རྔ་རྒོད།
དེ་རིང་གི་གླེང་གཞི་ནི་གཙོ་བོ་ནི་བོད་ཀྱི་བྱིས་པའི་བློ་ངོར་འབབ་འོས་པའི་རི་མོའི་སྒྱུ་རྩལ་དང་དེ་དང་མཉམ་པོར་བྱིས་སྒྲུང་གི་བརྗོད་བྱ་གང་དེས་ང་ཚོའི་བྱིས་པ་ཚོའི་ཡིད་དབང་དེ་འགུག་ཐུབ་མིན་གྱི་བརྩམས་ཆོས་གང་དེའི་སྐོར་ཡིན། འདི་སྐོར་ལ་བོད་ཀྱི་ལྷ་བཟོ་མཁས་པ་ཚོའི་ངག་རྒྱུན་དུ་”མཁས་པས་རི་མོ་དེའི་སྤུས་ཀ་དང་ཚགས་ལ་བལྟ་ཞིང་། བླུན་པོས་རི་མོའི་ཆེ་ཆུང་དང་མཚོན་མདོག་ལ་བལྟ་ཟེར་བ་དང་། བྱིས་པས་བྱེའུ་རི་དྭགས་སོགས་ཀྱི་རི་མོ་ལ་བལྟའོ”།། ཞེས་པའི་ཚིག་རྐང་ཐ་མ་འདི་སྐབས་བབས་ཀྱི་བརྗོད་བྱ་འདི་དང་འབྲེལ་བ་ཧ་ཅང་ཆེའོ།། འོན་ཀྱང་འདིར་ང་ཚོས་བྱིས་སྒྲུང་སྙན་མོ་འདྲ་ཞིག་བོད་ཡིག་གི་སྟེང་དུ་འབྲི་བ་ནི་ལས་སླ་བོ་ཞིག་གཏན་ནས་མ་རེད།
རྒྱུ་མཚན། སྔོན་མ་རང་རེའི་ལུགས་སྲོལ་ལ་ང་ཚོར་བྱིས་སྒྲུང་འབྲི་བའི་དཔེ་དེ་ཧ་ཅང་དར་མེད་པར་མ་ཟད་དེ་དང་མཉམ་པོར་བྱ་བ་འདི་དག་གི་རིགས་སྣང་ཆུང་བྱས་ཏེ་མཐར་རང་གི་སྐད་ཡིག་དང་ང་ཚོའི་བར་ན་ཁ་བརྡའི་ཚིག་གི་ཆད་ལྷག་དང་གོ་བརྡ་མི་འཕྲོད་པའི་རྩ་བའི་དཀའ་ངལ་དེ་ཡང་མདོར་བསྡུས་ན་གནད་འདི་ལ་བརྟེན་ཡོད།
དེའི་ཕྱིར། བྱིས་སྒྲུང་གང་ཞིག་དེ་བྲི་བར་འདོད་ན། བརྗོད་བྱ་དེ་ལ་མཐའ་གཅིག་ཏུ་དངོས་ཡོད་ཁོ་ན་མི་དགོས་ཏེ་རྟོག་སྒྲུང་དང་དངོས་ཡོད་གཉིས་ཀར་བྲི་ན་ཆོག དཔེར་ན། ཤམ་བྷ་ལའི་འཁོར་ཚོགས་དག་བྱིས་སྒྲུང་ཞིག་ལ་སྦྱར་འོས་ཤིང་། གཞན་ཡང་སྤྲེའུ་ཨཱ་ལ་མའི་གཏམ་རྒྱུད་ཚིག་བཅད་མ་དེ་ཚོ་ཚིག་ལྷུག་གི་ངོ་བོར་བསྒྱུར་ན་བྱིས་སྒྲུང་སྙན་པོར་འགྱུར་ཡང་སྲིད། དེ་མིན་གཞན་པ་དཔེར་ན། གླིང་གེ་སར་སྒྲུང་གི་ཚན་པ་རེ་ཡང་བྱིས་སྒྲུང་དུ་བཟོས་ན་བྱིས་པའི་བློ་ཡིད་འགུག་སྲིད་དེ། དཔེར་ན། དབྱིན་སྐད་དུ་(Harry Potter) ཡང་ན་༼Doctor who)ཟེར་བ་དག་ཀྱང་རྟོག་སྒྲུང་ཙམ་རེད། འོན་ཀྱང་བོད་ལ་བྱིས་སྒྲུང་རི་མོ་དང་བཅས་པ་སྙན་པོ་དང་མཛེས་པོ་རྩོམ་མཁན་ཕར་ཞོག་འབྲི་མཁན་ཧ་ཅང་དཀོན་པོ་རེད།
