༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་རྒྱལ་སའི་མངའ་ཁུལ་དུ་གནས་སྡོད་བོད་མི་ཚོར་བཀའ་སློབ་སྩལ་བ།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཨ་རིའི་རྒྱལ་སའི་མངའ་ཁུལ་དུ་རྟེན་གཞི་བྱས་པའི་བོད་རིགས་སྤྱི་མཐུན་ཚོགས་པས་ཇི་ལྟར་གསོལ་འདེབས་ཞུས་དོན་བཞིན་བཀའ་བཞེས་ཟབ་མོ་ཐོབ་སྟེ་མགོན་པོ་གང་ཉིད་མཆོག་གིས་ཕྱི་ལོ་༢༠༡༤ ཟླ་༢ ཚེས་༢༠ ཉིན་གྱི་ཕྱེད་ཡོལ་ཆུ་ཚོད་༣།༣༠ ཐོག་བཞུགས་གནས་མགྲོན་ཁང་གི་(Park hyatt)ཚོགས་ཁང་ནང་ཨ་རིའི་རྒྱལ་ས་ཝ་ཤིང་ཊོན་དང་གྲོང་ཁྱེར་ནིའུ་ཡོཀ་སོགས་ནས་ཆེད་བཅར་ཞུས་པའི་བོད་མི་༤༠༠ བརྒལ་བར་དམིགས་བསལ་མཇལ་ཁ་དང་བཀའ་སློབ་སྩལ་དོན། དེ་རིང་ངོས་རང་འདི་གར་ཡོང་སྟེ་ཁྱེད་རང་ཚོ་དང་ཁྱུག་ཙམ་ཐུག་བྱུང་བར་ཧ་ཅང་དགའ་པོ་བྱུང་།
སྤྱིར་བཏང་ང་ཚོ་བཙན་བྱོལ་བ་ཆགས་ནས་མི་ལོ་ལྔ་བཅུ་ང་ལྔ་ཙམ་འགྲོ་གི་ཡོད་པ་མ་ཟད་མི་རབས་ཀྱང་བརྗེ་འགྲོ་གི་ཡོད། ལྷག་པར་འདས་པའི་ལོ་ལྔ་བཅུ་དྲུག་ཅུ་ལྷག་དེའི་རིང་བོད་ནང་གི་རྒྱ་ཆེའི་མི་དམངས་རྣམས་དཀའ་སྡུག་སྣ་ཚོགས་ཤིག་མྱངས་དང་མྱོང་མུས་སུ་གནས་ཡོད། འོན་ཀྱང་གཞིས་ལུས་རྒྱ་ཆེའི་མི་དམངས་མི་རབས་བརྗེ་འགྲོ་གི་ཡོད་ནའང་། བོད་མི་རིགས་ཀྱི་ལ་ཞེན་གྱིས་གཙོས་ཆོས་དང་སྐད་ཡིག དེ་བཞིན་སོ་སོའི་རིག་གཞུང་ལ་གཅེས་ཞེན་བྱེད་རྒྱུ་འགྱུར་མེད་ཐོག་བསྡད་འདུག མདོར་ན། ང་ཚོས་བདེན་དོན་འཐབ་རྩོད་བྱེད་རྒྱུར་འགྱུར་བ་མེད་པར་བསྡད་འདུག གཞིས་ལུས་རྒྱ་ཆེའི་མི་དམངས་རྣམས་ནི་ང་ཚོའི་དོན་གྱི་བདག་པོ་རེད། དོན་གྱི་བདག་པོ་རྣམས་ནས་དངོས་གནས་དྲང་གནས་ལྷག་བསམ་གཡོ་མེད་ཐོག་བསྡད་ཡོད་སྟབས། ང་ཚོ་བཙན་བྱོལ་དུ་ཡོད་མཁན་ཚོས་ཀྱང་བོད་མི་རིགས་ཀྱི་ལོ་རྒྱུས་ཀྱིས་མཚོན་ཆོས་དང་རིག་གཞུང་གཏིང་ཟབ་ཡོད་པ་ཞིག་ཡིན། ཞེས་ཁ་བཀྱགས་བཀྱགས་བྱས་ཏེ་ཤོད་རྒྱུ་ཡོང་གི་ཡོད།
