འོས་སྦྱོར་བ། དཔལ་དོན།
ཕྱི་ལོ་ཉིས་སྟོང་དྲུག་བདུན་གང་ཡིན་གསལ་བོ་མ་དྲན་ཡང་། རེབ་གོང་དུ་སྙན་ངག་པ་ཞིག་མི་མང་གིས་སྐོར་བྲོ་འཁྲབ་སར་གཅེར་བུར་བུད་དེ་སྙན་ངག་གྱེར་པའི་གཏམ་རྒྱུད་རླུང་ལྟར་གྲགས། རླུང་སྒྲ་ཤུགས་ཆེ་རུ་ཕྱིན་ཞིང་སྤྱི་ཚོགས་སྟེང་བཤད་སྲོལ་སྣ་མང་སླེབས། ལོ་དེ་ལ་རྒྱ་ནག་ནས་ཀྱང་བུད་མེད་སྙན་ངག་པ་ཅིག་གར་སྟེགས་སྟེང་ནས་གཅེར་བུར་བུད་དེ་སྙན་ངག་གྱེར་འདོན་བྱས་པས་རྩོམ་རིག་གི་ཚོགས་འདུ་ཞིག་གི་སྟེང་བཤད་ཚུལ་སྣ་མང་བྱུང་ཡང་ཤུགས་རྐྱེན་ཆེན་པོ་ཆགས་མེད། ཡིན་ནའང་། བོད་ཀྱི་ན་གཞོན་སྙན་ངག་པ་འདིའི་ཤུགས་རྐྱེན་ནི་ཧ་ཅང་ཆེ་སྟེ། བོད་ཀྱི་རྩོམ་སྟེགས་སུ་ཚ་ཚ་འུར་འུར་བྱུང་བའི་མི་རབས་གསུམ་པའི་ཚོགས་པ་དེའང་གཡས་སྒུལ་གཡོན་སྒུལ་བྱས། གཅེར་བུར་འབུད་མཁན་གྱི་སྙན་ངག་པ་ནི་མི་རབས་གསུམ་པ་ཚོགས་པའི་ཚོགས་མི་ཞིག་མིན་ནའང་། གཏམ་རྒྱུད་དེ་ཁོ་ཚོས་རང་ཉིད་ཀྱི་ཤུགས་རྐྱེན་ལ་ངོས་ལེན་བྱས་པའམ། ཡང་ན་རང་ཉིད་ཀྱིས་སྤྱི་ཚོགས་ལ་འགན་འཁུར་མ་ཐུབ་པར་བསམ་པའི་བློ་དོགས་ཤིག་ཡོད་པ་ཧ་ཅང་བདེན།
ཆེས་ཐོག་མར་མི་རབས་གསུམ་པའི་ཁྲི་སེམས་དཔས་མི་རབས་གསུམ་པ་ལས་དགོངས་པ་ཞུས་ཡོད་པ་དང་། དགོངས་ཞུའི་ཡི་གེའི་ནང་དུ་༼གོ་ཐོས་སུ་ཡར་སྔོན་ཏག་ཏག་ལ་རེབ་གོང་གི་སྙན་ངག་པ་ཆེ་གེ་མོ་ཞིག་མི་མང་ཚོགས་ས་ནས་གཅེར་བུར་བུད་དེ་སྐྱུགས་བྲོ་བའི་བཟོ་ལྟ་སྣ་ཚོགས་བསྟན་པ་རེད་ཟེར། ཁོ་ཚོས”མི་རབས་གསུམ་པ”དེ་སྙན་ངག་གི་སྟེང་ནས་མཚོན་ཐབས་མི་བྱེད་པར་བྱ་སྤྱོད་ཡ་མ་བརླ་མང་པོའི་སྟེང་ནས་མཚོན་དུ་བཅུག་པ་དེ་ནི་དང་ཐོག་ང་ཚོས་་མི་རབས་གསུམ་པ་ཞེས་པའི་ཚོགས་པ་འདི་འཛུགས་པའི་དགོངས་དོན་དང་རིང་ནས་རྒྱབ་འགལ་དུ་གྱུར་འདུག་པ་སོགས་རྐྱེན་དུ་མའི་དབང་གིས། དེ་རིང་ནས་བཟུང་ཁོ་བོ་དངོས་སུ་མི་རབས་གསུམ་པ་ཞེས་པའི་ཚོགས་པ་འདིའི་ཁྲོད་ནས་ཕྱིར་བུད་པ་ཡིན་༽ཞེས་འཁོད་ཡོད།
