མངོན་པ་མཛོད་ཀྱི་ལམ་ཡིག

བྱ་མདོ-སྐལ་རྒྱམ།

དཔེ་ཆ་ནི་མིའི་རིགས་ཀྱི་བསམ་བློའི་རྒྱགས་ཕྱེ་ངོ་མ་དེ་ཡིན་པར་བཤད་པ་ལྟར། མི་གཞིའི་ཀུན་སྤྱོད་ཀྱི་བསམ་བློ་ལེགས་བཅོས་དང་། མིའི་བསམ་བློ་གསར་བ་དང་ལྟ་ཚུལ་གསར་བ། རྩོད་སྒྲུབ་ཀྱི་རིགས་ལམ་གསར་བ་ལ་སོགས་པའི་ཤེས་རབ་གོང་འཕེལ་དུ་འགྲོ་བའི་ཆ་རྐྱེན་གཙོ་བོ་ནི་དཔེ་ཆ་ཀློག་པ་འདི་ཡིན་ལ། དེ་ཡང་རང་གིས་རིག་ཚན་ཅི་ཞིག་ལ་སྦྱོང་བའི་སྐབས་དེའི་སྐོར་གྱི་དཔེ་དེབ་ཅི་འདྲ་ཞིག་ཡོད་པ་དང་དེ་དག་ལས་གང་ཞིག་བཟང་བའི་སྐོར་གྱི་འདེམས་གསེས་མ་ནོར་བ་བྱེད་རྒྱུ་ནི་ངེས་པར་གལ་ཆེའོ།།

དེ་ཡང་འཁོར་ལོ་དང་བོའི་སྤྱོད་པའི་ཆ་འགྲེལ་བར་བྱེད་པའི་བསྟན་བཅོས་ནི། གཞི་འགྲེལ་དང་འདུལ་བ་མདོ་རྩ་རྗེས་འབྲངས་དང་བཅས་པ་དང་། ལྟ་བའི་ཆ་འགྲེལ་བའི་བསྟན་བཅོས་ནི་མངོན་པ་སྡེ་བདུན་དང་བྱེ་བྲག་ཏུ་བཤད་པ་ཆེན་མོ། མཛོད་རྩ་རྗེས་འབྲངས་དང་བཅས་པ་ཡིན་པར་མཁས་གྲུབ་རྗེའི་རྒྱུད་སྡེའི་སྤྱི་རྣམ་དུ་གསུངས་ཤིང་། མཛོད་ཀྱིས་ནི་བརྗོད་བྱ་ཤེས་བྱ་གཞི་ལྔ་དེ་རྗོད་བྱེད་གནས་བརྒྱད་དུ་ཕྱེ་ནས་སྟོན་ཞིང་། བཤད་རྒྱུན་ལ་སློབ་དཔོན་དབྱིག་གཉེན་ནི་མཁས་པ་ཆེན་པོ་ཡིན་པས་མཛོད་རྩ་བའི་ཚིག་གི་ན་རེས་ཀྱང་བརྗོད་བྱའི་གནད་མི་སྟོན་པ་མེད་པར་གྲགས་པ་ལྟར་དོན་ལ་ཡང་དེ་ལྟར་དུ་གནས་ལ། མཛོད་ཀྱི་སྐོར་འདི་ལ་སྡེ་དགེའི་བསྟན་འགྱུར་གྱི་དཀར་ཆག་ལྟར་ན་བོད་དུ་འགྱུར་བའི་རྒྱ་འགྲེལ་བཅུ་ཙམ་ཡོད་ལ། དེ་དག་ལས་བདག་གི་མིག་ལམ་དུ་བརྒྱུད་མྱོང་བ་ནི། རང་འགྲེལ་དང་། འགྲེལ་བཤད་གཉིས། ཕྱོགས་གླང་གི་འགྲེལ་བ་གནད་སྒྲོན། བལ་བོ་པཎྚིཏ་ཞི་གནས་ལྷས་མཛད་པའི་འགྲེལ་བ་ཉེར་མཁོ་རྣམས་ཡིན།

