༧རྒྱལ་བ་རིན་པོ་ཆེའི་བཀའ་དྲིན།

གླིང་གཟི་མིག

 
གལ་ཏེ་ཁྱོད་ལ་དད་པ་ཡོད་ན།
གལ་སྲིད་རིན་ཐང་ཡོད་ན།
གལ་ཏེ་སྐུ་དྲིན་བསམ་ན།
༧རྒྱལ་བ་རིན་པོ་ཡི་བཀའ་སློབ་ཐོས་པ་ཙམ་མ་ཡིན་པར་ཉིན་རེ་བཞིན་འཚོ་བའི་ཁྲོད་ན་རང་གི་ལག་ལེན་ཅི་ཐུབ་ཀྱི་ཡོད་མེད་གཉིད་དུ་མ་ཡུར་བའི་སྔོན་ལ་རང་གིས་རང་ལ་འདྲི་དགོས་པའི་དྲི་ཚིག་གལ་འགངས་ཆེ་བ་ཞིག་རེད། དེ་ལྟ་བུའི་ཅི་ཡང་མེད་ན་ཡི་གེ་འདི་བཀླགས་པ་ཁྱོད་ཀྱི་ཆུ་ཚོད་འཕྲོ་བརླགས་རེད།

ང་ཚོར་གོམས་གཤིས་ཆགས་ཡོད་པའི་སྐད་ཆ་ཞིག་ལ་༼༧རྒྱལ་བ་རིན་པོ་ཆེ་ཡི་ཐུགས་རྗེ་བཀའ་དྲིན༽ཟེར་ནས་ད་ལྟའི་བར་བཤད་དེ་མི་ལོ་བདུན་ཅུ་འདས་ཟིན་ཏོ།། ད་ནི་བཀའ་དྲིན་ལག་ལེན་བྱས་ཏེ་འཇལ་དགོས་བའི་དུས་ལ་བབས་ཡོད། བོད་མི་དོལ་རྒྱལ་བ་ཞིག་མིན་པ་ནས་སུ་ཡིན་ཡང་ཁོང་གི་བཀའ་དྲིན་བསམ་ཤེས་དང་སྐད་ཆ་ཁ་ནས་དེ་ལྟར་བཤད། འོན་ཀྱང་དེ་རིང་ངས་དྲན་གསོའི་ཚུལ་དུ་བཤད་འདོད་པ་ནི་ཁ་ནས་བཤད་མཁན་མང་གི་ལག་བསྟར་བྱེད་པ་ཉུང་གི་ཟེར་འདོད།

སྐད་ཆ་འདི་ལྟར་བཤད་ན་སེམས་ལ་ཕོག་པའི་མི་བུ་ལྷག་བསམ་ཅན་རེ་ཟུང་ཡོད་སྲིད་ལ། ༼ཁོང་གིས་ང་ཚོར་གནང་བ་མང་དྲགས་སོང་། ང་ཚོས་ཁོང་ལ་ཕུལ་བ་ཉུང་དྲགས་སོང་༽བའི་སྐད་ཆ་འདི་ལྟར་བཤད་པ་ཡིན།
དེ་བས་ཀྱང་གལ་ཆེན་ཞིག་ལ་བཀའ་དྲིན་བསམ་པ་ཙམ་མ་ཡིན་པར་ཇི་ལྟར་བཀའ་དྲིན་འཇལ་དགོས་པ་ཤེས་རྒྱུ་གལ་ཆེན་རེད། ཁོང་གི་རླབས་ཆེན་གྱི་མཛད་རྗེས་རེ་རེ་དང་བཀའ་སློབ་རེ་རེ་མ་ཐོས་པ་ནས་ཐོས་པ་དང་ཐོས་པ་ནས་དོན་ཤེས་པ་དང་ལག་ལེན་བྱེད་པ་ཤེས་དགོས།

