཏུ་སྦྱར།
སློབ་ཆེན་ནང་གི་ལྕགས་རུལ་དག་ལ་གསེར་ཆུ་བྱུཊ་ཡོད།
དཔེ་ཁྲིད་སྐབས་སུ་ཁ་པར་གློང་བ་དང་། །
དཔེ་ཁང་ནང་ནས་གཉིད་ལྕོགས་རྒྱག་པ་སོགས། །
རོ་སྟོད་སྤྲིན་ལ་བསྙེས་པའི་ངལ་གསོ་ཡིན། །
སེམས་ཁ་ལྷོད་དུ་ཆགས་པའི་རོལ་དབྱངས་བྱོས། །

དཔེ་ཆ་ཉལ་ཁྲིའི་འོག་ཏུ་གཏོར་བ་དང་། །
མཇེ་ཤུབས་སྔས་མགོའི་འོག་ལ་སྤུངས་བ་སོགས། །
ཚོར་བ་ཆུ་ལ་བཏང་བའི་དད་པ་ཡིན། །
དག་འཁྲུལ་གཏན་ཚིགས་ཆག་པའི་རྨི་ལམ་བྱོས། །

གསར་མོ་སུ་ལ་ཅི་སྟེ་གཡབ་པ་དང་། །
མགྲོན་ཁང་གང་དུ་ཇི་ལྟར་འཁྲིད་པ་སོགས། །
སྐད་ཅིག་ཁུ་བ་ཟགས་པའི་བདེ་བ་ཡིན། །
སྣང་བ་རང་གར་ཡན་པའི་རི་མོ་བྱོས། །

ཆང་རག་གང་ཞིག་གང་ནས་མཆོད་པ་དང་། །
དུ་བ་ཅི་ཞིག་ཅི་ལ་འཐེན་པ་སོགས། །
འཚོ་བའི་སྙིང་བོ་སྟོང་བའི་འགྲེལ་བཤད་ཡིན། །
རོལ་རྩེད་གཤིས་སུ་གྲུབ་པའི་སྙན་ངག་བྱོས། །

གཞུང་ལུགས་ཁོག་ནས་ཐ་སྙད་འཐུ་བ་དང་། །
དཔེ་ཆའི་གསེང་ནས་རང་ཉིད་བཙལ་བ་སོགས། །
འོག་མའི་ས་བོན་སད་པའི་ཉེར་ལེན་ཡིན། །
མྱ་ངན་ཐང་ན་བཞད་པའི་མེ་ཏོག་བྱོས། །

ལས་བྱ་དཔར་ནས་སྐར་མ་བསོགས་པ་དང་།
སྐར་མ་བསོགས་ནས་ཐམ་ཀ་ལེན་པ་སོགས །
དག་པའི་ཞིང་དུ་བགྲོད་པའི་ལམ་ཡིག་ཡིན། །
ནམ་མཁའ་ཚལ་བར་གཤགས་པའི་གཤོག་པ་བྱོས། །

བཙའ་ཡིས་ཟིན་ཞིང་གཡའ་ཡིས་འབྱར་བ་དང་། །
འདམ་ལ་ཆགས་ཞིང་རྡུལ་གྱིས་ཟོས་པ་དེ། །
སློབ་ཆེན་ནང་གི་ཅིག་ཅིག་ཅན་པོ་ཡིན། །
ལྕགས་རུལ་སྟེང་ལ་བྱུགས་པའི་གསེར་ཆུ་བྱོས། །
2013／31／8མཚན་མོར།
དོ་ནུབ གཅིག་པུར་ངུས་ནས་བསྡད་ཡོད།
རྒྱབ་ནས་ཁུར་རྒན་ཞིག་གིས་མནན་འདྲ། །
བྲང་ཁར་རྡོ་ལེབ་ཆེ་ཞིག་བཞག་འདྲ། །
དབུགས་ཀྱང་གཏོང་ལེན་དཀའ་བའི་དུས་ལ། །
ཡ་ཁོག་བཙངས་བྱུང་མགྲིན་པ་བརྣངས་བྱུང་། །