གཅིག་བྱས་ན་དགོངས་ཞུའི་ཡི་གེ་འདི་འབྲེལ་མེད་དོན་གཞན་ཞིག་རེད། གང་ཡིན་ཟེར་ན་གཅེར་བུར་བུད་དེ་སྙན་ངག་གྱེར་མཁན་ནི་མི་རབས་གསུམ་པའི་ཚོགས་མི་མ་རེད། སྤྱི་ཚོགས་ནང་གི་གྲགས་སྐད་འདི་དང་བསྟུན་ནས་མི་རབས་གསུམ་པ་ཚོགས་པའི་ཆེད་དེབ་དུ་ཁོ་ཚོ་དང་འབྲེལ་བ་མེད་པའི་སྙན་ངག་པ་འདིའི་སྐོར་འཁོད་ཡོད་ཅིང་། དེ་ལས་གཞན་གྱི་ཟ་ཟུར་མང་པོ་ནས་ཀྱང་གནས་ཚུལ་འདིའི་སྐོར་ལ་བལྟ་ཚུལ་འདྲ་མིན་གྱི་རྩོམ་ཡིག་རབ་དང་རབ་རིམ་པ་སླེབས་པ་མ་ཟད། ལོ་ཤས་སྔོན་ནས་གཅེར་བུར་འབུད་ཐུབ་པ་ནི་མིའི་གཤིས་ཀྱི་ཆེས་དྭངས་གཙང་གི་ངོ་བོ་སྟོན་སྟངས་ཤིག་ཡིན་པའི་རྩོམ་ཡིག་རིང་མོ་བྲིས་ཏེ། རིང་ལུགས་སུ་གླེང་མཁན་ཡང་དྲ་ཐོག་ནས་འགའ་རེ་བྱུང་། སྙན་ངག་པ་གྲགས་ཅན་མང་པོས་གྲུབ་པའི་ཚོགས་པ་ཞིག་ལ་གཡོ་འགུལ་བྱིན་པའི་མི་དེ་ནི་ཁྱོད་ཀྱིས་ཐོས་མྱོང་ངམ།
ཁོང་གི་མིང་ལ་དུར་ཐང་ཟེར་ཞིང་། དུར་ཐང་ལགས་སྐབས་དེར་ཉི་ཤུ་ཡས་མས་ཡིན་འདུག དུར་ཐང་ནི་སེམས་ཀྱི་སྟོང་ཁམས་ལ་འཆར་སྣང་གི་ཚོས་གཞི་དཀར་ནག་ཁྲ་གསུམ་འཁྱུག་པའི་སྙན་ངག་པ་ཞིག་ཡིན་ཞིང་། ཕྱི་ལོ་༢༠༠༩ ཟླ་ ༡༢ ཚེས་ ༡༣ ཉིན་ན་གཞོན་གསར་བའི་དྲ་བར་༼དུར་ཐང་གི་སྙན་ངག་ཚན་པ་འགའ་༽ཞེས་པ་བཀོད་པ་ནས་ཁོས་གསར་དུ་བྲིས་པའི་སྙན་ངག་གཅིག་ཀྱང་མཐོང་རྒྱུ་མ་བྱུང་ལ། ཐ་ན་སྙན་ངག་པ་ཁོང་སྤྱི་ཚོགས་ཀྱི་མཐོང་ལམ་ནས་ཡལ་ཏེ་གང་དུ་ཡོད་པའང་མི་ཤེས་པར་གྱུར། གཤམ་དུ་སྙན་ངག་པ་ཁོང་གི་ཡིད་གདུང་དང་། ཚོར་ཤེས་ཟབ་པའི་སྙན་ངག་ཁག་བཅུ་བདུན་དྲ་ཐོག་ནས་བཏུས་ཏེ་ཀློག་མཁན་དག་ལ་འོས་སྦྱོར་བྱས་ཡོད།
དུར་ཐང་གི་སྙན་ངག་བཅུ་བདུན།
རྩོམ་པ་པོ། དུར་ཐང་།
༡༽ སྟོན་ཟླ་བརྒྱད་པའི་སེམས་ངལ།
ཁུར་མོང་དང་སྟོན་ལོའི་ཤག་སྒྲ་ཚོར་དུས
ངས་ཚོད་ཚོད་ལ་གཏད་སོ་བྲལ་བའི་བྱ་ཁྱུ་དེའི་ལས་དབང་དྲན
སྟོན་ཟླ་བརྒྱད་པ ཁྱོད་འདི་ལྟར་བསིལ་བསིལ་གྱིས་འགྲོ་གྲབས་བྱས་ན
ངའི་མཐོང་ལམ་གྱི་དངོས་པོ་གང་ལ་ཁ་དོག་བྲལ
ཟླ་བརྒྱད་པ
བར་སྣང་ན་གས་པའི་ལོ་མའི་ཆག་རོ་དང་
སྤྲིན་གསེབ་ན་ལུས་པའི་མེ་ཏོག་གི་རྣམ་ཤེས
ཡོད་ཚད་ཁྱོད་ཁོ་ནས་གང་དུ་ཁྲིད
༢༽ བུད་མེད་དག་གི་རྐང་བ་ལག་པ།
བུད་མེད་དག་གི་རྐང་བ་ལག་པས
ལྕགས་ཀྱི་སྒྲོག་གུ་གཏོར
བུད་མེད་དག་གི་རྐང་བ་ལག་པས
བདག་གི་དམ་ཚིག་བཅག
སུ་ཡི་རྣམ་ཤེས་བཤིག་པའི་མེ་ལོང་ངོས་སུ
བུད་མེད་དག་གི་རྐང་བ་ལག་པ་ལྷོད་པོར་བརྐྱངས་པས
ང་ཡི་ཡིད་སེམས་སྟོང་བའི་འཁོར་བ་འདི་ན
ཤ་ཡི་འཇའ་ཚོན་བཀྲ་ཤིང་ ཆགས་པའི་ཆར་བ་འབབ
ཨེ་མ སུ་ཡི་གཅེར་གཟུགས་ཀྱི་འཁོར་བ་ལགས
༣༽ རྩྭ་ཐང་།
སུས་རུས་པ་བརྡར་བའི་མག་མོག་གི་དཔྱངས་ཟམ་ཆེན་མོ
ཉི་ཟླའི་འོག་གི་སྤྲིན་པ་སྨུག་རྒྱུ་གྱོན་ཏེ
ང་རང་ཧ་ཅང་ཐག་རིང་དུ་ཁྲིད
འུར་རྡོས་གཙང་བོ་ཞིག་རྙོག་ཅིང
གཙང་བོ་ལག་མཐིལ་དུ་སྐམ་དུས
ང་ཡི་རྩྭ་ཐང་ནི་སུ་ཡི་ཡིད་དབང་འཕྲོག་བྱེད་ཀྱི་འཕྲོག་བྱེད་ཅིག་ཡིན
༤༽ མྱོས་བུམ།
མེ་ལོང་དུ་ཞིབ་ལྟ་བྱས་ཚེ
རྡོ་ལྕགས་ཀྱི་ཆུ་དང་རི་བོ་མཐོང་ཡོང
མཚན་མོ མེ་ཏོག རྨི་ལམ་གྱི་གཡས་གཡོན་མཐོང་ཡོང
དེ་ལྟར་ན
དོ་ནུབ
ངས་རྣམ་དག་གི་ཆོད་སེམས་རྙེད་ཐབས་མི་འདུག
