དགེ་ཆོས་བཀླགས་པ།

རེབ་ཐོག་མདའ།
—–མཁས་དབང་དགེ་འདུན་ཆོས་འཕེལ་མཆོག་གི་གསུང་རྩོམ་འགའ་བཀླགས་པའི་ཚོར་སྣང་།

རྨོངས་པའི་མུན་པ་སེལ་བའི་སྒྲོན་མེ་ཅིག །
བྱང་ཕྱོགས་བོད་ཀྱི་སྡེ་ལ་བསྒྲོན་ན་་ཡང་།།
རྒྱང་མཇལ་མིག་ཟུང་བོར་བའི་ཀླད་མེད་འགས།།
དཀར་བོ་འོད་ལ་རིན་ཐང་མེད་འདི་སྐྱོ།།

རིག་པ་འབྱུང་བའི་གྲོང་དུ་གྲགས་པ་ཡི།།
ལྷོ་རྒྱུད་རྨ་ཀླུང་རིང་མོའི་ཕ་རོལ་ནས།།
སྙན་པ་གླིང་འདིར་གྲགས་པའི་སྐྱེས་ཆེན་མཆོག །
བདག་གི་ཡབ་མེས་དམ་པ་དགེ་ཆོས་དྲན།།

བླ་བྲང་དྷི་ཚ་སྨད་ཀྱི་ཆོས་སྡེ་དང་།།
དབུས་ཀྱི་ལྷ་སའི་འབྲས་དཀར་སྤུངས་པ་ནས།།
ཐུབ་བསྟན་གཞུང་ལ་རིགས་པས་དཔྱད་མཛད་མཁན།།
རྣམ་དཔྱོད་རིག་པའི་དཔའ་བོ་དགེ་ཆོས་དྲན།།

འཕགས་ཡུལ་ལོ་ཙྰ་ར་ཧུ་ལ་དང་ལྷན།།
ནུབ་ཀྱི་ཡུལ་ལུང་བལ་བོ་སིང་གཱ་ལར།།
ཁ་བའི་དོན་དུ་དཀའ་བ་སྤྱད་མཛད་པའི།།
རྒྱ་བོད་ལོ་ཙཱ་ཆེན་མོ་དགེ་ཆོས་དྲན།།

སྒྲ་དང་ཡི་གེ་མཁས་པའི་ངག་ན་ཕྱུག །
སྲིད་འབྱོར་རིག་པ་རྟོགས་པའི་སེམས་དེ་མངའ།།
སྔོན་ཐོན་བསམ་བློ་གསར་བའི་མིག་ཟུང་ཅན།།
གནའ་དེང་རིགས་པའི་གཏེར་གྱུར་དགེ་ཆོས་དྲན།།

སྐད་རིགས་སྣ་འཛོམས་སྨྲ་བའི་ངག་དང་ལྡན།།
གསར་རྙིང་ལམ་སྲོལ་ལེགས་ཉེས་འབྱེད་མཁས་པ།།
ཕྱི་གཟུགས་རྙིང་བ་བསམ་བློ་གསར་བ་ཅན།།
རིགས་པའི་དཔའ་བོ་དགེ་ཆོས་སྙིང་ནས་དྲན།།

རྒྱལ་ཁམས་ཡུལ་ལུང་བསྐོར་བའི་འགྲུལ་བཞུད་པ།།
སྲིད་འབྱོར་ལོངས་སྤྱོད་དབེན་ཡང་རིག་པའི་གནས།།
སྙན་དང་གྲགས་པའི་རྗེས་སུ་མ་འབྲངས་པར།།
རང་གི་རིགས་ལ་ཕུལ་བའི་དགེ་ཆོས་དྲན།།

རྙིང་བ་ལྷ་རུ་མཐོང་བའི་སྐུ་དྲག་འགས།།
གསར་བའི་བློ་ཡིས་གྲུབ་པའི་བསམ་བློ་བ།།
རྨོངས་དད་ཟབ་མོས་བརྐོས་པའི་བག་ཆགས་ཀྱིས།།
དབང་སྔོན་བུམ་པ་ས་ལ་བརྡབ་འདིར་སྐྱོ།།

གྱེས་བྲལ་ལོ་ཟླ་ཅུང་ཙམ་སྔ་དྲགས་པས།།
སྐྱེས་ཆེན་མིག་གིས་རྗེས་སུ་མ་ཟིན་ཀྱང་།།
ཁྱོད་ཀྱི་རིགས་པས་དཔྱད་པའི་ལག་རྗེས་དག །
བདག་གི་བསམ་བློ་འབྱེད་པའི་ལྡེ་མིག་ཉིད།།