སངས་རྒྱས་ཆོས་དང་ཡི་ཤུའི་ཆོས་གཉིས་བསྡུར་བ།

རིན་ཆེན་དབང་རྒྱལ། (རྡ་ས་རིགས་སློབ།)

གཞི་རྩའི་ཆ་ནས་སངས་རྒྱས་ཆོས་དང་ཡི་ཤུའི་ཆོས་གཉིས་ཀྱང་ཆོས་ལུགས་ཀྱི་ཆ་ཤས་རེ་ཡིན་སྟབས་དད་པ་དང་དམ་ཚིག་སོགས་ཆ་ཤས་རེ་ཟུང་འདྲ་བའི་ཆ་ཡོད་མོད། འདིར་དེ་གཉིས་ངོ་བོ་བྱེད་ལས་རྒྱུ་གསུམ་གའི་སྟེང་ནས་བསྡུར་བ་བྱེད་འདོད་པས་མི་ཤེས་རྨོངས་པས་བསྒྲིབས་པ་དག་ལ་དགོངས་སེལ་ཡོད་པ་ཞུའོ།།

སྣོད་བཅུད་དཀོན་མཆོག་གི་བཀོད་པ་ནི་ཡི་ཤུའི་ཆོས་ཀྱི་རྩ་བའི་འཇིག་རྟེན་ལྟ་ཚུལ་ཡིན་ལ། སྣོད་བཅུད་རང་གི་མཐུན་པའི་རྒྱུ་ལས་སྐྱེས་པ་ནི་སངས་རྒྱས་ཆོས་ཀྱི་གཞི་རྩའི་འཇིག་རྟེན་ལྟ་ཚུལ་ཡིན། འདི་གཉིས་གདོད་མའི་མི་ཡི་བསམ་བློ་ལས་སྐྱེས་པ་གཅིག་པས་འབྱུང་ཁུངས་ཀྱི་ཆ་ནས་འདྲ་ཡང་། ངོ་བོའི་ཆ་ནས་མི་འདྲ་སྟེ། ཡི་ཤུའི་ཆོས་ཀྱིས་དཀོན་མཆོག་གི་མགོན་སྐྱབས་ཁོ་ན་གཙོ་བོར་བཟུང་ཞིང་། སངས་རྒྱས་ཆོས་ཀྱིས་བདེན་པ་མཐོང་བ་ཁོ་ན་གཙོ་བོར་བཟུང་བ་ཡིན། ཡང་བྱེད་ལས་ཀྱི་ཆ་ནས་མིའི་བསམ་བློའི་དགོས་མཁོ་སྐོང་བ་འདྲ་ཡང་ཐབས་ལམ་མི་འདྲ་སྟེ། ཡི་ཤུའི་ཆོས་ཀྱིས་དཀོན་མཆོག་ལ་བརྩེ་བ་སྒོམ་ན་ད་གཟོད་དག་ཞིང་དུ་བགྲོད་ནུས་ཤིང་། སངས་རྒྱས་ཆོས་ཀྱིས་སེམས་ཅན་ལ་བརྩེ་བ་དང་། རྟེན་འབྱུང་གི་དེ་ཁོ་ན་ཉིད་སྒོམ་ན་དག་ཞིང་དུ་བགྲོད་པར་བཞེད་པ་ཡིན་ནོ།། མདོར་བསྡུས་ན་ཆོས་ལུགས་འདི་གཉིས་ལ་མི་འདྲ་བ་བཅུ་སྟེ།

 

ཡི་ཤུའི་ཆོས།

1. དཀོན་མཆོག་ནི་རང་བཞིན་གྱིས་སྐྱོན་ཀུན་ཟད་དང་ཡོན་ཏན་ཀུན་ལྡན་ཡིན་ནོ།།

2. དཀོན་མཆོག་ནི་རང་གི་དགོངས་པ་ལྟར་སེམས་ཅན་རྣམས་ལ་ཐ་ཚིག་སྒྲོག་པ་ཞིག་གོ།།

3. སྟོན་པ་རྗེ་སི་སི་ནི་དཀོན་མཆོག་གིས་མིའི་ཡུལ་དུ་སེམས་ཅན་རྣམས་དཀོན་མཆོག་གི་དམ་ཚིག་ལས་མི་འདའ་བ་བྱ་བའི་ཆེད་དུ་ཕོ་ཉ་མངགས་པའོ།།

4. དཀོན་མཆོག་གི་སྲས་ནི་སྟོན་པ་རྗེ་སི་སི་ཉག་གཅིག་སྟེ་མི་དང་དཀོན་མཆོག་བར་གྱི་དམ་ཚིག་འབྲེལ་མཐུད་པ་ཡིན་ནོ།།

5. དཀོན་མཆོག་གི་གདམས་ངག་ནི་བྱམས་བརྩེ་དང་བསླབ་བྱའོ།།

6. དཀོན་མཆོག་ལ་ཡིད་ཆེས་ན་ད་གཟོད་མགོན་སྐྱབས་དང་དཔུང་གཉེན་མཛད་པའོ།།

7. དཀོན་མཆོག་དང་དམ་ཚིག་མཐུན་ན། རང་ཉིད་མ་ཤི་ཡང་མི་བཟང་པོ་ཞིག་གི་སྐྱེ་བ་གསར་དུ་ལེན་ཞིང་། འཆི་བའི་ཚེ་ཡང་རང་གི་བླ་སྲོག་དཀོན་མཆོག་དང་མི་འབྲལ་བར་གནས་པའོ།།

