ཁུངས་ལྡན་གནས་ཚུལ་ལྟར་ན།
ཉེ་ཆར་མཚོ་སྔོན་ཞིང་ཆེན་རྨ་ལྷོ་བོད་རིགས་རང་སྐྱོང་ཁུལ་ཁོངས་ཀྱི་རྨ་ལྷོ་སོག་རྫོང་གསེར་ལུང་ཞང་སྒ་ཁིས་རུ་ཆེན་ནང་གཞུང་གིས་རོགས་རམ་གྱིས་ཁང་པ་གསར་རྒྱག་བྱེད་པའི་ལས་འཆར་ཞིག་ཡོད་འདུག་པར། མཐར་ཁང་པ་རྒྱག་ཕྱོགས་ཐད་གཞུང་དང་མི་མང་གཉིས་བར་བསམ་ཚུལ་མི་མཐུན་པ་བྱུང་སྟེ་དེ་མུར་ལུས་ཡོད་འདུག
སྒ་ཁིས་ཟེར་བ་ནི་རྨ་ལྷོ་སོག་པོའི་ཁོངས་གསེར་ལུང་ཞང་ངམ་སྔོན་མིང་མདའ་ཚན་ལ་མདའ་ཁག་ལྔ་སྟེ་རུ་སྡེ་ལྔ་ཡོད་པའི་ནང་གི་གཅིག་ཡིན་པ་དང་དེ་ལ་མི་ཁྱིམ་བརྒྱ་དང་བཞི་བཅུ་ཡོད། སྒ་ཁིས་ལ་ཁང་པ་མེད་པའི་མི་ཁྱིམ་ཞིག་མེད་ཚོད་ཡིན་ཡང་གཞུང་ནས་མི་ཁྱིམ་རེར་སྒོར་ཁྲི་བཞིའི་འགྲོ་སོང་བཏང་ནས་ཁང་པ་རྒྱག་གི་ཡིན་ལབ་འདུག དེ་ཡང་མི་ཚང་ཉི་ཤུ་མ་གཏོགས་གཞན་ཁང་པ་ཚང་མ་རྫོང་ཐོག་གམ་ཞང་ཐོག་གང་རུང་ལ་ངེས་པར་རྒྱག་དགོས་ཚུལ་དང་དེ་ལྟར་མ་བྱས་ན་ཁང་པ་རྒྱག་པའི་ཐོབ་ཐང་འཆོར་གི་ཡོད་ཚུལ་བཤད་འདུག མི་མང་གིས་དེ་ལ་ངོས་ལེན་མ་བྱས་པར་རང་གི་ས་ཐོག་ཏུ་རྒྱབ་ན་ལས་གཞན་ཁང་པའི་དགོས་པ་མེད་ཁང་པ་མེད་པར་ན་ཁུག་ཅིག་ཏུ་ཉལ་ནས་སྡོད་དགོས་ཀྱང་འདུག་གི་ཡིན་ཟེར་ནས་གཞུང་གི་ཐག་ཆོད་ལ་ངོས་ལེན་མ་བྱས་པར་བསྡད་འདུག
ཁོ་ཚོས་གཞུང་གི་ཐག་ཆོད་ལ་ངོས་ལེན་མི་བྱེད་དོན་ནི། ཚང་མར་རང་གི་ས་ཐོག་ཏུ་ཁང་པ་ཡོད་པ་མ་ཟད་མི་ཚང་སྐོར་ཞིག་ལ་ཞང་ཐོག་ཏུ་ཁང་པ་ཡོད་པ་དང་སྐོར་ཞིག་ལ་ཞན་ཐོག་ཏུའང་ཁང་པ་ཡོད་འདུག