བཀྲ་ཤིས་དོན་འགྲུབ།
ནུབ་ཁའི་ཉི་མ་དམར་པོ་ལ།།
སྐྱོ་བའི་མདངས་ཤིག་ཆགས་ནས་ཡོད།།
དེ་ལ་སྣང་བ་མ་གཏོད་ཅིག།
དུད་ཞགས་གླིང་ལ་འཁྱིལ་ཡོང་ངོ་།།
བྱང་འགྲོ་རླུང་བུའི་ཕྱག་ཟུང་གིས།།
གཟན་སྣེ་དམར་པོ་བསྐྱོད་ཙམ་བྱེད།།
ཕྱི་མིག་ཤུལ་དུ་མ་འཇོག་རོགས།།
ཞེན་ཆགས་རྒྱང་ལ་ཤོར་ནས་འགྲོ།།
བྱ་ཚོགས་མཁའ་ལ་ཐེགས་ནས་སོང་།།
གཤོག་པའི་རླབས་ལ་རྩེན་བཞིན་སོང་།།
མུ་མེད་རྒྱ་ཐང་སྨུག་པོ་ལ།།
སྲོད་ཀྱི་ཁ་དོག་བཞག་ནས་སོང་།།
མཚམས་སྤྲིན་དམར་པོའི་ཉམས་སྣང་གིས།།
གཞས་དེ་བསྐྱར་དུ་བཀུག་བྱུང་བས།།
རྒྱང་མཐོང་རི་བོའི་སྣང་བརྙན་ལ།།
སྨྲེང་བའི་ཁམས་ཤིག་བཞག་ནས་བྱུང་།།
ཁེར་སྐྱེས་ལྗོན་པའི་མིག་ཟུང་གིས།།
རྒྱང་རིང་མགྲོན་པོར་ཅེར་བ་ལ།།
རྐང་རྗེས་བྲང་ལ་དཔར་ཡོད་པའི།།
ཞིང་ཐང་སྐྱ་བོ་བཤུམས་དོན་ཅི།།
དུས་ཀྱི་གོམ་ཁ་འགྱུར་བཞིན་འདུག།
མུན་པ་གཞུང་ལ་འབབ་བཞིན་འདུག།
འཁྱམ་ཁྱི་རྒན་པོའི་ཟུག་སྐད་ཀྱིས།།
རི་ཀླུང་ནད་པ་འདར་ཙམ་བྱེད།།
སྒེའུ་ཁུང་གྲུ་བཞིའི་ཕྱི་རོལ་ནས།།
ཟླ་བའི་ལྷ་མོ་ཕེབས་བཞིན་མཆི།།
ནམ་ཚོད་འཛིན་པའི་བྱ་ཕོ་ཀྱེ།།
མཚན་མོའི་ལྷིང་འཇགས་མ་དཀྲོག་ཅིག།
སྨག་ནག་སྲུང་བའི་གློག་སྒྲོན་ཏེ།།
གཉིད་ཀྱི་ཞིང་ལ་ཤོར་འདུག་པས།།
དགུ་ཚིགས་སྐྱ་མོའི་བརྩེ་བ་ཡིས།།
མུན་པའི་ལུས་ལ་འཁྱུད་ནས་འདའ།།
སྟོན་དུས་བཞུད་པའི་སྡོང་ལོ་དེ།།
ལོག་ནས་ཕེབས་རྒྱུ་མ་བྱུང་བས།།
གཅེར་རྒྱུག་བྱེད་པའི་ཡུགས་ས་མ།།
སྐར་འོད་མིག་ལ་འཚེར་འཚེར་བྱེད།།
རྒྱང་རིང་ཨ་ཇོའི་རྣ་བ་རུ།།
འདི་འདྲའི་སྙན་ངག་སྙན་མོ་ཞིག།
གོ་བའི་དགའ་བ་འབུམ་ཕྲག་གིས།།
ཁྱེད་ལ་ཁ་དྲོ་བཀྲིས་ཞུ།།