ཕ་བུའི་སྐྱེས་སྐར།

རྔ་རྒོད།

ང་ལ་མཚོན་ན་དེ་རིང་ནི་བཀྲ་ཤིས་དོན་བཟང་གི་ཉི་མ་ཞིག་སྟེ། ལས་ཀྱིས་བསྐོས་པའི་རང་གི་བུ༼ལས་བསྐོས༽ཀྱི་སྐྱེས་སྐར་ཉིན་མོ་དེ་རེད། དེའི་ཕྱིར། དེ་རིང་ཞོགས་ཀར་ཉི་མ་རི་རྩེར་ཤར་པ་དང་མཉམ་པོར། རྡུང་ལེན་མཁན་ཁོ་བསྟན་གྱི༼སྐྱེས་སྐར༽ཞེས་པའི་རྡུང་ལེན་འོད་སྡེར་དེ་མདུན་གྱི་བརྙན་འཁོོར་དེའི་ནང་ནས་ལྟ་ཉན་བྱེད་ཞོར་དང་རྩེད་ཞོར་ལ། ཁ་རྩང་ཕ་མས་ཉོས་པའི་ལེགས་སྐྱེས་འགའ་དང་། ལྷག་པར་དུ་བརྩེ་དུང་མཚོན་བྱེད་དེ་སྙིང་གི་དབྱིབས་ཅན་གྱི་ཐུད་དམ་cake ཟེར་བའི་མངར་ཟས་སོགས་བུ་འདི་ལ་སྤྲད་པས། བུ་ལས་བསྐོས་རང་གི་འདོད་པ་དེ་ཅུང་ཁེངས་ཡོད་པ་སོགས་རྟོགས་ཐུབ།
དེར་བརྟེན། ཉིན་གང་བོར་ངེད་ཅག་བཟའ་མི་གསུམ་ལྷན་འཛོམས་བྱས་ཏེ་དགའ་ཞིང་སྤྲོ་བའི་ངང་ང་ཚོས་མཉམ་དུ་སྐྱེས་སྐར་འདི་ལ་རོལ་རྒྱུ་བྱུང་བ་ནི་ང་ཚོའི་བསོད་ནམས་དང་བདེ་སྐྱིད་ཅིག་ཀྱང་རེད་འདོད།

གཞན་འདིར་དམིགས་བསལ་འཛམ་གླིང་གི་སྐྱེས་སྐར་སོགས་ཀྱི་སྐོར་དེ་ལ་ཏོག་ཙམ་དཔྱད་ན། སྤྱིར་ན། སྨྲ་ཤེས་ཤིང་དོན་གོ་བའི་མིའི་རིགས་ཀུན་ལ་མཚོན་ན། ཐོག་མར་མིའི་སྐྱེས་སྐར་མཛད་སྒོ་དེ་དུས་ནམ་ཞིག་ནས་འགོ་བརྩམས་པ་དང་། སྐྱེས་བུ་དམ་པ་གང་གི་འཁྲུངས་སྐར་དང་དེ་གསར་གཏོད་མཛད་མཁན་གྱི་ལོ་རྒྱུས་རྩོད་མེད་ཡོངས་གྲགས་ཤིག་ཁོ་བོས་མ་མཐོང་ལ་ཁྱེད་ཅག་གིས་ཀྱང་རྟོགས་མེད་པར་འདོད། རྒྱུ་མཚན། ལོ་ངོ་ཁྲི་ཕྲག་མང་བོའི་ཡར་སྔོན་གྱི་ལོ་རྒྱུས་དང་སྐྱེས་ཚེས་སོགས་ནི་ང་ཚོར་དུས་དང་ཡུལ་དང་ངོ་བོ་གང་གི་ཆ་ནས་བརྗོད་དེ་བལྟས་ན། དེ་ནི་བསྐལ་དོན་གྱི་ཡུལ་དང་ལྐོག་གྱུར་གྱི་ངོ་བོར་ཡོད་པས། ང་ཚོས་དངོས་སུ་མི་མཐོང་།
འོན་ཀྱང་དེ་ལ་བརྟགས་ཏེ་དཔག་ཚོད་ཀྱིས་ལོ་རྒྱུས་ཀྱི་སྐྱ་ཐིག་འཐེན་པ་དང་། ཚེས་གྲངས་སོགས་འགོད་པ་ནི་མི་འོས་པ་ཞིག་ཀྱང་མ་རེད། དེ་ཡང་བརྟག་ན་འདི་ལ་ཚད་ཅིག་མ་བཟུང་ན་མ་གཏོགས། ཐོག་མཐའ་མེད་པའི་རིགས་པ་དང་འདྲིས་ནས་མཐར་རང་ལུགས་ཤིག་ནམ་ཡང་མི་རྙེད་དོ།། དེའི་ཕྱིར། བོན་གྱི་སྟོན་པ་གཤེན་རབ་ཚང་དང་། ནང་བའི་སྟོན་པ་བཀའ་དྲིན་ཅན་ཤཱཀྱ་ཐུབ་པ་མཆོག་དང་། ཡི་ཤུ་ཡི་སྟོན་པ་རྗེ་ཟེ་སུ་སོགས་ཀྱི་འཁྲུངས་སྐར་ལའང་དུས་འདྲ་མིན་ཞིག་བྲིས་ཡོད་མོད། དེ་ལ་དགག་བཞག་ཅིག་བགྱིས་ནས་ཤུལ་དུ་རང་ལུགས་ཤིག་མ་རྙེད་པས། འདིའི་སྐོར་དེ་རིང་འདིར་གླེང་རྒྱུ་མིན།

