ཞོགས་པ་དེ་ནས་བཟུང༌། ངས་ཁྱེད་རང་བོར་སོང༌།

བོད། ལྷ་ཀླུ་གཉན་གསུམ་ནས།

ཞོགས་པ་དེར ཁྱེད་ཀྱིས་བཀྲ་ཤིས་བདེ་ལེགས་ཞུས་སོང་
ངས་རང་གི་མིག་ཟུང་ཕུར་ཕུར་ཞིག་གཏོང་ཞོར་དུ
ཁྱེད་རང་སུ་ཡིན་མིན་ལ་ཞིབ་དུ་བསམ་བློ་བཏང་
གང་ལྟར བཀྲ་ཤིས་བདེ་ལེགས་ཞུ་མཁན་གྱི་ཁྱེད་རང་
ཞོགས་པ་དེ་ནས་བཟུང་ སླར་ཡང་མཐོང་མ་ཐུབ

ཞོགས་པ་དེར ཁྱེད་ཀྱིས་ང་རང་ལ་འོ་ཇ་ཕོར་བཀང་བཏེགས
ངས་མལ་ཁྲི་ལས་ལག་ཟུང་བསྲིངས་དེ་ཚུར་ལེན་ཞོད་དུ
ཁྱེད་རང་ལ་དེ་འདྲའི་བཟང་དོན་ཅི་ཡིན་འདང་ཞིག་བརྒྱབ
ཡིན་ཡང་ འོ་ཇ་ཕོར་བཀང་སྤྲོད་མཁན་གྱི་ཁྱེད་རང་
ཞོགས་པ་དེ་ནས་བཟུང་ ངས་ནས་གཏན་ནས་རིག་མ་སོང་

ཞོགས་པ་དེར ཁྱེད་ཀྱིས་ང་རང་ལ་ཡར་ལོངས་དང་ཞེས་བོས
ངས་འགོ་བོ་ཡར་ལ་བཀྱགས་ནས་རང་ལ་འབོད་མཁན་དེར་བལྟས
ཁྱེད་རང་གིས་ང་ལ་དེ་ལྟར་བརྩེ་བ་ཆེ་དོན་གང་ཡིན་ནམ་སྙམ
གང་ལྟར དབྱངས་རྟ་སྙན་མོ་ཅན་གྱི་འབོད་བརྡ་གཏོང་མཁན་གྱི་ཁྱེད་རང་
ཞོགས་པ་དེ་ནས་བཟུང་ དགུན་ཁའི་ཁུ་བྱུག་ལྟར་གྲགས་འགུལ་མེད་པར་གྱུར་སོང་