འཆམ་ར་དྲི་མེད་རྒྱལ་མཚན་ནས།
མི་རིགས་གོད་ཆག་ཕོག་ནས་ལོ་ནག་བྱུང་།།
ཆོས་རིག་ཆུ་ཁར་བྱིངས་ནས་ལོ་ནག་བྱུང་།།
ནད་ངན་མྱོས་རྫས་དར་ནས་ལོ་ནག་བྱུང་།།
ལོ་ནག་བོད་ལ་ཚེས་དུས་ལོ་གསར་མེད།།
རང་ས་དགྲ་ལག་ཤོར་ནས་ལོ་ལྔ་བཅུ།།
༧གོང་མ་མི་ཡུལ་འཁྱམས་ནས་ལོ་ལྔ་བཅུ།།
མེས་པོ་བར་དོར་འཆར་ནས་ལོ་ལྔ་བཅུ།།
ལྔ་བཅུའི་སྡུག་གི་མཐའ་མ་ལོ་གསར་མེད།།
དྲག་གནོན་རྒྱུན་ཆད་མ་སོང་ལོ་གསར་མེད།།
ཆེས་མཐོའི་གྲོས་ར་འཁྲུགས་ནས་ལོ་གསར་མེད།།
གྲོས་མོལ་ལམ་ལྷོང་མི་འདུག་ལོ་གསར་མེད།།
རྐྱེན་ཆག་བོད་ལ་ཡོང་དུས་ལོ་གསར་མེད།།
ཕ་ཡུལ་ཕ་མ་མ་མཐོང་ལོ་བཅུ་གཉིས།།
སྤུན་ཟླ་ནང་མི་མ་མཇལ་ལོ་བཅུ་གཉིས།།
མི་ཡུལ་སྐྱོ་གདུང་མྱངས་ནས་ལོ་བཅུ་གཉིས།།
བཅུ་གཉིས་སྡུག་གི་མཐའ་མ་ལོ་གསར་མེད།།
གཤིན་པོའི་ཞལ་ཆེམས་མ་འགྲུབ་ལོ་ཟླ་སོང་།།
བོད་མིའི་སྙིང་ཁམས་སྐྲངས་ནས་ལོ་ཟླ་སོང་།།
གྱེས་པའི་སེམས་པ་རྒྱལ་ནས་ལོ་ཟླ་སོང་།།
ལོ་ཟླ་རི་ལ་སྐྱེལ་དུས་ལོ་གསར་མེད།།
སྤུན་ཟླ་བཙོན་ལ་བཅུག་ནས་ལོ་ངོ་གཉིས།།
བོད་རིགས་ཁྲག་ལ་བསྲེས་ནས་ལོ་ངོ་གཉིས།།
ཞི་བ་དྲག་པོས་རྡུང་ནས་ལོ་ངོ་གཉིས།།
ལོ་གཉིས་སྡུག་གི་མཐའ་མ་ལོ་གསར་མེད།།
སྐར་ཚོགས་སྤྲིན་གྱིས་བཏུམ་དུས་ལོ་གསར་མེད།།
ས་གཞི་སྨག་གིས་གཡོག་དུས་ལོ་གསར་མེད།།
ཁ་འཐོར་བོད་མི་སྐྱོ་དུས་ལོ་གསར་མེད།།
ད་ལོ་སྡུག་ལོ་ཡིན་པས་ལོ་གསར་མེད།།
བླ་མ་ཞིང་ལ་ཕེབས་ནས་ལོ་ངོ་གཅིག།
སྡུག་གི་མུན་པ་འཐིབས་ནས་ལོ་ངོ་གཅིག།
མིག་ཆུ་ཁྲག་ལ་འདྲེས་ནས་ལོ་ངོ་གཅིག།
ལོ་གཅིག་སྡུག་གི་མཐའ་མ་ལོ་གསར་མེད།།
ཕ་ཡུལ་དགྲ་ལ་ཤོར་བ་བོད་ཀྱི་མི།།
ཕ་མ་མིག་གིས་མ་མཐོང་བཙན་བྱོལ་བ།།
ཕ་རྒོད་བླ་མས་སྐྱུར་བའི་འཆམ་ར་བ།།
ཕམ་ཁ་སེམས་ལ་འཕྱུར་ཏེ་ལོ་གསར་མེད།།
༢༠༡༠་༢་༡༡་ཉིན་འཆམ་ར་དྲི་མེད་རྒྱལ་མཚན་ནས་ལྡི་ལི་གསར་བ་བྲིས།།
ད་ལོ་ལོ་གསར་མ་གཏོང་ཅིག
ད་ལོ་ལོ་གསར་མ་གཏོང་ཅིག །
རྟེན་འབྲེལ་སྒྲིག་ན་ཁང་བུག་ནང་། །
གཟབ་རྒྱས་ཟ་ན་ཁྱིམ་གྱི་མདོར། །
ཆང་འཐུང་བརྒྱབས་ནས་མ་འགྲོ་ཅིག །
ད་ལོ་ལོ་གསར་མ་གཏོང་ཅིག །
ཕྱི་རོལ་ཐོན་དུས་གོས་རྙིང་གཙང་། །
རང་རིགས་ཐུག་དུས་ངོ་འཛུམ་ནས། །
ལོ་གསར་བཀྲ་ཤིས་བདེ་ལེགས་བརྗོད། །
ད་ལོ་ལོ་གསར་མ་གཏོང་ཅིག །
མང་པོ་འཛོམས་དུས་གླུ་གཞས་ཚབ། །
ཡར་རྒྱས་འགྲོ་དང་རྗེས་ལུས་སོགས། །
སྤྱི་དོན་ལས་དོན་ལས་འགུལ་གླེང་། །
ད་ལོ་ལོ་གསར་མ་གཏོང་ཅིག
དགོང་དྲོ་ཤོད་རུབ་མཚན་མོ་ལ། །
མཚན་ཚོགས་ཚབ་ལ་ཁ་ཏོན་གྱིས། །
རྩེད་མོ་རྩེད་དང་སྒྲུང་གཏམ་བརྡུར། །
ད་ལོ་ལོ་གསར་མ་གཏོང་ཅིག །
སྔ་དྲོ་བླ་མའི་མཇལ་ཁ་དང། །
མཆོད་མཇལ་སྐོར་ར་གཉེན་ཉེ་སོགས། །
མཇལ་འཕྲད་ཕྱིན་ནས་གང་མགྱོགས་ཉོལ། །
ད་ལོ་ལོ་གསར་མ་གཏོང་ཅིག །
ཚེས་གསུམ་བསང་གསོལ་འཛོམས་པའི་སར། །
དར་ལྩོག་བཙུགས་ལ་གསེར་སྐྱེམས་ཕུལ། །
འགོར་གཞས་བཞག་ནས་ཤར་རེ་ལོག །
ད་ལོ་ལོ་གསར་མ་གཏོང་ཅིག །
བག་མེད་ཉུང་བའི་ཚེ་བསོད་ལྷག །
ཚེ་བསོད་རྣམ་དཀར་རྒྱས་བརྩོན་ན། །
ལོ་གསར་ག་དུས་གཏང་གཏང་རེད། །
མ་གཏོང་དགག་བྱ་འཚོལ་ནས་རོལ། །
བསོད་
བསོད་ནི་བྲིས་ཐལ་ཤོར་འདུག དགོངས་དག ཁ་ཤས་ལ་ངས་ལམ་དབུ་མའི་ལོ་གསར་བཤད་པ་ལ་བློ་ལ་ཞི་ཐད་པ་སྲིད་པས་དགོངས་ཚུལ་སྐྱོན་སེལ་ལ་ཕེབས་སུ་ཡོད།
ཚིག་རྐང་མཐའ་མར། ་་་་ཞི་ཐད་་་་ལ་མི་ཐད་དང་། ་་་་དགའ་སུ་་་ལ་དགའ་བསུར་བཅོས།
མདང་གི་བོད་སྐད་སྡེ་ཚན་ནང་།
ལོ་གསར་མ་གཏོང་འབྲི་ཤོར་ལ། །
རང་དབང་རླུང་འཕྲིན་ཉན་ཐལ་ཤོར། །
མཁས་དབང་རང་བཙན་དགོས་པའི་སྐོར། །
རྟག་ཏུ་ཞལ་ནས་ཁ་ཏོན་འདོན། །
མདང་ནུབ་ད་ལོའི་ལོ་གསར་དེ། །
གཏོང་དགོས་བོད་རྣམས་སྣང་སྐྱིད་ལ་། །
དགའ་དང་གཞན་དག་དགའ་ཕྱིར་གསུངས། །