དེ་བཞིན་ང་ཚོ་བཙན་བྱོལ་བ་ཆགས་ཏེ་ལོ་ལྔ་བཅུ་ང་ལྔ་ཙམ་ཕྱིན་ཡོད། དུས་ཡུན་དེའི་རིང་དེ་སྔ་བོད་མཐོང་ཐོས་མེད་མཁན་དང་བོད་ཀྱི་སངས་རྒྱས་པའི་ཆོས་ཞེས་བརྗོད་སྐབས། ལུང་པ་ཁུ་ཀྱོག་ཅིག་ནང་ལྷ་གསོལ་ཀླུ་གསོལ་བྱེད་བཞིན་ཡོད་པར་ངོས་འཛིན་བྱེད་རྒྱུ་དེར་འགྱུར་བ་ཕྱིན་ཏེ། དེང་སྐབས་འཛམ་གླིང་འདིའི་ནང་བོད་ཀྱི་སངས་རྒྱས་པའི་ཆོས་དང་འབྲེལ་བའི་ཚན་རིག སངས་རྒྱས་པའི་ཆོས་དང་འབྲེལ་བའི་ལྟ་གྲུབ། ཅེས་བརྗོད་སྐབས་དོ་སྣང་གསར་པ་ཞིག་བྱེད་ཀྱི་འདུག དེ་ཡང་ཡ་མཚན་མཚན་ཐོག་ནས་བྱས་པ་ཞིག་མིན་པར་དངོས་ཡོད་གནས་ཚུལ་ཐོག་མིའི་བསམ་བློ་གཏོང་རྒྱུར་ཕན་ཐོགས་ཡོད་པར་ངོས་འཛིན་གྱིས་དོ་སྣང་བྱེད་ཀྱི་འདུག དཔེར་ན། དེ་རིང་སྔ་དྲོ་དང་ཁ་སང་ང་ཚོ་བགྲོ་གླེང་གི་ཚོགས་འདུ་ཚོགས་པ་རེད།
དེ་རིང་གི་བགྲོ་གླེང་འདི་དངོས་གནས་བྱས་ན་དཔལ་འབྱོར་སྐོར་གཙོ་བོ་ཆགས་ཡོད། ཕན་ཚུན་བགྲོ་གླེང་ཐོག་སྐད་ཆ་ཤོད་སྐབས་གང་ལྟར་མིའི་བདེ་སྐྱིད་ཀྱི་རྩ་བ་སེམས་ལ་ཐུག་གི་ཡོད་པ་ཧ་ཅང་གསལ་པོ་རེད། དེར་བརྟེན་ང་ཚོ་འདྲ་མཉམ་ཐོག་ནས་སྐད་ཆ་དང་གོ་བསྡུར་བྱེད་རྒྱུ་གལ་ཆེན་པོ་ཆགས་ཡོད། ཕྱོགས་མཚུངས་ང་ཚོ་བོད་ལ་ལོ་སྟོང་ཕྲག་གོང་ནས་དཔལ་ནཱ་ལེནྡྲ་ནས་མཆེད་པའི་ལྟ་གྲུབ་དང་སེམས་ཁམས་རིག་པའི་ཚན་རིག་གི་གྲས་དེ་ཧ་ཅང་ཕྱུག་པོ་རེད་འདུག དེང་སྐབས་འཛམ་གླིང་འདིའི་ཐོག་དེ་དག་དངོས་སུ་ཕན་ཐོགས་ཡོད་པ་ཞིག་ཏུ་ཕྱི་རྒྱལ་མིས་མཐོང་གི་ཡོད་པ་དེ་ནི་ང་ཚོ་བཙན་བྱོལ་དུ་གནས་པ་ཚོའི་ཕལ་ཆེར་བྱས་རྗེས་ལྟ་བུ་རེད། ང་ཚོ་བོད་པའི་ཁ་རྒྱུན་ལ་ཡོད་པ༌ལྟར། རྐྱེན་ངན་གྲོགས་སུ་འགྱུར་ཐུབ་རྒྱུ་ཞིག་བྱུང་ཡོད། ང་ཚོ་བོད་མི་རིགས་དང་རིག་གཞུང་བཅས་པ་གནས་དང་མི་གནས་ཀྱི་མཚམས་སུ་སླེབས་ཏེ་གཉན་འཕྲང་ཅན་གྱི་དུས་ཚོད་ཅིག་རེད། ཕྱོགས་གཅིག་ནས་འཛམ་གླིང་ཕྱི་ཕྱོགས་སུ་བོད་མིའི་བསམ་བློའི་ཁྱད་ནོར་གང་འདྲ་ཡོད་མེད་དེ་འདོན་ཐུབ་རྒྱུ་ཞིག་ཆགས་ཡོད།