མི་ཚང་ཕལ་ཆེ་བ་ཕྱོགས་ཕྱོགས་སུ་ཁང་པ་རྒྱབ་པ་ཡིན་ན་ནང་དུ་འདུག་མཁན་མེད་པར་སྟོང་པར་འཇོག་དགོས་ཐུག་གི་ཡོད་པ་མ་ཟད་དེ་སྔོན་ནས་ཁང་པ་གསར་རྒྱག་བྱེད་མཁན་མང་དྲགས་པས་གླ་ས་ཡང་རེག་གི་མེད་ཚོད་རེད། རྒྱུ་མཚན་དེ་གཅིག་པོ་མིན་པར། ས་ཆ་གཞན་དང་གཞན་དུ་རྫོང་མཐའ་དང་ཐང་སྟོང་འདྲ་མིན་དུ་ཁང་ཚོགས་བསྐྲུན་ནས་འབྲོག་སྡེ་མང་པོ་ས་ཆ་གཅིག་ཏུ་ཕབ་ཏེ་དཀའ་ངལ་འདྲ་མིན་འབྱུང་བཞིན་པའི་གནས་ཚུལ་ཡང་རིམ་པས་གོ་བཞིན་པར་བརྟེན་དེ་ལ་དྭོགས་པ་ཞིག་རང་བཞིན་གྱིས་སྐྱེ་གི་ཡོད་འདུག
ལོ་འགའི་སྔོན་ཞིག་ལ། འབྲོག་པའི་རྩྭ་སའི་སྐྱེ་ཁམས་སྲུང་སྐྱོབ་ཀྱི་ཆེད་འབྲོག་ཁྱིམ་གྲོང་དུ་འབེབས་པའི་སྲིད་བྱུས་གསར་པ་ཞིག་གོང་རིམ་ནས་མར་རྫོང་རིམ་པར་སླེབས་སྐབས། སྐྱེས་ཡུལ་ས་གནས་རང་ནས་ཡིན་པའི་ངེད་ཚོའི་རྫོང་དཔོན་གཙོ་གཞོན་གཉིས་ཞིང་ཆེན་ལ་ཞུ་གཏུགས་སུ་ཕྱིན་ནས། རྩྭ་སའི་སྐྱེ་ཁམས་སྲུང་སྐྱོབ་དེ་རྫོང་རང་ནས་འགན་འཁུར་གྱིས་ཕྱུགས་ཟོག་ཉུང་དུ་གཏོང་བ་སོགས་ཐབས་ཤེས་འཐེན་གྱི་ཡིན་པའི་ཁག་ཐག་བྱས་པར། ཞིང་ཆེན་གྱི་རྒྱ་དཔོན་ཞིག་གིས་དེ་ལྟར་བྱེད་པར་བསྔག་བརྗོད་ཀྱང་བྱས་འདུག་པའི་གནས་ཚུལ་གསལ་པོར་གོ
ད་ཆ་ཡང་སྐྱར་ཁང་པ་མི་དགོས་སར་ཁང་པ་རྒྱག་གི་ཡིན་ཟེར་བ་དང་དེ་ཡང་མི་མང་གི་རེ་བ་ལྟར་མི་རྒྱག་པར་གཞུང་རང་གི་འདོད་པ་ལྟར་རྒྱག་དགོས་པ་འདིར་དམིགས་ཡུལ་གཞན་ཞིག་ཡོད་པ་རེད་དམ་ཅི་ཞིག།
རྒྱ་གཞུང་གི་བྱེད་སྟངས་དེ་དག་ནི་མི་མང་ལ་མགོ་སྐོར་འབའ་ཞིག་ཡིན་པ་ལས། རྒྱལ་ཁབ་ཀྱི་རོགས་རམ་འདྲ་རྩ་བ་ཉིད་ནས་རེད་མི་འདུག གནས་ཚུལ་དེ་འདྲ་མགོ་ལོག་དང་། རྩེ་ཁོག རེབ་གོང་སོགས་སུ་ཡང་བྱུང་ཡོད་པ་གོ་ཐོས་འབྱུང་རྒྱུ་འདུག དངོས་གནས་རྒྱ་གཞུང་ལ་དམིགས་ཡུལ་ངེས་ཅན་གཞན་འགའ་མེད་ན། བོད་ལ་ཤ་ཚའི་བསམ་པ་ནི་སྤྱང་ཀི་ཤ་གཟན་འདྲ་བའི་རྒྱ་གཞུང་ལ་སྤུ་ཙམ་ཡང་ཡོད་མི་སྲིད་དོ།
རྩོམ་ཡིག་མགོ་ནས་ཐེངས་གཅིག་བཀླགས་ཚར་བ་ཡིན།