ཚེ་རིང་།
——-གནས་ཡུལ་འགྲིམ་པའི་བུ་མོ་ཞིག་ལ་བྲིས།
གཡུ་རྩྭའི་ན་སྤང་གི་གསེབ་ཀྱི།།
ཡིད་དགའི་མེ་ཏོག་གི་རྒྱན་ཆ།།
མཉེན་ལྕུག་ཕྱག་སོར་གྱིས་འཛིན་དུས།།
སེམས་པ་སྟོངས་སྟོངས་ཤིག་ཡིན་ནམ།།
གཡང་དཀར་མུ་ཏིག་གི་ཚོམ་བུ།།
མཁའ་མཐའི་སྤྲིན་པ་དང་འདྲེས་དུས།།
ལ་གཞས་སང་སང་དུ་འཐེན་རྗེས།།
སེམས་པ་དུངས་དུངས་ཤིག་ཡིན་ནམ།།
ཆུ་མོ་ལྷུང་ལྷུང་གི་ངོགས་ནས།།
ངོ་འཛུམ་གསལ་གསལ་དུ་མཐོང་དུས།།
སྐྲ་ལོ་བྱིལ་བྱིལ་གསུམ་བྱས་རྗེས།།
སེམས་པ་སྤྲོ་སྤྲོ་ཞིག་ཡིན་ནམ།།
ཡ་གའི་སྤང་རི་ནས་ལངས་པའི།།
སྤྲིན་པ་བྱང་ཕྱོགས་སུ་འཁོར་དུས།།
བྱང་བགྲོད་ཇོ་བཟང་གི་ཞལ་རས།།
སེམས་ལ་དྲན་དྲན་ཞིག་ཡིན་ནམ།།
དབྱར་གསུམ་རི་ཀློང་གི་མཛེས་སྡུག།
རང་སེམས་ཉམས་སྣང་དང་འདྲེས་དུས།།
ཐོལ་བྱུང་སེམས་འགྱུ་ཡི་ཟེགས་མས།།
སེམས་པ་བསིལ་བསིལ་ཞིག་ཡིན་ནམ།།
གཟུགས་མེད་བསིལ་རླུང་གི་རེག་པ།།
འཇམ་གོས་ཁ་རུམ་ཁ་ནས་འཛུལ་དུས།།
མིག་ཟུང་ཟིམ་ཟིམ་གྱི་མོད་ལ།།
སེམས་པ་སྐྱིད་སྐྱིད་ཅིག་ཡིན་ནམ།།
འཁྲུལ་སྣང་མེ་ཏོག་གི་བརྩེ་ཞགས།།
ནམ་མཁའི་འཇའ་ཚོན་དང་བསྲེས་ཏེ།།
མིག་ཟུང་རྒྱང་རིང་ལ་འཕེན་དུས།།
སེམས་པ་སྐྱོ་སྐྱོ་ཞིག་བྱུང་ངམ།།
ཕྱེ་ལབ་གཡུ་སྦྲང་གི་གཤོག་བྲོ།།
མེ་ཏོག་ཁོང་གསེང་ནས་བསྒྱུར་དུས།།
བརྗོད་མེད་རོལ་མྱོང་གི་སྣང་བས།།
སེམས་པ་འཚུབ་འཚུབ་ཅིག་ཡིན་ནམ།།
རྒོངས་ཁའི་མཚམས་སྤྲིན་གྱི་ཁྲོད་ནས།།
དུ་སྨུག་སྤངས་གཤོངས་ལ་འཁྱིལ་དུས།།
ཨ་མས་རྒྱང་འབོད་ཀྱི་ངག་གིས།།
སེམས་པ་དཀྲོག་དཀྲོག་ཅིག་བྱུང་ངམ།།
མག་མོག་ཟླ་ཟེར་གྱི་ལག་པས།།
སྦྲ་ནག་ཁ་འཚུབ་དེ་འབྱེད་དུས།།
ཐུན་གསུམ་རྨི་ལམ་གྱི་ཞིང་ནས།།
སེམས་པ་བདེ་བདེ་ཞིག་བྱུང་ངམ།།
སྒོ་ཁྱིས་ཟུག་འཐེན་གྱི་སྐད་བརྡས།།
མཚན་མོའི་ལྷིང་འཇག་དེ་དཀྲོགས་དུས།།
དྲོད་འཇམ་ཚར་གོས་ཀྱི་མལ་ནས།།
སེམས་པ་སྐྲག་སྐྲག་ཅིག་ཡིན་ནམ།།
གཡུ་བྱུར་མུ་ཏིག་གི་རྒྱན་ཆ།།
སྐེ་ནས་སིལ་སིལ་དུ་འཁྲོལ་བཞིན།།
བག་ཕྱག་ལན་གསུམ་དུ་འཚལ་དུས།།
སེམས་པ་སྡུག་སྡུག་ཅིག་བྱུང་ངམ།།
རྟ་མཆོག་འདུར་རྒྱུགས་ཀྱི་ཁྲོད་ནས།།
ངེས་མེད་གནས་ཡུལ་དེ་འགྲིམ་དུས།།
ཕྱིར་བལྟས་ཕྱི་མིག་གི་ཟིལ་བ།།
སེམས་ལ་ཤག་ཤག་ཏུ་འཐོར་རམ།།
རྫོགས་མེད་ན་སྤང་གི་བརྩེ་གླུ།།
ཤང་ཤང་ཆུ་མོ་ཡི་འགྱུར་ཁུགས།།
སེམས་ནས་ལེན་འདོད་རང་མེད་ཀྱང་།།
ཁ་ནས་དབང་མེད་དུ་ཤོར་འོང་།།