འགྲེལ་བཤད་གཉིས་ལས་གང་སྤེལ་སྔོན་ལ་བྱུང་བ་ནི་རྒྱལ་སྲས་མའི་སྐབས་ལ་ལར་གང་སྤེལ་ལ་དགག་པ་བྱས་ཡོད་པས་ཤེས་ཐུབ་ལ། མཆིམས་མཛོད་དམ་མངོན་པའི་རྒྱན་ནི་རྒྱལ་སྲས་མ་གཞིར་བཞག་གིས་བརྩམས་པ་ཡིན་པར་འགྲེལ་བཤད་ཀྱི་མི་མཐུན་ས་ནས་རྒྱལ་སྲས་མ་གཙོ་བོར་བཟུང་བ་ལས་ཤེས་ཐུབ་པ་ཡིན། འགྲེལ་བཤད་གཉིས་ཀྱིས་ནི་རྩ་བ་ཙམ་དུ་མ་ཟད་རང་འགྲེལ་གྱི་ཚིག་ཕལ་མོ་ཆེ་དངོས་སུ་དྲངས་ནས་བཤད་པ་མཛད་ཡོད་པས་མཛོད་ཀྱི་འགྲེལ་པ་ལ་འདི་ལས་ལྷག་མེད་པ་དང་མི་དགོས་པ་ལྟ་བུ་ཞིག་ཡིན།
གནད་སྒྲོན་འདི་ལ་རྩ་བའི་ཚིག་འགྲེལ་ཙམ་ལས་དགག་བཞག་དང་དོགས་སློང་སོགས་མང་བོ་མེད་ལ། དེ་ཡང་རང་འགྲེལ་གྱི་ཚིག་སྣ་བསྡུས་པ་ཙམ་ཡིན་པས་རང་འགྲེལ་ལ་གཟིགས་རྟོག་བྱེད་མཁན་ཞིག་ཡིན་ན་ཞོར་ལ་ངེས་ནུས་པས། བོད་དུ་འདིའི་འཕྲིན་ལས་ཆེར་མ་དར་བར་མངོན།

འགྲེལ་བཤད་མཁོ་འདིར་རྩ་ཚིག་རྣམས་དངོས་སུ་དྲངས་མེད་ཀྱང་རྩ་བའི་ཐད་ཀ་ཐད་ཀར་མདོ་རྣམས་དངོས་སུ་དྲངས་སྣང་བས། སྐབས་སོ་སོའི་མཇུག་དུའང་། དཔེར་ན། གནས་དང་བོ་ཕལ་ཆེར་མདོ་དང་སྦྱར་བ་རྫོགས་སོ།། ཞེས་འབྱུང་བས་རྩ་བ་མདོ་དང་སྦྱོར་བའི་འགྲེལ་བ་ལྟ་བུ་ཞིག་ཡིན། བུ་ཊཱིཀ་ལས་དོན་འགྲེལ་གྱི་མཚན་གཞིར་ཡང་བཞག་ཡོད། གང་ལྟར་ཡང་མཛོད་རྩ་བ་འདི་མདོ་དང་སྦྱར་ནས་སློབ་གཉེར་བྱེད་མཁན་ཞིག་ཡིན་ན་འདི་མེད་དུ་མི་རུང་བའི་གཞུང་ཞིག་ཡིན།

བོད་འགྲེལ་གྱི་སྐོར་ལ་ཨ་ཁུ་ཤེས་རབ་རྒྱ་མཚོའི་དཔེ་རྒྱུན་དཀོན་རིགས་ཀྱི་ཐོ་གཞུང་ལྟར་ན་བདུན་བཅུར་ཉེ་བ་ཞིག་གི་དཔེ་མཚན་བྲིས་ཡོད་ལ། དེར་ད་དུང་མ་འདུས་པའི་དཔེ་རྙིང་གཞན་ཡང་ཡོད་སྲིད་དེ། དཔེར་ན། མཆིམས་བསམ་གཏན་བཟང་བོའི་མཛོད་འགྲེལ་འདི་པཎ་ཆེན་བསོད་ནམས་གྲགས་པའི་མཛོད་ཤེས་བྱ་རབ་གསལ་དུ་འདིའི་བཤད་པ་བཀོད་ཅིང་། སྦྱར་བྱང་དུའང་འདི་དང་མཆིམས་མཛོད་གཉིས་ལ་སློབ་གཉེར་བྱས་པར་གསུངས་པས་འདི་དང་འདིས་མཚོན་པའི་ད་དུང་གཞན་ཡང་ཡོད་སྲིད། མཆིམས་མཛོད་དམ་མངོན་པའི་རྒྱན་འདི་ནི་གདན་ས་ཁག་གི་སློབ་གཉེར་བྱེད་ས་གཙོ་བོ་ཞིག་པས་གསལ་བཤད་ཅི་ཡང་བྱེད་མ་དགོས། འདི་དང་མཆིམས་ནམ་མཁའ་གྲགས་ཀྱི་མཛོད་འགྲེལ་སྐོར་གྱི་བཤད་པ་ནི་བདག་གིས་གཞན་ལས་བྱས་ཟིན་པས་འདིར་མ་བཀོད་དོ།།

