གནས་ཚུལ་གཏོང་མཁན། ཙ་ཡུས་ཕུན་ཚོགས།
ཟླ་༧ ཚེས་༣ ཉིན་སུད་སིར་གནས་སྡོད་ལྷུན་གྲུབ་ཚང་ཀརྨ་བཀྲ་ཤིས་ཚེ་རིང་དང་། སྟག་ཚང་དཀོན་ཅོག བཀྲ་བསྟན་ཚང་པ་སངས་ནང་མི་གསུམ་གྱིས་རྒྱལ་ཚོགས་ལ་བོད་དོན་ཞུ་གཏུག་ལས་འགུལ་ཐེངས་༣༡ པ་དེ་སྤེལ་ཡོད་འདུག
ཁྱིམ་ཚང་གསུམ་གྱི་རྒྱལ་ཚོགས་མདུན་དུ་བོད་དོན་ཞུ་གཏུགས་ལས་འགུལ་འདི་ནི་ཕྱི་ལོ་༢༠༡༢ ལོའི་ཟླ་༡༢ ཚེད་༡༠ ནས་དབུ་འཛུགས་ཀྱིས་ཁྱིམ་ཚང་གཉིས་ཀྱི་བོད་དོན་ཞུ་གཏུགས་ལས་འགུལ་ཞེས་འབོད་ཀྱིན་པ་དེར། ཉེ་བའི་ཆར་བཀྲ་བསྟན་ཚང་པ་སངས་ལགས་མཉམ་ཞུགས་ཐོག་ནང་མི་གསུམ་ཆགས་ཡོད་འདུག་ཅིང་། ནང་མི་གསུམ་གྱི་ལས་འགུལ་འདི་ཉིད་སུད་སི་ཇི་ནི་ཝར་རྟེན་གཞི་བྱས་པའི་མཉམ་འབྲེལ་ཚོགས་ལས་ཁུངས་མདུན་དང་། མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་མདུན་ཐང་བཅས་སུ་བོད་ཀྱི་རྒྱལ་དར་སྒྲེང་འཛུགས་དང་། བོད་ནང་གི་དཀའ་སྡུག་གི་གནས་བབ་འཁོད་པའི་ཡིག་ཆ་ཁག་འགྲེམས་སྤེལ། ལྷག་པར་དུ་སྐུ་ལུས་མེར་སྲེག་གནང་མཁན་རྒྱལ་གཅེས་དཔའ་བོ་དཔའ་མོ་ཚོའི་སྐུ་པར་འགྲེམས་འཇོག
དེ་བཞིན་ཁོང་རྣམས་ཀྱི་སྐུ་ལུས་མེར་སྲེག་གནང་དགོས་པའི་རྒྱབ་ལྗོངས་འགྲེལ་བརྗོད་དང་ཁོང་རྣམས་ཀྱི་འབོད་སྒྲའམ་དགོས་འདུན་འཁོད་པའི་ཡིག་ཆ་ཁག་དང་འཕྲེད་དར། དེ་བཞིན་སྐུ་ལུས་མེར་སྲེག་གནང་བའི་ཐད་༧གོང་ས་མཆོག་དང་དབུས་བོད་མིའི་སྒྲིག་འཛུགས་ཀྱི་ལངས་ཕྱོགས་དང་དགོངས་ཚུལ་ག་རེ་ཡིན་པའི་སྐོར་གྱི་ཡིག་ཆ་དང་འཕྲེད་དར། ༧གོང་ས་མཆོག་གིས་དམིགས་བསལ་རྒྱ་རིགས་ཚོར་བཀའ་སློབ་བསྩལ་བའི་ཡིག་ཆ་སོགས་རྒྱ་ཡིག་དང་། དབྱིན་ཡིག འཇར་མན་ཡི་གེ་བཅས་ཀྱི་ནང་བསྒྱུར་ཏེ། ཕྱི་རྒྱལ་མི་རིགས་དང་། རྒྱལ་ཚོགས་ཀྱི་ལས་བྱེད། ལྷག་དོན་རྒྱ་རིགས་ཡུལ་སྐོར་བ་མང་པོར་འགྲེམ་སྤེལ་བྱེད་ཀྱིན་འདུག་ཅིང་། ཐེངས་རེ་རེ་བཞིན་མཉམ་འབྲེལ་རྒྱལ་ཚོགས་ཀྱི་ལས་ཁུངས་དང་། མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ཆེས་མཐོའི་ལས་ཁུངས་གཉིས་ལ་སྔ་མའི་གསར་གནས་ཁག་ཏུ་འཁོད་ཟིན་པའི་དགོས་འདུན་དོན་ཚན་དྲུག་གི་དགོས་འདུན་སྙན་ཞུ་གཏོང་བཞིན་པའི་ལས་འགུལ་ཞིག་ཡིན་འདུག
