བཀའ་ཟུར་རྣམ་པས་བོད་གཞུང་བཀའ་ཤག་ལ་ཕུལ་བའི་དགོངས་འཆར།༼མ་ཕྱི་སོར་བཞག་གིས་བཀོད་པ་ཡིན།༽

༄༅། །དཔལ་ལྡན་བཀའ་ཤག་ལྷན་སྟེང་གི་ྋཞབས་མངོན་དྲུང་དུ།

གུས་པས་ཞུ་གསོལ། དེང་རྒྱ་ནག་ཏུ་སྐུ་ཚབ་རྣམ་པས་འབྲེལ་མོལ་གནང་མུས་ཀྱི་རྒྱུད་རིམ་འགྲོ་བཞིན་པའི་གནས་སྐབས་ཡིན་ཀྱང༌། ཡུན་རིང་གི་འདས་པའི་དུས་སྐབས་ནས་ད་བར་མུ་མཐུད་གཅིག་མཇུག་གཉིས་མཐུད་ཀྱིས་རྒྱ་ནག་གཞུང་འཛིན་སྡེ་ཚན་ཁག་དང༌། མི་སྣས་ྋགོང་ས་ྋསྐྱབས་མགོན་ཆེན་པོར་མཚན་སྨད་ཞུ་བ་དང་འབྲེལ། གཞི་རྩ་བྲལ་བའི་རང་རེར་སྐྱོན་བརྗོད་ཀྱི་བརྒྱུད་བསྒྲགས་བྱེད་མུས་དང༌། ལྷག་པར་ལམ་རོབ་གཤམ་འཁོད་སྙན་སེང་ཞུས་ཡོད་པ་ལྟར་ཉེ་ཆར་ྋགོང་ས་ྋསྐྱབས་མགོན་ཆེན་པོར་ཧ་ལས་པའི་མཚན་སྨད་ཞུ་བ་དང་ཆབས་ཅིག་ྋགོང་ས་ཆེན་པོར་བོད་དོན་སྐོར་ཐུགས་ཁུར་སྐྱེད་བཞེས་ཀྱི་སྐུ་དབང་དང་བྲལ་ཚུལ་དང༌། བོད་དོན་སྐོར་ྋགོང་ས་མཆོག་ནས་འབྲེལ་མོལ་གནང་རྒྱུའི་སྐུ་དབང་མེད་ཚུལ་སོགས་རིག་འཚོ་མ་ཟིན་པ་ལྟ་བུའི་སྤྱི་བསྒྲགས་གཏམ་བཤད་མང་པོ་ཞིག་སྤེལ་དང་སྤེལ་བཞིན་པའི་གནད་དོན་འདི་ཉིད་ཧ་ལས་ཧོན་འཐོར་ཙམ་གྱི་ངང་ཟོམ་འཇོག་ཏུ་མ་སོང་བར། གཤམ་འཁོད་མཚན་སྨད་ཞུས་ཚུལ་དཔེ་མཚོན་ལམ་རོབ་སྙན་སེང་ཞུས་ཡོད་པ་ལྟར་རྒྱ་ཕྱོགས་ནས་རྒྱ་ཁྱབ་ཀྱི་སྤྱི་བསྒྲགས་ཡང་ཡང་བྱས་པ་འདི་རིགས། གཞུང་དང༌། མི་མང་གཉིས་ཕྱོགས་ནས་དགོངས་པར་མངའ་གསལ་ཡང༌། ད་ལྟའི་ཆར་གནད་དོན་འདི་རིགས་ཐོག་གཞུང་མང་ཚོགས་སྡེ་ཁག་སོགས་ནས་དགོངས་བཞེས་ཕྱག་ལེན་བསྟར་ཕྱོགས་འདི་བྱུང་བར་གུས་ཅག་རྣམས་ཀྱིས་ཤེས་རྟོགས་མ་བྱུང་བ་བཅས། འདི་དག་སྐོར་དོན་སྙིང་གང་དགའ་ཅི་ལེགས་འཕྱར་གྲུ་མཉམ་འདེགས་ཞུ་རྒྱུ་སྤྱིའི་འགན་ཁུར་དུ་བསམ་ནས་བློ་ཚབས་ཆེན་པོའི་ངང་ད་ལམ་ཕྱི་རྒྱལ་དུ་བཞུགས་པའི་བཀའ་ཟུར་ཕེབས་ཁོམ་གྱུར་རིགས་དང༌། རྒྱ་གར་ནང་བཅའ་བཞུགས་བཀའ་ཟུར་ཕལ་ཆེ་བ་བཅས་ལྷན་འཛོམས་ཀྱིས་རང་རང་བསམ་པའི་འཆར་སྒོ་ཇི་ཡོད་བློ་རིག་རྩལ་འདོན་གྱི་དགོངས་འཆར་བྱུང་བའི་སྙིང་དོན་ཁག་སྙན་སེང་ཞུ་རྒྱུ་དང༌། འདས་པའི་ནང་བཀའ་ཤག་དང་བཀའ་ཟུར་ལྷན་རྒྱས་ལན་གྲངས་རིམ་པ་བཀའ་བསྡུར་བསྐྱངས་སྐབས་རང་རང་བཟོད་མེད་ཀྱི་བསམ་ཚུལ་ཞུས་པ་དང༌། རྒྱ་གར་ནང་ཡོད་བཀའ་ཟུར་ཐུན་མོང་ནས་ཡིག་ཐོག་བསམ་འཆར་གུས་འབུལ་ཞུས་པ་བཅས་དེ་ལྟར་ཡང༌། འདི་བྱས་འདི་འཐུས་ཀྱི་བཀའ་གསལ་ཕེབས་རིགས་མ་བྱུང་བས་སྙན་བསུན་ཞུ་ཐལ་འདྲ་སོང་སྙམ་གྱི་སྐབས་རེ་བློ་འཚབ་ཡང་ཡོང་མུས་དང༌། གཞི་རྩའི་བསམ་ཚུལ་ཞུས་པ་རྣམས་མཐའ་གཅིག་ཏུ་ཕྱག་ལེན་བསྟར་བཞེས་ཡོང་སྐོར་ཞུ་རྒྱུ་རྩ་བྲལ་ཡང་ཞུ་དོན་ཁག་དགོངས་པར་འཐད་མིན་བཀའ་གསལ་གནང་འགབ་འདྲ་བྱུང་ན་འབྱུང་འགྱུར་ངེད་ཚོའི་བསམ་བློའི་དཔྱད་གཞིར་ཕན་ཐོགས་ཡོང་ངེས་སྙམ་པ་དང༌། ལྷག་པར་སྤྱི་དོན་འཆར་སྒོ་ཇི་ཡོད་བློ་སྦུག་རུལ་བསུང་དུ་བཞག་ན། དོན་མེད་དོགས་གཞིའི་སྣེ་འདྲེན་ཡོང་སྲིད་ཁར། སྤྱི་སྨན་དོན་འཁྱོལ་ལ་ཕན་ཐོགས་ཀྱང་ཡོང་མིན་སྙམ་སྟེ་བཟོད་མེད་སྙན་སེང་ཞུས་པ་འདི་ཉིད་ཞུ་ཧམ་དུ་མ་སོང་བར་ཆོས་ཀློང་དུ་སྟིམ་པའི་དགོངས་བཞེས་ཡོང་བ་ཞེས་ཞུ་བ་དང་ཆབས་ཅིག་ད་ལམ་ངེད་ཚོ་གྲོས་བསྡུར་བྱུང་བའི་བསམ་ཚུལ་སྙིང་པོ་ཞིག་ཞུ་རྒྱུར། ཞུ་རྩའི་དོན་དང་པོར།
༡༽ད་ཆ་ཕྱི་ཟླ་༡༠ པའི་ནང་རྒྱ་བོད་འབྲེལ་མོལ་གནང་རྒྱུ་གནང་བ་རྒྱུའི་དགོངས་བབ་ཕྱོགས་གཉིས་ཀར་བྱུང་ཚོད་ལ་ད་དུང་རྒྱ་ཕྱོགས་ནས་ཕྱི་ལོ་༢༠༠༦ ཟླ་༥ ནས་བཟུང་བོད་ཆོས་སྲིད་གཉིས་ཀྱི་དབུ་ཁྲིད་བོད་མིའི་ཁོག་པའི་སྙིང་དང་རེ་བའི་གཏོད་ཡུལ་གཅིག་ཉིད་ྋགོང་ས་མཆོག་ལ་བསམ་ཡུལ་ལས་འདས་ཤིང་མཚམས་ཚིག་བརྒལ་བའི་སྐྱོན་བརྗོད་མུ་མཐུད་བྱེད་བཞིན་པ་དང༌།
བར་ལམ་བོད་རྒྱ་འབྲེལ་མོལ་གནང་བཞིན་པའི་སྐབས་སུ་རྒྱ་ནག་གཞུང་གི་དཔོན་རིགས་ཚོས་ཤོད་ཚུལ་རེད་ཅེས་གསར་གནས་ཁག་ཏུ་ཐོན་པ་ཁག་ནང་འདི་ལྟར། ༢༠༠༦ བོད་ལྗོངས་བརྙན་འཕྲིན་ལས་ཁུངས་ནས་གནས་སྤེལ་ཞེས་པའི་ནང༌། བོད་རྒྱ་འབྲེལ་མོལ་གནང་ཡུལ་གཙོ་བོ་དང༌། ང་ཚོའི་རེ་འདུན་གནང་ཡུལ་ཀྲུང་དབྱང་འཐབ་ཕྱོགས་གཅིག་གྱུར་ཁང་གི་རྒྱུན་ལས་བློན་ཆེན་གཞོན་པ་ཀྲུའུ་ཝེ་ཆོན་གྱིས་ཏཱ་ལའི་ཆབ་སྲིད་ཐད་ལོག་སྤྱོད་རང་བཞིན་དང༌། ཆོས་ལུགས་ཐད་གཡོ་རྫུན་གྱི་རང་བཞིན། བྱེད་ཐབས་ཐད་མགོ་སྐོར་རང་བཞིན་བཅས་ལ་ངོས་འཛིན་གསལ་པོ་བྱས་ནས་ཏཱ་ལའི་ཁ་བྲལ་རུ་ཚོགས་དང་དབྱེ་མཚམས་གསལ་པོ་གཅོད་དགོས་ཞེས་པ་དང༌།
ཕྱི་ལོ་༢༠༠༨ ཟླ་༣ ཚེས་༢༡ ཉིན་བོད་ལྗོངས་ཉིན་རེའི་ཚགས་པར་གྱི་དཔྱད་གཏམ་ནང༌། ཐེངས་འདིར་ལྷ་སར་བྱུང་བའི་རྡུང་འཕྲོག་གཅོག་སྲེག་གི་ཚབས་ཆེའི་དོན་རྐྱེན་དང༌། སྐྱི་གཡའ་བའི་དྲག་སྤྱོད་དེ་དག་གིས་དོན་མེད་དུ་སྐྱེ་འགྲོ་རྣམས་ལ་སྡུག་བསྔལ་ཚབས་ཆེན་མྱོང་དུ་བཅུག་པ་དེས། ཏཱ་ལའི་ཁོ་རང་གིས་སྒྲོག་པ་ནང་བཞིན་གྱི་ནང་པའི་དགེ་སློང་ཡིན་ཟེར་བ་དེ་ལྟ་བུ་ཞིག་གཏན་ནས་མིན་པ་ར་འཕྲོད་ཡོད། ཁོང་ནི་མིའི་གདོང་ལ་གཅན་གཟན་གྱི་སེམས་དང་ལྡན་ཞིང༌། ཆོས་གོས་གྱོན་པའི་འཕར་སྤྱང་ཞིག་རེད་ཅེས་བརྗོད་ན་ཐལ་ཆ་གང་ཡང་མེད། སྟོན་པ་བཅོམ་ལྡན་འདས་ཡིན་ནའང༌། ཏཱ་ལའི་ནང་བཞིན་ཁ་འཇམ་ཁོག་རྩུབ་ཀྱི་ནང་པའི་ཞབས་འདྲེན་པ་དང༌། མིའི་གདོང་ལ་གཅན་གཟན་གྱི་སེམས་དང་ལྡན་པའི་དྲག་སྤྱོད་པ་སྨྱོ་རྩུབ་ཅན་འདི་བཟོད་བསྲན་བྱེད་ཐུབ་ཀྱི་མ་རེད་ཅེས་འཁོད་པ་དང༌།
ལྷ་ས་ནས་བོད་ལྗོངས་རླུང་འཕྲིན་༢༠༠༨ ཟླ་༣ ཚེས་༡༩ ཉིན་གནས་ཚུལ་སྤེལ་བ་ཞེས་པའི་ནང༌། རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ལྗོངས་ཡོངས་ཀྱི་ལྷ་སའི་གསུམ་གཅིག་བཞིའི་་དོན་རྐྱེན་ཐག་གཅོད་དང་ལྗོངས་ཡོངས་ཀྱི་བརྟན་ལྷིང་སྲུང་སྐྱོབ་བྱེད་པའི་བརྙན་འཕྲིན་ཁ་པར་ཚོགས་འདུའི་སྟེང༌། ༼ཀྲང་ཅིས་ལིས་བོད་རང་སྐྱོང་ལྗོངས་ཟེར་བའི་གཙོ་འཛིན་༽གཏམ་བཤད་ནང་ཏཱ་ལའི་རུ་ཚོགས་ཀྱི་ཁ་བྲལ་གཏོར་བཤིག་ནི་རང་སྐྱོང་ལྗོངས་ཀྱི་བརྟན་ལྷིང་ལ་གནོད་སྐྱོན་གཏོང་བའི་འབྱུང་རྩ་གཙོ་བོ་ཡིན་པ་དང༌། བོད་ལྗོངས་གོང་འཕེལ་བརྟན་ལྷིང་གི་ནང་ཁུལ་གྱི་གནོད་སྐྱོན་ཆེ་ཤོས་ཡིན་ཞེས་གསུངས་པ་རེད། ཏཱ་ལ་ནི་ཆོས་གོས་གྱོན་པའི་འཕར་སྤྱང་དང་མི་གདོང་སྤྱང་སེམས་ཀྱི་གདོན་ཞིག་ཡིན་པ་སླར་ཡང་ར་སྤྲོད་གང་ལེགས་བྱུང་ཡོད་པ་རེད། ང་ཚོས་ཏཱ་ལའི་རུ་ཚོགས་པ་དང་ཁྲག་དང་མེ་ལྕེའི་ཁྲོད་ཀྱི་རྣོ་ངར་ཆེ་བའི་འཐབ་རྩོད་བྱེད་བཞིན་ཡོད་པ་དང༌། ཁྱོད་ཤི་ང་གསོན་གྱི་དགྲ་ཕྱོགས་དང་རང་ཕྱོགས་བར་གྱི་འཐབ་རྩོད་བྱེད་བཞིན་ཡོད་པ་རེད་ཅེས་དང༌། ཡང་ང་ཚོས་ངེས་པར་དུ་ཏཱ་ལའི་རུ་ཚོགས་ཀྱི་སྡུག་སེམས་ཤི་མེད་པ་དང༌། ཤི་ཁའི་འཕག་འཚག་རྒྱག་གི་ཡོད་པས་ཁ་བྲལ་ལ་ངོ་རྒོལ་བྱེད་པའི་འཐབ་རྩོད་ཀྱི་དུས་བབས་སྔར་བཞིན་ཧ་ཅང་ཛ་དྲག་པོ་ཡོད་པ་ཞིག་རིག་པ་དྭངས་གསལ་གྱིས་ཤེས་པ་བྱེད་དགོས་ཞེས་འཁོད་ཡོད།
དེ་མཚུངས་ཕྱི་ཟླ་༧ ཚེས་༡༦ ཉིན་རྒྱ་ནག་རྒྱལ་སྲིད་སྤྱི་ཁྱབ་ཁང་གི་གསར་འགྱུར་སྡེ་ཚན་གྱི་འགན་འཛིན་ཏུང་ཡུན་ཧུའུ་ཡིས་རྒྱ་ནག་གིས་ཏཱ་ལའི་བླ་མ་དང་མཉམ་དུ་ཁོང་གི་མ་འོངས་པའི་སྐོར་ལ་གྲོས་བསྡུར་བྱེད་འདོད་ཡོད། འོན་ཀྱང་བོད་ཀྱི་གནད་དོན་སྐོར་ལ་གྲོས་བསྡུར་བྱེད་འདོད་མེད། ཏཱ་ལའི་བླ་མར་བོད་ཀྱི་འཐུས་ཚབ་བྱེད་པའི་ཐོབ་ཐང་མེད། གལ་སྲིད་ཁོང་ལ་༼ཐོབ་ཐང་༽ཡོད་མྱོང་བའི་དབང་དུ་བཏང་ཡང༌། དེ་ནི་༡༩༥༩ སྔོན་ལ་རེད། ད་ལྟའི་ཆར་ཏཱ་ལའི་བླ་མར་བོད་ཀྱི་མ་འོངས་པའི་སྐོར་ལ་གྲོས་བསྡུར་བྱ་རྒྱུའི་དབང་ཆ་ཡོངས་རྫོགས་ཤོར་ཟིན་པ་རེད། གལ་སྲིད་ཏཱ་ལའི་བླ་མ་ཀྲུང་གོའི་སྤྱི་འབངས་ཤིག་བྱེད་འདོད་ཡོད་པ་དང༌། ཀྲུང་གོའི་འཕེལ་རྒྱས་ལ་ལེགས་སྐྱེས་འབུལ་བསམ་ན་ཁོ་རང་བོད་ལ་ལོག་རྒྱུ་ཡོང་སྲིད་པ་ཞིག་རེད། ཏཱ་ལའི་བླ་མའི་སྐུ་ཚབ་ཀྱི་ཆབ་སྲིད་ལངས་ཕྱོགས་དེ་གྲོས་མོལ་སྐབས་གསལ་བོ་བྱུང་སོང༌། དེ་ནི་ཀྲུང་གོ་སྲིད་གཞུང་གི་ལངས་ཕྱོགས་དང་རྦད་དེ་རྒྱབ་འགལ་རེད། ཁོ་ཚོས་བོད་ནི་རྒྱ་ནག་གི་མངའ་ཁོངས་ལས་ཁ་བྲལ་དུ་མི་རུང་བ་ཞིག་ཡིན་པ་ཁས་མི་ལེན་པར་བོད་ཆེན་པོ་རང་སྐྱོང་གི་རེ་བ་འདོན་གྱི་ཡོད། འདིའི་གོ་དོན་ནི་ཏཱ་ལའི་བླ་མས་བོད་རིགས་གནས་སྡོད་ཀྱི་ས་ཁུལ་ཡོངས་སུ་རྫོགས་པ་དབང་སྒྱུར་དགོས་པ་དང༌། དེ་ཀྲུང་གོའི་༼ས་ཁོངས་༽བཞི་ཆ་གཅིག་ཡིན་པ་དང༌། རྒྱ་རིགས་རྣམས་ས་ཆ་དེ་ནས་ཕྱི་སྤོ་བྱེད་དགོས་ཀྱི་ཡོད། འདི་ནི་རྒྱ་ནག་གིས་ཁས་ལེན་ཐབས་མེད་པའི་ལངས་ཕྱོགས་ཡིན་ཞེས་གསལ་འདུག
༢༽དོན་གནད་འདི་གཉིས་རྒྱ་ནག་གཞུང་གི་སྲིད་བྱུས་སམ་ལངས་ཕྱོགས་ཡིན་ཚེ་ད་དུང་མུ་མཐུད་བཀའ་མོལ་གནང་རྒྱུའི་གཞི་རྩ་གཏན་ནས་མེད་པ་ཞིག་མཐོང་ཞིང༌། རྡོ་དོན་སྙིང་པོ་ཉེ་ཆར་ཚགས་ཤོག་ཐོག་ཐོན་པ་ལྟར་རྒྱལ་སྲིད་སྤྱི་ཁྱབ་ཁང་གིས་བོད་ཐོག་འཛིན་པའི་སྲིད་བྱུས་དེ་རང་ཡིན་ཚེ་སྐུ་ཚབ་ཆེད་གཉེར་གནང་སྟེ་བཀའ་མོལ་གནང་རྒྱུའི་གཞི་རྩ་རྩ་བྲལ་དུ་མཐོང་བས་གནས་སྐབས་མཚམས་འཇོག་གནང་བཞེས་ཡོང་བ་ཞེས་ཞུ་རྒྱུ་དང༌། འོན་ཀྱང༌། གུས་ཅག་ནས་རྒྱ་ནག་གཞུང་གི་རང་རེའི་སྐུ་ཚབ་ཚོར་འཛིན་པའི་སྲིད་བྱུས་ཇི་བཞིན་ཤེས་རྟོགས་མེད་སྟབས་མཐའ་གཅིག་ཏུ་བཀའ་མོལ་གནང་འགབ་མཆིས་མིན་ཞུ་ཚོད་མ་ཐེག་པས་གཞུང་འཛིན་འགན་དབང་ཡོད་པའི་བཀའ་ཤག་གིས་དགོངས་བཞེས་ཟབ་ནན་ཡོང་བ་དང༌།
༣༽ད་ལམ་བཀའ་ཤག་གི་གསུང་འཕྲིན་ནང༌། བོད་རྒྱའི་དབར་འགལ་ཟླ་གཙོ་ཆེ་བ། ༡༽བྱུང་རབས་ལ་ལྟ་ཕྱོགས་དང༌། ༢༽བོད་རིགས་ཆིག་སྒྲིལ་སྐོར་ཡིན་ཞེས་འཁོད་པ་ལྟར། འབྱུང་འཆར་སྤྱི་ཟླ་༡༠ ནང་སླར་ཡང་གྲོས་མོལ་གནང་སྟེ་གོང་གསལ་གནད་དོན་གཉིས་ཐོག་རྒྱ་གཞུང་ནས་བསམ་ཞིབ་ཞུ་རྒྱུའི་གཞི་རྩ་ཡོད་ན་རབ་དང༌། དེ་ལྟར་གཞི་རྩ་མ་གཟིགས་ཚེ་རང་རེས་འཛིན་པའི་གྲོས་མོལ་གནང་རྒྱུའི་སྲིད་བྱུས་གསར་པ་ཞིག་གཏན་འབེབ་གནང་འགབ་མཆིས་མིན་དགོངས་བཞེས་ཡོང་བ།
