ཚེ་རིང་།
ནུབ་ཕྱོགས་ཀྱི་མཁས་པ་དང་དཔོན་པོ་ཕྱུག་བདག་སོགས་ལ་ཐུན་མོང་མ་ཡིན་པའི་རང་གཤིས་ཡག་པོ་ཞིག་ཡོད་པ་ནི་ཁེངས་དྲག་དང་ཆེ་ཚུགས་མེད་པ་འདི་རེད། འདི་ནི་གནས་སྐབས་ཀྱི་གནས་བབས་མི་འདྲ་ནའང་ཚང་མ་འགྲོ་བ་མིའི་རིགས་སུ་མཚུངས་པའི་རྒྱུ་མཚན་གྱིས་འགྲོ་བ་མིའི་རིགས་ཀྱི་གཞི་རྩའི་ཐོབ་ཐང་ལ་བརྩི་བཀུར་གྱི་འདུ་ཤེས་ལས་བྱུང་བ་ཞིག་ཡིན་ལ། མདོར་དེད་ནས་བཤད་ན་འདི་ནི་དམངས་གཙོའི་ལྟ་གྲུབ་ཀྱིས་བསྐྲུན་པའི་བག་ཆགས་བཟང་བོ་ཞིག་དང་མི་དམངས་ལ་ཧ་ཅང་གི་ཡིད་འགུལ་སྟེར་བའི་ཀུན་སྤྱོད་ཅིག་ཀྱང་རེད།
སྔོན་ཏག་ཏག་འདིར་ཨོ་བྷ་མའི་གཏམ་བཤད་བོད་འགྱུར་མ་ཞིག་ལ་བལྟས་པས་བསམ་བློ་རྒྱུན་རིང་ཞིག་གཏོང་དགོས་བྱུང་། གཏམ་བཤད་དེར:རོགས་སྐྱོར་དེང་ལེན་ནུས་པ་ནི་སྙིང་སྟོབས་ཞིག་རེད:ཅེས་བཤད་འདུག
སྤྱིར་བཤད་ན་མི་ཅི་འདྲའི་འཇོན་པོ་དང་ནུས་པ་ཅན་ཞིག་ཡིན་ནའང་ཁོར་ཡུག་དང་དུས་ཚོད་སོགས་ལ་ལྟོས་པ་མེད་པར་རང་ངོས་ནས་ཀྱང་ཚད་བཀག་ཅིག་ཡོད་ལ། དེའི་དབང་གིས་བྱ་བཞག་ལ་ལ་ཞིག་སྒྲུབ་སྐབས་ནུས་འཇོན་དང་བཀོད་ཁྱབ་ཀྱིས་མ་འདང་བའི་ཁྲོད་ནས་འགོག་རྐྱེན་དང་འཕྲད་པ་ནི་རྒྱུན་ལྡན་ཞིག་ལ་བརྩི་ཆོག རྒྱུན་ལྡན་གྱི་གནས་སྟངས་འདི་རྒྱུན་ལྡན་དུ་མ་ཤེས་པའི་དབང་གིས་མང་བོ་ཞིག་ལ་ཡིད་ཆད་དང་བློ་ཕམ་ཚད་མེད་འབྱུང་གི་ཡོད་ལ། གལ་འགངས་ཆེ་ཆུང་གིས་ཐ་ན་རང་སྲོག་གཅོད་པའི་གནས་ཚུལ་ཡང་འབྱུང་གི་ཡོད། ལུས་སེམས་གཉིས་ཀའི་ཤུགས་ཟད་པའི་སྐབས་དེར་སུ་ཞིག་གིས་ཁྱེད་ཀྱི་བྱ་བཞག་དེར་མུ་མཐུད་ནས་རོགས་རམ་དང་རྒྱབ་སྐྱོར་བྱས་ཚེ། ཡིད་ཞུམ་པའི་སེམས་འགྱུའི་ཁྲོད་ནས་མང་བོ་ཞིག་གིས་དང་ལེན་བྱེད་མི་སྲིད།
དེ་ནི་རང་གི་བྱ་བཞག་དེ་མུ་མཐུད་རྒྱུན་སྐྱོང་བྱེད་རྒྱུའི་སྙིང་སྟོབས་ཀྱིས་མ་འདང་བ་ཞིག་དང་། རང་བཀུར་དང་ཨུ་ཚུགས་ཀྱི་འདུ་ཤེས་ཆེ་བའི་མི་རྣམས་ཀྱི་སེམས་ངོར་རང་ཉིད་ཀྱི་ངོ་ཚ་དང་ནུས་མེད་ཅིག་ཏུ་མཐོང་བཞིན་ཡོད་པ་རེད།
གཞན་གྱི་རོགས་སྐྱོར་དང་ལེན་རྒྱུ་དེས་སུ་ཞིག་ཀྱང་ནུས་མེད་ཅིག་ཏུ་མི་མཚོན་པར་མ་ཟད། གཅིག་ལ་གཅིག་རྟེན་གྱི་འབྲེལ་ལམ་འདི་སྐབས་འགར་མི་འདོད་བཞིན་དུ་དང་ལེན་བྱེད་དགོས་པའི་ཆོས་ཉིད་ཀྱི་རྒྱ་ཞིག་ཀྱང་ཡིན། འདེམས་དཀའ་བའི་འདེམས་གསེས་དེའི་ཁྲོད་ནས་:རོགས་སྐྱོར:དང་ལེན་བྱེད་རྒྱུ་ནི་རང་གི་བྱ་བཞག་དེ་ལེགས་འགྲུབ་དང་མངོན་གྱུར་ཡོང་བའི་རེ་སྨོན་དང་། མུ་མཐུད་རྒྱུན་སྐྱོང་བྱེད་ཐུབ་མིན་གྱི་སྙིང་སྟོབས་ཆེ་ཆུང་ཅི་འདྲ་ཞིག་ཡོད་པ་དེ་རེད། འདི་ནི་དོ་ནུབ་ངས་ཨོ་བྷ་མའི་གཏམ་ཚིག་དུམ་བུ་དེར་གོ་བ་ལེན་སྟངས་ཤིག་ཡིན།
2014/4/16 མཚན་མོར།