མི་གསོན་པོ།
སེམས་དང་སེམས་པའི་སྦྲེལ་ཐག་གཅིག་ན་ཡང་།།
ལས་དང་ལུས་ཀྱི་བསྐོས་ཐང་མེད་པ་ཡི།།
ང་དང་ཁྱོད་ཀྱི་གྱེས་བྲལ་དྲན་པའི་མོད།
སྐྱོ་བའི་མིག་ཆུས་གདུང་བ་སྙིང་དུ་ལྕི།།
ལས་ཀྱི་རི་མོ་གང་བསྐོས་མ་གཏོགས་པ།།
སེམས་ཀྱི་སྣང་བ་གང་ཤར་མེད་པ་ཡི།།
གནའ་རབས་རྒན་པོའི་གཏམ་གྱི་ངོ་མཚར་ལ།།
བདེན་པའི་མགོ་བོ་དུད་པ་དེ་རིང་བྱུང་།།
ངོས་དང་ལྐོག་གི་རྒྱབ་མདུན་མེད་པ་དང་།།
གཡོ་དང་སྒྱུ་ཡིས་བཀོད་བྱུས་མེད་པ་ཡི།།
ལྷད་མེད་དྭངས་གཙང་ཁྱེད་ཀྱི་གཤིས་ཀ་དེས།།
ང་ཡི་སེམས་པ་དབང་མེད་དྲན་དུ་བཀོལ།།
ཡོད་ཚད་རྟག་བརྟན་རློམ་པའི་འཁྲུལ་སྣང་གི།།
རེ་སེམས་ནན་མོས་ཁོར་ཡུག་ཟླུམ་པོའི་སླད།།
ཨ་འཐས་རྒྱ་རུ་འཆིང་བའིདུང་སེམས་ཀྱིས།།
ཁྱོད་དང་ང་ཡི་སྨོན་ལམ་གཅིག་ཏུ་བཟུང་།།
ཤ་ཁྲག་ལུས་དང་བླ་ཚེ་སྲོག་གི་ཁམས།།
མཛེས་སྡུག་ལང་ཚོ་འབྱུང་འགྱུར་རིགས་ཀྱི་རྒྱུན།།
ཡོད་ཚད་ཁྱོད་ཉིད་དགྱེས་པའི་མཆོད་སྤྲིན་དུ།།
མོས་པའི་སྟོང་བསམ་ཕུང་པོ་སྙིང་དུ་སྤུངས།།
འོན་ཏེ་ལས་ཀྱི་རྒྱལ་མོའི་བཀའ་ལུང་དང་།།
སྦག་པའི་ཁྱེད་ཀྱི་བསམ་གཞིག་འགྱུར་འགྲོས་ཀྱིས།།
མི་ཚེའི་འཚོལ་སྙེག་ཐ་དད་གྱུར་པའི་དུས།།
གདུང་བའི་མིག་ཆུས་ཁྱེད་ལ་སྐྱེལ་མ་བྱེད།།
འགྲོགས་པའི་ལག་རྡང་དེ་རིང་གློད་ན་ཡང་།།
དུང་བའི་སེམས་པ་ནམ་ཡང་འགྱུར་མེད་ངང་།།
ཕན་ཚུན་གྲོགས་སུ་འཛིན་པའི་འདུ་ཤེས་ཀྱིས།།
མི་ཚེའི་ཁ་ཕྱོགས་སོ་སོས་འཚོལ་བས་ཆོག །
སྙན་སོང་།