ཚུར་ཤོག་ཚུར་ཤོག་དབྱངས་ཅན་མ།

འབའ་སྲས།

བདག་གི་རྣམ་དཔྱོད་ཡངས་པའི་རུམ་ཁ་ནི།།
ད་ནི་མ་རིག་དགུན་གྱི་ཁ་བ་སྟུག །
ཀྱེ་ཀྱེ་བརྩེ་བའི་དབྱངས་ཅན་མཛའ་ན་མོ།།
ཚུར་ཤོག་ཚུར་ཤོག་བདག་གི་སྙིང་དབུས་སུ།།

ཁྱེད་རང་ཕར་སོང་བདག་གིས་མ་ཤེས་ཤིང་།།
ཁྱེད་ཀྱིས་བུད་འགྲོ་ཁོ་བོར་མ་གསུངས་པས།།
ཡོད་ཡོད་འདྲ་བའི་བདག་གི་བྲང་ངོགས་སུ།།
ཁྱེད་ནི་མེད་མེད་འདྲ་བའི་སྣང་བ་ཤར།།

བདག་གི་ཁྱིམ་ན་འོད་གསལ་སྒྲོན་མེ་གསལ།།
ང་ཡི་ཉལ་སར་བདེ་ཞིང་འཇམ་པས་སྐྱིད།།
འོན་ཀྱང་སྙིང་རྩ་འཕར་བའི་སྒྲར་ཉན་ན།།
ཁྱེད་ཉིད་དྲན་པའི་སྐྱོ་བའི་མུན་པ་འཐིབས།།

ད་ཀོ་ཁྱེད་ནི་རྒྱང་དུ་བྲོས་པ་ཤེས།།
ཁོ་བོ་མི་རྐྱང་འདི་ནས་ལྷག་པ་ཚོར།།
ཀྱེ་ཀྱེ་སྙིང་གྲོགས་དབྱངས་ཀྱི་དགའ་མ་ལགས།།
ཚུར་ཤོག་ཚུར་ཤོག་བདག་གི་ཉལ་ས་རུ།།

ཁོ་བོ་འདོད་ལྡན་ཡིན་པས་འདོད་ཆགས་ཆེ།།
དགའ་མར་བྲལ་ན་གདུང་བ་ཤིན་ཏུ་ལྕི།།
ཁྱེད་ནི་འདོད་པ་མེད་ཀྱང་འདོད་པ་སྐོང་།།
དེ་བས་ཚུར་ཤོག་ཚུར་ཤོག་བདག་ལ་འཁྱུད།།

ཁྱེད་ཀྱི་ཞལ་རས་མཛེས་པའི་འཆར་ཡན་ཡིན།།
ཁྱེད་ཀྱི་ནུ་འབུར་ཚིག་གི་སྒྱུ་རྩལ་ཡིན།།
ཁྱེད་ཀྱི་འཇོ་སྒེག་ངོ་མཚར་རྟོག་པ་ཡིན།།
ཚུར་ཤོག་ཚུར་ཤོག་སྙན་ངག་མཛེས་མ་ལགས།།

ནམ་ཞིག་གང་དུ་ཁྱེད་དང་མ་མཇལ་ཚེ།།
བདག་གི་སྙིང་ན་ལྷོག་ལྷོག་ལྡིང་བ་ཡི།།
སྙན་ངག་ནད་པའི་ཁྲག་རྒྱུན་བུ་ག་ནས།།
ས་གསུམ་ཁྱིམ་ལ་ངུ་འབོད་ཁྲག་དམར་བསྐྱིལ།།

ཀྱེ་ཀྱེ་རིང་ནས་བརྩེ་བའི་དགའ་མ་ལགས།།
སུ་དང་གང་གི་རུམ་ན་ཡོད་ན་ཡང་།།
ཁོ་བོས་བྲང་ཁ་བརྡུངས་པའི་སྒྲ་ཐོས་ནས།།
མ་འགྱངས་ཚུར་ཤོག་ཚུར་ཤོག་དབྱངས་ཅན་མ།།

༠༥/༠༦/༠༤ ཕྱི་དྲོར་གསོལ་འདེབས་དྲག་པོས་སྦྱར།