གློག་བརྙན་གསར་བར་བསྒུགས་པ།

ཀླུ་སྨྱོན།

མི་ཧ་ཅང་མང་པོ་ཞིག་གིས།

ཁྱབ་བསྒྲགས་ཤོག་བུ་དེ་བདེན་པ་ཡིན་ཚེ།

གློག་བརྙན་གསར་བ་འདི་ངོ་མ་ཅིག་ཡག་ས་རེད་བསམས་ནས།

ཉི་མ་རྟག་པར་གློག་བརྙན་ཁང་གི་སྒོ་འགྲམ་དུ་བསྒུགས་ནས་བསྡད།

ཁ་བ་འབབ་དུས་དང་ཆར་བ་བྱོ་དུས་གཉིས་ཁར་བསྒུགས་ནས་བསྡད།

དྲན་རྒྱུ་རྒོད་པའི་མི་ལ་ལས།

གློག་བརྙན་གསར་བའི་ནང་དུ་དོན་དག་ཅི་ཞིག་འབྱུང་མིན་ཐད།

རང་གི་ལས་ཀའི་གླ་ཕོགས་ཀྱང་རྒྱན་དུ་བཙུགས་ཡོད་སྐད།

ཉི་མ་རེ་རེ་བཞིན་ཕར་འདས་སོང་།

དུས་ཚིགས་རེ་རེ་བཞིན་ཚུར་བསླེབས་སོང་།

ཤིང་སྡོང་སྐམ་པོ་ཚོར་ཡང་ལོ་འདབ་ལྗིད་ཐག་ཆོད་པ་རེ་འབུས་འདུག

ཡིན་ན་ཡང་།

གློག་བརྙན་གསར་བ་ད་དུང་མ་བསླེབས།

ཁྱབ་བསྒྲགས་ཤོག་བུ་དེ་སྔར་བཞིན་གསར་བ་གསར་རྐྱང་གི་ཚུལ་དུ།

རྩིགས་ངོས་གང་ས་གང་དུ་འོད་འཚེར་བཞིན་སྦྱར་འདུག་ལ།

ལམ་འགྲོ་བ་རེ་ཟུང་གིས་ཡུད་ཙམ་རེར་ལྟ་ཀློག་བྱེད་པ་ཡང་རྒྱུན་ལྡན་ཞིག་རེད།

ད་ནི་དགུན་ཁ་བསླེབས་བྱུང་།

ཁ་བ་བབས་རྗེས་གྲང་ངར་ཆེ་བས།

མི་རྣམས་ཀྱི་ཁ་རླངས་ཀྱང་དཀར་སབ་སིབ་ཏུ་འཕྱུར་བཞིན་འདུག་ཅིང་།

རྒྱང་ནས་བལྟས་ན་ཐ་མག་ཆེན་པོ་རེ་འཐེན་བཞིན་པ་དང་ཡང་འདྲ།

གློག་བརྙན་གསར་བ་དེ་ད་དུང་བསླེབས་མ་བྱུང་།

ཅི་ཞིག་གི་རྐྱེན་ཡིན་ནམ།

མི་རྣམས་ཀྱིས་སུན་སྣང་མེད་པར་འདི་ལྟར་ཕན་ཚུན་ལ་འདྲི་བར་བྱེད་ཅིང་།

དྲི་ལན་ཅི་ཞིག་ལྡོན་མིན་ཐད་སེམས་ཁྲལ་ཅི་ཡང་མེད།

གློག་བརྙན་འཁྲབ་མཁན་དེར་རླངས་འཁོར་བརྡབས་སྐྱོན་བྱུང་བ་ཨེ་ཡིན།

གློག་བརྙན་བཟོ་གྲྭ་དེའི་མ་རྩ་བརྡིབས་སོང་བ་ཨེ་ཡིན།

མི་རྣམས་ཀྱིས་འདི་ལྟར་བསམས་ཤིང་འདི་ལྟར་བརྗོད།

གློག་བརྙན་གསར་བ་དེ་སང་ཉིན་བསླེབ་ངེས་པའི་བརྡ་ཁྱབ་ཅིག་འབྱོར་དུས།

མི་རྣམས་སྔ་མོ་ནས་དམག་འཁྲུག་ལ་གཡོལ་ཆེད།

གྲོང་ཁྱེར་འདི་བཞག་ནས་ས་གནས་གཞན་དུ་ཆས་ཟིན།

དོ་དགོང་གློག་བརྙན་གསར་བ་དེ་སྟོན་བཞིན་ཡོད།

ཡིན་ན་ཡང་།

གློག་བརྙན་འཆར་སའི་ཡོལ་བའི་ངོས་སུ།

སྲིན་བུ་གཤོག་ཐོགས་འགའ་ཡར་འཕུར་མར་འཕུར་བྱེད་པའི་གཟུགས་བརྙན་ལས།

གློག་བརྙན་ཁང་ཡོངས་སུ་མིའི་གྲིབ་མ་ཙམ་ཡང་མི་འདུག