༼འགྲོ་བ་མིའི་ཡ་རབས་བཟང་སྤྱོད་མ་ཉམས་གང་འཕེལ་གཏོང་དགོས་ལ་ཆོས་ལུགས་འཆམ་མཐུན་དང་འཛམ་གླིང་ཞི་བདེ་ལ་བརྩོན་དགོས། དུས་རབས་ཉེར་གཅིག་པའི་ནང་པ་ཞིག་བྱེད་དགོས་ལ་བོད་མི་ཆེད་མཁས་པ་གང་མང་གསོ་སྐྱོང་བྱེད་དགོས། སློབ་གྲྭ་དང་སློབ་གསོ་གལ་ཆེན་ཡིན་པའི་བཙན་བྱོལ་ལ་སླེབས་ཉིན་ནས་ཤེས་ཡོན་སློབ་གསོ་གཙིགས་ཆེན་བྱེད་པ་ཡིན།༽

དེ་དང་འདྲ་བའི་བཀའ་སློབ་སྙིང་གི་ནོར་བུ་སྟོང་ཕྲག་གསུངས་ཡོད་པས་ང་ཚོ་ཕན་ཚུན་སུ་ཡིན་ནའང་ཤེས་ན་བཟང་ལ་བྱ་སྤྱོད་ཀྱང་དེ་བཞིན་གཟབ་ན་ལེགས། བདག་གི་དྲན་པའི་སེམས་སུ་ཡང་ཡང་འཁོར་བའི་སྐད་ཆ་ཞིག་ལ་ང་ཚོ་བོད་མི་ཚོས་ཁོང་གི་རིན་ཐང་ཤེས་ན་ལེགས། ལྷག་པར་དུ་རང་གི་ཁ་ཕོར་ཙམ་དང་སྒོར་མོ་འགའི་དོན་དུ་སྨྱོ་ལ་ཉེ་བའི་བོད་རིགས་དོལ་རྒྱལ་བ་ཚོ་ཤེས་ན་བཟང་།

དེས་ན་ཇི་ལྟར་བཀའ་དྲིན་འཇལ་ཐུབ་ཟེར་ན་༼བླ་སློབ་དམ་ཚིག་གཙང་བ་དང་སེར་སྐྱ་སུ་ཡིན་རུང་བཀའ་སློབ་ལྟ་ཀློག་བྱེད་པ་དང་དོན་ཤེས་པ་དང་ལག་ལན་ཡོད་པ་སོགས་ལ་༽བཀའ་དྲིན་འཇལ་ཟེར།
བོད་མི་རིགས་ཀྱི་ཡ་རབས་བཟང་སྤྱོད་རང་གི་ལུས་ངག་ཡིད་གསུམ་ན་ཡོད་པ་དང་། ཤེས་ཡོན་སློབ་གསོ་མེད་པས་བོད་མི་ཕམ་སོང་ཟེར་བའི་བཀའ་སློབ་བཞིན་ཆེ་ཆུང་སུ་ཡིན་ཡང་སློབ་སྦྱོང་ལ་ཧ་ཅང་འབད་བརྩོན་དང་ཆེད་མཁས་མི་སྣ་མང་པོ་གསོ་སྐྱོང་བྱེད་པ། བཙན་བྱོལ་ལ་ཡོང་ནས་་སློབ་གྲྭ་དང་པོ་བཙུགས་པ་དང་དགོན་པ་རྗེས་ནས་བརྒྱབ་པ་༧རྒྱལ་བ་རིན་པོ་ཆེ་ཆོས་ལ་དད་པ་མེད་པ་ག་ལ་ཡིན།
ཤེས་ཡོན་ལ་དེ་འདྲའི་གལ་ཆེན་དང་དོན་ཆེན་གནང་བ་ང་ཚོ་ཚང་མས་སེམས་ལ་ཉར་ན་བཟང་ལ་ལྷག་པར་ཤེས་ཡོན་སློབ་གསོའི་ལས་རིགས་སུ་ཡོད་པའི་ལས་ཀྱི་སྣེ་མོ་བ་ཚོས་གོ་སོང་བ་ཙམ་མ་ཡིན་པར་སེམས་སུ་ཉར་ནས་ལས་ཀ་བྱས་ན་བཟང་ལ་བཀའ་དྲིན་འཇལ་བ་ཡིན། སྤྱི་ཚོགས་ཆོས་ལུགས་འཆམ་མཐུན་དང་འཛམ་གླིང་ཞི་བདེ། འགྲོ་བ་མི་ཡི་ཡ་རབས་བཟང་སྤྱོད་སོགས་ལ་བཀའ་སློབ་ལམ་སྟོན་ཡང་ཡང་གནང་ཡོད་པས་དེ་དེ་བཞིན་བསྒྲུབ་ན་ང་ཚོ་ལ་ཕན་པ་ཡོད་པ་ཤེས་ན་ཤིན་ཏུ་ལེགས་སོ།།