སྐེད་པ་ཡན་ཆད་དབྱུག་པས་རྡུང་འདྲ། །
དཔྱི་ཡི་མན་གྱི་རུས་ཚིགས་འཐོར་འདྲ། །
མགོ་ཡང་སྐེ་ཡིས་ཐེག་པར་དཀའ་སྟེ། །
སྣང་བ་ངལ་བྱུང་ལུས་པོ་ཉོབ་བྱུང་། །

སྙིང་གི་རྩེ་ལ་ཁབ་ཀྱིས་གཙགས་འདྲ། །
མཆིན་པའི་ཞབས་ལ་ཆུ་འཁྱགས་འཁྱིལ་འདྲ། །
ཁ་ཤ་འདར་རོ་མིད་ཐག་སྐམ་མོ། །
སྣ་ནང་སྐྱུར་བྱུང་མིག་མཐའ་བརླན་བྱུང་། །
ཞེ་རྩ་འཁྱག་གོ་དར་གྱིས་བཟུང་འདྲ། །
ཁ་ལག་འཁོབ་བོ་ཙག་གིས་ཕྱིད་འདྲ། །
འགྲོ་ནི་ཁག་སྟེ་སྡོད་ཀྱང་མི་ཚུགས། །
ཁྲག་རྩ་སྦྲིད་བྱུང་རུས་རྐང་གཟེར་བྱུང་། །

དེ་སྔོན་ཁོར་ཡུག་ལྷིང་ཞིང་འཇགས་པ །
ད་ཅི་ཀླད་པ་སྟོང་ཞིང་སང་བ། །
མཁའ་དབུཊ་འཇམ་ཞིང་མཁའ་དབུཊ་རྩུབ་སྟེ། །
ཚོར་བ་ཚ་ཞིང་ཚོར་བ་གྲང་ངོ། །

མེ་ལོང་ནང་ན་མི་ཞིག་འགུལ་བ། །
བཀྲེས་སྐོམ་འཐུང་བའི་རང་ཉིད་ཡིན་ནོ། །
རྨི་ལམ་ནང་ནས་ལམ་ཞིག་རྙེད་པ། །
རྡུལ་འཚུབ་ཀློང་ན་དཔྱངས་ནས་ཡོད་དོ། །
ང་ཡིས་བཙལ་ཞིང་ང་ལ་ཐོབ་པ། །
གསོན་རེ་མེད་པའི་ཡིག་འབྲི་འགའ་འོ། །
མཚན་མོའི་གསེང་ལ་སེམས་ཤིག་བྲིིས་པ། །
སྨག་རིམ་ཡོང་ནས་ཟ་གྲབས་འདུག་གོ །

ཡབ་ཡུམ་ནམ་མཁའི་ཉི་ཟླ་གཉིས་སོ། །
གཅིག་ལས་གཉིས་གསུམ་བཙལ་དུ་མེད་དོ། །
ཕ་མ་དྲིན་ཆེ་ཕ་མ་གལ་ཆེ། །
རྒས་དུས་ཐུགས་དགོངས་དཀྲུགས་པ་སྡུག་གོ །

ཤ་སྤུན་སེན་མོའི་གསེང་གི་ས་འོ། །
དེ་རིང་འདུ་ཞིང་ནངས་ཀ་འབྲལ་ལོ། །
ཁ་སེམས་དཀར་རོ་བརྩེ་འདང་ཆེ་འོ། །
ཡིད་ཐང་ཡང་ཡང་བཅད་ཡོད་སྐྱོ་འོ། །

ང་ཡི་མི་ཚེ་ཤིང་སྡོང་ཞིག་སྟེ། །
ལ་ལས་བཅད་ཅིང་ལ་ལས་བཞོག་གོ། །
ལ་ལས་ཁུར་ཞིང་ལ་ལས་པང་སྟེ། །
མཐའ་མར་གྱང་རྩ་ཞིག་ཏུ་ལུས་སོ །

ང་ལ་དགའ་བའི་མྱི་ནི་མང་ངོ་། །
ང་རང་ཤེས་པའི་མྱི་ནི་མེད་དོ། །
སེམས་པ་གཅོང་ཞིང་སེམས་པ་སྡུག་དུས། །
ཁེར་མོ་ངུས་ནས་སྡོད་པ་དགའ་འོ། །

2013／11／2མཚན་མོར།
_____________________________
གནའ་སྔ་མོ་ཞིག་ལ། འཇིག་རྟེན་གྱི་བྱ་དངོས་མཐའ་ཡས་པའི་ཁྲོད་ན་ངས་རང་ཉིད་ཀྱང་ཡོད་པ་ཚོར། དེའི་རྗེས་སུ། ངས་རང་གི་ངོ་བོ་ཙམ་འཛིན་བདེ་བའི་ཕྱིར་དུ་ངག་འདར་མ་འདར་གྱིས་རང་གི་མིང་ནས་སྐྱ་བོ་ཞེས་བོས། དེའི་རྗེས་སུ། སྐྱ་བོ་ཞེས་བྱ་བའི་ཆོས་གཞན་ཞིག་ལ་ནོར་མི་ཉན་པ་དྲན་ནས་ངས་རང་གི་མིང་ཡིག་སྔོན་ལ་སླར་ཡང་འབྲོག་ཅེས་པའི་ཡིག་འབྲུ་ཞིག་བྲིས། དེ་དུས་ངའི་མིང་ལ་འབྲོག་སྐྱ་བོ་ཟེར། དེ་ནི་ལོ་ངོ་མང་པོའི་ཡར་སྔོན་གྱི་འདས་དོན་ཞིག་ཡིན། ཕལ་ཆེར་སྐབས་དེ་ཙམ་ཞིག་ལ། ང་ནི་རྩོམ་ཞེས་པ་ཞིག་ལ་དགའ་ནས་ཤི་ལ་ཁད་དུ་ཡོད་ན་ཡང་སྒྱུ་རྩལ་ཟེར་བ་ཞིག་ནི་ཁྱོན་ནས་ཧ་གོ་གྱིན་མེད། དེ་ནི་བོད་ཀྱི་རྩོམ་རིག་གིས་རང་ཐོག་གི་རྩིས་ཐང་དང་ཚུགས་ཀ་རྩ་ནས་དོར་ཞིང་སྨད་འཚོང་མའི་ལས་ཁོ་ན་གཉེར་གྱིན་པའི་དུས་ཤིག་ཀྱང་ཡིན་ཚོད་རེད། ལོ་ངོ་མང་པོ་འགོར་སོང་། དཀོན་མཆོག་གི་དྲིན་ལ། ངས་ཤེས་རབ་འབར་བའི་མི་མང་པོ་ཞིག་ངོ་ཤེས་སོང་། དེའི་ཁྲོད་དུ་སྐྱབས་ཆེན་བདེ་གྲོལ་ཟེར་བ་ཞིག་ཡོད། གངས་དང་ཁ་བ་སྙིང་ལྕགས་འབོད་པའི་གསར་བུ་གཞན་གཉིས་ཀྱང་ཡོད། དེའི་རྗེས་སུ། ངས་རྩོམ་རིག་སྒྱུ་རྩལ་ཟེར་བ་ཞིག་ལ་གོ་བ་ལེན་ཐུབ་སོང་། མ་མཐའ་ཡང་། རྩོམ་རིག་སྒྱུ་རྩལ་ནི་ཁོ་རང་ཉིད་ལས་གཞན་གང་ཡང་མིན་པ་ཧ་གོ་སོང་། ཡང་དེའི་རྗེས་སུ། ངས་རང་ཉིད་ཀྱི་ནང་སེམས་ལྟ་བུའི་ཐ་སྙད་ཞིག་ཀྱང་རྙེད་སོང་། དེ་ནས་བཟུང་། མི་རྣམས་ཀྱིས་ངའི་མིང་ལ་སྨུག་པ་ཞེས་འབོད། ངའི་མིང་ལ་སྨུག་པ་ཟེར