བར་ཕུ་ཕུན་ཚོགས།
ཐབས་མཁས་ཐུགས་རྗེས་གངས་ཅན་ལྗོངས་སུ་བྱོན།
ཉམ་ཐག་འགྲོ་ལ་བརྩེ་ཆེན་མ་བཞིན་གཟིགས།
ཆོས་སྲིད་ཀུན་ལ་ཐོགས་མེད་དྲིན་ཅན་རྗེ།
བཀའ་དྲིན་ཟླ་བྲལ་རྩ་བའི་བླ་མ་དྲན།
ཚད་མེད་སྙིང་རྗེའི་ཤུགས་དྲག་ཆུ་ཀློང་གིས།
བགྲང་ཡས་འགྲོ་ལ་འཆི་མེད་བདུད་རྩིའི་རྒྱུན།
བར་མེད་སྟེར་མཁས་མཚུངས་བྲལ་ཆོས་ཀྱི་རྗེ།
ཁྱེད་སྐུ་སྤྲིན་སྒྲིབ་ཉི་མ་སྙིང་ནས་དྲན།
མཁས་དགུའི་དབུས་ན་གཙུག་རྒྱན་དཔལ་དུ་མངའ།
དཔའ་བོའི་གྲལ་ལས་འཇིགས་མེད་སེང་གེའི་སྒྲ།
རྟག་ཏུ་གྲགས་མཛད་མཁས་གྲུབ་ཀུན་གྱི་མགོན།
ཀུན་གཟིགས་དཔའ་བོའི་ཡང་རྩེ་སྙིང་ནས་དྲན།
མཁས་གྲུབ་བྱེ་བའི་འབྱུང་གནས་སློབ་གྲྭ་དང་།
བསྟན་འཛིན་སྐྱེས་བུའི་གདན་ས་དགོན་སྡེ་སོགས།
གསར་བཞེངས་དཔའ་མཛངས་གཡུལ་ལས་རྣམ་པར་རྒྱལ།
རྒྱལ་སྲས་ཐུགས་རྗེའི་གཏེར་ཆེན་སྙིང་ནས་དྲན།
འགྲོ་བ་སྤྱི་དང་ལྷག་པར་གངས་ཅན་པའི།
ལས་འབྲས་སྡུག་བསྔལ་རྩད་ནས་ཞི་སླད་དུ།
མུན་པའི་བཙོན་དུ་བགྲང་བྱ་དུ་མའི་རིང་།
བཞུགས་ཏེ་སྐུ་ཉིད་འོ་རྒྱལ་མི་ཆེ་ཅི།
ཁྱེད་སྐུ་ཉི་མ་གཞོན་ནུ་འོད་བཟང་མའི།
ཞབས་འོག་གཏན་གྱི་མདུན་མ་ལེགས་གནས་གདའ།
སྐལ་དམན་བདག་འདྲར་གཟི་སྦྱིན་མཐུ་སྟོབས་ཀྱི།
ཐུགས་བརྩེས་ཀུན་ནས་གཟིགས་ཤིང་སྐྱབས་སུ་འཆི།