༧གོང་ས་མཆོག་རྗར་མེ་ནིར་ཞབས་སོར་འཁོད་རྒྱུ།

གནས་ཚུལ་གཏོང་མཁན། ཕུན་ཚོགས་ཚེ་རིང་།

༧གོང་ས་༧སྐྱབས་མགོན་༧རྒྱལ་བའི་དབང་པོ་ཐམས་ཅད་མཁྱེན་པ་མཆོག་རྗར་མེ་ནིའི་མང་གཙོ་དང་རང་དབང་མཚོན་པའི་ཡེ་ཤུའི་ལྷ་ཁང་ཞིག་ཏུ་ཞབས་སོར་འཁོད་གཏན་ཁེལ་བ།

བོད་ཀྱི་ཤེས་རིག་བསྟི་གནས་”རྗར་མེ་ནི་བོད་ཀྱི་ཁང་པ་”ནས་ཡུན་རིང་དུས་ཀྱི་ཕྲེང་བར་གསོལ་འདེབས་ཞུས་པ་བཞིན། གཞིས་བྱེས་བོད་མིའི་དབུ་ཁྲིད་༧གོང་ས་༧རྒྱལ་བའི་དབང་པོ་མཆོག་འདི་ལོའི་སྤྱི་ཟླ་ལྔ་པའི་ཚེས་བཅུ་གསུམ་ནས་བཅུ་དྲུག་བར་རྗར་མེ་ནིའི་གྲོང་ཁྱེར་ཧྥི་རན་ཧྥོར་ཊིར་ཞབས་སོར་འཁོད་གཏན་ཁེལ་ཞིང་། སྐབས་དེའི་ཆིབས་སྒྱུར་སྐབས་མི་མང་ལ་གསུང་བཤད་བཀའ་དྲིན་ཆེ་རྒྱུ་དང་། གསུང་བཤད་ཀྱི་ནང་དོན་”བྱམས་སྙིང་རྗེ་རྩ་བར་བཟུང་ནས་དེང་དུས་ཀྱི་སྤྱི་ཚོགས་ལ་ཕན་ཐབས་”ཞེས་པའི་བརྗོད་གཞིའི་ཐོག་རེད།
དེའི་ཐོག་ཁུལ་འདིའི་སློབ་གྲྭ་ཁག་ཉི་ཤུའི་སློབ་ཕྲུག་དགུ་བརྒྱ་ཙམ་ལའང་གསུང་བཤད་གནང་རྒྱུ་དང་། སློབ་ཕྲུག་ཚོས་༧གོང་ས་མཆོག་ལ་དྲི་བ་ཞུ་རྒྱུ་བཅས་ཀྱི་མཛད་རིམ་ཁག་རང་རེ་རྗར་མེ་ནི་བོད་ཀྱི་ཁང་པ་དང་། ས་གནས་གྲོང་ཁྱེར་གཉིས་ཐུན་མོང་གིས་གོ་སྒྲིག་ཞུ་རྒྱུ་ཡིན།

