ཕྱི་ནང་གི་བོད་མི་སྤུན་ཟླ་རྣམ་པས་ད་ལོར་ངེས་པར་དུ་ཤེས་དགོས་པ་ཞིག་ལ་ང་ཚོའི་བོད་མི་དཔའ་བོ་དཔའ་མོ་མང་པོ་ཞིག་གིས་མི་རིགས་རང་དབང་དང་ཆོས་དང་རིག་གནས་ཀྱི་ཆེད།
ཆེས་གཅེས་པའི་རང་གི་སྲོག་ལུས་ཕངས་མེད་དུ་བཏང་སྟེ་ང་རང་ལྟ་བུའི་བསམ་མེད་སྙིང་མེད་རྣམས་ལའང་བསམ་བློ་གཏོང་དགོས་པའི་དྲི་བ་རྫོགས་མེད་ཅིག་གནང་ཡོད་ན།
ང་ཚོས་དེ་ལྟ་བུས་བསམ་སྤྱོད་མི་ནུས་ཀྱང་ད་ལོ་འདིར་ཁོ་ཚོ་ལ་གདུང་སེམས་མཚོད་ཆེད་དགའ་དགའ་སྤྲོ་སྤྲོའི་རྣམ་པའི་སྤྲོ་སྐྱིད་དགའ་འཛོམས་ལྟ་བུས་ངོ་ཚ་དང་ཁྲེལ་མེད་ཀྱི་
བྱ་བ་དེ་རིགས་ཤེས་བཞིན་དུ་བྱེད་པ་དང་མི་ཤེས་པར་བྱེད་པ་སོགས་ད་ལོ་གཏན་ནས་སྤངས་ན་ལེགས་སོ། དེ་རང་ཉིད་བོད་མི་ཞིག་ཡིན་པའི་ཆ་ནས་དང༌།
རང་ལ་བསམ་བློ་ཞིག་ཡོད་པའི་ཆ་ནས། ད་ལོ་བརྒྱ་སྲོག་སྟོང་སྲོག་ཤོར་བའི་རྣམ་ཤེས་དག་ལ་ང་ཚོས་སྡུག་བསྔལ་གྱི་མཆི་བའི་མཆོད་པ་དང་མྱ་ངན་གྱི་གདུང་ཡུས་དབྱངས་སུ་གྱེར་དགོས།
བོད་པའི་མཁས་པ་ཚོ། བླུན་པོ་ཚོ་ང་ཚོས་ད་ལོ་གདུང་སེམས་མཉམ་སྐྱེས་ཀྱི་མཆི་མ་མི་འདོན་ནམ། ང་ཚོས་ཁ་སང་གི་འདས་དོན་དེ་རིང་གི་བསླབ་བྱར་ལེན་དགོས་ཡ། བརྟུལ་ཕོད་ཀྱི་མི་རིགས། མགོ་བོ་ཡར་ལ་དགྱེས་དང༌། མཁའ་དབྱིངས་ན་སྔར་བཞིན་སྤྲིན་པ་དང་ཉི་འོད་འཁྱིལ་ཡོད།
བོད་ནས་བོད་མི་ཁ་ཤས་གྱིས་སྤྲིངས་ཐོག་བོད་ནང་གི་ཟིན་བྲིས་སུ་ཡང་སྤེལ་པ་ཡུན་ཙམ་ལས་བརྟན་མེད།
ཀླུ་འབུམ་གྱིས་
གྲོགས་པོ་ལགས། ཁྱེད་ཀྱིས་གསུངས་པར་རྗེས་སུ་ཡི་རང་དང་རྒྱབ་སྐྱོར་ཡོད། ངས་ཀྱང་གྲོགས་པོ་ཁ་ཤས་ལ་འབྲེལ་བ་བྱས་ནས། ད་ལོའི་ལོ་གསར་བྱེད་སྒོ་སོགས་སྤྲོ་སྐྱིད་ཀྱི་རིགས་གང་ཡང་མི་བྱེད་པའི་སྐུལ་འདེད་བྱེད་འཆར་ཡོད། གཞིས་ལུས་དཔའ་བོ་དཔའ་མོ་རྣམས་ཀྱིས་སྲོག་དང་ཁྲག་གི་མཆོད་པ་གྲངས་མེད་པ། རྒྱལ་ཁབ་དང་མི་རིགས་ཀྱི་ཆེད་དུ་མཆོད་ཐུབ་ས་ནས། ང་ཚོ་རང་དབང་ལུང་བར་ཡོད་པའི་བོད་མི་རྣམས་ཀྱིས་སྤྲོ་སྐྱིད་གཏོང་རྒྱུ་མཚམས་འཇོག་མི་ཐུབ་རྒྱུ་ཅི་ཞིག་ཡོད། ང་ཚོས་གཞིས་ལུས་བོད་མི་རྣམས་ལ་རྒྱབ་སྐྱོར་བྱེད་མ་ཐུབ་ཀྱང་། གདུངས་སེམས་མཉམ་བསྐྱེད་ཙམ་ཡང་མ་བྱས་ན། ལས་འབྲས་ཟེར་བ་ཡོད་མེད་གང་ལྟར་ཀྱང་། འཇིག་རྟེན་ཚུལ་ལུགས་དང་གཏན་ནས་མཐུན་ཐབས་མེད་པ་ཞིག་ཡིན་པས། ཕྱི་སྡོད་བོད་མི་རྣམས་ཀྱིས། དེ་དོན་སེམས་ལ་བཟུང་ནས་གཞིས་ལུས་དཔའ་བོ་དཔའ་མོ་ཚོར་མྱ་ངན་གུས་འདུད་དང་། གདུངས་སེམས་མཉམ་བསྐྱེད་མཚོན་སླད་ད་ལོའི་ལོ་གསར་སོགས་སྤྲོ་དགའི་རིགས་གང་ཡང་མི་བྱེད་པའི་རེ་སྐུལ་ཞུ། ཐུགས་རྗེ་ཆེ།
ང་རང་ཡིན་ན་ཕ་ཡུལ་དང་བྲལ་ནས་ལོ་ཉི་ཤུ་འཁོར་གྲབས་འདུག ལོ་འདི་དག་གི་རིང་ལ་དགའ་སྟོན་རིགས་ཕར་ཞོགས་ལོ་གསར་ཡག་པོ་ཞིག་བཏང་བ་ཡང་དྲན་ཡུལ་ན་མི་འདུག ལྷག་པར་ཏུ་ད་ལོའི་བོད་ནང་གི་དྲག་གནོན་འདིས་གཞིས་བྱེས་མི་མང་གི་སེམས་པར་བཟོས་པའི་རྨ་ཁ་གསར་བ་ཡིན་པས་ལོ་གསར་སོགས་ཀྱི་སྐབས་བོད་མི་ཡོངས་ཀྱིས་དགའ་བའི་ཡོ་ལང་གི་རིགས་བཞག་ནས་ལོ་ནག་འདི་དང་བཙན་གནོན་གཏོང་མཁན་དགྲ་བོ་དེ་སེམས་ནས་མ་བརྗེད་པ་གནང་རོགས།།