ཚེ་རིང་།
ཞི་བའི་ཞལ་རས་འཛུམ་པའི་ཟིལ་བ་ཐ་དད་འགྲོ་བའི་སྙིང་ལ་ཟིམ།།
ཤེས་རབ་འོད་ཀྱི་ཟེགས་མ་རྣོན་པོས་ངུར་སྨྲིག་གོས་ཀྱི་རིན་ཐང་བསླངས།།
ཕྱག་ཟུང་ཐལ་མོ་སྦྱར་བའི་ཉམས་ཀྱིས་བདེན་པའི་ལོ་རྒྱུས་གསལ་མཛད་པའི།།
གངས་རིས་མུ་ཁྱུད་བསྐོར་བའི་ཡུལ་དུ་ལས་སྨོན་ཤུགས་ཀྱིས་སྦྲེལ་བའི་མགོན།།
ལོ་ཟླའི་བགྲོད་པ་གསལ་བའི་གྲངས་འདི་དགའ་སྤྲོ་ཚོར་བས་བགྲང་ན་ཡང་།།
ལས་དབང་སྐྱ་མོའི་ངོ་གདོང་དྲན་ཚེ་སེམས་ལ་འཇིགས་སྐྲག་ངང་གིས་འབྱུང་།།
ཀྱག་ཀྱོག་ལོ་ཟླའི་འགྲོས་ཀྱིས་བཀབ་པའི་འདས་སོང་ལམ་བུའི་ཁུགས་པ་ན།།
སྐྱོ་སྡུག་སྤྱན་ཆབ་ཐོར་བའི་བྱུང་བ་ད་དུང་སུས་ཀྱང་གླེང་བ་མེད།།
མཛད་འཕྲིན་མི་ཟད་དུང་གི་དཀྱིལ་འཁོར་འཛམ་གླིང་འཛིན་མའི་རྒྱན་དུ་ཤར།།
ལྷག་བསམ་གསེར་གྱི་རང་མདངས་སེར་བོ་གངས་ལྗོངས་འགྲོ་བའི་སྙིང་ལ་ལྷུང་།།
བྱམས་བརྩེའི་ཕྱག་སོར་ཆོས་ཀྱི་འཁོར་ལོ་གླིང་བཞིའི་ཁོར་ཡུག་ཀུན་ཏུ་བསྐོར།།
བཀྲ་ཤིས་གཡང་ཆགས་ཁྱོད་ཀྱི་ཞབས་ཟུང་རིང་དུ་བརྟན་ཅིང་བཞུགས་གྱུར་ཅིག།
འཁྲུངས་སྐར་ལ་རྟེན་འབྲེལ་ཞུ།