མེ་ཏོག་སྒྲོལ་དཀར། འཛིན་རིམ་༡༠ རང་ལོ་༡༤ དཔེ་སྟོན་སློབ་གྲྭ
༡༽ སྤྱིར་ང་ཚོ་སློབ་ཕྲུག་ཅིག་ཡིན་པའི་ཆ་ནས་སྒྲུབ་དགོས་པའི་ལས་འགན་གཙོ་བོ་ནི་སྤྱི་ཚོགས་ནང་གི་མི་ཕལ་པ་བཞིན་དུ་བསམ་བློ་གཏོང་མ་ཤེས་མཁན་དང་ཀུན་སྤྱོད་ཕལ་པའི་ལས་འགན་དེ་མ་ཡིན་པར་སློབ་ཕྲུག་ཅིག་ཡིན་པའི་ཆ་ནས་སློབ་མ་བཟང་པོ་ཞིག་དང་ཡ་རབས་སྤྱོད་བཟང་ཞིག་བྱེད་རྒྱུ་ཧ་ཅང་གལ་ཆེ་ཡིན། ང་ཚོ་སློབ་ཕྲུག་ཚོས་སྤྱི་ཚོགས་ཀྱི་མི་ཕལ་པ་བཞིན་བྱེད་རྒྱུ་མེད་པར་མ་ཟད་མི་གཞན་ལ་མིག་དཔེ་སྟོན་མཁན་ཞིག་བྱེད་དགོས།
༢༽ སློབ་ཕྲུག་ཅེས་པ་ནི་གཙོ་བོ་རང་ཉིད་ཀྱི་རྒྱལ་ཁབ་ཀྱི་དོན་དུ་མ་འོངས་པའི་སོན་རྩ་བྱ་རྒྱུ་དང་མདོར་ན་རྒྱལ་ཁབ་ཅིག་གི་རྒྱལ་དར་དང་མཚུངས། རྒྱལ་ཁབ་ཅིག་གི་ནང་སོན་རྩ་མེད་ཚེ་རྒྱལ་ཁབ་འདིར་ཡར་རྒྱས་ཀྱི་རྣམ་པ་ཞིག་ཐོན་རྒྱུ་ནི་ཉི་མོའི་སྐར་མ་ཡིན། དེ་བཞིན་རྒྱལ་ཁབ་ཀྱི་སོན་རྩ་སློབ་ཕྲུག་ཚོ་ཡིན་པས་སྤྱི་ཚོགས་ཀྱི་རྒན་གཞོན་ཚོས་རེ་བ་ཡོངས་རྫོགས་སློབ་ཕྲུག་ང་ཚོར་བཅོལ་ཡོད། ང་ཚོ་བོད་ཕྲུག་ཚོར་དམིགས་བསལ་འགན་འཁྲི་ཞིག་ཡོད་ལ་འབྱུང་འགྱུར་བོད་ཀྱི་སོན་རྩ་མིང་ཙམ་མ་ཡིན་པར་ལག་ལེན་གྱི་ཐོག་ནས་ཤེས་ཡོན་སློབ་སྦྱོང་གི་ཐོག་འབད་པ་ཧུར་ལེན་བྱེད་རྒྱུ་གལ་ཆེན་པོ་ཡིན། གང་ལགས་ཞེ་ན་ན་ང་ཚོའི་རང་དབང་དང་ཕ་ཡུལ་མི་ལག་ཏུ་ཤོར་ཟིན་པས་སོན་རྩ་ང་ཚོས་ཞི་བའི་ཐོག་ནས་རང་དབང་བསྐྱར་གསོ་བྱེད་རྒྱུ་ནི་ང་ཚོའི་གཞོལ་དུ་མེད་པའི་འོས་འགན་ཞིག་ཡིན་། ང་ཚོ་ནི་བོད་མི་རིགས་ཀྱི་ཕུགས་བསམ་ཡིན་པས་དེ་མངོན་འགྱུར་ཐུབ་མིན་ང་ཚོར་རག་ལས་ཡོད་སྟབས། སློབ་སྦྱོང་ཇི་ཙམ་འབད་པ་ཆེར་བསྐྱེད་བྱས་པ་དེ་ཙམ་གྱི་མངོན་འགྱུར་གྱི་རེ་བ་དང་ཇེ་ཐག་ཉེ་རུ་འགྲོ་ངེས།
༣༽ ང་ཚོ་ན་གཞོན་སློབ་ཕྲུག་ཚོས་མཚན་ཚོགས་དང་འཁྱམ་མྱུལ་བྱེད་སྒོ་སྣ་ཚོགས་ཚ་ཚ་འུར་འུར་ངང་སྤེལ་བ་ལས་ཤེས་ཡོན་སློབ་སྦྱོང་དང་འབྲེལ་བའི་བྱེད་སྒོ་གང་མང་སྤེལ་ན་འཕྲལ་ཕུགས་གཉིས་ཀར་ཕན་རླབས་ཆེན་པོ་ཡོད། དཔེར་ན། ང་ཚོས་སློབ་གྲྭའི་ཕྱི་ནང་གང་སར་དོན་སྙིང་ལྡན་པའི་བརྗོད་གཞིའི་ཐོག་བགྲོ་གླེང་རིགས་ཐེངས་མང་གོ་སྒྲིག་བྱེད་དགོས་། དེ་བཞིན་ང་ཚོ་བོད་མི་ཞིག་ཡིན་པའི་ཆ་ནས་བོད་མི་རིགས་ཀྱི་ཁྱད་ཆོས་ལྡན་པའི་སྐད་ཡིག་རིག་གཞུང་དང་འབྲེལ་བའི་དཔེ་དེབ་གང་མང་བལྟ་ཀློག་བྱེད་དགོས་ཤིང་ཕན་ཚུན་སྐད་ཆ་ཤོད་སྐབས་ཀྱང་མི་རིགས་གཞན་གྱི་སྐད་རིགས་མཉམ་བསྲེས་བྱེད་རྒྱུ་མེད། སློབ་གྲྭའི་ནང་ང་ཚོ་སློབ་ཕྲུག་རྒན་པ་ཚོས་དུས་དང་རྣམ་པ་ཀུན་ཏུ་སློབ་མ་ཆུང་བར་སློབ་གསོ་དང་རྒན་རབས་ལ་བརྩི་བཀུར། ད་དུང་མ་སྐུལ་དང་བླངས་ཀྱིས་སྤྱི་ཚོགས་ཀྱི་བྱ་བ་བཟང་པོ་སྒྲུབ་དགོས་ལ་སློབ་མ་ཆུང་བ་ཚོར་ཡང་སྐུལ་ལྕག་གཏོང་དགོས། དགེ་རྒན་གྱིས་འཛིན་གྲྭའི་ནང་སྐུ་ངལ་འཛད་མེད་ཀྱིས་སློབ་ཁྲིད་གནང་དུས་ང་ཚོས་སེམས་པ་རྩེ་གཅིག་ཏུ་ཉན་འཇོག་དང་བསམ་བློ་གཏོང་དགོས། སློབ་ཕྲུག་ཅིག་ཡིན་པའི་ཆ་ནས་རང་ཉིད་ཀྱི་ཚོར་སྣང་ལ་ཡིད་ཆེས་དང་བསམ་བློ་གཞན་དབང་དུ་མ་སོང་བ་དགོས།
གལ་སྲིད་ཁྱེད་རང་ལ་སློབ་ཚན་བྱེ་བྲག་ཅིག་གི་ཐོག་དཀའ་ངལ་འཕྲད་ན་རང་ངོས་ནས་དུས་ཚོད་བཙལ་ཏེ་དམིགས་བསལ་ཤུགས་སྣོན་རྒྱག་དགོས་པ་ལས་དཀའ་ངལ་ལ་གཡོལ་ཐབས་བྱེད་ན་མིང་དོན་མཚུངས་པའི་སོན་རྩ་ཞིག་ཏུ་འགྱུར་ག་ལ་སྲིད། སློབ་ཕྲུག་ཅིག་ཡིན་པའི་ཆ་ནས་གཞན་ནོར་མ་སྦྱིན་པར་ལེན་པ་དང་སློབ་ཕྲུག་ནང་ཁུལ་དབྱེན་སྦྱོར་དཀྲུག་ཤིང། ཕག་པ་བཞིན་ཉིན་མཚན་ལྟོས་མེད་རྔན་པ་ཟ་རྒྱུར་བྲེལ་བ་ནི་བག་མེད་ཀྱི་སྤྱོད་ཚུལ་ཡིན་པས་རང་རྒྱུད་ནས་མ་དོར་ན་སློབ་ཕྲུག་ཅིག་གི་འོས་འགན་ནམ་ཡང་འགྲུབ་མི་སྲིད།
༤༽ ད་ལྟའི་གནས་སྐབས་སུ་ང་ཚོ་སློབ་ཕྲུག་ཚོ་སུད་ཚོང་དང་ཞིང་ལས་སོགས་ངལ་དུབ་ཅན་གྱི་ངལ་རྩོལ་རྗེས་སུ་རྒྱུགས་མི་དགོས་པས་སྐྱིད་པོ་ཡིན་པ་ཚོར་དགོས་ལ་སློབ་སྦྱོང་ལ་འབད་པ་ཧུར་ལེན་བྱེད་དགོས། ང་ཚོ་སྤྱི་ཚོགས་ནང་འདབ་གཤོག་གཉིས་ལྡན་གྱི་ཤེས་ཡོན་ཅན་ཞིག་ཆགས་འདོད་ན་ཤེས་ཡོན་དང་ཀུན་སྤྱོད་ཟུང་དུ་སྦྲེལ་དགོས་པ་ལས་གནད་ཅིག་གི་ཐོག་ལྷོད་གཡེང་ནམ་ཡང་ཤོར་མི་ཉན། མདོར་ན་ཆག་འཇིག་གི་གནས་སུ་གྱར་བའི་མི་རིགས་ཤིག་ལ་མཚོན་ན་ང་ཚོ་སོན་རྩ་རྣམས་ནི་མི་རིགས་འདིའི་ཕུགས་བསམ་ཡིན་པ་ཡིད་ལ་ངེས་དགོས་སོ།།
ཡག་པོ་འདུག
སློབ་ཕྲུག་ཁྱེད་ནི་མ་འོངས་བོད་མི་རིགས་ཀྱི་སོན་རྩ་ཞིག་ཡིན་ངེས་ཡི་རང་ཡོད།
སློབ་ཕྲུག་ཁྱེད་ལ་ཡིད་རངས་ཞུ་བཞིན་ཡོད།
ཀློག་པ་པོ་རྣམས་ གུས་མོ་ངའི་རྩོམ་ཡིག་ཀློག་པ་ཐུགས་རྗེ་གནང།