༤༽དེ་དང་འབྲེལ་བ་བཀའ་ཤག་གིས་གསལ་བསྒྲགས་སུ། དབུ་མའི་ལམ་གྱི་གོ་དོན་ལ་མཐའ་གཉིས་ལས་ལྡོག་སྟེ་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་རྩ་ཁྲིམས་སུ་གསལ་བའི་མི་རིགས་ས་གནས་རང་སྐྱོང་གནས་བབ་ཆ་ཚང་བ་ཞིག་བོད་རིགས་ཡོངས་ལ་ཐོབ་ཐབས་བྱ་རྒྱུ་དེ་དབུ་མའི་ལམ་གྱི་སྙིང་དོན་ཡིན་ཞེས་འཁོད་འདུག
འདས་པའི་ལོ་རྒྱུས་ཀྱི་བྱུང་རིམ་དུ་གསལ་བའི་དབུ་མའི་ལམ་གྱི་དོན་གནད་ཐད་ད་ལྟའི་སྐབས་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་རྩ་ཁྲིམས་སུ་གསལ་བ་ཞིག་ངེས་འདྲོང་མ་མཐོང་བས་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ལ་བསྒྱུར་བཅོས་མ་སོང་བར་འདི་གཉིས་མཉམ་བསྲེས་ཡོང་ཐབས་མེད་པའི་རང་བཞིན་ཆགས་ཡོད་པར་ངོས་འཛིན་ཞུ་གི་ཡོད།
འདི་སྐོར་ད་ཕན་བཀའ་ཤག་དང་བཀའ་ཟུར་ལྷན་ཚོགས་ཐོག་རང་རང་བསམ་ཚུལ་ཇི་ཡོད་གསལ་པོར་སྙན་སེང་ཞུས་ཟིན་ཡང༌། ད་དུང་སླར་ཡང་ཞུ་རྒྱུ་གལ་ཆེར་བརྩིས་ཏེ་ཞུ་དོན་ལ། འདས་པའི་ལོ་རྒྱུས་ནང་དབུ་མའི་ལམ་ཞེས་པ་ྋགོང་ས་མཆོག་གིས་སི་ཊར་སི་སྦག་ཏུ་ཡོ་རོབ་གྲོས་ཚོགས་སུ་བཀའ་ཁྱབ་གནང་བ་ བོད་གཞུང་ཕྱི་དྲིལ་ལས་ཁུངས་ནས་དཔར་འགྲེམས་ཞུས་པའི་དེབ་ཆུང་བོད་རྒྱ་ཞི་མོལ་གྱི་སྒྲོམ་གཞི་དབུ་མའི་ལམ་གྱི་སྲིད་བྱུས་དང༌། དེའི་བྱུང་རབས་ངོ་སྤྲོད་ ཞེས་གཞུང་འབྲེལ་འགྲེམས་སྤེལ་གནང་བའི་རྩ་དོན་འདི་གཉིས་ལ་རྩ་འཛིན་ཞུ་མུས་ལ་མི་རིགས་ས་ཁུལ་རང་སྐྱོང་ལ་སོགས་པའི་དོན་གནད་འདི་གཉིས་དབུ་མའི་ལམ་དུ་རྩ་འཛིན་ཞུ་འོས་གཏན་ནས་མ་མཐོང་བས། འབྱུང་འཆར་འདི་གཉིས་མཉམ་བསྲེས་མ་ཡིན་པར་སོ་སོའི་ངོ་བོ་དང་དོན་གནས་སོ་སོར་འགྲེལ་བརྗོད་གནང་བཞེས་ཡོང་བ་ཞུ་རྒྱུ་ཡིན།

༥༽འདས་པའི་ནང་ྋགོང་ས་མཆོག་ཕྱི་རྒྱལ་ཡུལ་གྲུ་ཁག་ལ་བཀའ་ཡི་ཕེབས་སྒོར་ངོས་ཕྱེད་བགྲེས་ཡོལ་ཡིན་ཞེས་དང༌། ཉེ་བའི་ཆར་ཡང་སློབ་སྟོན་པ་ཡིན་ཚུལ་ཕེབས་པ། ད་སྔོན་གཞུང་འབྲེལ་བརྟན་བཞུགས་སྐབས་ས་སྐྱ་བདག་ཁྲི་རིན་པོ་ཆེ་ནས་མཎ་ཌལ་ལྗགས་བཤད་ཀྱི་གསོལ་འདེབས་ཞུས་པའི་སྙིང་པོར། ྋགོང་སྋསྐྱབས་མགོན་ཆེན་པོ་མཆོག་སྐུ་ཚེ་ཞབས་པད་བརྟན་པ་དང༌། ཕྱེད་བགྲེས་ཡོལ་ཡིན་པའི་ཕེབས་དགོངས་མཛད་བཞེས་མི་ཡོང་བའི་གསོལ་འདེབས་ཞུས་གནང་མཛད་པར་ཕྱིར་ཕེབས་སུ་སྐུ་ཚེ་བརྟན་པའི་ཐུགས་སྨོན་གནང་རྒྱུ་ཞལ་བཞེས་གནང་བ་དང༌། ཕྱེད་བགྲེས་ཡོལ་གྱི་དགོངས་བཞེས་ཐད་ལ་འགྱུར་བ་ཡོང་ཐབས་མེད་སྐོར་བཀའ་གསལ་ཕེབས་པ་དེ་དག་གཞུང་མང་ཡོངས་ཀྱི་དགོངས་ཆུབ་ཏུ་བརྟས་པ་ལྟར། བཀའ་ཡི་ཕེབས་སྒོ་འདི་དག་བཀའ་ཤག་གམ་གཞུང་འབྲེལ་གྱི་དགོངས་བཞེས་དང་འབྲེལ་བའི་མཛད་ཕྱོགས་ཇི་ཡིན་ད་བར་གསལ་པོ་ཞིག་མ་བྱུང་བ་དང༌། གཞུང་འབྲེལ་གྱི་རྩ་འཛིན་གནང་ཐབས་མིན་ཚེ། ད་སྐབས་བོད་དོན་གཉན་འཕྲང་གི་དུས་སྐབས་འདིར་གཞིས་བྱེས་བོད་མིར་སེམས་ནད་དང༌། བློ་འཚབ། དོགས་འདྲོགས་སོགས་མི་ཡོང་ཆེད་གཞུང་དང་མི་མང་གཉིས་ཕྱོགས་ཀྱི་དེ་ལྟའི་བཀའ་ཡི་ཕེབས་སྒོ་ནམ་ཡང་མི་ཡོང་བ་ཞེས་ཡང་ཡང་རྒྱུན་མཐུད་ཀྱི་གསོལ་འདེབས་ཞུ་རྒྱུ་གལ་འགངས་ཤིན་ཏུ་ཆེ་གནད་དུ་མཐོང་བས་དེ་དོན་མཛད་ཕྱོགས་ཅི་ནས་ཡོང་བ་ཞུ་རྒྱུ་ཡིན།
༦༽ཕྱི་ལོ་༢༠༠༨ ཟླ་༣ ཚེས་༡༠ རྗེས་ཀྱི་བོད་མི་མང་རྣམས་འདས་པའི་ལོ་༦༠ ལ་ཉེ་བའི་རིང་རྒྱ་དམར་གཞུང་གིས་བོད་ཀྱི་སྣོད་བཅུད་ཡོངས་རྫོགས་ཧམ་འཕྲོག་བྱས་པ་མ་ཟད་བོད་མི་རྣམས་རྒྱ་ནག་གི་མནར་གཅོད་སྡུག་སྦྱོང་གཏོང་ཡུལ་ལ་བརྩིས་ནས་མི་ཆོས་ཡ་རབ་ལས་འདས་པའི་བོད་ཀྱི་སྐོར་བསམ་ངན་སྦྱོར་རྩུབ་རྫོགས་མཐའ་མེད་པ་ཞིག་བྱས་པར་བརྟེན། བོད་མི་མང་ཡོངས་རྫོགས་འུ་ཐུག་ཐབས་ཟད་ཀྱིས་མེ་མདའི་རྩེ་གྲི་འོག་ཏུ་འཚེ་མེད་ཞི་བའི་ལམ་ནས་གྱེན་ལངས་བྱས་པ་དང༌། དེར་རྒྱ་ནག་གི་བསམ་ཤེས་མེད་པར་བསད་རྡུང་གཏོར་བཅུག་གིས་ཁྲག་དམར་བཏོན་པའི་མནར་གཅོད་བཏང་བ་བཅས་ཀྱི་བོད་མི་མང་ཉམ་ང་བའི་གནས་སྟངས་ཐོག དུས་ད་ལྟའང་རྒྱལ་སྤྱིའི་མི་མང་གིས་ཇི་བཞིན་རྟོགས་ཡུལ་མེད་པ་འགྱུར་བཞིན་པར་བརྟེན་བཙན་བྱོལ་བོད་གཞུང་གིས་ྋགོང་ས་ྋསྐྱབས་མགོན་ཆེན་པོའི་དགོངས་གཞི་གཞི་རྩར་མཛད་དེ་རྒྱལ་སྤྱི་རང་དབང་ཅན་གྱི་ཚོགས་སྡེ་དང༌། གསར་འགྱུར་ལས་རིགས་པ། གཟུར་གནས་སྐྱེ་བོ་བཅས་བོད་ནང་བསྐྱོད་དེ་དངོས་ཡོད་གནས་ཚུལ་ཞིབ་འཇུག་ཡོང་བའི་ཐབས་ཤེས་འབད་བརྩོན་མུ་མཐུད་གནང་རྒྱུ་དང༌། དེ་མཚུངས་བོད་ནང་གི་གནས་སྟངས་ཉམ་ང་བ་དང༌། རྒྱ་དམར་དཔོན་རིགས་ཚོས་ཚུལ་མིན་གྱི་བྱ་སྤྱོད་ཇི་བྱས་རྣམས་རྒྱལ་སྤྱིའི་ནང་ཞིབ་ཕྲའི་ཤེས་རྟོགས་ཡོང་ཐབས། ཕྱི་རྒྱལ་དོན་གཅོད་ཁག་ནས་ྋགོང་ས་མཆོག་ཆིབས་བསྒྱུར་སྐབས་ཆེད་བཅར་བོད་དོན་རྒྱབ་སྐྱོར་ཚོགས་པ་དང་རོགས་ཚོགས་ཁག འབྱོར་ལྡན་མི་སྣ་བཅས་ཀྱིས་ཁས་ལེན་ཞུས་པའི་རོགས་འཆར་རྣམ་གྲངས་དང་འབྲེལ་བོད་ནང་གཙོ་བོར་གྱུར་པའི་རྒྱ་གར་དང༌། བལ་ཡུལ་སོགས་བཙན་བྱོལ་བོད་མིའི་སྡོད་སྒར་ཁག་ནང་དཔལ་འབྱོར་མ་འཛུགས་དང་རོགས་རམ་ལས་འཆར་སྤེལ་རྒྱུ། གཞུང་གི་དབུ་ཁྲིད་ཚོས་བོད་མི་མང་ལ་ལམ་སྟོན་གནང་སྐབས་བོད་ནང་གི་རྒྱལ་གཅེས་མི་མང་གི་བསམ་ཚུལ་ལ་གནོད་གཞི་དང༌། ཕོག་ཐུག་འགྲོ་གཞི་མི་འབྱུང་བ་དང༌། བོད་ནང་གི་མི་མང་གི་རླབས་ཆེའི་མཛད་རྗེས་ལ་རྒྱབ་སྐྱོར་དང་བསྔགས་བརྗོད་ཀྱིས་སྙིང་སྟོབས་སྤེལ་བའི་གནས་ཚུལ་ལ་ཐབས་ལམ་བཙལ་བཞེས་ཡོང་བ་དང༌།
༧༽བོད་ནང་རྒྱ་མིས་ྋགོང་ས་མཆོག་ལ་མཚན་སྨད་ཞུས་པ་དང༌། བཙན་བྱོལ་གཞུང་ལ་དམའ་འབེབས་འཁྱོག་བཤད་བྱས་པའི་གནས་ཚུལ་ཇི་བྱུང་ལ་གཞུང་འབྲེལ་དང་གཞུང་འབྲེལ་མ་ཡིན་པའི་ལན་འདེབས་གང་འོས་ཤུགས་ཆེ་གནང་དགོས་པ། བོད་ནང་རྒྱ་མིའི་བཙན་འོག་མནར་གཅོད་ཕོག་པའི་བོད་མི་དང་ཁོང་ཚོའི་རྗེས་ཤུལ་ལ་བཙན་བྱོལ་བོད་གཞུང་ནས་འཚོ་བ་དང་གང་ཅིའི་ལྟ་རྟོགས་གནང་དགོས་ཞུ་རྒྱུ།
༨༽བོད་དང་བོད་མི་མང་གི་བདེ་སྐྱིད་ཀྱི་སྲོག་རྩ་གཅིག་ཉིད་ྋགོང་ས་ཆེན་པོའི་སྐུ་ཕྱྭ་མཛད་འཕྲིན་ལ་རག་ལུས་སྟབས་སྐུའི་འགན་སྲུང་ཞུ་རྒྱུ་ཤིན་ཏུ་གལ་ཆེ་ནང་གི་གལ་ཆེ་ཡིན་སྟབས། དེང་སྐབས་རྒྱ་ནག་དཔོན་རིགས་ཀྱི་ྋགོང་ས་སྐྱབས་མགོན་ཆེན་པོར་མཚན་སྨད་རྩུབ་སྤྱོད་ཀྱི་གཏམ་སྤྱོད་སྤེལ་སྟངས་དང༌། རྒྱ་དམར་གྱི་རྒྱུགས་ཁྱི་དོལ་རྒྱལ་ཚོགས་པའི་ཁོངས་ཡོད་བོད་མི་གླེན་རྨོངས་གཏུམ་སྤྱོད་ཅན་ཉུང་ཤས་ཀྱི་ཁོག་པར་རྒྱ་འདྲེ་ཁོག་ཏུ་ཞུགས་ཏེ་ངན་སྤྱོད་ཚབས་ཆེ་ཅི་ཡོང་སྙམ་པའི་བོད་མི་མང་གི་བསམ་བློར་འཇིགས་སྣང་དངངས་སྐྲག་གིས་ཁྱབ་བཞིན་ཡོད་སྟབས། གཞུང་ནས་གཙོ་བོ་རྒྱ་གར་གཞུང་ལ་དེའི་སྐོར་འབྲེལ་ལམ་གཏིང་ཟབ་ཞུས་ཏེ་ཕྱི་ནང་གང་ས་ནས་ལྟ་རྟོགས་ཉམས་ཞིབ་དང༌། རང་ཕྱོགས་དང་འབྲེལ་བའི་སྐུའི་སྲུང་བྱ་ཞུ་མི་ཚོའི་ལས་འགན་ལ་ཞིབ་འཇུག་གནང་རྒྱུ།
དེ་བཞིན་ྋགོང་ས་མཆོག་བཞུགས་སྒར་དུ་བཞུགས་སྐབས་དང༌། ཕྱི་རྒྱལ་ཆིབས་སྒྱུར་སྐབས་བཅས་ལ་མཛད་འཛིང་ཤིན་ཏུ་ཆེ་རྐྱེན་ད་ཕྱིན་དེ་མུས་སུ་མ་སོང་བར་གསུང་ཆོས་སྐབས་ལ་ཉིན་རེར་ཆུ་ཚོད་༣ ལས་མ་མང་བ་དང༌། ཕྱི་ལ་ཆིབས་སྒྱུར་སྐབས་ཉིན་ཕྱེད་སྐུ་ངལ་གསོ་རྒྱུའི་ཆ་རྐྱེན་ཞིག་ཡོང་ཐབས་སྐུ་སྒེར་ཡིག་ཚང་གིས་གཙོས་པའི་འབྲེལ་ཡོད་ཚང་མས་འགན་བཞེས་ནན་ཟབ་ཡོང་བ། གཙོ་ཆེ་ྋགོང་ས་སྐྱབས་མགོན་ཆེན་པོ་མཆོག་ནས་དགོངས་བཞེས་ཀྱིས་ད་ཕན་སྨན་པ་ཁག་ནས་ཞབས་བསྐུལ་ཞུས་པ་ལྟར་མཛད་ཁུར་དང་བོད་མི་མང་ཉམ་ཐག་པ་ཚོའི་མགོན་དཔུང་རྒྱུན་རིང་སྐྱོང་གནང་ཐུབ་ཐབས་སུ་འབྲེལ་ཡོད་ཞབས་ཞུ་བ་ཚོའི་རེ་འདུན་དང་གོ་སྒྲིག་ཞུས་པ་ལྟར་དགོངས་བཞེས་ཡོང་བ་ཞེས་གསོལ་བ་རྩེ་གཅིག་ཏུ་འདེབས་རྒྱུ།