དེ་བཞིན་ང་ཚོས་ང་ཚོའི་ཆོས་རིག་དང་གཞུང་ཉམས་པ་སླར་གསོ་དང་མི་ཉམས་གོང་སྤེལ་བྱེད་རྒྱུ་ཞེས་པ་ནི། གཙོ་བོ་སློབ་སྦྱོང་བྱེད་དགོས་རྒྱུ་ཧ་ཅང་གལ་ཆེན་པོ་ཆགས་ཡོད། ལྷག་པར་ཁྱེད་རང་ཚོ་ཕྱི་རྒྱལ་ལུང་པའི་ནང་བསྡད་ཡོད། དེར་བརྟེན་གཞོན་སྐྱེས་ཚོས་བོད་ཡིག་དང་བོད་སྐད་མ་བརྗེད་པ་བྱེད་དགོས། ཕལ་ཆེར་ལོ་གཉིས་གོང་ངོས་རང་ཀ་ཤི་མིར་ལ་ཐེངས་ཤིག་བསླེབས་པ་རེད། དེ་གར་བོད་པའི་སྐད་ཡིག་བསླབ་རྒྱུའི་དམིགས་བསལ་སློབ་གྲྭ་མི་འདུག་ཀྱང་ལྷ་ས་ཁ་ཆེའི་བུ་ཕྲུག་གིས་ངོས་རང་ཐུག་སྐབས་ལྷ་སའི་སྐད་ཡག་པོ་རྒྱག་གི་འདུག
ཕལ་ཆེར་ཨ་རིར་ཡོད་པའི་བོད་ཕྲུག་ཚོ་ལས་ཀ་ཤི་མིར་ཡོད་པའི་ཁ་ཆེའི་བུ་ཕྲུག་ཚོ་བོད་སྐད་བདེ་བ་ལྟ་བུ་འདུག ཁོང་ཚོས་རང་ཉིད་ཀྱི་ཁྱིམ་ཚང་ནང་ཞར་དང་ཞོར་དུ་བོད་སྐད་བརྒྱབ་ཀྱི་ཡོད་པ་རེད། གང་ལྟར་བོད་ཕྲུག་ཅིག་ཡིན་ཕྱིན་ཆད་ལ་བོད་པའི་སྐད་ཡིག་མ་བརྗེད་པ་བྱ་རྒྱུ་ཧ་ཅང་གལ་ཆེན་ཡིན་པས་སེམས་ལ་བཞག་དགོས། སྤྱིར་བཏང་མི་རིགས་གང་ཞིག་ཡིན་རུང་ངས་ཐུབ་པ་དང་ནུས་ཞེས་པའི་སྤོབས་པ་དགོས། ང་ཚོ་བོད་མི་རིགས་ནི་རིག་གཞུང་ཕྱུག་པོ་ཡོད་མཁན་ཞིག་ཡིན།
༼འདྲེན་ཁུངས། བོད་མིའི་སྒྲིག་འཛུགས་ཀྱི་དྲ་རྒྱ།༽
དེ་བཞིན་སྤྱི་ཡོངས་ནས་བཤད་ན། བོད་པར་ཡ་རབས་དང་དྲང་པོ་འདུག་ཅེས་བརྗོད་ཀྱི་འདུག འོན་ཀྱང་བར་སྐབས་དངུལ་ལ་འདོད་རྔམ་ཆེ་དྲགས་པའི་དབང་གིས་ཡ་རབས་སྤྱོད་བཟང་ཕྲན་བུ་ཉམས་རྒུད་འགྲོ་གི་ཡོད་པ་ལྟ་བུ་འདུག ཡ་རབས་དང་དྲང་པོ། སྙིང་རྗེ་བྱེད་རྒྱུ་ནི་ང་ཚོའི་ཕ་མེས་ནས་ང་ཚོར་འཇགས་པའི་གཅེས་ནོར་ཡིན་སྟབས། དེ་དག་མི་རབས་གཞོན་པའི་རྒྱུད་ལ་འཇགས་ཐབས་བྱེད་རྒྱུ་ཧ་ཅང་གལ་ཆེན་པོ་རེད། ཅེས་བཀའ་སློབ་སྩལ་ཡོད།