འོན་ཏེ་བཀུར་འོས་སྐུ་ཞབས་དཔལ་ཤུལ་མཁས་གྲུབ་ཀྱིས་༼ཁཱ་ཎར་ཏྲར༽ རྒྱལ་ཁབ་ནས་དབྱིན་ཡིག་སློབ་ཆེན་མཐར་རྗེས་སུ་ལོ་མང་རིང་དཀའ་ལས་བརྒྱབ་སྟེ་བྱིས་སྒྲུང་དང་ཡང་ན་རི་མོ་དང་མཉམ་པོར་སྐད་ཡིག་ངོ་སྤྲོད་ཀྱི་དཔེ་དེབ་གཉིས་ཡོད་པ་དེ་ང་ཚོ་ཕྱི་སྡོད་བོད་མའི་ཁྲོད་དུ་དཔེ་སྟོན་ལྟ་བུ་ཞིག་ཏུ་གྱུར་ཡོད། ད་དུང་༼ཁཱ་ཎར་ཏྲར༽ བཞུགས་པའི་བསམ་བློ་བ་མི་གཞན་པ་ཞིག་གིས་ཀྱང་ལོ་མང་རིང་ཉམས་མྱོང་བརྒྱུད་བྱིས་སྒྲུང་ཞིག་བྲིས་ཡོད་པའི་གསར་བསྒྲགས་ཙམ་མཐོང་ཡང་དེ་རིང་ཁོང་གི་མཚན་དངོས་དེ་གུས་པའི་ཡིད་ངོར་མི་འདུག་པས་དགོངས་དག་ཞུ།
གཞན་བོད་ནང་ལ་མཚོན་ན། དུས་གསུམ་ཀུན་ལ་ང་ཚོས་བསྟོད་འོས་པའི་མཚོ་སྔོན་བོད་སྐད་ནང་གསེས་ན་ཆུང་བྱིས་བའི་དགའ་ཚལ་སྡེ་ཚན་གྱི་ཕྱག་རྗེས་དང་བཀའ་དྲིན་ལ་བརྟེན་ཏེ་བོད་ཕྱི་ནང་གཉིས་ལ་ཕན་པ་ཆེན་པོ་བསྐྲུན་ཡོད། ལྷག་པར་ཉེ་བའི་ཚེ་ན་༼༼གཉའ་ཁྲི་བཙན་པོ་༽༽ ཞེས་པའི་རྩོག་སྒྲིག་པ་ལྷག་བསམ་ཅན། བཙན་པོ་གསེར་བ་དང་། ཁ་བ་སྙིང་ལྕགས། ཀིརྟི་སྐྱབས། རི་མོ་བ་བཀྲ་ཡེ་དོན་ནེ། སོགས་གཙོས་རང་གི་སྐད་ཡིག་གི་ལས་དོན་འདིའི་སྐོར་ལ་བྱ་ར་མཛད་ཀྱིན་པའི་རང་རེའི་རིགས་ཀྱི་བུ་དང་རིགས་ཀྱི་བུ་མོ་དག་ས་གང་ན་བཞུགས་ཡོད་མེད་ལ་མ་བལྟོས་པར་ཁོང་ཚོའི་བསམ་དོན་གང་དེ་ཡིད་བཞིན་དུ་འགྲུབ་པའི་བཀྲ་ཤིས་ཁ་གཡང་ཞིག་འདིར་བརྗོད་དགོས་བྱུང་།
གཞན་དབྱིན་ཡུལ་འདིར་མཚོན་ན། དབྱིན་ཇི་སློབ་ཆུང་དག་གིས་བདུན་ཕྲག་གཅིག་རེར་ཕལ་ཆེར་བྱིས་སྒྲུང་མི་འདྲ་བ་གསར་བ་རེ་བཀླག་དགོས་པ་ཞིག་ཡིན་ལ་ད་དུང་གཞན་པ་སློབ་གྲྭ་དང་སློབ་ཆུང་སྡེ་ཚན་མ་འདྲ་ན་བྱིས་སྒྲུང་གི་བརྗོད་བྱ་དེ་ཡང་མི་འདྲའོ།། འོན་ཀྱང་རྩ་བའི་དབྱིན་ཇིའི་བརྡ་སྤྲོད་གཞུང་གི་རྩ་བ་དེ་སྒེར་གཞུང་ཚང་མས་འདས་པའི་སྐོར་ལ་མཚོན་ནའང་འདྲ་བརྩིས་ཡོད་ལ་ད་ལྟའི་སྐབས་སུའང་རྩི་བཞིན་ཡོད་ལ་མ་འོངས་པའང་ངེས་པར་བརྩི་དགོས། དེར་བརྟེན། འདིའི་སྐོར་དེ་དག་ལ་ཡུལ་ལུང་ཁ་ཤས་ཀྱི་སྒྲ་གདངས་འདྲ་མི་འདྲ་ཟེར་བའི་ངན་ཁག་འཇོག་ས་ཞིག་གཏན་ནས་མེད། དེའི་ཕྱིར། འདིའི་སྐོར་དེ་ལ་ཚང་མས་ཐུགས་གནང་མཛད་པར་བཀའ་དྲིན་ཆེའོ།།
ཞེས་༢༠༡༤/༡༠/ ༠༨ ལ་དབྱིན་ཡུལ་ནས།
ངོ་མ་བདེན་པ་གསུང་འདུག