དེ་འདྲ་མ་ཡིན་པར་ང་ཚོ་ཚང་མས་ཤེས་གསལ་ལྟར་ན་གཞོན་ཕོ་མོ་གང་མང་གིས་ཆང་རག་དང་ཐ་མག་རྒྱན་སྐུག་བྱས་ནས་ཁ་ནས་༧རྒྱལ་བ་རིན་པོ་ཆེ་ཟེར་ནས་དོན་དུ་ལྡོག་པའི་ལས་ཀ་དང་མི་ཚེ་འགྲོ་ཐབས་ཙམ་བྱེད་ན་ག་ལ་འགྲིག
ལྷག་པར་དུ་དེང་སང་གི་དུས་འདིར་ན་གཞོན་མང་པོ་ཞིག་གིས་རྒྱན་སྐུག་དང་ཉལ་ཐ་ཡིས་ཉི་མ་དང་མི་ཚེ་འགྲོ་ཐབས་འདུག་ཐབས་ཙམ་བྱེད་པ་ནི་ཐབས་སྡུག་དང་ཁོང་གིས་གསན་ན་ཐུགས་སྐྱོ་བའི་གནས་ཚུལ་ཡིན་པས་ཁྱོད་རང་བོད་མི་ཞིག་ཡིན་པའི་བསམ་བློ་ཅུང་ཙམ་གཏོང་རོགས་ཞུའོ།། འགན་འཁུར་ཡོད་པ་མ་བརྗེད་རོགས་ཞུའོ།།

༧རྒྱལ་བ་རིན་པོ་ཆེས་དགུང་ལོ་བཅུ་དྲུག་ནས་བཟུང་སྟེ་ཕྱག་གིས་ཐལ་མོ་སྦྱར་ནས་ང་ཚོའི་འཚོ་བ་དང་བདེ་སྡུག་གསུངས་ཏེ་གཞན་ལ་སློང་མོ་བརྒྱབ་སྟེ་ང་ཚོ་ལ་གནང་བྱུང་། དཔེར་ན། ཁྱིམ་ཚང་ཞིག་གི་ཕ་བཞིན་ང་ཚོ་བསྐྱངས་པ་རེད་མ་གཏོགས་༧་རྒྱལ་བ་རིན་པོ་ཆེ་མི་གཅིག་གམ་གྲྭ་རྐྱང་ཞིག་གར་འགྲོ་གར་བཞུགས་ཡིན་པ་ཤེས་གསལ་རེད།
བོད་མི་མང་པོ་ཞིག་གིས་ཁོང་གི་བཀའ་དགོངས་ང་ལས་ལྷག་པར་མཁྱེན་་ཡོད་ལ་དེ་ལྟར་སྒྲུབ་བཞིན་ཡོད་མོད། ད་དུང་བོད་མི་ཁ་ཅིག་གིས་ཅི་ཡང་མ་ཐོས་པ་དང་ཐོས་ན་ཡང་ལག་ལེན་ཉུང་བས་དྲན་གསོའི་ཚུལ་དུ་བྲིས་པ་ཡིན། ད་ནི་བཀའ་དྲིན་ཤེས་རན་རེད་ལ་དྲིན་ལན་འཇལ་རན་ཡིན་པའི་བསམ་བློ་རེ་གཏོང་རོགས་ཟེར་ནས་འབོད་སྐུལ་ཚུལ་དུ་གླིང་གཟི་མིག་གིས་གུས་ཕུལ་ཞུའོ།།