སྤྱི་བཏང་། ལོ་རྒྱུས་རྙིང་བ་དག་ཁ་ཇེ་གསལ་དང་ཇེ་བཟང་དུ་སོང་བའི་རིགས་དང་ཡང་ན་འགྲེལ་བཤད་དེ་ཇེ་ངན་ཇེ་སྡུག་ཏུ་གྱུར་པ་དང་། གཞན་ཡང་ཡོད་པ་མེད་པར་གྱུར་ཏེ་སྟོང་བ་དང་། གསར་བ་རྙིང་བར་བཟོས་པའི་ལོ་རྒྱུས་དེ་ཁ་སྐོང་སོགས་རྫུན་མ་བཟོས་པ་གྲངས་མེད་རེད། འོན་ཀྱང་ང་ཚོ་མིའི་སྐྱེས་སྐར་དེ་གོང་འཕེལ་ཇི་ལྟར་བྱུང་རིམ་མདོ་ཙམ་བསྙད་ན། ཐོག་མར། སྐྱེས་སྐར་གྱི་སྲོལ་དེ་མི་དཔའ་བོ། རྒྱལ་བོ། རྒྱལ་མོ། ཡང་ན་མཁས་པའམ་སྟོན་པ་སོགས་དེ་མཐོ་རིམ་མི་སྣ་ཚོའི་ཁྲོད་ནས་བྱང་སྟེ་ང་ཚོར་བརྒྱུད་འོངས་པའི་ལོ་རྒྱུས་འདི་རེད།
འོན་ཏེ་སྤྱི་བཏང་ངེད་ཅག་དམའ་རིམ་དཀྱུས་མའི་སྐྱེས་སྐར་གཏོང་སྲོལ་དེ། ནུབ་ཕྱོགས་ནས་འགྲོ་བ་མིའི་ཐོབ་ཐང་དང་ཕོ་མོ་འདྲ་མཉམ་དང་ཡང་ན་སྒེར་གྱི་རང་དབང་སོགས་ཀྱི་ཆེད་སྒེར་ལངས་བགྱིས་པ་དང་མཉམ་པོར་ཚོང་གི་འགྲོས་དང་བསྟུན་ནས་དེང་སང་ཡོངས་ཁྱབ་ཏུ་གྱུར་པ་འདིའོ།།

གང་ལྟར་ང་ཚོ་བོད་ཀྱིས་མིའི་སྐྱེས་སྐར་དེ་གཙོ་བོར་མི་འཛིན་པར་མྱིའི་ཤི་ཚེས་སམ་འདས་མཆོད་སོགས་གལ་ཆེན་པོར་བརྩི་དགོས་པའི་གནད་དང་རྒྱུ་མཚན་གང་ལ་བརྟེན་ཡོད་མེད་བརྗོད་ན། ཆོས་ཀྱི་ཞིང་ཁམས་འཆི་བ་མི་རྟག་པར་སྒོམ་པའི་བོད་པ་ཚང་ལ། ཆོས་ཀྱིས་སྡོངས་གྲོགས་མཛད་དེ། སྐྱེས་པ་དང་འཆི་བ་གཉིས་ལས་གཙོ་བོར་འཆི་བའི་ཕྱོགས་སུ་ཐོས་བསམ་དང་སློབ་གཉེར་མཛད་པས་འདིའི་སྐོར་ལ་ངེས་འབྱུང་ཏོག་ཙམ་རེ་ཡང་རྙེད་ཡོད་ཚོད་རེད།
རྒྱུ་མཚན་དེས། གདུང་མཆོད་གང་གི་སྐབས་དང་སྦྱར་ནས་བལྟས་ན། ང་ཚོ་མང་ཚོགས་ཀྱིས་ཉིན་མོ་དེ་ལ། དགེ་བའི་བྱ་བ་ཞིག་ལ་བརྩོན་དང་བརྩོན་བཞིན་པ་འདིས་ལྷག་པར་གསར་བོར་མངོན་སུམ་གྱིས་གྲུབ་སྙམ།

མཇུག་མཐར་ཞུ་རྒྱུར། ཁོ་བོས་རང་གི་སྐྱེས་ལོ་དེ་ཏག་ཏག་ཤེས་ཀྱིན་ཡོད་མོད། རང་གི་སྐྱེས་ཚེས་ངོ་མ་དེ་ཉིན་གང་ཡིན་གསར་བོར་བཤད་རྒྱུ་མེད། དེ་ལ་རང་རེའི་བཤད་སྲོལ་ཞིག་ལ། “ཕ་མ་ངན་པས་རང་གི་བུ་ཕྲུག་གི་སྐྱེས་སྐར་མི་མཁྱེན། བུ་ཕྲུག་ངན་པས་རང་གི་ཕ་མའི་ཤི་ཚེས་བརྗེད” ཅེས་ངན་པ་ཞིག་བཤད་ཚུལ་ཡོད་མོད། འོན་ཏེ་གུས་པའི་དྲིན་ཅན་ཕ་མ་གཉིས་ལ་ཟུར་ཟ་ཞིག་གི་ཆེད་དུ་འདིར་བསྙད་པ་ནི་གཏན་ནས་མིན་ཏེ། དཔེར་ན། ང་དང་དུས་མཉམ་དུ་སྐྱེས་པའི་བོད་པ་ཕལ་མོ་ཆེ་ལ། རང་གི་སྐྱེས་སྐར་ངོ་མ་དེ་བཤད་རྒྱུ་མེད་པར་འདོད།
འོན་ཀྱང་ཕ་མའམ་ཡབ་ཡུམ་གང་རུང་གིས་སྐྱེས་ཚེས་དེ་རང་བཟོ་བགྱིས་པའམ་ཡང་ན་བླ་མའི་མངོན་མཁྱེན་དེས་རྟོགས་པ་གང་ཡིན་མ་ངེས་མོད། ང་ཁོང་ཚོ་དང་མཉམ་དུ་སྐྱེས་ཡོད་མེད་གང་ལྟར། ང་ཚོའི་སྤྲུལ་སྐུ་འདི་ཚོ་ལ་སྐྱེས་པའི་རྟགས་དང་མཉམ་པོར་གཟའ་སྐར་ཧ་ཅང་འཛོམས་པའི་འཁྲུངས་སྐར་རེ་ཡོད། འོན་ཀྱང་། འདིའི་སྐོར་ལ་ཆེད་དུ་ཞིབ་བརྟག་ཅིག་འདོད་ན་༧ གོང་ས་ལྔ་བ་ཚང་གི་རང་རྣམ་ལ་ལྟོས་དང་དེ་ནས་བདེན་ཚིག་ཅིག་རྙེད་ཅེས།

རྔ་རྒོད་ཀྱིས་༢༠༡༤/༤/༡༤ ལ་དབྱིན་ཡུལ་ནས་བྲིས།།