༥༽ འོད་ཀྱི་ཆག་རོ།
སུས་ཀྱང་རྙེད་མི་ཐུབ་པ་ནི
རང་གི་ཡིད་སེམས་ནོར་བུ་ཞིག་དང་མཚུངས་ཚུལ་དེ་ཡིན
མཚན་མོ་གང་གི་མཛེས་སྡུག་གི་མཚོན་ཆ་དག་ཡིན
ད་དུང་བུད་མེད་དེའི་གདོང་གི་སྨྲ་བརྗོད་ལས
རང་གི་ཡིད་སེམས་གཙང་བོ་ཞིག་དང་འདྲེས་ཚུལ་དེ་ཡིན
དོ་ནུབ
ངས་མཚན་སྨག་གྱོན་ནས་ཁེར་ངུ་བྱས
ཡིད་གཞུང་ཚེར་མས་གཙེས་པའི་སྐྱོ་མདོག་འདི་ངས་སུ་ལ་སྟོན་མི་འདོད
ང་ནི་ལྕགས་ལས་སྐྱེས་པའི་མེ་ཏོག་ཅིག་ཡིན
འོད་ཀྱི་ཆག་རོ་དེ་ཡིན
སུས་ཀྱང་དབང་དུ་བསྡུ་མི་ཐུབ་པའི་ནོར་བུ་ཚེ་ཟད་དེ་ཡིན
༦༽ མི་རེ་རེ།
མི་རེ་རེ་བར་སྣང་གི་འོད་དུ་གྱུར
མི་རེ་རེ་ཆུ་འོག་ཏུ་འཛུལ
མི་རེ་རེས་ང་ལ་སོ་ལྟ་བྱས
མི་རེ་རེ་ཆང་གིས་བཟི
མི་རེ་རེའི་ཕྱི་ནང་གི
མི་རེ་རེའི་སེམས་ནང་གི
མི་རེ་རེ མི་རེ་རེ་རེད
༧༽ དེ་རིང་ང་ཡི་མགྲོན་པོ།
སྲོག་གི་རི་རབ་ཞིག་འགུལ་ཤུལ་ན
དེ་རིང་ང་ཡི་མགྲོན་པོ་གཉོམ་ཆུང་ངེ
ཞེན་ཆགས་ཀྱིས་སེམས་རྩ་བཟུང་ཞིང་
རྨི་ལམ་གྱིས་ཡིད་སེམས་གཙེས
ཐག་རིང་གི་འོད་སྣང་དང་རྡོ་བའི་སྨྲ་བརྗོད་ལ་གཤོག་པ་ཐོགས་དུས
ང་ཡི་མགྲོན་པོ ཁྱོད་ཚུར་ལ་ཤོག
ཨ་མའི་སློག་རྙིང་ནང་གི་བྱིས་དུས་ཁྱེར་ལ་ཤོག
ད་དུང་ཕྱི་གཙང་ནང་གཙང་གི་སེམས་པ་དེ་ཡང་ཁྱེར་ལ་ཤོག
༨༽ ཧ་ཅང་རྒྱང་རིང་གི་མཛེས་སྡུག
དུས་ཤིག་ལ་ཆུ་ནང་གི་ཟླ་བས་ང་འབོད་ཀྱི་འདུག
ངས་ནི་ལོ་ངོ་བདུན་ལ་རང་གི་སེམས་པར་གཅིལ་བའི་བདེན་པའི་ང་རོ་དྲན
མཐའ་མེད་ཀྱི་ཚོར་བ་ཞིག་ལ་རང་གི་ལང་ཚོ་དྲན
ང་ནི་དེ་རིང་སུ་ཚང་གི་སྒོ་ཁྱི་ཉན་ཡོད
ང་ནི་དེ་རིང་ཆུ་ནང་གི་ཟླ་བ་དེ་ཡིན
ང་ལ་ཚེར་ཕུང་གི་སྙིང་རྩིད་སྐྱེ་སའི་ཕ་ས་བོད་ཡུལ
