བདེ་པོ་འཚོ།
དེ་རིང་ནི།
གསེར་མདོག་གི་ཉི་མ་གློ་བུར་དུ་ནུབ་ལ
མུན་སེལ་གྱི་ཟླ་བ་སྤྲིན་ནག་གིས་བསྒྲིབས་ཤིང
ཕ་ལམ་གྱི་གཟི་འོད་སྐད་ཅིག་ཏུ་ཡལ་བའི་ཉིན་དེ་ཡིན།
དེ་རིང་ནི།
དགོས་འདོད་ཀྱི་ནོར་བུ་མི་གཙང་བས་སྦགས་ལ
དྭངས་གཙང་གི་འོ་མ་ཁྲག་རྣག་གིས་བརྫུས་ཤིང་
ཁུ་བྱུག་གི་གསུང་སྐད་ཙག་རླུང་གིས་བཅོམ་པའི་ཉིན་མོ་དེ་ཡིན།
དེ་རིང་ནི།
ཡར་ལུང་གཙང་པོའི་བཞུར་རྒྱུན་ཆད་ལ
གངས་དཀར་ཏི་སིའི་མགོ་བོ་དུད་ཅིང
ཡར་འབྲོག་གཡུ་མཚོས་ངུ་ངག་འདོན་པའི་ཉིན་མོ་ཡིན།
དེ་རིང་ནི།
འགྱོད་གདུང་གི་སྨྲེ་ངག་དབང་མེད་ཤོར་ནས
ངུ་འབོད་ཀྱི་སྐད་སྒྲས་མཁའ་དབྱིངས་བཀད་དེ
རིན་བྲལ་གྱི་ནོར་བུ་ལག་ནས་ཤོར་བའི་ཉིན་མོ་ཡིན་ཨང་་།
ཡང་གཅིག་བསམ་ན།
དེ་རིང་ནི།
གངས་རིའི་ལྗོངས་སུ་རང་དབང་གི་མེ་སོན་སྦར་ཞིང
ཁ་བ་ཅན་ལ་ཤེས་རིག་གི་འོད་སྣང་འདྲེན་པའི་མི་ཕོ་ཞིག་གི་དབུགས་རྒྱུན་ཐ་མ
རྟོགས་སད་རྒྱང་འབོད་ཀྱི་སླད་དུ་ཡལ་ཞིང
བསྐྱར་གསོན་སྙིང་སྟོབས་ཀྱི་ཆེད་དུ་བཞུད་པའི་ཉི་མ་ཡིན།
དེ་བས་ན།
ཉིན་མོ་འདི་ནི་་་་
མཇུག་བསྡུས་པའི་ཉིན་མོ་ཞིག་མ་ཡིན་པར
མགོ་བཙུགས་པའི་ཉིན་མོ་རླབས་ཆེན་སྟེ
ཉིན་མོ་འདིར་སྐྱེས་ཆེན་ཞིག་གི་མཛད་པ་རླབས་ཆེན་དང
དཔའ་པོ་ཞིག་གི་སྣང་བརྙན་གསོན་པོ
ད་ལྟའང་ང་ཚོས་དྲན་བཞིན་ཡོད་པ་མ་ཡིན་ནམ།
ངོ་མ་ཉིན་མོ་འདིར་་་་་
དྲག་ཏུ་མཆོང་ལྡིང་བྱེད་བཞིན་པོ་སྙིང་གསོན་པོ་ཞིག་བཞུད་ཟིན་ཀྱང
ལང་ཚོའི་ཟིལ་ཤུགས་ཀྱི་རྦབ་ཆུ་དྲག་པོ་དེ་
གངས་ལྗོངས་ཀྱི་ལོ་རྒྱུས་ཁྲོད་ད་ལྟའང་ཤུགས་ཀྱིས་བཞུར་གྱིན་ཡོད་པས
ཉིན་མོ་འདིར་མྱ་ངན་གྱི་མགོ་བོ་དུད་འོས་སམ་་་་་???
ཉིན་མོ་འདིར་སྤོབས་པའི་མགོ་བ་དགྱེ་དགོས་སམ་་???
༢༠༡༤/༡༡/༣༠