ཉི་ཐིག་གི་མེ་ཏོག

སྐྱ་རེངས།

ཉི་མ་བཞུད་ཤུལ། ས་གཞི་མུན་པས་རུམ་པར་གྱུར།
བདག་གསོམ་ཤིང་ཁེར་སྐྱེས་ཤིག་དང་འགྲེང་ནས་ལྟ་དུས།
ཁོ་མོའི་མགུལ་གྱི་རིན་ཆེན་ཕྲེང་རྒྱུད་ཉིད་ས་རུ་ཐོར་བ་ལྟར།
རི་ཞོལ་གྱི་གྲོང་རྡལ་དག འོད་ཆེམ་ཆེམ་དུ་གྱུར་ནས་གདའ།

བདག་གྲོང་གསེབ་ཀྱི་ལམ་ཕྲན་དེ་བརྒྱུད་ནས་འགྲོ་སྐབས།
ཟླ་བ་ནི་ནམ་མཁའ་ནག་པོ་དེའི་བྲང་སྐྱེས་དོ་ཤལ་བཞིན་གསལ་ཞིང་།
སྐར་ཚོམ་ཁྱུ་གཅིག་ཀྱང་དེའི་ཉེ་འཁྲིས་སུ་འོད་མདངས་འཕྲོ་ནས་མཆིས།
བདག་གིས“མཚན་མོ་འདི་ཁྱོད་ཀྱི་སྐྲ་ལོ་བཞིན་ཤིན་ཏུ་གནག”
“ཟླ་བ་འདི་ཁྱོད་ཀྱི་བཞིན་རས་ལྟར་ཤིན་ཏུ་སྒོར”ཞེས།
ཁོ་མོར་དེ་ལྟར་བརྗོད་འདོད་སྐྱེས།

ཁྱིམ་གྱི་སྒྲོན་མེ་སྦར་མེད་པས། བདག་གིས་མྱུར་སྟབས་ཀྱིས་སྒོ་མོ་ཕྱེས་ཏེ།
བདག་ཁྱིམ་གྱི་མུན་པའི་གཏིང་གཏིང་དུ ། དྲན་ཤེས་ཀྱི་ལག་པ་བསྲིངས་ནས།
མལ་ཁྲིའི་གཞོགས་ཀྱི་སྒྲོན་མེ་སྦར་ཞིང་། དེ་དང་ལྷན་བདག་གཉིད་དུ་ཡུར།

མཚན་དཀྱིལ་དུ། ཁོ་མོ་རྨི་ལམ་བཞིན་བདག་གི་རྨི་གུང་དུ་ཞུགས།
རྨི་ལམ་དེ་གཙང་བོ་ཞིག་ལྟར། མཚན་གང་བོར་བདག་གི་མནལ་ལམ་དུ་བཞུར།
དབེན་འཇགས་ཀྱི་གཙང་འགྲམ་དེར། བདག་གིས་ཁོ་མོའི་དྲི་ངད་དང་གསུང་གླེང་ཚོར།

མཐིང་མདོག་གི་ཞོགས་པའི་ནམ་མཁའ་རུ། ཚེར་སྣེ་ལྟར་རྣོ་བའི་ཉི་ཟེར་གྱིས།
ཤིང་སྡོང་དག་གི་སྐེ་རུ་དམའ་མོར་འཁྱུད་པའི་སྨུག་ཤག་གི་སེང་རས་བརྟོལ་ཏེ།
ཆར་རྡུལ་གྱི་རི་མོ་གསལ་བའི་སྒེའུ་ཁུང་ལས། ཐག་རིང་ནས་འཕྲོ་འོངས་པའི་ཉི་ཐིག་གི་མེ་ཏོག
བདག་གི་མལ་ཁྲིའི་སྟེང་དུ་གཏོར་བར་གྱུར།

དེ་ནི། ཟླ་བཞི་བའི་ཟླ་མགོ་ཞིག་སྟེ།
ཉི་འོད་དྲོ་ཞིང་བསིལ་རླུང་འཇམ་པའི་ནངས་མོཞིག་ལགས་ཤིང་།
དེ་དུས་ནི། བྱེའུ་དག་ཀྱང་རྒྱང་རིང་ནས་འཕུར་ཏེ། གྱ་གྱུར་གྱི་གསུང་སྙན་སྒྲོག་ཆེད།
ཡུལ་འདིའི་ནགས་ཀློང་དུ་འཛོམས་པར་གྱུར།

2014/6/10