སྐལ་བཟང་སྒྲོལ་དཀར། འཛིན་རིམ།༦ རང་ལོ།༡༡
དེ་རིང་རེས་གཟའ་ཟླ་བ་སྔོ་བསང་ནམ་མཁའི་དབྱིངས་སུ་ཉི་མའི་འོད་ཟེར་ས་གཞིར་འཕྲོས་ཏེ་ང་ཚོ་ཕྲུ་གུ་ཚོས་རྒན་བློ་ཚེ་ལགས་ལ་རྐང་རྩེད་སྤོ་ལོ་རྩེད་པར་འཁྲིད་དང་ཞེས་རྙོག་དྲ་རྒྱུན་ཆད་མེད་པར་བཤད་པས་རྒན་ལགས་ཀྱིས་སང་ཉིན་འཁྲིད་ཀྱི་ཡིན་ཞེས་གསུངས་བྱུང་བས་ང་ཚོ་ཚང་མ་གོས་ལོག་བརྗེ་ལེན་རེ་འཁྱེར་ཡོང་བ་ཡིན། གང་ཡིན་ཟེར་ན་གལ་སྲིད་སང་ཉིན་ཆར་པ་བརྒྱབ་ན་ད་དུང་རྩེད་རྒྱུ་ཡོད་པས་ཡིན། སང་ཉིན་དེར་ང་ཚོ་ཚང་མས་རྔན་པ་དང་གོས་ལོག་སོགས་འཁྱེར་ནས་རྐང་རྩེད་སྤོ་ལོའི་རྩེད་ཐང་དུ་ཤར་རེར་བསྐྱོད། རྩེད་ཐང་དུ་སླེབས་སྐབས་ཁོང་རྣམས་ཅ་ལག་མར་བཞག་ལོང་མེད་པར་ལམ་སེང་རྩེད་མོ་རྩེ་བར་བསྐྱོད།
རྒན་ལགས་ཀྱིས་ང་ཚོ་ཚང་མ་ཚུར་སྐད་བཏང་ནས་སྒོར་སྒོར་བཟོ་རུ་བཅུག་ནས་མར་བསྡད་བཅུག རྒན་ལགས་ཀྱིས་དཔེ་ཁུག་ཅིག་བཏོན་ཏེ་ང་ཚོ་རྔན་པ་སྣ་ཚོགས་གནང་བྱུང། ད་དུང་རླུང་རྫས་ཡོད་པའི་མངར་ཆུ་གནང་བྱུང། དེ་ནས་ང་ཚོ་བུ་མོ་ཁ་ཤས་ཤིག་ཟམ་པའི་སྒང་ལ་འགྲོ་དུས་རྡོའི་སྟེགས་ནས་སྦྲུལ་ལྗང་ཁུ་ཞིག་ཡོང་བ་མཐོང་དུས་སེམས་ནང་དངངས་སྐྲག་ངང་རང་གི་འཛིན་གྲོགས་གཅིག་པ་བུ་དང་རྒན་ལགས་ལ་རྒྱང་རིང་ནས་སྐད་ཤུགས་ཆེན་པོས་བོས།
དེ་རྗེས་ང་ཚོ་རྐང་རྩེད་སྤོ་ལོ་རྩེད་བར་འགྲོ་དུས་གློ་བུར་དུ་ནམ་མཁར་སྤྲིན་ནག་འཁྲིགས་པ་དང་གློག་དམར་འཁྱུགས་མ་ཐག་དྲག་ཆར་བབ་འགོ་ཚུགས། ང་ལ་མཚོན་ན་སྔོན་ནས་འཆམ་ནད་དྲག་པོ་འཕོག་ཡོད་སྟབས་ཚོང་ཁང་ཞིག་གི་འོག་ལ་ཁེར་རྐྱང་ཆར་པར་གཡོལ་ནས་བསྡད། འོན་ཀྱང་ངའི་གྲོགས་མོ་ཚོ་དབུགས་ཧལ་བཞིན་ཡར་རྒྱུག་མར་རྒྱུག་བྱེད་བཞིན་པའི་སྐྱིད་སྒྲ་དང་དགོད་སྒྲ་ལྷང་ལྷང་དུ་ཐོས་བྱུང།
སྐབས་དེར་གཞུང་ལམ་ཐོག་ཕར་འགྲོ་ཚུར་ཡོང་བྱེད་མཁན་གྱི་ཡུལ་མི་རྣམས་ཡ་མཚན་གྱི་རྣམ་འགྱུར་དང་བཅས་ང་ཚོར་མིག་ཅེ་རེར་བལྟས་ནས་བསྡད་འདུག ཕལ་ཆེར་བུ་མོས་རྐང་རྩེད་སྤོ་ལོ་རྩེས་པ་མཐོང་བ་ཐེངས་དང་པོ་ཡིན་པ་འདྲ། ཆུ་ཚོད་གཅིག་ཙམ་རྐང་རྩེད་སྤོ་ལོ་བློ་འདོད་ཁེངས་པ་ཞིག་རྩེས་རྗེས་ང་ཚོ་སློབ་གྲྭ་ལ་ལོག་རྒྱུའི་འགྲོ་ཆས་སྒྲིག མ་ཟད་ལུས་ཐོག་གི་གྱོན་ཆས་རྣམས་ཆར་པས་བརླན་འདུག་པས་གོས་སློག་རྣམས་མགྱོགས་མྱུར་བརྗེས་ནས་ཤར་མར་སློབ་གྲྭར་བསྐྱོད་པ་ཡིན། དེ་རིང་གི་ཆར་པ་དང་ལྷན་དུ་རོལ་བའི་ཉིན་མོ་དེ་ངའི་མི་ཚེར་ནམ་ཡང་བརྗེད་མི་ཕོད་པའི་ཉིན་མ་ཞིག་ཏུ་གྱུར།།
བུ་མོ་ལོ་བཅུ་གཅིག་ཅན་ཞིག་གིས་འདི་འདྲའི་སྙན་མོ་བྲིས་པ་དངོས་གནས་ཡག་པོ་རེད། འོན་ཀྱང་བོད་པའི་སྤྱི་ཚོགས་ནང་དུ་རྫུན་མདང་ཚུལ་ཆོས་ཅན་གྱིས་ཁེངས་ཡོད་སྟབས་ཡིད་ཆེས་བྱེད་རྒྱུ་ཁག་པོ་རེད།