ད་དུང་ཆོས་ལུགས་མི་སྣ་དང་། ཤེས་ཡོན་ཅན་ལྷན་དུ་འཇིག་རྟེན་ཀུན་སྤྱོད་བཟང་ཕྱོགས་ཇི་ལྟར་འཕེལ་དང་སྤེལ་ཐབས་སྐོར་བགྲོ་གླེང་ལྷན་ཚོགས་ཤིག་ཀྱང་གནང་གཏན་འཁེལ་སོང་། བགྲོ་གླེང་འདིའི་མཛད་རིམ་གོ་སྒྲིག་ཞུ་མཁན་”བོད་ཀྱི་ཁང་པ་”དང་། ཧྥི་རང་ཧྥོར་ཊིའི་སློབ་གྲྭ་ཆེན་མོ། དེ་བཞིན་ཧྥི་རང་ཁེ་ཧྥོར་ཊིའི་ས་གནས་གྲོང་ཁྱེར་གཞུང་བཅས་རེད།
བགྲོ་གླེང་གནང་ཡུལ་ནི་གྲོང་ཁྱེར་འདིའི་ཡེ་ཤུའི་ལྷ་ཁང་གྲགས་ཅན་ St. Paul Church ནང་དུ་ཡིན་པ་དང་། ལྷ་ཁང་དེ་ལ་རྗར་མེ་ནིའི་ལོ་རྒྱུས་ཀྱི་དོན་སྙིང་གལ་ཆེ་ཡོད་པའི་གནས་ཤིག་ཏུ་ངོས་འཛིན་ཞུ་བཞིན་ཡོད་པ་རེད། དེ་ཡང་1848 ལོའི་ཟླ་བ་3 ཚེས་18 ཉིན་རྗར་མན་གྱི་མང་གཙོའི་ཚོགས་འདུ་ཐོག་མ་དེ་ལྷ་ཁང་འདིའི་ནང་ཚོགས་པ་དང་། དུས་དེ་ནས་བཟུང་ལྷ་ཁང་དེ་ནི་མང་གཙོ་དང་རང་དབང་གི་མཚོན་བྱེད་དུ་ངོས་འཛིན་ཞུ་བཞིན་ཡོད་པས། “རྗར་མན་ནིའི་ཞི་བདེའི་གཟེངས་རྟགས་”ཞེས་པལོ་ལྟར་ཐེངས་གཅིག་སྤྲོད་སྲོལ་ཡོད་མུས་་དེ་ཡང་འཛམ་གླིང་དེབ་ཀྱི་ཚོང་འདུས་ཆེན་མོ་དང་སྟབས་བསྟུན་ལྷ་ཁང་འདིའི་ནང་སྙན་གྲགས་ལྡན་པའི་རྩོམ་པ་པོ་དང་། ཞི་བདེ་དང་། རང་དབང་ལ་འཐབ་རྩོད་བྱེད་མཁན་གྱི་མི་སྣ་བྱས་པ་ཅན་ཚོར་འབུལ་སྲོལ་ཡོད་འདུག

ད་རེས་༧གོང་ས་༧སྐྱབས་མགོན་ཆེན་པོ་མཆོག་ལྷ་ཁང་དེའི་ནང་གསུང་བཤད་དང་། བགྲོ་གླེང་གནང་རྒྱུ་ཡིན་པར་བརྟེན། ཡུལ་མི་རྣམས་ནས་ཆིབས་སྒྱུར་འདི་བཞིན་ལོ་རྒྱུས་ཀྱི་རང་བཞིན་ལྡན་པའི་ཆིབས་སྒྱུར་དམིགས་བསལ་ཞིག་ལ་ངོས་འཛིན་ཞུ་བཞིན་པ་ལགས། ཆིབས་སྒྱུར་སྐོར་གྱི་དྲྭ་ཚིགས། www.dalailama-frankfurt.info
རྗར་མེ་ནི་བོད་ཀྱི་ཁང་པ་འདི་ནི་བྲག་གཡབ་༧སྐྱབས་མགོན་རིན་པོ་ཆེ་མཆོག་ནས་ཆོས་ཕྱོགས་ཀྱི་དབུ་ཁྲིད་གནང་སྟེ་ 2005 ལོར་དབུ་བརྙེས་པ་ནས་བཟུང་།  ༧གོང་ས་༧སྐྱབས་མགོན་ཆེན་པོ་མཆོག་ཁུལ་དེར་གདན་འདྲེན་ཞུ་ཐེངས་གཉིས་པ་ཡིན་ཞིང་།  ༧གོང་ས་༧སྐྱབས་མགོན་ཆེན་པོ་མཆོག་ནས་རྗར་མེ་ནི་བོད་ཀྱི་ཁང་པའི་མཚན་འཛིན་དབུ་ཁྲིད་ཐོག་ནས་མགོན་སྐྱབས་མཛད་བཞིནཔ་རེད། རྒྱལ་སྤྱིའི་ནང་གདེང་འཇོག་ཚད་ལྡན་ཡོད་པའི་བོད་ཀྱི་ཤེས་རིག་བསྟི་གནས་འདིར་ལས་རིམ་རྣམ་གྲངས་སྡེ་ཚན་ལྔ་ཡོད་ལ། ལོ་གཅིག་ནང་ལས་རིམ་ཁྱོན་བསྡོམས་སུམ་བརྒྱ་ཙམ་སྤེལ་བཞིན་པ་ལགས།