མཆིམས་མཛོད་ཆུང་བའམ་མཛོད་འགྲེལ་ལེགས་བཤད་རྒྱ་མཚོ་ནི། མཆིམས་བློ་བཟང་གྲགས་པས་མཛད་པ་ཡིན་ལ། ཞུ་ཆེན་ཚུལ་ཁྲིམས་རིན་ཆེན་གྱི་མཛོད་ཀྱི་བླ་བརྒྱད་བགྲང་སྐབས་དཔལ་ལྡན་མཆིམས་ཞེས་པ་དེའང་ཁོང་ཡིན་པར་གཞུང་ཉིད་ཀྱིས་སྦྱར་བྱང་ལས་ཤེས། ཁོང་ནི་ཆོས་རྗེ་དོན་རིན་པའི་བླ་མ་དང་ཆོས་རྗེ་མདོ་སྨད་དུ་ཕེབས་ཁར་རྗེ་བློ་བཟང་གྲགས་པར་ཁོང་གི་མཚན་དེ་འདོགས་དགོས་པའི་ལུང་བསྟན་གནང་མཁན་དེ་ཡིན་ལ། ༡༢༩༩–༡༣༧༥ ལོ་རྒྱུས་ལ་ལར་འཁྲུངས་འདས་ཀྱི་ལོ་ཚིགས་འདི་ལྟར་འབྱུང་ཞིང་། མཆིམས་ནམ་གྲགས་ཀྱི་འཁྲུངས་འདས་ ༡༢༡༠–༡༢༨༥ འདི་ལྟར་འབྱུང་བ་ལྟར་ན་འདིའི་ཞབས་ཟིན་མེད་པར་མངོན་ལ། འོན་ཀྱང་འདིིའི་མཆོད་བརྗོད་དུ། འཇིག་རྟེན་ཀུན་ལ་ཐམས་ཅད་མཁྱེན་པར་གྲགས།།སངས་རྒྱས་མཆིམས་ལ་གུས་པས་འདིར་ཕྱག་འཚལ།།ཞེས་དང་། མཇུག་ཏུའང་། ནམ་མཁའ་ལྟར་གྱུར་མཁྱེན་པ་རབ་ཡགས་གྲགས་པའི་མཐའ་ཅན་དེས་མཛད་གང་།།སྟོན་པའི་གསུང་བཞིན་བདག་གིས་བླངས་ཤིང་གཞན་ལའང་བཤད་བྱ་དེ་ལྟ་ནའང་།། ཞེས་དམིགས་བསལ་གྱིས་མཆོད་བརྗོད་མཛད་པ་དང་དེའི་གཞུང་ལ་སྦྱངས་པར་གསུང་བ་ལྟར་ན་འབྲེལ་ཅི་ཡོད་དཔྱད་དགོས་པས་མཆིམས་ནམ་མཁའ་གྲགས་ཀྱི་ལོ་ཚིགས་འདི་ད་དུང་ཡང་དཔྱད་པའི་གཞིར་སྣང་ངོ།།

གཞུང་འདིས་ནི་རང་འགྲེལ་གྱི་སྐབས་སོ་སོའི་དོན་ཡོངས་སུ་མ་ཚང་བ་མེད་པར་གོ་སླ་བའི་ངང་ནས་བསྡུས་བས། རང་འགྲེལ་གྱི་ཚིག་དོན་ལ་གོ་བ་ལེན་དཀའ་བ་བྱུང་ཚེ་རེམ་འདེགས་ལེགས་པོ་བྱེད་པས་རང་འགྲེལ་བལྟ་བྱེད་ཀྱི་གཞུང་མཆོག་ཏུ་གྱུར་བ་ཞིག་ཡིན། མངོན་པའི་རྒྱན་དང་མི་མཐུན་ས་ལ་འཆད་པ་པོ་སྔ་མ་ཞེས་དགག་པའང་མཛད་སྣང་བས། ངག་རྒྱུན་དུ་འདི་བརྩམས་པས་མཆིམས་མཛོད་ཀྱི་འཕྲིན་ལས་ཉམས་ཞེས་ཀྱང་ཟེར་རོ།། གང་ལྟར་ཡང་གཞུང་གི་རྒྱས་བསྡུས་འཚམ་ཞིང་རྩ་འགྲེལ་གྱི་བཤད་པ་ཡོངས་སུ་རྫོགས་པས་མཛོད་འགྲེལ་གལ་ཆེན་ཞིག་ཡིན།

དེ་ལྟར་ན་ཡིག་ཆ་སོ་སོའི་མཐའ་དཔྱོད་ཀྱི་ཟུར་དུ་སྤྱི་དོན་ལྟ་བུའི་མཛོད་འགྲེལ་འདི་ལྟ་བུ་དང་སྦྱར་ནས་བལྟས་ན་མཛོད་ཀྱི་ཚིག་དོན་ཡོངས་སུ་རྫོགས་པ་ལ་གོ་བ་སྟེར་ཕུལ་ཆེ་ལ། དེ་མིན་ཡིག་ཆའི་བདག་པོ་རྣམས་ཀྱི་རྗེས་འབྲང་གི་མཁས་པ་ལ་ལསཡིག་ཆའི་ཟུར་མནོན་དང་རྒྱབ་བསྟེན་གྱི་ཚིག་ཚོགས་ལ་འབད་དེ་འགྲེལ་བ་བརྩམས་ལ་རྣམས་ཀྱིས་འགའ་རེས་ནི་མཛོད་རྩ་འགྲེལ་གྱི་སྐབས་སོ་སོའི་དོན་ལ་ཅི་ཡང་མི་རེག་པའང་ཡོད་པས་ཆོས་བརྒྱུད་དང་ཡིག་ཆས་རིས་བཅད་ཀྱིས་དབང་དུ་མ་སོང་བར་གཞུང་གི་འདེམས་གསེས་མ་ནོར་བར་བ་གལ་ཆེའོ།།

2014/911ཕྱི་དྲོ།