ང་ལ་མུན་ནག་གི་འདོད་ཁམས་སྩོལ་བའི་གངས་ཀྱི་ལྷ་ཚོགས
ངས་ཉིན་མཚན་དབྱེར་མེད་དུ་འོད་མདོག་གི་སེམས་ཉིད་ཞིག་ལ་
ཁྱོད་རང་བསུས་ཡོད
འོ་དོད་ཀྱི་མཚན་མོར་རྒྱང་རིང་ལ་ངང་སྒུག་བྱས
ཆུ་ནང་དང་རྡོ་འོག་གི་པོ་ཏ་ལ་ཟླ་གཟུགས་ཤིག་ལྟར་འཆར་བར་ངང་སྒུག་བྱས
སེར་བུས་ཁུར་བའི་མེས་པོ་དག་གི་ལོ་རྒྱུས་ལ་ངས་རལ་གྲི་གཡུགས
རྡོ་བའི་མནན་པའི་མི་བུ་དག་གི་བློ་མིག་ལ་ངས་ལྕགས་རི་སྐོར
འདི་ནི་ང་ཁོ་ནའི་འུ་ཐུག་ཐབས་ཟད་ཀྱི་ལོ་ངོ་བདུན་གྱི་དེ་རིང་རེད
རྔུལ་ཆུས་ཞལ་རིས་ཤིག་ལ་དེ་རིང་ངས་ཚངས་དབྱངས་རྒྱ་མཚོ་དྲན་བྱུང་
མུན་པའི་རི་ལུང་འདི་ནས་དེ་རིང་ངས་མཁས་དབང་དགེ་ཆོས་འབོད་འདོད
ཚེར་སྤང་ལྟ་བུའི་ལོ་རྒྱུས་ཀྱི་གླེགས་བམ་བཤིག་ནས
མུན་ནག་ལྟ་བུའི་བློ་གཤིས་ཀྱི་རྨོངས་པ་བསེད་ནས
ངས་ཧ་ཅང་རྒྱང་རིང་གི་མཛེས་སྡུག་ལ་རེ་སྨོན་འཕྱར
2011.7.9．
༩༽ རྒྱུ་མ་ཆད་བྱེད་ཀྱི་རྩེ་ཁོག
——ཀུ་རེའི་ཚུལ་དུ་རང་གི་ཕ་ས་རྩེ་ཁོག་ལ།
བྱེའུ་དེ་འཕུར་ཤུགས་ལྡན་པས
ཉིན་དཀར་ནག་གཉིས་ཀར་ཁྱེད་ལ་སུན་སྣང་བཟོ་སྲིད
ཆབ་སྲིད་ཀྱི་ལག་མདུད་ཕོག་པའི་ཁྱེད་ཀྱི་མགོ་ཁྲིད་དག
གཞུང་ལམ་སྐམ་པོའི་སྟེང་གི་རླངས་འཁོར་དག་ལས་ཕྱེར་འབུད་མ་ཐུབ་ཀྱང་
བྱེའུ་དེ ཁྲག་འཐུང་བྱེའུ་དེ
ན་ནིང་གི་ཁྱེད་ཀྱི་དབྱར་ཁ་དེར་མཛེས་སྡུག་གི་བབས་འདུག
དུས་ད་ལྟ་མིག་ཟུང་བཙུམ་ནས་འདང་རྒྱབ་ན
རྒྱུ་མ་གཅོད་བྱེད་ཀྱང་འདི་རེད་ལ
རྒྱུ་མ་ཆད་བྱེད་ཀྱང་དེ་རེད་འདུག རྒྱུ་མ་ཆད་བྱེད 。。。。。。
༡༠༽ ཁྱེད་ཀྱི་པང་གི་བུད་མེད་དག
སློབ་ཆེན་པ་ཡིན་ཟེར་ཁུལ་གྱི་སྐྲ་ལོ་མཛེས་པོ་ཅན་དག
ངའི་མིག་མདུན་ནས་ཤོག་བྱ་ཞིག་བཞིན་ཡལ་འགྲོ་དུས
