སེ་ར།

ཤ་ཀླན་འཇམ་དབྱངས་གྲགས་པ།

ད་ནངས་ཞོགས་པར་སྨུག་པ་འཁྲིགས་པས།
སེ་རའི་ཡུལ་ལྗོངས་ཀུན།
ཕྱིང་ལྭ་དཀར་པོ་ཞིག་དང་མཚུངས་པའི་སྨུག་པས་བཏུམས་འདུག
ངས་ཉལ་ཐུལ་ཟུར་དུ་དེད་སྒེའུ་ཁུང་ནས།
གཙུག་ལག་ཁང་གི་གསེར་ཏོག་ལ་ལྟ་སྐབས།
རང་ཉིད་ཡུལ་འདིའི་མགྲོན་པོར་གྱུར་ཚུལ་བསམ་བློར་འཁོར།
རེད་ཡ། ང་ཡུལ་འདིའི་མགྲོན་པོ་མིན་པའི་མགྲོན་པོར་གྱུར།
སེ་ར་ངའི་ཕ་ཡུལ་མིན་པའི་ཕ་ཡུལ་གྱུར་བ་ཇི་བཞིན།
སེ་ར་ནས་ལྷོད་ཀྱིས་བསྡད་ན།

རྔ་སྦུབ་དང་ཆོས་དུང་གི་སྒྲ།
གྲྭ་རྐྱང་ཚོའི་ཐལ་ལྕག་དང་བསྡོངས་ནས་གྲག་འོངས།
དེ་དང་འགྲོག་པའི་ཚོར་བ་བག་དྲོ་བོ་ཞིག་གིས།
ངའི་ཡིད་སེམས་ལྷག་མེད་དུ་ཁེངས་འགྲོ་བས།
ངས་ཁྱེད་ལ་བཀའ་དྲིན་ཞུ་འོས།
ནམ་ཡང་ཞི་དུལ་དང་བརྟན་བརླིང་སྲུང་བའི་སེ་ར་ཁྱེད་ལ།

སེ་རའི་བསུང་ཞིམ་སྣ་ལ་བསྣམས་པ་ཙམ་གྱིས།
སེ་རའི་ཡུལ་ལྗོངས་མིག་ལ་བསྟར་བ་ཙམ་གྱིས།
ངས་ཕ་ཡུལ་དྲན་འོངས།
དེ་དང་བསྡོངས་ནས་ཕ་ཡུལ་གྱི་སེ་ར་དྲན་འོངས།
ཡིན་ཡང༌། ཕ་ཡུལ་གྱི་སེ་ར་ན་གྲྭ་གྲངས་དང་
དམག་གྲངས་འགྲན་པར་བསམ་ན།
ང་གནས་འདིའི་ཞི་བདེ་དང་དབེན་ཐང་སྲུང་བའི།
སེ་ར་ཁྱེད་ལ་དགའ་བྱུང༌།

སྨུག་ཀློང་གི་སེ་ར།
ངའི་སྨིག་སྔར་རྩིག་ལྡེབས་ཀྱི་པར་རིས་ལྟར།
མཛེས་ཡང་མཛེས།
སྨག་ཁྲོད་ཀྱི་སེ་ར་ཡང༌།
ལྷིང་འཇགས་དུང་ཕྱུར་གྱིས་སྲུང་བའམ།
ལྷིང་འཇགས་དུང་ཕྱུར་སྲུང་བ་ལྟར་ཡི་གར་འོང་བས།
ངོ་མ། སྒེའུ་ཁུང་གི་སེ་རའི་རྒྱ་ཁྱོན་ཡང་གཞལ་བར་མི་ནུས།
གཞལ་བར་མི་ནུས།

སེ་ར་ནས་སྐྱིལ་ཀྲུང་དུ་བསྡད་ན།
སེ་ར་ནས་ཀེ་རེར་ལངས་ན།
སེ་ར་ནས་ཕུར་ཚུགས་སུ་བལྟས་ན།
ངས་བརྗོད་འདོད་པ་ནི། ཞི་དུལ་ལ་དུང་བའི་མི་མང་པོ་ཞིག་
སེ་ར་ན་འོངས་བཞིན་ཡོད།
ངས་བརྗོད་འདོད་པ་ནི། སེ་རས་ཁྱེད་ལ་ནམ་ཡང་འཛུམ་མདངས་ཀྱིས་གསུ་ངེས། ༢༠༠༩ ༣ ༩ ཉིན་སེ་ར་ནས།