8. བདེན་པ་ནི་གཅིག་ཁོ་ན་སྟེ། དཀོན་མཆོག་ཉག་གཅིག་ཡིན་ནོ།།

9. དཀོན་མཆོག་ལ་བློ་འཁེལ་བ་རྣམས་ཀྱི་སྡུག་པའི་རྣམ་སྨིན་དཀོན་མཆོག་གིས་འགན་ལེན་པའོ།།

10. མི་དགེ་བ་ནི་དཀོན་མཆོག་གི་བཀའ་མ་བརྩི་བའོ།།

 

སངས་རྒྱས་ཆོས།

1. སངས་རྒྱས་ནི་སྙིང་རྗེ་བསྒོམས་ཤིང་བདེན་པ་མཐོང་བའི་སྟབས་ཀྱིས་དྲི་མ་མཐའ་དག་སངས་ཤིང་ཡོན་ཏན་ཀུན་རྫོགས་ཡིན་ནོ།།

2. སངས་རྒྱས་ནི་སེམས་ཅན་གྱི་ཁམས་མོས་དང་འཚམས་པའི་ཐར་ལམ་སྟོན་པ་པོའོ།།

3. སྟོན་པ་ཤཀྱཱ་ཐུབ་པ་ནི་དགའ་ལྡན་གྱི་ཡུལ་ནས་མི་ཡུལ་དུ་བསམ་བཞིན་དུ་སེམས་ཅན་འདུལ་བའི་དོན་དུ་བྱོན་པའོ།།

4. སངས་རྒྱས་ཀྱི་སྲས་ནི་མཐའ་ཡས་ཏེ། བྱང་ཆུབ་སེམས་དཔའ་ཐམས་ཅད་དོ།།

5. སངས་རྒྱས་ཀྱི་གདམས་ངག་ནི་ལྟ་བ་རྟེན་འབྱུང་དང་སྤྱོད་པ་འཚེ་བ་མེད་པའོ།།

6. སངས་རྒྱས་ཀྱི་གསུང་ཉམས་སུ་ལེན་ན་ད་གཟོད་རང་ཉིད་ལ་གྲོགས་དང་འཕྲིན་ལས་ངང་གིས་འགྲུབ་པའོ།།

7. སངས་རྒྱས་ཀྱི་བཀའ་ལྟར་རང་གི་ལུས་ངག་ཡིད་གསུམ་གྱི་མི་དགེ་བའི་སྤྱོད་པ་སྡོམ་ཞིང་། སངས་རྒྱས་ཀྱི་གསུང་ཚད་མར་བཟུང་སྟེ་གོམས་པ་རིང་དུ་བསྟེན་ན་མངོན་མཐོ་དང་ངེས་ལེགས་ཀྱི་གོ་འཕང་འཐོབ་པ་གདོན་མི་ཟའོ།།

8. བདེན་པ་ལ་གཉིས་ཏེ་ཀུན་རྫོབ་དང་དོན་དམ་པའི་བདེན་པའོ། ཡང་ན་བདེན་པ་ནི་བཞི་སྟེ་སྡུག་བསྔལ་བདེན་པ་སོགས་བཞིའོ།།

9. སངས་རྒྱས་ལ་ཡིད་ཆེས་ཀྱང་རང་གི་དགེ་མི་དགེའི་ལས་ཀྱི་རྣམ་སྨིན་ནི་རང་ཉིད་ཀྱིས་མྱོང་བའོ།།

10. མི་དགེ་བ་ནི་སྡུག་པའི་ལས་བྱེད་པའོ།།
སྤྱི་ལྡོག་རགས་པ་ཙམ་གྱི་མི་འདྲ་བའི་ཚུལ་ནི་འདི་ཙམ་ཡིན་ཞིང་། དེ་ལས་གཞན་སེམས་ཀྱི་ཉམས་རྟོགས་ཕྲ་མོ་རྣམས་ནི་རང་ཉིད་ཀྱི་མྱོང་བ་དང་སྒོ་བསྟུན་ཚེ་ད་གཟོད་ཤེས་པ་ལས་བདག་གིས་ནི་གང་ཡང་བརྗོད་མ་ནུས་སོ།།
མདོར་ན་ཡི་ཤུའི་ཆོས་ཀྱིས་བདག་གི་མགོན་ནི་དཀོན་མཆོག་ཉག་གཅིག་ཡིན་ཟེར་ལ། སངས་རྒྱས་ཆོས་ཀྱིས་བདག་གི་མགོན་ནི་བདག་ཉིད་ཡིན་ཟེར་བས། དེ་ལྟར་ན་ཡི་ཤུའི་ཆོས་ཀྱིས་མིའི་རྣམ་དཔྱོད་ཁོ་ན་ལ་ཡིད་མི་ཆེས་ཤིང་། སངས་རྒྱས་ཆོས་ཀྱིས་མིའི་རྣམ་དཔྱོད་ཁོ་ན་ལ་ཡིད་ཆེས་པ་ནི་འགལ་འདུ་གཙོ་བོ་མིན་ནམ་སྙམ་མོ།།