འབའ་སྲས།
སྐོམ་པའི་དུས་སུ་བཀླག་ན་རྫ་ཆུ་བསིལ་མ།།
ལྟོགས་པའི་དུས་སུ་བཀླག་ན་སྦྲང་དཀར་རྩམ་པ།།
ན་བའི་དུས་སུ་བཀླག་ན་འཆི་མེད་བདུད་རྩི།།
ང་ཡི་འདོད་པའི་སྙན་ངག་རེ་བ་ཀུན་སྐོང་།།
ཁེར་རྐྱང་ཁེར་མོར་བཀླག་ན་སེམས་ཀྱི་སྐྱོ་རོགས།།
ས་མཐའི་ཡུལ་ནས་བཀླག་ན་དྲན་པའི་གདུང་དབྱངས།།
ན་ཟླའི་ལྷན་དུ་བཀླག་ན་དགའ་བའི་དགོད་སྒྲ །
ང་ཡི་འདོད་པའི་སྙན་ངག་དགའ་སྐྱོའི་དཔུང་རོགས།།
ཚ་བའི་ཀློང་ནས་བཀླག་ན་ལྗོན་པའི་གྲིབ་བསིལ།།
འཁྱག་རོམ་ཁྲོད་ནས་བཀླག་ན་མེ་ཡི་དྲོ་ཁ།།
ཚ་དུས་བསིལ་ཞིང་འཁྱག་དུས་གྲང་བའི་གཉེན་པོ།།
ང་ཡི་འདོད་པའི་སྙན་ངག་ཉི་མ་ཟླ་བ།།
ཕྲག་དོག་ཅན་ཚོས་བཀླག་ན་དུག་གི་ཚེར་མ།།
ཞེ་སྡང་བ་ཡིས་བཀླག་ན་ཁོང་ཁྲོའི་མེ་ལྕེ།།
ང་རྒྱལ་ཅན་གྱིས་བཀླག་ན་གླང་ཆེན་སྨྱོན་པ།།
ང་ཡི་འདོད་པའི་སྙན་ངག་དུག་ཆུ་ཁོལ་མ།།
བླ་མའི་དྲུང་ནས་བཀླག་ན་བླ་མའི་མཆོད་པ།།
ལྷ་ཡི་མདུན་ནས་བཀླག་ན་ལྷ་ཡི་གསེར་སྐྱེམས།།
ཕ་མའི་སྔུན་ནས་བཀླག་ན་ཕ་མའི་དྲིན་ལན།།
ང་ཡི་འདོད་པའི་སྙན་ངག་དྲིན་ལན་ངོ་ཤེས།།
མཁས་པའི་མདུན་ནས་བཀླག་ན་གླེགས་བམ་མཐུག་པོ།།
བླུན་པོའི་རྣ་ལ་བསྒྲོག་ན་ཐང་གི་གཅིན་སྐྱག །
མཁས་བླུན་བར་གསུམ་ཚང་མ་ལྷན་ཅིག་དགའ་བྱེད།།
ང་ཡི་འདོད་པའི་སྙན་ངག་གང་ལ་དེ་མཐུན།།
ཁྲིམས་ཀྱི་མདུན་ནས་བཀླག་ན་དྲང་བའི་རྒྱ་མ།།
བཙན་པོའི་མདུན་ནས་བཀླག་ན་ལྕགས་ཀྱི་ཐོ་བ།།
ཉམ་ཆུང་སྔུན་ནས་བཀླག་ན་རྒྱབ་ཀྱི་དཔུང་རོགས།།
ང་ཡི་འདོད་པའི་སྙན་ངག་བཟང་ངན་དབྱེ་འབྱེད།།
ཕྱུག་པོས་མཛོད་ནས་བཀླག་ན་སྦྱིན་གཏོང་ཆེན་པོ།།
དབུལ་བོས་སྲང་ནས་བཀླག་ན་ཡོང་སྒོ་མང་བོ།།
དབུལ་ཕྱུག་གཉིས་ཀས་བཀླག་ན་མི་ཚེ་དོན་ལྡན།།
ང་ཡི་འདོད་པའི་སྙན་ངག་དཔག་བསམ་ལྗོན་པ།།
ཆུང་མའི་རུམ་ནས་བཀླག་ན་སྙིང་ཁ་དྲོན་པོ།།
དགའ་རོགས་བྲང་ནས་བཀླག་ན་གསང་བ་དམ་པོ།།
སུ་དང་གང་གིས་བཀླག་ན་ཚོར་བ་གསོན་པོ།།
ང་ཡི་འདོད་པའི་སྙན་ངག་འདོད་པའི་ཞིང་ཁམས།།
ཆགས་ཅན་སྐྱེ་བོས་བཀླག་ན་ཁུ་བ་རང་ཤོར།།
འདོད་ལྡན་བུ་མོས་བཀླག་ན་གཡའ་ཆུ་རང་འཛག །
ཉིན་མཚན་དབྱེར་མེད་སྤྱད་ཀྱང་འདོད་པ་རྫོགས་མེད།།
ང་ཡི་འདོད་པའི་སྙན་ངག་འདོད་པའི་གཏེར་མཛོད།།
ཕྱི་མའི་ཁམས་ནས་བཀླག་ན་ལྷ་ཡི་ཡུལ་ལྗོངས།།
བར་མདོའི་ཁམས་ནས་བཀླག་ན་འཇིགས་སྐྲག་རང་སེལ།།
མི་ཡི་ཡུལ་ནས་བཀླག་ན་འདོད་པའི་ལོངས་སྤྱོད།།
ང་ཡི་འདོད་པའི་སྙན་ངག་ཁམས་གསུམ་སྒྲོན་མེ།།
༡༤/༠༧/༠༣ ཕྱི་དྲོར།
༼བླུན་པོའི་རྣ་ལ་བསྒྲོག་ན་ཐང་གི་གཅིན་སྐྱག །
ཁྲིམས་ཀྱི་མདུན་ནས་བཀླག་ན་དྲང་བའི་རྒྱ་མ།།༽
འགྲོ་ཞོར་བར་ནས་མྱིག་ལ་གཟན་པའི་ཚིག་རྐང་འདི་ཚོ། དུས་གསུམ་ལ་མུན་ནག་འཐིབས་པའི་རྒན་ལ་འདི་ཚོ། ཧ་ཧ་ཧ།