ཐེངས་འདིའི་ལས་འགུལ་ནང་ཁྱིམ་ཚང་གསུམ་གྱི་ནང་མི་མ་ཡིན་པའི་གདུང་སེམས་མཉམ་བསྐྱེད་ཆེད་ཨ་རིག་ཀརྨ་རྒྱ་མཚོ་ལགས་དང། རྒྱལ་ཚང་བཀྲིས་ལྷ་མོ།ཡ་རུང་ཚང་བློ་གྲོས་རྒྱ་མཚོ་བཅས་མི་དྲུག་མཉམ་ཞུགས་གནང་འདུག་ཅིང་། ཉིན་འདིར་ལས་འགུལ་བ་རྣམས་ཀྱིས་བོད་གནས་འགྲེལ་བརྗོད་ཡིག་ཆ་གྲངས་༦༠༠ ལྷག་་ཕྱི་རྒྱལ་མི་རིགས་རྣམས་ལ་འགྲེམ་སྤེལ་གནང་ཐུབ་ཡོད་པ་མ་ཟད་། རྒྱ་རིགས་ཡུལ་སྐོར་སྤྲོ་འཆམ་པ་ཚོར་བོད་མི་ཡོངས་ལ་མིང་དོན་མཚུངས་པའི་རང་སྲིད་རད་སྐྱོང་ཡོང་ཐབས་ཀྱི་བསམ་འཆར་ཡིག་ཆ་སོགས་འགྲེམ་སྤེལ་གང་མང་གནང་ཡོད་པ་དང་། དེར་ཉི་ཧོང་གི་ཡུལ་སྐོར་སྤྲོ་འཆམ་པ་མང་པོ་ཞིག་གི་གདུང་སེམས་མཉམ་བསྐྱེད་ཀྱི་རྒྱབ་སྐྱོར་གང་ལེགས་གནང་ཡོད་འདུག
འབྲེལ་གཏུག་ཞུ་ཡུལ།
ཁ་པར། 0041764774162 སྟག་ཚང་དཀོན་ཅོག
ཁ་པར། 0041763080018 ལྷུན་གྲུབ་ཚང་ཀརྨ་བཀྲ་ཤིས།
ཁ་པར། 076 620 10 51 བཀྲ་བསྟན་ཚང་པ་སངས།
ཁོང་རྣམ་པར་ཐུགས་རྗེ་ཆེ། ཡི་རངས་ཡོད།
ད་རེས་ཁོང་ཚོའི་མིང་བྲིས་གཏང་དེ་བོད་སྐད་དང་མཐུན་པ་ཞིག་བྲིས་འདུག་ མི་ཚང་གི་མིང་སྔོན་ལ་བྲིས་པ་དང་ མིའི་མིང་འཇུག་ལ་བྲིས་པ་དེ་ལུགས་དང་མཐུན་པ་ཞིག་ཡིན་པས་དེ་ལྟར་ཚང་མས་གནང་ཐུབ་ཡག་པོ་འདུག་ ལྷག་པར་དུ་ངས་དོ་སྣང་བྱུང་བ་ཞིག་ལ་ཁ་པར་ཨང་ཀི་བོད་མི་གཞན་ལ་སྤྲོད་སྐབས་ སུད་སི་ནས་ཡིན་པའི་བོད་པ་མང་ཆེ་བས་ལམ་སེང་བོད་སྐད་ཐོག་ནས་སྤྲད་ཀྱང་བྱེད་ཀྱི་འདུག་པས་དེ་ཚོ་ནི་སྐད་ཡིག་སྲུང་སྐྱོབ་དངོས་གནས་དེ་རེད་ གཞན་བོད་མི་མང་ཆེ་བས་ཁ་པར་ཨང་ཀི་་སྐད་ཡིག་གཞན་གི་ཐོག་ནས་སྤྲད་པ་དང་ ལྷག་པར་དུ་བོད་ནས་ཁ་པར་ཨང་གྲངས་དང་ དེ་རིང་གཟའ་ག་རེ་ཡིན་མིན་ལ་སོགས་པ་རྒྱ་སྐད་རྒྱབ་ནས་བཤད་ཀྱང་བྱས་པ་ལས་་ བོད་སྐད་ཐོག་གསུ་རོགས་གནང་ཟེར་ན་ཁོང་ཚོས་ཁག་མདོགས་ཁ་པོ་བྱེད་ཀྱི་འདུག་ ལྷག་པར་དུ་ལྷ་ས་བ་རྒད་ཁོག་ཡིནའང་ཁ་པར་ཨང་གྲངས་དང་གཟའ་དེ་རྒྱ་སྐད་ཐོག་ནས་བོད་སྐད་ཡིན་ཞག་བྱས་བཤད་ཀྱི་འདུག་