སྤྱན་ཆེན་པོ།
_____གྲོགས་པོ་ཞིག་གི་ཚབ་ཏུ་ཁོའི་ནུ་བོར་སྤྲིངས་པ།
སྤྱང་ཚོགས་ཀྱི་སྨོན་ལམ་ཕ་ཡུལ་ལ་ལྷུང་བས
ཁྱོད་ཀྱིས་འོད་ཟེར་གྱི་ཉག་མ་འགའི་སྣེ་མོར་འཇུས་ཏེ
དུས་ཚིགས་ལྗང་ཁུ་དེའི་ནེམ་ཤ་ལ་སེམས་པ་གླན
ལྕགས་སྒྲོག་གི་སིལ་སྒྲས་ནམ་མཁའ་དང་ས་གཞི་བསྒྲིབས་ཤིང
ས་གཞིའི་ངོས་སུ་འབྱར་བའི་ཀློག་མི་ཤེས་པའི་ཁྱོད་ཀྱི་བྲང་གཞུང་ལས
ང་ནི་འཇིག་རྟེན་གྱི་ནག་ཉེས་མ་ཚོར་བའི་ཉེས་ཅན་ཞིག་དང་འདྲ་བས
སྙིང་སྟོབས་ཀྱི་འོད་སྣང་རྟག་བརྟན་གྱི་སྲོག་ཤིང་དུ་གྱུར་བའི
རྣོ་ལྕགས་ལྟ་བུའི་རི་རབ་ལྟ་བུའི་སྐྱེས་ཆེན་ཚོ་ཧ་ཅང་དྲན
བདེན་ལུགས་མཐའ་དག་རྨ་ཁ་ལས་གྲུབ་པའི་དེ་རིང་ནི
ཁྱོད་ཉིད་ཀྱི་གྱོན་གོས་ལས་ཀྱང་དམར་ན་ཡང
སྤྱན་ཆབ་ཧུབ་གང་གིས་འགྲེལ་དཀའ་བའི་སེམས་པ་འདིས
ཕ་ཡུལ་དང་ཁྱོད་ཀྱི་ས་ཚིགས་ལ་ཕྲ་རྒྱན་བཏབ
འཐོར་རླུང་གིས་དེད་པའི་ཁྱོད་ཀྱི་ལང་ཚོའི་ཁྲག་རྒྱུན་གྱིས
གསེང་དང་ཟུར་ནས་ཁྱོད་ལ་མིག་བརྡ་སྟོན་གྱིན་འདུག་པས
འདོད་རྔམ་ཚོའི་མིག་མདུན་གྱི་ཤ་རྡོག་ལ་སྐག་ཚོས་བྱུགས་ནས
ལྗང་མྱུག་ལྟ་བའི་སང་ཉིན་ལ་གཤོག་པ་བཏགས་ན
༢༠༡༤-༤-༢༥མཚན་གུང་ལ།
ཡག་གི བལྟས་་པ་ཙམ་གྱི་རང་མོས་སྙན་ངག་ལ་བྱང་ཆ་ཅན་ཞིག་ཡིན་པ་ཤེས་ཐུབ