གླིང་གཅེར་བུ།
ལེའུ་གཉིས་པ།
དོ་ནུབ་དབྱངས་ཅན་ལྷ་མོ་འབོད་པའི་བུ་མོ་ཞིག་ལ་ཟླ་མཚན་བཞུར་བཞིན་ཡོད། བོད་ཀྱི་སྙན་ངག་པ་ཚོས་ཤེས་རབ་ཀྱི་ལྷ་མོ་ཟེར་བཞིན་སྙན་ངག་གིས་ཁོ་མོའི་ཟླ་མཚན་འགོག་པར་རྩོམ་བཞིན་ཡོད།
དོ་ནུབ་མེ་རི་འབར་བའི་གླིང་ག་ཞིག་ན་བྲང་ཁ་མང་པོའི་ཡར་ལངས་བརྒྱག་བཞིན་ཡོད། ཁོ་ཚོའི་འབོད་ཚིག་ནི་སང་ལོ་སྔར་བཞིན་རྨི་ལམ་ལ་རོལ་བཅུག་རྒྱུ་དེ་ཡིན།
དོ་ནུབ་མི་ཚོགས་འདུས་པའི་ཁྲོམ་སྲང་ཞིག་ན་མདོག་འགྱུར་བའི་བུད་མེད་ཅིག་གཅེར་བུར་བུད་དེ། སྲིད་པའི་ཁམས་ཆེན་མོར་འདོད་ཆགས་ཀྱི་བསྒྲག་གཏམ་སྤེལ་བཞིན་ཡོད།
དོ་ནུབ་ཁ་བ་མེད་པའི་གངས་རི་ཞིག་ས་ཆེན་གྱི་ཡང་སྟེང་ནས་གཏན་དུ་ཡལ་བཞིན་ཡོད། ཁོ་བོའི་ཁ་ཆེམས་ནི་ད་ནས་བཟུང་ང་ཚོ་ཚང་མ་མི་ཞིག་བཅའ་རྒྱུ་དེ་ཡིན།
དོ་ནུབ་ཀློག་པ་པོ་མེད་པའི་བརྩམས་ཆོས་ཤིག་གིས་གླེགས་བམ་མཐུག་པོ་ཞིག་གི་ལྟེབ་བརྩེགས་བར་ན་འཕག་འཚག་བརྒྱག་གིན་ཡོད། ཁོས་བཤད་རྒྱུར་འཇིག་རྟེན་འདིར་ཀླད་པ་དྭངས་མོ་ཅན་གྱི་མི་གཅིག་ཀྱང་མི་འདུག་ཟེར།
དོ་ནུབ་ལྷ་ཆེན་འཁྲོས་པའི་སྒྱོགས་རྡོ་འཕངས་བས་གསེར་གྱི་སྐྱག་ཁང་ཞིག་ཤུལ་མེད་དུ་བཟོས་སོང་བས། མི་སེར་ཚོས་ཐལ་མོ་སྙིང་གར་སྦྱར་ནས་དད་པའི་མིག་ཆུ་བཞུར་བཞིན་ཡོད།
དོ་ནུབ་ཐ་སྙད་དང་སྐད་ཆས་གྲུབ་པའི་ནད་ཁང་ཞིག་ན་ཡན་ལག་དང་སྙིང་ལག་བྲལ་བའི་མི་ཚོགས་ཤིག་ནུར་ཡོང་གིན་ཡོད།ཁོ་ཚོས་ངག་ན་གསལ་ལ་མི་གསལ་ངང་རང་དབང་ཞེས་པའི་ཚིག་འབྲི་གཉིས་བཟློ་བཞིན་ཡོད།
དོ་ནུབ་བོད་སྐད་མི་ཤོད་པའི་མི་ཞིག་གིས་གསལ་བྱེད་སུམ་ཅུ་ཞེས་སྐད་ཤུགས་ཆེན་པོས་མི་ཚོར་འགྲེལ་བཞིན་ཡོད། ཁོ་བོ་གཏན་ནས་བོད་པ་ཞིག་ཡིན་མི་སྲིད།
དོན་ངོ་མར་བཤད་ན་དོ་ནུབ་ནི་དོ་ནུབ་གཅིག་པོར་དབང་བ་ལས་གཞན་སུ་ལ་མི་དབང་།
༢༠༡༤། ༡༡། ༢༩། ཉིན།
བཀླགས་ཟིན་ལགས།