སྙིང་གི་འཕར་ལམ་ནས་འབུས་པའི་སྐད་ཆ་དག་བདག་མེད་དུ་ལུས་འགྲོ
ནམ་མཁའ་ལྟ་བུའི་དཀྱེལ་ཡངས་ཤིག་སེམས་རྣམ་གྱིས་ཕྱེས་རུང་
བདག་གི་བསམ་བཀོད་འདི་ཤིག་དང་སྲོ་མང་གི་ཐར་བས་སྒྲོན་སོང་
སྐབས་འདིར ཁྱེད་ཀྱི་པང་གི་བུད་མེད་དག
ཤོག་བྱ་ཞིག་གི་ཚུལ་དུ་ང་ལ་དགོས་མཁོ་མི་འདུག
༡༡༽ དཔོན་གྱི་ལག་མདུད་བཤིག་པ།
དམངས་ཀྱི་དཀར་ལམ་ལག་པས་མདུད་དམ་སེམས་པས་མདུད
གང་ལྟར་མུན་ནག་གི་ལམ་ནས་བསྔོས་པའི་ཁྱེད་ཀྱི་ཡིག་ཆ་ཁྱེར་ཤོག
རྨི་ལམ་མང་པོས་གསོད་གྱིན་པའི་དངུལ་ཁུག་ཁྱེར་ཤོག
ཆབ་སྲིད་ཀྱི་རྐང་ལག་གཉིས་ཀྱིས་ཁྱེད་ལ་བོར་སྟོར་བྱུང་འདུག་ཟེར
ཁྱེད་ལ་ཧམ་པ་ཆེ་གི་ཟེར ངས་ཁྱེད་ལ་ཞིབ་བལྟ་བྱེད་འདོད་ཆེ
ངས་ཁྱེད་སེམས་པ་མདུད་འདོད་ཆེ བདག་གི་དཔོན་ངན་འབྱོར་ལྡན་པ
༡༢༽ དམྱལ་ཁམས་ལྟ་བུའི་སྲང་ལམ།
ལྕགས་ཀྱི་འཕྲུལ་ཆས་དང་འབྲོག་གི་འགྲོ་འདུག་གིས
ང་རང་སུན་པོར་བཟོས
བསམ་བློར་བསམ་རྒྱུ་མེད་པའི་སྲང་ལམ་འདིར
ང་ལ་འཇིགས་སྣང་ཆེ ང་ལ་སྡུག་བསྔལ་ལྕི
སྔོན་གྱི་འཕུར་ཤུགས་ལྡན་པའི་བྱེའུའང་ཁྱེད་ཀྱི་སྲང་ལམ་ན་ཤི་འདུག་པས
སྔོན་པོའི་གཞས་པ་ཞིག་གི་རྨིས་པའི་སྲང་ལམ་འདི
ང་ཡི་རྒྱུ་མ་གཅོད་བྱེད་རེད ཁྱེད་ཀྱི་རང་དབང་རྙེད་ས་རེད
༡༣༽ སྡོད་གནས་བྲལ་བའི་མི།
ཚེར་མའི་སྤང་ལྗོངས་ནས
རྐང་རྗེན་དུ་ཕར་འགྲོ་ཚུར་འོང་བྱས་རྗེས
ད་ལྟའི་ང་ནི་སྐར་མའི་མཐུ་འོག་ནས་འཛུབ་མོ་
གནམ་ལ་གེར་མཁན་གྱི་བྱིས་པ་དེ་རེད
ལོ་རྒྱུས་བློ་ལ་མི་ཤོང་བས
ངས་ད་དུང་ཚེར་མའི་སྤང་ལྗོངས་རྒྱུད་དགོས
སྤྱོད་གཤིས་ལ་མཛེས་གཡོ་བྲལ་བའི་མི་ཚོས
ངའི་ཁེར་རྐྱང་གི་མཐོང་རྒྱུན་མ་སྒྲིབ
ཡང་བསྐྱར་འཛུབ་མོ་གནམ་ལ་གེར་ནས་སྐར་མ་རྩིས་ན
