སྤེལ་ལྗམ་དུ་རང་ལུས་མེར་བསྲེགས།

གསང་གྲོལ།

 
ཕྱི་ཟླ་བཅུ་བའི་ཚེས་གསུམ་སྟེ་རེས་གཟའ་པ་སངས་ཉིན། སྤེལ་ལྗམ་རྒྱལ་ས་སྤར་སིལ་གྱི་གྲོང་ཁྱེར་དཀྱིལ་དུ་སྐྱབས་བཅོལ་ཡིག་ཆ་མ་རག་པའི་མི་གྲངས་ ༣༠༠ ཡིས་ངོ་རྒོལ་སྐད་འབོད་ཀྱི་ལས་འགུལ་ཞིག་བརྩམས་ཡོད་འདུག་ལ། སྐབས་དེར་རྒྱལ་ཁོངས་lebanon ལིས་བྷ་ནོང་ནས་ཡིན་པའི་ཕོ་གསར་ཞིག་གིས་རང་ཉིད་ཀྱི་མགོ་ལ་ས་སྣུམ་བླུགས་ཏེ་མེར་སྒྲོན་ཡོད་འདུག ཉེ་འཁོར་ཀྱི་ལམ་འགྲོ་བ་དང་ལས་འགུལ་བ་ཚོས་ལམ་སེང་ཁོང་གི་ལུས་སྟེང་གི་མེ་བསད་ཡོད་འདུག་མོད། ཁོང་གི་མགོ་དང་ལག་ཟུང་ཚབས་ཆེན་འཚིགས་ཡོད་པས་ད་ལྟ་དམག་མིའི་སྨན་ཁང་ཞིག་ཏུ་ཛ་དྲག་སྨན་བཅོས་གནང་བཞིན་ཡོད་འདུག

གཞན་སྤེལ་ལྗམ་སྐྱབས་བཅོལ་ལས་ཁུངས་ཀྱིས་བསྡོམས་རྩིས་ལྟར་ན་ཕྱི་ཟླ་དགུ་བའི་ནང་སྤེལ་ལྗམ་གཞུང་ལ་སྐྱབས་བཅོལ་སྙན་ཞུ་འབུལ་མཁན་༢༠༠༠ ཙམ་བྱུང་ཡོད་པ་དང་། དེ་ནི་ལོ་ངོ་གཉིས་ཀྱི་ནང་སྐྱབས་བཅོལ་ཞུ་མཁན་གྲངས་ཚད་མཐོ་ཤོས་སུ་ཆགས་ཡོད་འདུག་ལ། སྐྱབས་བཅོལ་ཞུ་མཁན་གཙོ་ཆེར་སི་རེ་ཡ་དང་ཨི་རག ཨབ་གྷན། ཨ་ཧྥེ་རི་ཁ་བཅས་ནས་ཡིན་པ་དང་། ཤར་ཡུ་རོབ་དང་ཨུ་རུ་སི་ནས་ཡོང་བའི་སྐྱབས་བཅོལ་པའང་མང་དུ་འགྲོ་བཞིན་ཡོད་འདུག་ལ། སྤེལ་ལྗམ་དཔོན་རིགས་ཚོས་སྐྱབས་བཅོལ་ཞུ་མཁན་གྱི་ཚ་རླབས་གསར་བ་ཞིག་བསྐྱར་ཏུ་འབྱུང་རྒྱུ་ཡིན་པའི་ཉེན་བརྡ་བཏང་ཡོད་འདུག

གནས་ཚུལ་ཡོང་ཁུངས་འབྲེལ་ཐག http://www.lacapitale.be/1116608/article/2014-10-03/les-jours-du-sans-papier-qui-a-tente-de-s-immoler-a-bruxelles-sont-menaces-photo