ང་རང་བློ་ལ་མ་བབས་ཙང་། །
ཚིགས་བཅད་འདི་རྣམས་བྲིས་དགོས་བྱུང་། །
ང་ཚོའི་མེས་པོའི་གཏམ་དཔེ་ལ། །
ར་བསད་ལུག་འདར་ཁ་དཔེ་དྲན། །
རང་བཙན་ལེན་འདོད་ར་ངར་ནས། །
ལས་འགུལ་བརྩམས་ནས་ལུག་རང་གིས། །
བསད་པ་མཐོང་ཡང་མི་འདར་བ། །
ད་ལོའི་ལོ་གསར་གཏོང་དགོས་ཞེས། །
རང་རིགས་མཁས་པའི་ཚིག་ལ་མཚར། །
འདི་རིང་ལོ་འདིའི་ཉིན་མཐའ་མ་བོད་ཚེས་ ༣༠ གནམ་གང་ཡིན་པས་ཟླ་འོད་མེད་ལ་མཚན་མོ་མུན་ནག་ཡིན་པས་མཆོད་མེ་ངེས་པར་སྤར་སྲོལ་ཡོད། ལོ་ཆུང་ཚོའི་ཆེད་དུ་ཡིན།
དེ་རིང་ལོ་གསར་མེད་ཀྱང།
ཉོ་ཆ་བརྒྱབ་ནས་སྤྲོ་སྐྱིད་གཏོང་ཟེར་བ་འདྲ་འདུག་ག
ཁྲོམ་ལམ་ཁག་ལ་བོད་མིས་ལོ་གསར་ཆེད་ཉོ་ཆ་བརྒྱབ་སྟེ་སྲང་ལམ་བཀང་གིན་འདུག
ཡིན་ནའང་གཞས་ཞབས་བྲོའི་རྣམ་པ་གཏན་ནས་མི་འདུག
བོད་རིགས་མ་ཤིའི་ལོ་ནི་གཅིག་ཀྱང་མེད། །གཞན་ཡུལ་གྱལ་བ་དེ་རིང་བྱུང་བ་མིན། །བཙོན་པའི་གྲངས་ཀྱང་དྲུག་ཅུའི་ལོ་ལས་ཉུང་། །ཐུགས་ཁྲལ་མ་བྱེད་སྙིང་སྟོབས་ལྷག་པར་སྐྱེད། །གཅིག་ཆོག་གཙུག་རྒྱན་ཁམས་བཟང་ཞབས་པད་བརྟན། །ཆོས་དང་རིགས་གཞུང་ཉམས་པ་སླར་སོར་ཆུད། །ཆེ་ཆུང་ཀུན་ཀྱིས་བོད་གླེང་དེ་དོན་གཉེར། །བློ་ཕམ་མི་དགོས་ཐུགས་སྟོབས་བསྐྱེད་རེ་རན། །སྡུག་བསྔལ་གདོང་ལེན་ནུས་པའི་སྙིང་སྟོབས་དང་། །ཕྱི་ནང་རྐྱེན་ཀྱིས་མི་འཇིག་དམ་བཅའ་དང་། །བདུན་ལམ་ཕྲ་ཞིབ་འབྱེད་པའི་ཤེས་རབ་དང་། །ལྷག་བསམ་མངོན་དུ་འགྱུར་བའི་ཐབས་ལ་འབོད། །སྡུག་པོ་སྔོན་ཆད་མྱོང་པ་དེས་ཆོག་གིས། །དགྲ་དགའ་གཉེན་སྡུག་བྱ་བ་སྟོང་ཡང་རུང་། །ལྷག་བསམ་མཐུན་སྒྲིལ་སྤྱང་གྲུང་འཛོམས་པ་ཡི། །བློ་གྲོས་སྙིང་སྟོབས་ཤི་ཡང་འདོར་མི་བྱ། ། ལོ་གསཪ་དགའ་སྡུག་ཅི་འདྲ་གླེང་ནའང་། །ཀུན་གྱིས་སྙིང་ལ་བསྣག་པ་གཅིག་ཁོ་ན། །ལེགས་དང་ཉེས་པའི་ལ་ཤན་མ་ཡིན་པའི། །ཐུགས་རྗེ་ཆེ་ཞེས་སོར་བཅུ་སྙིང་གར་སྦྱོར། །