ད་ནི་སུ་ཡང་བྱིས་པ་ཡིན་དགོས་པའི་ངེས་པ་མེད
༡༤༽ མེ་འབར་བྱུང༌།
ང་ནི་ཉལ་ནས་བསྡད་ཡོད
གློ་བུར་དུ་སྒོའི་ཕྱི་རོལ་ནས་མེ་སྒྲ་མཆེད་ཡོང་
ཐོལ་གྱིས་ཡར་ལ་དགྱེ་ནས
ལྷམ་དང་ལྭ་བ་རིམ་བཞིན་གྱོན་རྗེས
མེ་སྒྲ་དེ་ཡུན་གྱིས་ཡུན་གྱིས་འཇིག་སོང་
ཕྱིར་མལ་ཁྲིའི་སྟེང་བསྡད་ནས
ཞིབ་འདང་ཅིག་ཡུན་གྱིས་བརྒྱབ་ན
མེ་སྒྲ་དེ་ཕོ་མོ་གཉིས་ཀྱི་འདོད་སྲེད་དང་
ཆགས་སྤྱོད་ཀྱིས་སྦར་བའི་འདོད་ནད་ཀྱི་མེད་མུག་དེ་རེད
མལ་ཁང་ཆུང་ཆུང་དག་གི་ནང་དུ
མེ་སྒྲ་དེ་ཡང་དང་བསྐྱར་དུ་མཆེད་པས
ང་ལ་ཞེན་ལོག་དང་མི་འདོད་པའི་ཡི་ག་ལྷག་མེད་ཅིག་སྐྱེས་སོང་
༡༥༽ གྲིབ་གཟུགས་ལྟར་མངོན་པ་ནི།
རེ་བ་མ་བྱེད
ད་ནས་བཟུང་ཉི་མ་འཆར་རྒྱུ་མ་རེད
ཡིན་ཡང་གྲིབ་གཟུགས་དག་ཡལ་ཐབས་མེད་པ་ནི
མི་ཚོའི་སེམས་རྒྱུན་ལ་འདོད་ཧམ་ཆེ་དྲག་པ་དང་
མི་ཚོའི་རྩ་དོན་དུག་ལོ་བཞིན་ས་ལ་འཐོར་ཡོད་པས་རེད
:འདོད་ཆུང་ཆོག་ཤེས་བྱས་ན:ནམ་ཡང་བདེ་བ་འབྱུང་ཟེར་ན
ཁྱོད་ཀྱི་གཡོ་སེམས་ནམ་ཡང་གྲིབ་གཟུགས་ལྟར་མངོན་ཡོང་ནས་ཅི་བྱེད
༡༦༽ ཡ་ང་བའི་མཚན་ཕྱེད།
སྐྱོ་གདུང་གིས་སྙིང་ཤ་གཏིབས་གྱིན་པའི་མཚན་ཕྱེད་ཅིག་ལ
ངས་བདེ་བོའི་གཉིད་དེ་གཏད་ནས་མ་ཁུག
ཨར་ཁང་ཐོག་བརྩེགས་ཤིག་གི་སྒེའུ་ཁུང་ཁར་འགྲེངས་ནས
སྲང་ལམ་ཡོད་དགུ་ལ་རྒྱང་བལྟ་བྱས་ན
གྲོང་ཁྱེར་ནི་དངོས་གནས་དམྱལ་བ་ཆེན་པོ་ཞིག་རེད
ཚེ་སྲོག་ལ་སྦར་བྱ་བྲལ་བའི་མི་མོ་དང་མི་ཕོ་དག་གིས
དངུལ་སྒོར་ཕྲན་ཙམ་རེ་ཕུང་ཤའི་བློ་ཁུག་ཏུ་བཅུག་ནས
སྣ་ཚོགས་དགུ་ཚོགས་ཀྱི་འདོད་སྲེད་ཁང་དག་སྙེག་གིན་འདུག
དེ་དུས་སྒེའུ་ཁུང་གི་ཁར་ཧད་སེམས་ཀྱིས་འགྲེངས་པའི་ངས་ནི
ལྷ་ས་ནི་འདོད་སྲེད་ཀྱི་སྤར་མོ་གནམ་ལ་གེར་ས་ཞིག་རེད་འདོད
