ཚེ་རིང་།
ཉི་ཐིགས་རྡང་ལ་འཐེན་པའི་ལམ་བུ་ནས།།
ཐང་དཀར་རྒོད་པོའི་གཤོག་འགྱུར་དུས་ཀྱིས་ཡལ།།
མུན་པ་རླུང་གིས་ཁུར་བའི་མྱ་ངན་གྱིས།།
དག་པའི་མིག་ལ་མཚན་མོའི་འཇིག་རྟེན་བསྐྲུན།།
ཡིད་འོང་ཟླ་བའི་གོ་ལ་དགོད་པའི་འཛུམ།།
གཡའ་བྲལ་མཚན་མོའི་གདོང་ན་འཚེར་བ་འདིས།།
མུན་པའི་བུ་ག་འོད་ཀྱིས་བརྟོལ་པ་ལ།།
ཁྲོ་དང་བཟོད་པའི་དགའ་སྐྱོ་ངང་གིས་འཕེལ།།
ནམ་མཁའི་ལྷ་མོ་སྐྱོ་བའི་མྱ་ངན་གྱིས།།
མིག་ཆུ་ཆར་བའི་ཟོལ་གྱིས་ལྷུང་ན་ཡང་།།
རུས་རྐང་མེ་ལ་བསྒོས་པའི་འོད་མཐའ་ནས།།
བག་གཡེང་སྐོར་བྲོ་མཚན་ནས་མཚན་ལ་འཁྲབ།།
སྐར་མའི་མིག་མཐའ་མཆི་མས་བསྒྲིབས་པ་ལ།།
མཛེས་སྡུག་ལྷ་མོའི་ཆོས་སུ་བསྙད་བཏགས་ནས།།
ཟོལ་བཅོས་གཏམ་སྙན་རྒྱང་ནས་སྒྲོག་པ་དེའི།།
སེམས་པའི་ཁ་དོག་ང་ལ་མ་འདྲི་ཨང་།།
དུས་བཞིའི་འགྱུར་བ་རིམ་གྱིས་རིམ་གྱིས་སླེབས།།
ལང་ཚོའི་རི་ལུང་ཡིན་གྱིས་ཡིན་གྱིས་འགྱུར།།
འབྲས་ལྡན་སྙེ་མ་དུད་པའི་སྟོན་གྱི་དུས།།
ཁྱོད་ཀྱི་མིང་ནས་ལན་གཅིག་འབོད་པར་ངེས།།
ཆུ་ཡིས་གཏམས་པའི་ཤེལ་གྱི་བུམ་པ་དེ།།
བརྩེ་བའི་ཕྱག་ཟུང་དྲོན་མོས་བཏེགས་པ་འདི།།
མྱ་ངམ་བྱེ་མའི་ཐང་སྟོང་འགྲིམ་པའི་དུས།།
སྲོག་འཛིན་གསེར་གྱི་ཐ་གུ་འདི་ལས་མེད།།
སྐྱིད་དུས་ལྷན་ཅིག་འཛོམས་པ་ཚོང་འདུས་གྲོགས།།
གསེར་གྱི་འཛུམ་ཆུང་གཅིག་ལས་གཅིག་ལ་འཕྲོས།།
ཐ་དད་ཡུལ་ལ་ཕྱོགས་པའི་སེམས་ཀྱི་འོད།།
རང་རང་རས་གཞིའི་ངོས་ནས་སོ་སོར་གྱེས།།
ཁ་ཆར་བུ་ཡུག་འཚུབ་པའི་རི་རྩེ་ལ།།
བཀྲ་ཤིས་རླུང་རྟས་བརྒྱན་པའི་དར་ཅིག་ཡོད།།
དུས་བཞིའི་རླུང་བུ་དལ་གྱིས་མ་འཇགས་ན།།
ས་ལ་དགེ་བའི་མཚན་མ་རིམ་གྱིས་འབོད།།
2014/6/10
རླུང་གི་བསྐུལ་བའི་དྷ་སའི་དམངས་ཁྲོད་ཀྱི་གསར་འགྱུར།