༩༽ྋགོང་ས་སྐྱབས་མགོན་ཆེན་པོ་མཆོག་ནས་ད་ལན་གྲོས་ཚོགས་ཐེངས་བཅུ་བཞི་པའི་ཚོགས་དུས་དྲུག་པའི་ཐོག་བོད་མིའི་དམིགས་བསལ་ཚོགས་ཆེན་རྒྱས་བསྐོང་དགོས་པའི་བཀའ་སློབ་ལམ་སྟོན་བཀའ་དྲིན་ཆེ་བའི་དགོངས་དོན་ཕྱག་བསྟར་མཛད་རྒྱུའི་མཛད་འཆར་ཡོད་པ་ལྟར་ད་དུང་དགོངས་གཞི་ལེགས་འགྲུབ་ཡོང་ཆེད་བོད་མི་ལྷག་བསམ་ལྡན་པ་དང༌། ཉམས་མྱོང་ཡོད་པ། རྣམ་ཀུན་བོད་དོན་ཐོག་གཏམ་བཤད་པ། ལས་འགན་རྐང་འཁུར་བྱེད་མཁན་ཤེས་ཡོན་ཅན་དང༌། གཞན་ཡང་བོད་དོན་རྒྱབ་སྐྱོར་ཚོགས་པའི་ནང་འགན་འཁུར་བྱེད་པོ་བོད་མི་རྣམས་ཚོགས་བསྐོང་གནང་ཐབས་དགོངས་བཞེས་ཡོང་བ།
༡༠༽བར་ལམ་འཛམ་གླིང་མཉམ་འབྲེལ་རྒྱལ་ཚོགས་སུ་བོད་མིའི་མངོན་འདོད་དམ། འགྲོ་བ་མིའི་ཐོབ་ཐང་སྐོར་གླེང་སྒྲོས་ཡོང་ཐབས་བྱ་རྒྱུ་མཚམས་འཇོག་གནང་བ་འདིར། ཆབ་སྲིད་ཀྱི་དགོས་ཕན་ཆེ་གཟིགས་ཡོད་པ་སྨོས་མེད་ཀྱང༌། གུས་ཅག་གི་བསམ་ཚུལ་ལ་འདས་པའི་ནང་གླེང་སློང་ཡོང་བའི་ཐབས་ལམ་གནང་བ་མུ་མཐུད་མཛད་བཞེས་གང་འགབ་ཇི་དགེ་དགོངས་བཞེད་མཛད་ཕྱོགས་ཡོང་བ།
མཐའ་དོན་འདིར་བོད་ཕྱི་ནང་གཉིས་ཀྱི་བོད་མིས་གདུང་ཤུགས་ཆེར་བསྐྱེད་ཀྱིས་རང་རེའི་བདེན་པའི་རྩ་དོན་འགྲུབ་སླད་རང་སྲོག་ལ་ཕངས་མེད་ཀྱིས་ལས་འགུལ་རྣམ་གྲངས་སྣ་ཚོགས་ཀྱི་སྒོ་ནས་སྤེལ་གནང་མཛད་པ་དང༌། དེ་བཞིན་བོད་ནང་ཡོད་པའི་རང་རིགས་རྩོམ་འབྲི་གནང་མཁན་དང་སྒྱུ་རྩལ་པ་སོགས་ཀྱིས་རྒྱ་ནག་གཞུང་གི་སྒྲིག་འཛུགས་དམ་གཅུན་གྱི་གནས་སྟངས་ལ་ཉམ་ང་མེད་པར་རང་རེའི་བདེན་པའི་འབོད་སྒྲ་སྒྲོག་བཞིན་པར་གུས་བཀུར་བསྔགས་བརྗོད་ཞུ་གི་ཡོད། བོད་རྒྱལ་ལོ་༢༡༣༥ ཕྱི་ལོ་༢༠༠༨ ཟླ༩ ཚེས་༢༦ ལ་བཀའ་ཟུར་ཐུན་མོང་ནས་ཕུལ།། །།

ངོ་བཤུས། སྐུ་སྒེར་ཡིག་ཚང༌།

མཚན་གཞུང༌། མཚན་རྟགས།
བཀའ་ཟུར་དང་ཁྲིམས་ཞིབ་ཆེ་བ་ཟུར་པ་བློ་བཟང་དར་རྒྱས།
བཀའ་བློན་ཁྲི་ཟུར་འཇུ་ཆེན་ཐུབ་བསྟན་རྣམ་རྒྱལ།
བཀའ་བློན་ཁྲི་ཟུར་རྒྱལ་ལོ་དོན་འགྲུབ།
བཀའ་བློན་ཁྲི་ཟུར་སྐལ་བཟང་ཡེ་ཤེས།
བཀའ་བློན་ཁྲི་ཟུར་བཀྲས་མཐོང་བསྟན་འཛིན་རྣམ་རྒྱལ།
བཀའ་བློན་ཁྲི་ཟུར་བསོད་ནམས་སྟོབས་རྒྱལ།
བཀའ་ཟུར་ཨ་ལགས་འཇིགས་མེད་ལྷུན་འགྲུབ།
བཀའ་ཟུར་རྗེ་བཙུན་པདྨ།
བཀའ་ཟུར་ཀི་རྟི་རིན་པོ་ཆེ།
བཀའ་ཟུར་རིན་ཆེན་མཁའ་འགྲོ།
བཀའ་ཟུར་མདོ་སྔགས་བསྟན་འཛིན།
བཀའ་ཟུར་པདྨ་ཆོས་འབྱོར།
བཀའ་ཟུར་བཀྲས་མཐོང་ཚེ་དབང་ཆོས་རྒྱལ།