༡༧༽ གདུང་བས་ངུས་པ།
གཏམ་རྒྱུད་ཀྱི་སེར་ག་སྲུང་བའི་སྤྲང་བོ་ང
དོ་ནུབ་ཐལ་མདོག་གི་མལ་ཁང་ཞིག་ན་ཁེར་རྐྱང་དུ་བསྡད་ཡོད
ཁེར་རྐྱང་དུ་བསྡད་ནས་ཁེར་རྐྱང་དུ་ངུས་ན
གཞོན་ནུ་ཟེར་བ་ནི་ཅི་འདྲའི་རླབས་ཤིག་རེད་འདོད
གདུང་བས་ངུས་པ་ནི་ཐབས་ཟད་ཀྱི་ངང་ཚུལ་ཞིག་ག་ལ་ཡིན
གདུང་བས་ངུས་པ་ནི་ཁྲག་རྗེས་ཤིག་ཕབས་འདོད་ཀྱི་ཕྱིར་དུ་རེད
གདུང་བས་ངུས་པ་ནི་བླ་སྲོག་མཐོང་འདོད་ཀྱི་ཕྱིར་དུ་རེད
གདུང་བས་ངུས་པ་ནི་མི་འདོད་པ་དག་འདོད་འདོད་ཅིག་ཏུ་གཏོང་བསམ་པས་རེད
དེ་བས་གཞོན་ནུ་ང་མལ་ཁང་གི་ནང་དུ་ཁེར་རྐྱང་དུ་བསྡད་ནས
ཁེར་རྐྱང་དུ་གདུང་བས་ངུས
2007。9。11。ཉིན་ལྷ་སའི་རྟགས་ཞབས་མགྲོན་ཁང་དུ།
ཁོང་ཆབ་སྲིད་ཀྱི་ཚོར་བ་ཅན་ཞིག་ཡིན་པའི་ཚོར་སྣང་བྱུང་ལ། གྲྭ་ལོག་ཆོས་མེད་ཅིག་ཡིན་པའི་ཚོད་དཔོག་ཡང་བྱ་དགོས་བྱུང་།
འོས་སྦྱོར་བ་རང་ཉིད་གཅེར་བུར་འབུད་མཁན་གྱི་དུར་ཐང་ཟེར་བ་འདི་པ་མིན་པ་འམ་འདིའི་ཉེ་དུ་ཡང་མིན་པ་ཡིན་ན། སྤྱི་ཚོགས་ཀྱི་ས་ཟུར་ལ་དོ་སྣང་གིས་འོས་སྦྱོར་གནང་བར་ང་སྒེར་གྱི་ངོས་ནས་བཀའ་དྲིན་ཆེ་ཞུ། བདག་གི་དུར་ཐང་ཞེས་པའི་མིང་ཚིག་ཐང་མ་དང་བོར་མཐོང་བ་ཡིན།
འོས་སྦྱོར་མཁན་དཔལ་དོན་ལ་ཐུགས་རྗེ་ཆེ་ཞུ། དུར་ཐང་གི་སྤྱོད་གཤིས་བཟང་ངན་གང་ལྟར་ཡང་སྙན་ངག་ནི་ཚོར་བ་རལ་བའི་སྙན་ངག་རང་རེད། ཐེངས་འགར་བཀླགས་དགོས་བྱུང་སོང་།
དྲན་དཀར་དཔལ་ཡོན་ལགས་སྐུ་ཉིད་ནས་དུར་ཐང་ཞེས་པའི་མིང་ཐང་མ་དང་བོར་མཐོང་བ་ཡིན་ན་དུར་ཐང་གྲྭ་ལོག་ཅིག་ཡིན་པ་དང་དེའི་ནང་ནས་གྲྭ་ལོག་ཆོས་མེད་ཅིག་ཡིན་པ་ཅི་ལྟར་ཤེས་པ་ཡིན། ཧེ་ཧེ་ཧེ་་སྐུ་རྩེད་ཞུས་པ་ཡིན།